ꓣꓱ-ꓧꓳ-ꓐꓳ ꓐꓰ ꓙꓱ-ꓣꓳ-ꓐꓳ ꓟꓸ ꓟꓲꓽ (1)

ꓣꓱ-ꓧꓳ-ꓐꓳ ꓐꓰ ꓙꓱ-ꓣꓳ-ꓐꓳ ꓟꓸ ꓟꓲꓽ

ꓣꓱ-ꓧꓳ-ꓐꓳ ꓐꓰ ꓙꓱ-ꓣꓳ-ꓐꓳ ꓐꓴ ꓠꓬ ꓬꓲ-ꓢꓷ-ꓡꓰ ꓗꓴꓷꓼ ꓠꓬꓲꓽ ꓟ ꓔꓯ ꓙꓵꓽ ꓔꓬ ꓟ ꓪ ꓔꓲ ꓐꓴ ꓥ ꓡꓳ= ꓣꓱ-ꓧꓳ-ꓐꓳ ꓠꓬ ꓢꓳ-ꓡꓳ-ꓟꓳ ꓬꓲ ꓤ ꓕꓲ ꓣꓳ ꓥ ꓢꓲ꓾ ꓗꓴꓷꓼ ꓖꓴ ꓟꓶꓸ ꓕꓲ ꓛꓱꓽ ꓗꓪ ꓙꓵꓽ ꓔꓬ ꓟ ꓬꓴ-ꓔ ꓪ ꓔꓲ ꓥ ꓡꓳ (1 ꓪ ꓔꓲ 11ꓽ43)= ꓙꓱ-ꓣꓳ-ꓐꓳ ꓠꓬ ꓧꓶꓸ ꓕꓯ ꓢꓳ-ꓡꓳ-ꓟꓳ ꓔꓯ ꓣꓱꓽ ꓙ ꓗꓷ ꓟ ꓬꓲ-ꓒ-ꓡꓲ ꓞꓳ ꓫꓵꓽ ꓕꓲ ꓣꓳ ꓥ ꓢꓲ꓾ ꓬꓲ ꓠꓬ ꓗꓴꓷꓼ ꓖꓴ ꓪꓴꓸ ꓕꓲ ꓛꓱꓽ ꓗꓪ ꓙꓵꓽ ꓔꓬ ꓟ ꓬꓲ-ꓢꓷ-ꓡꓰ ꓪ ꓔꓲ ꓥ ꓡꓳ (1 ꓪ ꓔꓲ 11ꓽ26)=

ꓢꓳ-ꓡꓳ-ꓟꓳ ꓪ ꓔꓲ ꓢꓯꓸ ꓔꓬ ꓕꓯ꓾ ꓙꓱ-ꓣꓳ-ꓐꓳ ꓡꓰ ꓪ ꓔꓲ ꓐꓱ ꓶ ꓣꓱꓽ ꓙ ꓔꓬ ꓕꓯ ꓱ-ꓦꓲ-ꓬ ꓟꓬꓱ ꓔ ꓟ ꓟꓷꓽ ꓠꓷꓹ ꓝꓸ ꓒ ꓕꓲ ꓣꓳ ꓠꓬ ꓙꓱ-ꓣꓳ-ꓐꓳ ꓔꓯ ꓪꓴ-ꓢ ꓠꓬ ꓢꓳ-ꓡꓳ-ꓟꓳ ꓬꓲ ꓤ ꓣꓱ-ꓧꓳ-ꓐꓳ ꓡꓯꓽ ꓒꓯꓹ ꓗꓪ ꓐꓰ ꓬꓲ-ꓢꓷ-ꓡꓰ ꓞꓳ ꓫꓵꓽ 12 ꓪꓳꓼ ꓘꓴꓽ ꓗꓪ ꓐꓰ 10 ꓪꓳꓼ ꓔꓯ ꓣꓴ ꓗꓷ ꓢꓲ ꓙꓱ-ꓣꓳ-ꓐꓳ ꓔꓯ ꓖꓶꓽˍ ꓥꓳ (1 ꓪ ꓔꓲ 11ꓽ29-31)꓾ ꓐꓰ ꓐꓯ ꓡꓳ= ꓐꓯ ꓘꓶꓽ ꓕꓱ ꓟ ꓠꓬ ꓢꓳ-ꓡꓳ-ꓟꓳ ꓪ ꓔꓲ ꓐꓰ ꓬꓲ ꓕꓲ ꓦꓲ ꓢꓴ ꓠꓬ ꓪꓴ-ꓢ ꓔꓯ ꓡꓳ ꓒꓰꓹ ꓗꓷ ꓢꓲ ꓢꓲꓺ ꓐꓬꓱꓽ ꓔꓯ ꓣꓱꓽ ꓙꓹ ꓟ ꓑꓶꓸ ꓓꓴ ꓪꓴ-ꓢ ꓡꓰ ꓐꓯ ꓖꓶ ꓡˍ ꓟ ꓐꓯ ꓘꓶꓽ ꓥ ꓡꓳ (1 ꓪ ꓔꓲ 11ꓽ33)=

ꓝꓸ ꓢꓲ ꓙꓱ-ꓣꓳ-ꓐꓳ ꓠꓬ ꓪ ꓔꓲ ꓒꓬꓱꓼ ꓡˍ ꓥꓳ ꓐꓯˍ ꓟ ꓐꓯ ꓘꓶꓽ ꓐꓰ ꓕꓲ ꓪꓽ ꓪꓴ-ꓢ ꓠꓬ ꓬꓲ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ= “ ꓥꓪ ꓚꓳ ꓑꓸ ꓓ-ꓪꓵ ꓬꓰ ꓗꓷ ꓟˍ ꓡꓰ ꓐꓰ꓾ ꓠꓴ ꓠꓬ ꓔꓱꓹˍ ꓟ ꓠꓲꓹ ꓟ ꓡꓰ ꓥꓪ ꓕꓵꓼ ꓪˍ ꓐꓰ ꓙꓵꓽ ꓚꓱꓹ ꓔꓯ ꓬꓲ ꓜꓶ ꓒꓵꓽ ꓛꓳˍ ꓠꓬ꓾ ꓥꓪ ꓠꓽ ꓠꓴˍ ꓐꓰ ꓮ ꓕꓯˍ ꓟꓲ ꓔꓬ ꓢꓲ꓾ ꓥꓪ ꓚꓳ ꓑꓸ ꓓ-ꓪꓵ ꓔꓯ ꓙ ꓟꓳ ꓗꓷ ꓟˍ ꓡꓰ ꓐꓰ꓾ ꓠꓴˍ ꓐꓰ ꓠꓴ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓙꓵꓽ ꓢꓴ ꓒꓬꓱꓼ ꓡ ꓝꓲˍ ꓥꓳ=” ꓐꓰ ꓐꓯ ꓡꓳ= (1 ꓪ ꓔꓲ 11ꓽ38)

ꓪꓴ-ꓢ ꓠꓬ ꓙꓱ-ꓣꓳ-ꓐꓳ ꓔꓯ ꓬꓲ-ꓢꓷ-ꓡꓰ ꓗꓴꓷꓼ ꓔꓯ ꓙꓵꓽ ꓠꓹ ꓟ ꓐꓱ ꓶ ꓢꓲꓺ ꓗꓷ ꓟ ꓔꓯ ꓪ ꓔꓲ ꓢꓳ-ꓡꓳ-ꓟꓳ ꓑ ꓙꓽ ꓡꓰ ꓕꓯ꓾ ꓪ ꓔꓲ ꓠꓬ ꓬꓲ-ꓙꓲ ꓟꓵꓽ ꓗꓪ ꓛꓰꓹ ꓙꓰ ꓟ ꓙꓱ-ꓣꓳ-ꓐꓳ ꓔꓯ ꓢꓰꓼ ꓠꓹ ꓟ ꓢꓯꓼ ꓕꓵꓼ ꓗꓷꓳ=(1 ꓪ ꓔꓲ 11ꓽ40)

ꓗꓸ ꓠꓯꓸ ꓕꓯ ꓠꓬ ꓢꓳ-ꓡꓳ-ꓟꓳ ꓫꓵꓻ ꓗꓷ ꓠꓬꓲ ꓬꓲ ꓤ ꓥ ꓟ ꓣꓱ-ꓧꓳ-ꓐꓳ ꓠꓬ ꓪ ꓔꓲ ꓒꓬꓱꓼ ꓡ ꓗꓷ ꓢꓲ ꓬꓲ-ꓙꓲ ꓟꓵꓽ ꓗꓪ ꓛꓰꓹ ꓙꓰ ꓟ ꓙꓱ-ꓣꓳ-ꓐꓳ ꓥˍ ꓟꓲ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓡ ꓗꓷꓳ (1 ꓪ ꓔꓲ 12ꓽ1-2)= ꓖꓳ ꓡꓱ ꓥˍ ꓟꓲ ꓣꓱ-ꓧꓳ-ꓐꓳ ꓠꓽ ꓮ ꓘꓶꓸ ꓥꓶˍ ꓟ ꓪ ꓔꓲ ꓕꓲ ꓣꓳ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓐꓹ ꓐ ꓢꓳ-ꓡꓳ-ꓟꓳ ꓬꓰˍ ꓟ ꓡꓰ ꓐꓰ ꓑ ꓫꓬ ꓐꓴ ꓔꓯ ꓚꓲꓸ ꓒꓴ ꓮ ꓟꓬꓹ ꓟꓽ ꓖꓳ ꓠꓹ ꓟ ꓪ ꓔꓲ ꓣꓱ-ꓧꓳ-ꓐꓳ ꓔꓯ ꓙꓱ-ꓣꓳ-ꓐꓳ ꓡꓰ ꓙꓳꓺ ꓗꓽ ꓖꓶˍ ꓡꓳ (1 ꓪ ꓔꓲ 12ꓽ3-4)=

ꓖꓳ ꓕꓯ ꓣꓱ-ꓧꓳ-ꓐꓳ ꓠꓬ ꓕꓱ ꓡꓱ ꓒꓳꓹ ꓖꓶˍ ꓡꓳ= “ꓥꓪ ꓐꓹ ꓐ ꓡꓰ ꓡꓲꓽˍ ꓟ ꓶꓻ ꓠꓴ ꓪ ꓔꓯ ꓟꓯꓻ ꓝꓲˍ ꓠꓬ꓾ ꓥꓪ ꓠꓽ ꓥꓪ ꓐꓹ ꓐ ꓶꓻ ꓕꓯꓽ ꓢꓲ ꓟꓬꓽ ꓠꓬꓲ ꓡꓲꓽ ꓡꓰ ꓝꓲˍ ꓥꓳ= ꓥꓪ ꓐꓹ ꓐ ꓠꓴ ꓪ ꓔꓯ ꓒꓲꓹ ꓓ ꓡꓰ ꓒꓲꓹ ꓗꓷ ꓢꓲ꓾ ꓥꓪ ꓠꓽ ꓠꓴ ꓪ ꓔꓯ ꓟꓲ ꓙꓱꓼ ꓡꓰ ꓔꓶꓸ ꓝꓲˍ ꓥꓳ꓾” ꓐꓰ ꓒꓳꓹ ꓖꓶˍ ꓡꓳ (1 ꓪ ꓔꓲ 12ꓽ14)

ꓑ ꓫꓬ ꓐꓴ ꓠꓬ ꓒꓳꓹ ꓘꓶꓽ ꓕꓱ ꓟ ꓔꓯ ꓑ ꓙꓽ ꓡꓰ ꓕꓯ ꓪ ꓔꓲ ꓫꓵꓼ ꓔꓯ ꓒꓳꓹ ꓔꓳꓹ ꓗꓷ ꓢꓲ꓾ ꓙꓱ-ꓣꓳ-ꓐꓳ ꓔꓯ ꓬꓲ-ꓢꓷ-ꓡꓰ ꓪ ꓔꓲ ꓣꓱꓽ ꓝꓲˍ ꓡꓳ (1 ꓪ ꓔꓲ 12ꓽ16-20)= ꓬꓴ-ꓔ ꓞꓳ ꓫꓵꓽ ꓐꓰ ꓐꓰ-ꓠꓬ-ꓟꓲ ꓞꓳ ꓫꓵꓽ ꓐꓴ ꓡꓰꓽ ꓢꓳ-ꓡꓳ-ꓟꓳ ꓬꓲ ꓤ ꓣꓱ-ꓧꓳ-ꓐꓳ ꓙꓵꓽˍ ꓟ ꓠꓯꓸ ꓘꓪ ꓔꓬ ꓡꓳ= ꓠꓱꓸ ꓐꓯ ꓞꓳ ꓫꓵꓽ 10 ꓪꓳꓼ ꓐꓴ ꓠꓬ ꓙꓱ-ꓣꓳ-ꓐꓳ ꓙꓵꓽˍ ꓟ ꓠꓯꓸ ꓘꓪ ꓔꓬ ꓡꓳ=

ꓖꓳ ꓡꓱ ꓢꓲ ꓪ ꓔꓲ ꓣꓱ-ꓧꓳ-ꓐꓳ ꓠꓬ ꓬꓲ ꓙꓵꓽˍ ꓟ ꓠꓯꓸ ꓗꓪ ꓟꓽ ꓔꓬ ꓟ ꓞꓳ ꓫꓵꓽ 10 ꓪꓳꓼ ꓔꓯ ꓓꓶꓽ ꓡꓯ ꓘꓳ ꓠꓹ ꓟ ꓢꓯꓼ ꓕꓵꓼˍ ꓟ ꓗꓪ ꓢꓯꓼ ꓙꓳ ꓪꓽ ꓠꓬꓲˍ ꓟ ꓟꓯꓼ 180ꓹ000 ꓣꓳ ꓔꓯ ꓢꓲ ꓗꓷ ꓥˍ ꓟꓲ ꓪꓴ-ꓢ ꓡꓰ “ꓕꓱ ꓟ ꓠꓬ ꓥꓪ ꓡꓰ ꓒꓬꓱꓼ ꓡ ꓝꓲˍ ꓟ ꓥ ꓡꓳ꓾” (1 ꓪ ꓔꓲ 12ꓽ24) ꓐꓯ ꓢꓲ ꓬꓲ ꓪ ꓦꓲꓻ ꓗꓪ ꓬꓲꓼ ꓙꓰ ꓝꓲˍ ꓡꓳ=

ꓖꓳ ꓡꓱ ꓠꓬꓲ ꓪ ꓔꓲ ꓣꓱ-ꓧꓳ-ꓐꓳ ꓠꓬ ꓬꓴ-ꓔ ꓟꓵꓽ ꓥ ꓟ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰ ꓗꓷꓳ= ꓙꓱ-ꓣꓳ-ꓐꓳ ꓠꓬ ꓫꓱ-ꓘꓷ-ꓟꓷ ꓡꓳ ꓒꓱ ꓗꓪ ꓔꓬ ꓢꓲ ꓬꓲ-ꓢꓷ-ꓡꓰ ꓟꓵꓽ ꓔꓯ ꓙꓵꓽˍ ꓡꓳ= ꓗꓸ ꓠꓯ ꓕꓯ ꓠꓬ ꓕꓲ-ꓣꓷ-ꓜꓷ ꓡꓳ ꓒꓱ ꓗꓪ ꓐꓰ ꓬꓲ-ꓢꓷ-ꓡꓰ ꓟꓵꓽ ꓔꓯ ꓙꓵꓽ ꓗꓷꓳ=