ꓣꓳ‐ꓟ ꓡꓳ ꓒꓱ ꓗꓪ ꓮ ꓠꓱ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓴ. ꓔ ꓟ ꓔꓶ. ꓡꓯꓼ ꓜꓳꓼ ꓜꓳꓻ (The Catacombs)

#rvalisu #churchhistory #The catacomb #creditphoto

Monday, August 07, 2023

ꓣꓳ‐ꓟ ꓡꓳ ꓒꓱ ꓗꓪ ꓮ ꓠꓱ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓴ. ꓔ ꓟ ꓔꓶ. ꓡꓯꓼ ꓜꓳꓼ ꓜꓳꓻ (The Catacombs)

ꓮ ꓠꓱ ꓟ ꓙꓵ, ꓕꓯ ꓣꓳ‐ꓟ ꓗꓴꓷꓼ ꓗꓪ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓠꓬ ꓡ ꓞꓳ ꓫꓵꓻ ꓡꓰ ꓟ ꓙꓵ, ꓔꓯ ꓧꓪꓽ ꓖꓳ ꓓꓱ ꓔꓯ ꓮ.‐ꓔꓳ ꓛꓴꓻ ꓗꓷꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓫꓵꓻ ꓡꓰ ꓟ ꓙꓵ, ꓕꓯ ꓮ.‐ꓔꓳ. ꓟꓽ ꓛꓴ ꓧꓪꓽ ꓖꓳ ꓓꓱ ꓔꓯ ꓟꓲ ꓠꓯ ꓗꓪ ꓔꓴ ꓔ ꓟ ꓥ ꓡꓳ꓿ꓣꓳ‐ꓟ ꓡꓳ ꓒꓱ ꓬꓲ. ꓐ ꓢꓲ ꓗꓪ ꓙꓳˍ ꓟ Tu-Fa ꓟꓬꓱꓺ ꓔ ꓟ ꓔꓶ. ꓗꓪ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓫꓵꓻ ꓡꓰ ꓟ ꓙꓵ, ꓕꓯ ꓔꓴ. ꓔ ꓟ ꓔꓶ. ꓟꓲ ꓥ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓐꓰ ꓟꓵꓽ ꓙꓳˍ ꓢꓴ ꓐꓴ ꓠꓬ ꓚꓲ. ꓛꓬ ꓟꓵꓽ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓫꓵꓻ ꓟꓳ ꓔꓯ ꓔꓴ. ꓔ ꓟ ꓥ ꓡꓳ꓿ ꓖꓳ ꓡꓱ ꓐꓰ ꓣꓳ‐ꓟ ꓡꓳ ꓒꓱ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓫꓵꓻ ꓡꓰ ꓟ ꓙꓵ, ꓕꓯ ꓔꓴ. ꓔ ꓟ ꓔꓶ. (70) ꓔꓶ. ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓕꓱ ꓙꓲ‐ꓢꓴ ꓢꓲꓺ ꓤ ꓐꓴ ꓔꓴ. ꓔ ꓟ ꓔꓶ. ꓔꓯ Catacombs ꓐꓰ ꓟꓬꓱꓺ ꓔ ꓟ ꓥ ꓡꓳ꓿

ꓕꓱ ꓡꓯꓼ ꓜꓳꓻ ꓠꓬ ꓩꓙꓲꓻ ꓫꓬ ꓢꓴ Sebastian ꓪꓽ ꓘꓴ ꓦꓲꓻ ꓐ ꓕꓲ ꓗꓪ ꓡꓳ. ꓟꓳ ꓪ ꓡꓳ꓿ ꓕꓱ ꓪꓽ ꓗꓴ ꓦꓲꓻ ꓠꓬ ꓣꓳ‐ꓟ ꓡꓳ ꓒꓱ Appian ꓟꓬꓱꓺ ꓔ ꓟ ꓙ ꓖꓴ ꓐ ꓕꓲ ꓗꓪ ꓙꓳˍ ꓟ ꓥ ꓡꓳ꓿ Catacomb ꓡꓯꓼ ꓜꓳꓻ ꓐꓴ ꓠꓬ ꓟꓲ ꓠꓯ ꓘꓴꓽ ꓗꓪ ꓮ ꓟꓬ, ꓫꓵˍ ꓟ ꓔꓶ. ꓥ ꓢꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓫꓵꓻ ꓡꓰ ꓟ ꓙꓵ, ꓔꓯ ꓕꓱ ꓗꓪ ꓔꓴ. ꓔ ꓟ ꓥ ꓡꓳ꓿ ꓕꓱ ꓬꓲ. ꓘꓴ ꓢꓲ ꓠꓬꓲ ꓬꓲ. ꓗꓪ. ꓮ ꓟꓬ, ꓫꓬ, ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓴ. ꓔ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ‐ꓟ ꓟꓯꓼ ꓐꓴ ꓡꓰ ꓢꓰꓼ ꓟ ꓐꓰ ꓫ. ꓓꓴ ꓟꓶ ꓓꓴ ꓮ ꓟꓶ ꓖꓶ ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓴ. ꓟ ꓔꓶ. Catacombs ꓔꓶ. ꓥ ꓟꓲ ꓮ ꓟꓬ, ꓪꓴꓽ ꓡ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓬꓲ. ꓗꓪ. ꓕꓲ ꓗꓪ. ꓡꓰ ꓐꓰ ꓒꓬꓱꓼ ꓡ ꓟ ꓥ ꓡꓳ꓿

ꓮ ꓟꓶ ꓟ ꓙꓵ, ꓗꓪ ꓧꓪ, ꓟꓳ ꓡꓳ. ꓟꓳ ꓡꓰ ꓡꓯꓼ ꓜꓳꓻ Catacombs ꓔꓶ. ꓗꓪ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓢꓴ ꓐꓴ ꓔꓯ ꓔꓴ. ꓟ ꓔꓶ. ꓥ ꓡꓳ꓿ ꓝꓮꓲ ꓕꓱ ꓬꓲ. ꓔꓶ. ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ‐ꓟ ꓟꓯꓼ ꓐꓴ ꓡꓰ ꓢꓰꓼ ꓡ ꓟ ꓐꓰ ꓫ. ꓓꓴ ꓟꓶ ꓓꓴ ꓖꓶ ꓡ ꓟ ꓙꓵ, ꓗꓪ ꓕꓲ ꓠꓬꓲ ꓕꓲ ꓪ ꓪꓽ ꓘꓴ ꓢꓲ ꓠꓬꓲ ꓟꓲ‐ꓢ ꓔꓲ. ꓟ ꓔꓶ. ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓬꓲ. ꓔꓶ. ꓗꓪ ꓪꓽ ꓘꓴ ꓟ ꓠꓬ ꓮ ꓕꓯ ꓟꓲ ꓟꓽ ꓘꓴ ꓣꓳ‐ꓟ ꓟꓯꓼ ꓐꓴ ꓡꓰ ꓫ. ꓓꓴ ꓟꓷꓼ ꓢꓴ ꓬꓰ ꓡ ꓟ ꓙꓵ, ꓕꓯ ꓡꓰ ꓪꓽ ꓘꓴ ꓟ ꓔꓶ. ꓟꓲ ꓥ ꓡꓳ꓿

Barbarian ꓐꓴ ꓣꓳ‐ꓟ ꓗꓴꓷꓼ ꓔꓯ ꓟꓯꓼ ꓢꓰꓼ ꓟꓯꓼ ꓔꓶꓽ ꓡ ꓟ ꓙꓵ, ꓗꓪ ꓐꓰ Catacombs ꓡꓯꓼ ꓜꓳꓻ ꓐꓴ ꓟꓽ ꓙꓳˍ ꓗꓷ ꓡꓰ ꓟ ꓥ ꓡꓳ꓿ ꓮꓓ 700 ꓘꓳꓼ ꓐꓰ 800 ꓘꓳꓼ ꓕꓯ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓪꓴ‐ꓢ ꓟꓬꓱꓽ ꓟꓯꓼ ꓢꓴ ꓐꓴ ꓡꓯꓼ ꓜꓳꓻ ꓔꓯ ꓣꓳ‐ꓟ ꓡꓳ ꓒꓱ ꓙꓲꓻ ꓫꓬ ꓢꓴ ꓒꓲ‐ꓕꓱ ꓪꓽ ꓘꓴ ꓦꓲꓻ ꓗꓪ ꓚꓲ. ꓗꓷ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓐꓰ ꓣꓳ‐ꓟ ꓟꓯꓼ ꓐꓴ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷ ꓢꓴ ꓐꓴ ꓔꓯ ꓔꓴ. ꓔ ꓟ ꓔꓶ. Catacombs ꓔꓯ ꓡ ꓞꓳ ꓐꓴ ꓮ ꓟꓬ, ꓟꓽ ꓢꓷ. ꓡꓰ ꓟ ꓥ ꓡꓳ꓿ ꓮꓓ (1600) ꓘꓳꓼ ꓕꓯ Catacomb ꓡꓯꓼ ꓜꓳꓻ ꓔꓯ ꓟꓽ ꓟꓳ ꓪ ꓡꓰꓳ꓿

ꓟꓬꓱꓺ ꓓꓳꓽ ꓮ ꓟꓬ, ꓙꓳˍ ꓟ ꓐꓰ ꓮ ꓟꓶ ꓟ ꓙꓵ, ꓕꓯ ꓡꓳ. ꓟꓳ ꓓ ꓟ ꓔꓶ. ꓠꓬ ꓙꓲꓻ ꓫꓬ ꓢꓴ St. Callistus Catacomb ꓥ ꓡꓳ꓿ ꓖꓳ ꓕꓲ ꓔꓶ. ꓗꓪ ꓠꓬ ꓣꓳ‐ꓟ ꓟꓯꓼ ꓐꓴ ꓡꓰ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷ ꓟ ꓔꓲꓺ ꓒ ꓪ ꓔꓲ ꓐꓴ ꓐꓰ ꓔꓲꓺ ꓒ ꓐꓴ ꓔꓯ ꓔꓴ. ꓔ ꓟ ꓬꓲ. ꓔꓶ. ꓟꓲ ꓥ ꓡꓳ꓿ ꓮ ꓙꓵꓽ ꓢꓴ ꓔꓯ ꓮ ꓘꓶ. ꓫ. ꓟꓳ ꓪ꓿