ꓣꓳ‐ꓟ ꓪ ꓔꓲ ꓐꓴ ꓡꓰ ꓪꓴ‐ꓢ ꓦꓻ ꓡꓱ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫ. ꓓꓴ ꓟꓶ ꓓꓴ ꓮ ꓟꓬ, ꓛꓲ ꓬꓰ ꓟ ꓚꓱ, 2 ꓕꓱ

#rvalisu #credtitphoto #persecution #Charistian

Monday, July 03, 2023

ꓡꓬꓳꓠꓢ ꓡꓳ ꓒꓱ ꓗꓪ ꓑꓮꓖꓮꓠ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓠꓬ ꓑꓮꓲꓽ ꓓꓽ ꓟ ꓬꓰ ꓔꓬ ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓟꓽ ꓐꓽ ꓟ ꓪꓴ. ꓠꓬꓲ ꓟꓽ ꓦꓻ ꓡꓱ ꓢꓴ ꓐꓴ ꓠꓬ ꓮ ꓟꓬ, ꓛꓲ ꓪꓽ ꓫꓪ ꓟ ꓟꓽ ꓠꓲ, ꓟ ꓫꓵꓺ ꓟ ꓔꓯ ꓫ. ꓕꓱ ꓗꓷ ꓟ ꓥ ꓡꓳ꓿ ꓖꓳ ꓗ. ꓠꓯ ꓟꓽ ꓦꓻ ꓡꓱ ꓢꓴ ꓐꓴ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫ. ꓓꓴ ꓟꓷꓼ ꓓꓴ ꓖꓶ ꓢꓲ ꓠꓬꓲ ꓢꓰꓼ ꓟ ꓥ ꓡꓳ꓿ ꓟꓽ ꓦꓻ ꓡꓱ ꓢꓴ ꓐꓴ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓓꓲꓽ ꓡꓯ ꓘꓳ, ꓟ ꓔꓯ ꓙꓵꓽ ꓪ ꓙꓳˍ ꓢꓴ ꓐꓴ ꓡꓳ. ꓟꓳ ꓗꓷ ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓬꓰ ꓟ ꓝꓴꓲ ꓥ ꓡꓳ ꓐꓰ ꓐꓯ ꓢꓲ ꓠꓬꓲ ꓐꓱ ꓓꓵ ꓗꓪ ꓐꓱ ꓗꓷ ꓟ ꓥ ꓡꓳ꓿

ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓠꓴ ꓪ ꓙꓲ‐ꓢꓴ ꓢꓲꓺ ꓤ ꓥ ꓡ ꓟꓽ ꓥ ꓡꓳ ꓐꓰ ꓠꓽ ꓠꓬꓲ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓥ ꓡꓳ ꓐꓰ ꓐꓯ ꓢꓴ ꓐꓴ ꓔꓯ ꓢꓰꓼ ꓗꓷ ꓟ ꓥ ꓡꓳ꓿ ꓬꓲ. ꓪꓴ. ꓟ ꓙꓵ, ꓕꓯ ꓗꓴꓷꓼ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓠꓽ ꓠꓬꓲˍ ꓟ ꓙꓵ, ꓕꓯ ꓟꓽ ꓥ ꓐꓰ ꓐꓯ ꓥ ꓟꓲ ꓬꓲ. ꓪ ꓠꓬ ꓓꓵꓽ ꓙ ꓒꓳ, ꓡꓶ ꓡ ꓢꓲ ꓠꓬꓲ ꓬꓲ. ꓟꓶ ꓕꓯ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷ ꓟ ꓔꓯ ꓔꓳ, ꓜꓳ ꓡꓰꓳ꓿

ꓣꓳ‐ꓟ ꓡꓳ ꓒꓱ ꓔꓲꓐꓰꓣ ꓐꓰ ꓟꓬꓱꓺ ꓔ ꓟ ꓔꓶ. ꓗꓪ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓤ ꓟꓶ ꓤ ꓕꓲ ꓣꓳ ꓡꓯꓼ ꓜꓳ ꓗꓪ ꓮ ꓟꓬ, ꓡꓳ. ꓐꓲˍ ꓟ ꓪꓽ ꓘꓴ ꓦꓲꓻ ꓕꓲ ꓦꓲꓻ ꓫꓬ, ꓔ ꓟ ꓥ ꓡꓳ꓿ ꓕꓱ ꓤ ꓟꓶ ꓤ ꓠꓬ ꓪ ꓔꓲ ꓰꓟꓑꓰꓣꓳꓣ ꓟꓮꓣꓚꓴꓢ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓟ ꓙꓵ, ꓕꓯ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷ ꓢꓴ ꓥ ꓡꓳ꓿ ꓬꓲ. ꓟꓬꓱꓽ ꓠꓬ ꓚꓰꓚꓲꓡꓲꓮ ꓥ ꓡꓳ꓿ ꓬꓲ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓒꓬꓱꓼ ꓡ ꓟ ꓪꓴ. ꓠꓬꓲ ꓣꓳ‐ꓟ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓐꓱ ꓓꓵ ꓗꓪ ꓜꓳꓻ ꓔ ꓟ ꓢꓲ ꓠꓬꓲ ꓬꓲ. ꓪ ꓕꓲ ꓦꓲꓻ ꓢꓴ ꓔꓯ ꓟꓽ ꓜꓲꓼ ꓝꓲ ꓟ ꓟꓲ ꓥ ꓡꓳ꓿ ꓬꓲ. ꓠꓬ ꓕꓲ ꓤꓶ ꓡꓱ ꓦꓲꓻ ꓢꓲꓽ ꓒ ꓟꓽ ꓧꓪ ꓠ, ꓟ ꓓꓵꓽ ꓙ ꓗꓷ ꓢꓴ ꓥ ꓡꓳ꓿

ꓬꓲ. ꓐ, ꓐ ꓐꓰ ꓟ, ꓟ ꓠꓬ ꓦꓮꓡꓰꓣꓲꓮꓠ ꓟꓬꓱꓺ ꓔ ꓢꓴ ꓐꓴ ꓡꓯꓼ ꓒꓯ, ꓝ ꓖꓶ ꓠꓲ, ꓫꓵˍ ꓡꓳ꓿ ꓬꓲ. ꓠꓬ ꓦꓲꓻ ꓢꓲꓽ ꓒ ꓟꓽ ꓣꓴ ꓠ, ꓟ ꓐꓯ ꓗꓷ ꓢꓲ ꓠꓬꓲ ꓬꓲ. ꓪ ꓕꓲ ꓦꓲꓻ ꓡꓱ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓟ ꓥ ꓡꓳ꓿ ꓬꓲ. ꓔꓯ ꓣꓳ‐ꓟ ꓙꓵꓽ ꓪ ꓙꓳˍꓢꓴ ꓐꓴ ꓡꓰ ꓢꓯꓼ ꓦꓻ ꓟꓽ ꓓ ꓠ, ꓬꓰ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ. ꓠꓬ ꓟꓽ ꓫꓵꓻ ꓟ ꓥ ꓡꓳ꓿ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓬꓲ. ꓔꓯ ꓮ. ꓕ ꓗꓪ ꓐꓰ ꓢꓰꓼ ꓗꓷ ꓟ ꓥ ꓡꓳ꓿ ꓬꓲ. ꓔꓯ ꓠꓬ ꓘꓴ ꓜꓲꓼ ꓞꓳ ꓡꓰ ꓟꓶ ꓢꓯꓼ ꓔꓯ ꓬꓰ ꓙ ꓢꓴ ꓙꓲꓻ ꓫꓬ ꓢꓴ ꓐꓰ ꓟꓬꓱꓺ ꓖꓶ ꓔ ꓟ ꓥ ꓡꓳ꓿

ꓣꓳ‐ꓟ ꓪ ꓔꓲ ꓰꓟꓑꓰꓣꓳꓣ ꓢꓰꓑꓔꓲꓟꓲꓴꓢ ꓢꓰꓦꓰꓣꓴꓢ ꓪ ꓔꓲ ꓣꓱ ꓟ ꓙꓵꓽ ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓝꓴꓲ ꓟꓽ ꓔꓲ ꓠ, ꓟ ꓐꓯ ꓐꓶ ꓗꓷ ꓟ ꓥ ꓡꓳ꓿ ꓪ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓬꓴ‐ꓔ ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓴ ꓐꓴ ꓔꓯ ꓢꓰꓼ ꓠ, ꓟ ꓬꓰ ꓗꓷ ꓥ ꓡꓳ꓿ ꓪ ꓔꓲ ꓔꓯ ꓬꓲ. ꓣꓳ‐ꓟ ꓗꓴꓷꓼ ꓙꓵꓽ ꓟ ꓙꓵ, ꓔꓯ ꓰꓖꓬꓑꓔ ꓗꓴꓷꓼ ꓐꓰ ꓮꓝꓣꓲꓚꓮ ꓗꓴꓷꓼ ꓗꓪ ꓛꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓗꓷ ꓟ ꓥ ꓡꓳ꓿ Carthage ꓡꓳ ꓒꓱ ꓗꓪ ꓐꓰ ꓙꓲꓻ ꓫꓬ ꓢꓴ St. Felicitas ꓐꓰ ꓬꓲ. ꓛꓳ ꓒꓯꓼ ꓐꓴ ꓠꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Perpetua ꓬꓲ. ꓐ, ꓐꓽ ꓠꓬ ꓬꓲ. ꓢꓲꓺ ꓒ ꓬꓰ‐ꓢꓴ ꓔꓯ ꓦꓻ ꓡꓱ ꓟ ꓪꓴ. ꓠꓬꓲ ꓬꓲ. ꓪ ꓕꓲ ꓦꓲꓻ ꓢꓴ ꓐꓴ ꓔꓯ ꓕꓽ ꓫ. ꓔꓳ ꓝꓲ ꓐꓰ ꓬꓲ. ꓐ, ꓐꓽ ꓡꓰ ꓐꓯ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓬꓲ. ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓡ ꓞꓳ ꓟꓲ ꓕꓯ ꓢꓲ ꓗꓪ ꓘꓳ ꓣꓴ ꓟ ꓠꓬ ꓥꓪ ꓠꓯ, ꓗꓪ ꓬꓲ ꓠ, ꓟ ꓙꓵꓽ ꓪ ꓙꓳˍ ꓡꓳ ꓐꓰ ꓐꓯ ꓗꓷꓳ꓿ ꓡ ꓞꓳ ꓒꓵ ꓟꓬ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓪꓴ‐ꓢ ꓦꓻ ꓡꓱ ꓟ ꓔꓯ ꓟꓽ ꓡꓳ ꓗꓷ ꓐꓰ ꓐꓯ ꓗꓷꓳ꓿ ꓬꓲ. ꓐꓰ ꓬꓲ. ꓛꓳ ꓒꓯ ꓐꓴ ꓔꓯ ꓐꓱ ꓓꓵ ꓗꓪ ꓐꓱ ꓟ ꓔꓯ ꓔꓳ, ꓜꓳ ꓡꓰꓳ꓿ ꓐꓱ ꓓꓵ ꓗꓪ ꓬꓲ. ꓤ ꓠꓱ ꓤ ꓐꓰ ꓕꓲ ꓪ ꓔꓬ ꓠ, ꓟ ꓙꓵꓽ ꓪ ꓪ ꓡꓰꓳ꓿

ꓬꓲ. ꓪ ꓕꓲ ꓜꓴꓻ ꓔꓯ ꓢꓰꓼ ꓠ, ꓟ ꓦꓬꓼ ꓠꓬꓲ ꓛꓲ ꓡ ꓟ ꓙꓵ, ꓕꓯ ꓬꓲ. ꓪ ꓔꓯ ꓓꓶ ꓢꓲ ꓠꓬꓲ ꓡꓳ ꓒꓱ ꓗꓪ ꓧꓳꓻ ꓙꓰ ꓟ ꓥ ꓡꓳ꓿ ꓬꓲ. ꓪ ꓜꓴꓻ ꓔꓯ ꓢꓰꓼ ꓠ, ꓟ ꓔꓶ. ꓗꓪ ꓛꓲ ꓕꓯ ꓙꓱꓽ ꓤ ꓐꓴ ꓔꓯ ꓜꓽ ꓢꓰꓼ ꓝꓲ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Perpetua ꓐꓰ ꓙꓲꓻ ꓫꓬ ꓢꓴ Felicitas ꓐꓴ ꓠꓬꓲꓽ ꓣꓳ ꓕꓯ ꓠꓬ ꓮ.‐ꓠꓬꓲ ꓡꓰ ꓚꓴ. ꓢꓰꓼ ꓗꓷꓳ꓿ ꓬꓲ ꓪ ꓮ ꓙꓵꓽ ꓢꓴ ꓐꓴ ꓠꓬ ꓙꓵꓻ ꓠꓲ, ꓚꓱ, ꓐꓱ ꓶ ꓢꓰꓼ ꓟ ꓔꓯ ꓔꓳ, ꓜꓳ ꓢꓴ ꓐꓴ ꓥ ꓡꓳ꓿