ꓣꓳ‐ꓟ ꓪ ꓔꓲ Diocletian ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓚꓱ, (Church history)

ꓣꓳ‐ꓟ ꓪ ꓔꓲ Diocletian ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓚꓱ,

ꓣꓳ‐ꓟ ꓗꓴꓷꓼ ꓠꓬ ꓗꓴꓷꓼ ꓠꓬ ꓮ ꓟꓬ, ꓗꓴꓷꓼ ꓐꓼ ꓟ ꓥ ꓡꓳ꓿ ꓕꓱ ꓗꓴꓷꓼ ꓮ ꓟꓬ, ꓠꓬ ꓢꓲ ꓡꓲ ꓐꓰ ꓙꓵꓽ ꓠ, ꓟ ꓙꓵꓽ ꓪ ꓟꓶ ꓟ ꓟꓲ ꓥ ꓡꓳ꓿ ꓕꓱ ꓗꓴꓷꓼ ꓮ ꓟꓬ, ꓗꓪ ꓐꓰ ꓗꓴꓷꓼ ꓝꓲ ꓓꓴ ꓐꓴ ꓡꓰ ꓗꓴꓷꓼ ꓔꓯ ꓙꓵꓽ ꓟ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ‐ꓟ ꓗꓴꓷꓼ ꓮꓓ 300 ꓘꓳꓼ ꓕꓯ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓮ ꓟꓬ, ꓑ ꓟ ꓟꓲ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓢꓴ ꓐꓴ ꓠꓬ ꓣꓳ‐ꓟ ꓟꓯꓼ ꓜꓴꓻ ꓗꓪ ꓐꓰ ꓓꓯ ꓡ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ ꓟꓯꓼ ꓜꓲꓽ ꓒꓽ ꓡꓰ ꓐꓯ ꓟ ꓔꓯ ꓡꓰ ꓛꓳ ꓢꓴ ꓐꓴ ꓥ ꓡꓳ꓿

ꓣꓳ‐ꓟ ꓗꓴꓷꓼ ꓗꓪ ꓫꓵꓽ ꓪꓴꓽ ꓮ ꓟꓬ, ꓙꓳˍ ꓡ ꓟ ꓥ ꓡꓳ꓿ ꓟꓯꓼ ꓜꓴꓻ ꓐꓴ ꓡꓰ ꓣꓱ ꓟ ꓒꓴ ꓮ ꓟꓬ, ꓙꓳˍ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓯꓼ ꓜꓴꓻ ꓐꓴ ꓣꓱ ꓟ ꓒꓴ ꓫꓵˍ ꓔꓯ ꓑ ꓫꓬ ꓐꓴ ꓗꓶ ꓠ, ꓟ ꓔ ꓟ ꓥ ꓡꓳ꓿ ꓒꓴ ꓒꓵꓽ ꓮ ꓟꓬ, ꓟꓽ ꓙꓳˍ ꓡ ꓟ ꓥ ꓡꓳ꓿ ꓖꓳ ꓡꓱ ꓡꓰ ꓟꓽ ꓞꓲ ꓣꓳ‐ꓟ ꓗꓴꓷꓼ ꓔꓯ Barbarian  ꓜꓴꓻ ꓡꓰ ꓢꓰꓼ ꓡ ꓟ ꓟꓲ ꓥ ꓡꓳ꓿

AD (284) ꓘꓳꓼ ꓕꓯ ꓪ ꓔꓲ Dalmatian ꓬꓲ ꓤ Diocletian ꓣꓳ‐ꓟ ꓪ ꓔꓲ ꓒꓬꓱꓼ ꓡ ꓟ ꓥ ꓡꓳ꓿ ꓬꓲ ꓠꓬ ꓮ ꓟꓬ, ꓢꓯꓼ ꓪ ꓙꓳˍ ꓢꓴ ꓥ ꓢꓲ ꓠꓬꓲ ꓣꓳ‐ꓟ ꓗꓴꓷꓼ ꓔꓯ ꓮ ꓟꓬ, ꓛꓲ ꓪꓴꓽ ꓟꓴ ꓡ ꓠ, ꓟ ꓐꓰ ꓢꓯꓼ ꓙꓳˍ ꓠ, ꓟ ꓙꓵꓽ ꓠ, ꓟ ꓓꓵ ꓙ ꓔ ꓟ ꓥ ꓡꓳ꓿ ꓖꓳ ꓡꓱ ꓐꓰ ꓣꓳ‐ꓟ ꓗꓴꓷꓼ ꓔꓯ ꓝꓮꓲ ꓕꓲ ꓧꓪ, ꓪꓴꓽ ꓟꓴ ꓡ ꓠ, ꓟ ꓐꓰ ꓢꓯꓼ ꓙꓳˍ ꓪꓽ ꓠꓬꓲˍ ꓡ ꓠ, ꓟ ꓬꓰ ꓙ ꓢꓴ ꓠꓬ Maximian ꓟꓬꓱꓺ ꓔ ꓢꓴ ꓥ ꓡꓳ꓿ ꓪ ꓔꓲ ꓠꓬ ꓣꓳ ꓗꓴꓷꓼ ꓗꓪ ꓔꓬ ꓢꓲ ꓠꓬꓲ ꓣꓳ‐ꓟ ꓗꓴꓓꓼ ꓔꓯ ꓙꓵꓽ ꓢꓲ ꓠꓬꓲ Maximain ꓠꓬ Milan ꓡꓳ ꓒꓱ ꓗꓪ ꓔꓬ ꓢꓲ ꓠꓬꓲ ꓗꓴꓷꓽ ꓔꓯ ꓙꓵꓽ ꓟ ꓥ ꓡꓳ꓿

ꓖꓳ ꓡꓱ ꓐꓰ ꓗꓴꓷꓼ ꓔꓯ ꓙꓵꓽ ꓟ ꓙꓵ, ꓕꓯ ꓣꓳ‐ꓟ ꓗꓴꓷꓼ ꓠꓬ ꓮ ꓟꓬ, ꓛꓲ ꓪꓴꓽ ꓟꓴ ꓡ ꓓꓴ ꓙꓳˍ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓗ, ꓛꓲꓽ ꓛꓲꓽ ꓡꓰ ꓢꓯ. ꓔꓬ ꓟꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓣꓳ‐ꓟ ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓝꓴꓲ ꓖꓶ ꓠ, ꓟ ꓕꓳ ꓶ ꓐꓳ ꓩꓴ ꓡ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓣꓳ‐ꓟ ꓡꓳ ꓒꓱ ꓓꓽ ꓗꓪ ꓮ. ꓔꓳ ꓐꓬ ꓡꓰ ꓟ ꓪꓴ. ꓠꓬꓲ ꓕꓱ ꓟ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓬꓰ ꓥ ꓐꓰ ꓝꓴꓲ ꓓꓲ. ꓟ ꓥ ꓡꓳ꓿ Armenia ꓟꓵꓽ ꓐꓰ Syria ꓗꓴꓷꓼ ꓗꓪ ꓒꓳ, ꓔꓴ ꓟ ꓟꓬ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓬꓰ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓕꓱ ꓗꓴꓷꓼ ꓗꓪ ꓔꓬ ꓟ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓐꓴ ꓔꓯ ꓐꓱ ꓓꓵ ꓗꓪ ꓐꓱ ꓟ ꓟꓲ ꓥ ꓡꓳ꓿ ꓬꓲ. ꓟꓶ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓦꓻ ꓡꓱ ꓔꓬ ꓟ ꓪꓴ‐ꓢ ꓔꓯ ꓡꓳꓻ ꓗꓷ ꓢꓲ ꓠꓬꓲ ꓠꓲꓽ ꓔꓯ ꓪꓴꓽ ꓓꓴ ꓕꓵ ꓠ, ꓟ ꓐꓯ ꓑꓶ ꓗꓷꓳ꓿  ꓕꓱ ꓡꓰ ꓐꓰ ꓘꓴ ꓜꓲꓼ ꓞꓳ ꓠꓯ, ꓗꓪ ꓙꓵꓻ ꓠꓲ, ꓚꓰ, ꓑꓶ. ꓓꓴ ꓢꓰꓼ ꓟꓶ ꓡꓰ ꓟ ꓕꓱ ꓕꓳ ꓶ ꓠꓬ ꓒꓬꓱꓼ ꓡ ꓝꓲ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓟꓬ, ꓫ. ꓟ ꓟꓬꓱꓽ ꓔꓯ ꓬꓰ ꓝꓲ ꓟ ꓥ ꓡꓳ꓿ ꓫ. ꓟꓴ ꓫ. ꓛꓬ ꓟꓲ ꓬꓰ ꓢꓲ ꓠꓬꓲ ꓜ ꓮ ꓟꓬ, ꓟꓽ ꓖꓶ ꓜ ꓟ ꓥ ꓡꓳ꓿

ꓙꓲ‐ꓢꓴ ꓢꓲꓺ ꓤ ꓐꓴ ꓔꓬ ꓟ ꓡꓳ ꓒꓱ ꓞꓳ ꓘ, ꓮ ꓟꓬ, ꓔꓯ ꓮ. ꓔꓳ. ꓛꓴ ꓗꓷ ꓟ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓡꓰ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓔꓯ ꓢꓰꓼ ꓗꓷ ꓟ ꓗꓪ ꓙꓲꓻ ꓫꓬ ꓢꓴ St.Sebastian ꓥ ꓟꓲ ꓐ ꓟ ꓥ ꓡꓳ꓿ ꓬꓲ ꓠꓬ ꓣꓳ‐ꓟ ꓟꓯꓼ ꓒꓽ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓥ ꓟ ꓪꓴ. ꓠꓬꓲ ꓬꓲ ꓔꓯ ꓣꓳ‐ꓟ ꓟꓯꓼ ꓐꓴ ꓡꓰ ꓛꓳ ꓔ ꓢꓲ ꓠꓬꓲ ꓛꓬ꓾ ꓗꓪ ꓐꓰ ꓑꓶ ꓢꓰꓼ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓟꓽ ꓫꓵꓻ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ St.Sebastian ꓔꓯ ꓮ.‐ꓔ ꓗꓪ ꓐꓰ ꓗ. ꓢꓰꓼ ꓗꓷꓳ꓿ ꓙꓲꓻ ꓫꓬ ꓢꓴ Acolyte ꓠꓬ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓔꓯ ꓗꓽ ꓕ ꓢꓲ ꓠꓬꓲ ꓣꓳ‐ꓟ ꓟꓯꓼ ꓐꓴ ꓡꓰ ꓢꓰꓼ ꓗꓷ ꓢꓴ ꓕꓲ ꓣꓳ ꓥ ꓡꓳ꓿

ꓬꓲ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓗꓳ. ꓡꓳ ꓗꓪ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓚꓵ. ꓔꓯ ꓗꓽ ꓕ ꓢꓲ ꓠꓬꓲ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷ ꓟ ꓟꓶ ꓢꓴ ꓥ ꓡꓳ꓿ ꓙꓲꓻ ꓫꓬ ꓢꓴ Lucy ꓔꓯ ꓠꓬ ꓣꓳ‐ꓟ ꓟꓯꓼ ꓐꓴ ꓡꓰ ꓟꓬꓽ ꓢꓶ ꓔꓯ ꓑꓳꓻ ꓩꓴ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Cosmon ꓐꓰ ꓙꓲꓻ ꓫꓬ ꓢꓴ Damian ꓐꓴ ꓠꓬꓲꓽ ꓣꓳ ꓠꓬ ꓠꓯꓻ ꓞꓲꓼ ꓟ. ꓒꓽ ꓓꓽ ꓥ ꓟꓲ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓣꓳ‐ꓟ ꓟꓯꓼ ꓐꓴ ꓡꓰ ꓢꓰꓼ ꓗꓷ ꓢꓴ ꓐꓴ ꓙꓲꓻ ꓫꓬ ꓢꓴ ꓐꓴ ꓥ ꓡꓳ꓿

ꓙꓲꓻ ꓫꓬ ꓢꓴ Agnes ꓐ, ꓐ ꓐꓰ ꓟ, ꓟ ꓠꓬ ꓒꓴ ꓫꓵˍ ꓮ ꓟꓬ, ꓙꓳˍ ꓟ ꓕꓲ ꓦꓲꓻ ꓗꓪ ꓐꓰ ꓥ ꓡꓳ꓿ꓬꓲ ꓞꓲ (12) ꓙꓳˍ ꓕꓯ ꓬꓲ ꓠꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓑꓶ. ꓑꓶ. ꓙꓵꓻ ꓠꓲ, ꓚꓱ, ꓗꓪ ꓫꓵꓻ ꓢꓴ ꓙꓲꓻ ꓫꓬ ꓢꓴ ꓥ ꓡꓳ꓿ ꓟꓽ ꓙꓲꓻ ꓢꓴ ꓐꓴ ꓡꓰ ꓬꓲ ꓔꓯ ꓮ ꓟꓬ, ꓛꓲ ꓫ. ꓓꓴ ꓟꓷꓼ ꓢꓴ ꓖꓶ ꓥ ꓟꓲ ꓬꓲ ꓠꓬ ꓪꓴ‐ꓢ ꓔꓯ ꓟꓽ ꓡꓳ ꓗꓷ ꓟ ꓥ ꓡꓳ꓿ ꓬꓲ ꓔꓯ ꓟꓽ ꓙꓲꓻ ꓢꓴ ꓐꓴ ꓡꓰ ꓪꓴ. ꓓꓵ ꓔꓯ ꓓꓶꓻ ꓗꓷ ꓟ ꓥ ꓡꓳ‐ ꓬꓲ ꓔꓯ ꓬꓲ ꓪ ꓦꓲꓻ ꓟꓵꓽ ꓗꓪ ꓓꓵꓻ ꓔ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Agnes ꓠꓬ ꓞꓲꓼ ꓣꓳ ꓥ ꓟꓲ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓫꓵꓻ ꓙ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿