ꓣꓳ-ꓟ ꓡꓳ ꓒꓱ

ꓣꓳ-ꓟ ꓠꓬ ꓲ-ꓔ-ꓡꓲ ꓟꓵꓽ ꓗꓪ ꓟ ꓡꓳ ꓒꓱ ꓓꓽ ꓟ ꓕꓲꓽ ꓟ ꓥ ꓢꓲ꓾ Vatican ꓐꓰ ꓔꓲꓺ ꓒ ꓪ ꓔꓲ ꓐꓴ ꓦꓲꓻ ꓥ ꓢꓲ ꓠꓬꓲ ꓮ ꓠꓱ ꓕꓯ ꓠꓬ ꓮ ꓘꓶꓸ ꓪꓴꓽˍ ꓟ Empire ꓬꓲꓸ ꓚꓳ ꓟꓶ ꓥ ꓡꓳ= ꓖꓳ ꓗꓪ ꓠꓬ 3000 ꓘꓳꓼ ꓘꓴꓽ ꓗꓪ ꓞꓳ ꓤ ꓮ ꓟꓬꓹ ꓔꓬꓹ ꓗꓷ ꓟ ꓡꓳ ꓒꓱ ꓕꓲ ꓟ ꓒꓬꓱꓼ ꓗꓷꓳ= ꓣꓳ-ꓟ ꓠꓬ ꓲ-ꓔ-ꓡꓲ ꓟꓵꓽ ꓔꓱꓹ ꓫꓵ ꓗꓪ ꓟ Lazio ꓟꓵꓽ Tiber ꓬꓲꓽ ꓟ ꓕꓯꓽ ꓢꓲ ꓗꓪ ꓓꓹ ꓡꓳ= ꓧꓶꓸ ꓕꓯ ꓞꓳ ꓫꓵꓽ ꓐꓴ ꓔꓬ ꓗꓷ ꓟ ꓠꓬ꓾ ꓟꓵꓽ ꓖꓳ ꓟ ꓗꓪ ꓟ ꓬꓲꓻ ꓙꓬ ꓬꓲꓽ ꓟ ꓘꓶꓽ ꓗꓪ ꓓꓹ ꓡꓳ= ꓣꓳ-ꓟ ꓪ ꓔꓲ ꓐꓴ ꓠꓬ ꓡꓳ ꓒꓱ ꓔꓯ ꓪ ꓚꓲ ꓫꓵꓽ ꓚꓲ ꓕꓯꓽ ꓢꓲ ꓗꓪ ꓔꓶ ꓗꓷ ꓟ ꓥꓳ= ꓪ ꓚꓲ ꓫꓵꓽ ꓚꓲ ꓐꓴ ꓠꓬ꓾ Aventine ꓾ Caelian꓾ Capitoline ꓾ Esquiline ꓾Palatine ꓾ Quirinal ꓐꓰ Viminal ꓪ ꓚꓲ ꓐꓴ ꓥ ꓡꓳ= ꓠꓬꓲꓸ ꓠꓬꓲ ꓟ ꓣꓳ-ꓟ ꓠꓬ ꓣꓳ-ꓟ ꓚꓺ ꓟꓲꓽ ꓬꓲꓸ ꓚꓰꓺ ꓖꓴ ꓪꓴꓸ Tiber ꓗꓪ ꓬꓲꓻ ꓓꓵꓽ ꓡꓰˍ ꓟ ꓠꓱꓸ ꓐꓯꓼ ꓬꓲꓽ ꓟ ꓕꓲ ꓟ ꓥ ꓟ Aniene ꓬꓲꓽ ꓟ ꓕꓯꓽ ꓢꓲ ꓗꓳꓸ ꓙꓰ ꓢꓲ ꓔꓶꓻ ꓔ ꓟ ꓥ ꓡꓳ=

ꓮ ꓠꓱ ꓕꓯ ꓟ ꓚꓺ ꓟꓲꓽ ꓗꓪ ꓣꓳ-ꓟ ꓔꓯ ꓐꓸꓚꓸꓰ 713 ꓕꓯ Romulus ꓟꓬꓱ ꓔ ꓢꓴ ꓡꓰ ꓫꓬꓹ ꓔꓶ ꓔ ꓥˍ ꓟꓲ꓾ ꓖꓳ ꓗꓪ ꓔꓬ ꓗꓷ ꓟ ꓠꓬ Latium Plain ꓗꓪ ꓔꓬꓹ ꓢꓴ ꓐꓴ ꓗꓪ ꓟ ꓕꓲꓽ ꓣꓳ ꓗꓪ ꓐꓰ ꓪꓴꓸ ꓔꓴ ꓗꓷ ꓟ ꓥꓳ= ꓣꓳ-ꓟ ꓠꓬ Tiber ꓬꓲꓽ ꓟ ꓔꓯ ꓗꓳꓸ ꓙ ꓙꓰ ꓢꓲ꓾ ꓞꓼ ꓐꓳ ꓶꓻ ꓡꓯꓽ ꓬꓰˍ ꓟ ꓚꓱꓹ ꓔꓯ ꓗꓳꓸ ꓘꓳ ꓢꓲ ꓠꓬꓲ ꓡꓳ ꓒꓱ ꓔꓯ ꓫꓬꓹ ꓔꓶˍ ꓟ ꓪ ꓚꓲꓺ ꓫꓵꓽ ꓚꓲ ꓒ ꓕꓲꓺ ꓗꓪ ꓡꓳ ꓒꓱ ꓒꓬꓱꓼ ꓡ ꓗꓷ ꓟ ꓥꓳ= ꓟꓬꓽ ꓠꓬꓲ ꓠꓬ ꓣꓳ-ꓟ ꓔꓯ ꓙꓵꓽ ꓗꓷ ꓢꓴ ꓐꓴ ꓠꓬ ꓪ ꓔꓲꓺ ꓐꓴ ꓥ ꓡꓳ ꓐꓰ ꓙꓵꓻ ꓔ ꓟ ꓥꓳ=

ꓣꓳ-ꓟ ꓗꓴꓷꓼ ꓐꓰ ꓣꓳ-ꓟ Empire 500

ꓘꓳꓼ ꓗꓪ ꓛꓲꓺ ꓙꓳ ꓗꓷ ꓢꓲ ꓟꓲ-ꓠꓯ-ꓔꓱ-ꓦꓲ-ꓬꓲ-ꓡꓴ-ꓐꓱ ꓖꓼ ꓡꓯꓼ ꓖꓼ ꓙꓲ ꓗꓪ ꓣꓳ-ꓟ ꓐꓴ ꓡꓰ ꓟꓵꓽ ꓔꓯ ꓫꓬꓹ ꓪꓴꓽ ꓗꓷꓳ= ꓣꓳ-ꓟ ꓠꓬ Empire ꓟꓵꓽ ꓗꓪ ꓟ ꓬꓲꓸ ꓚꓳꓻ ꓟꓶ ꓒꓬꓱꓼ ꓡ ꓗꓷ ꓢꓲ ꓾ ꓮ-ꓗꓴꓸ-ꓢꓶ-ꓔꓴ ꓪ ꓔꓲ ꓦꓬꓼ ꓠꓬꓲ ꓗꓪ Empire ꓔꓯ ꓙꓵꓽ ꓢꓴ ꓐꓴ ꓠꓬ ꓪ ꓔꓲ ꓐꓴ ꓒꓬꓱꓼ ꓡ ꓗꓷꓳ= ꓣꓳ-ꓟ ꓠꓬ Europe ꓐꓶꓻ ꓓꓵꓽ ꓐꓰ ꓖꓴ ꓪꓴꓸ꓾ ꓖꓴ ꓪꓴꓸ Africa ꓐꓰ Middle East ꓗꓪ ꓛꓲꓺ Empire ꓟꓵꓽ ꓫꓬꓹ ꓔꓶ ꓗꓷ ꓟ ꓥꓳ= ꓖꓳ ꓟ ꓪꓴꓸ ꓠꓬꓲ ꓣꓳ-ꓟ ꓠꓬ ꓐꓳ ꓶꓼ ꓮ ꓟꓬꓹ ꓙꓳ ꓢꓲ ꓾ ꓡꓲꓽ ꓒꓲꓼ ꓦꓲꓻ ꓓꓽ ꓟ ꓐꓴ ꓐꓱꓼ ꓶ ꓣꓱꓽ ꓖꓴ ꓕꓲ ꓟ ꓒꓬꓱꓼ ꓡ ꓗꓷꓳ=

ꓪ ꓔꓲ Constantine ꓠꓬ꓾ ꓓꓽ ꓪꓴꓸ ꓬꓲꓸ ꓠꓬ ꓙꓲ-ꓢꓴ ꓢꓲ ꓤ ꓒꓬꓱꓼ ꓡ ꓗꓷ ꓢꓲ ꓾ꓬꓲꓸ ꓪꓴ-ꓢ ꓫꓵꓼ ꓐꓱ ꓶ ꓦꓲꓻ ꓓꓽ ꓟ ꓫꓬꓹ ꓟ ꓐꓰ꓾ ꓡꓳ ꓒꓱ ꓘꓴꓽ ꓗꓪ ꓟ ꓚꓬꓹ ꓚꓱꓹ ꓐꓰ ꓟꓬꓱꓽ ꓣꓱꓽ ꓚꓱꓹ ꓔꓯ ꓡꓶꓸ ꓗꓷˍ ꓟ ꓔꓯ ꓬꓰˍ ꓡꓳ= ꓝꓮꓲ ꓬꓲ ꓠꓬ Empire ꓟꓵꓽ ꓕꓲꓽ ꓐꓶꓽ ꓛꓲ ꓔꓯ ꓣꓳ-ꓟ ꓙꓵꓽ ꓪ ꓙꓳ ꓢꓴ ꓐꓴ ꓫꓬꓹ ꓪꓴꓽ ꓔꓬꓹ ꓟ ꓗꓪ Empire ꓡꓳ ꓒꓱ ꓫꓵꓼ ꓥ ꓟ Constantinople ꓔꓯ ꓫꓬꓹ ꓜꓶꓻ ꓗꓷꓳ= ꓚꓵꓺ ꓚꓵꓺ ꓐꓯˍ ꓠꓬ꓾ Constantine ꓦꓬꓼ ꓠꓬꓲ ꓗꓳꓸ ꓗꓷ ꓗꓸ ꓠꓯꓸ ꓪꓺ ꓔꓲ ꓮ ꓡꓲ ꓕꓲ ꓣꓳˍ ꓟꓲ ꓣꓳ-ꓟ ꓔꓯ ꓬꓲꓸ ꓪ ꓐꓴ ꓮ ꓕꓯꓹ ꓟꓲ ꓔꓬꓹ ꓟ ꓦꓲ ꓐꓰ ꓢꓷꓸ ꓙ ꓟꓳ ꓙ ꓗꓷ ꓟ ꓟꓽ ꓙꓳ= ꓐꓶꓻ ꓓꓵꓽ ꓟꓵꓽ Empire ꓠꓬ ꓕꓲ ꓠꓬꓲ ꓔꓬꓹ ꓕꓲ ꓠꓬꓲ ꓣꓳꓺ ꓡꓰ ꓢꓲ꓾ ꓣꓳ-ꓟˍ ꓟꓲ ꓧꓶꓸ ꓕꓯ ꓟ ꓡꓰ ꓛꓲꓺ ꓟꓽ ꓪꓴꓽ ꓗꓷ ꓡꓰꓳ= ꓐꓸꓚꓸꓰ 410 ꓕꓯ Alaric ꓐꓰ Goths ꓐꓴ ꓡꓰ ꓣꓳ-ꓟ ꓔꓯ Empire ꓟꓵꓽ ꓗꓪ ꓐꓰ ꓒꓰꓹ ꓓꓳ ꓗꓷꓳ=

ꓣꓳ-ꓟ ꓐꓬ ꓡꓰˍ ꓟ ꓐꓰ ꓔꓲꓺ ꓒ ꓪ ꓔꓲ ꓐꓴ ꓓꓳꓻ ꓡˍ ꓟ

ꓐꓶꓻ ꓓꓵꓽ ꓟꓵꓽ ꓙꓵꓽ ꓪ ꓡꓳꓹ ꓬꓰ ꓟ ꓠꓬ ꓣꓳ-ꓟ ꓔꓲꓺ ꓒ ꓓꓽ Leo I ꓦꓬꓼ ꓠꓬꓲ ꓥ ꓟ 476 ꓕꓯ ꓒꓬꓱꓼ ꓗꓷ ꓟ ꓥ ꓡꓳ= Lombard ꓐꓰ Byzantine ꓐꓴ ꓠꓬꓲꓽ ꓗꓴꓸ ꓚꓸꓼ ꓗꓪ ꓟꓯꓼ ꓓꓶꓽ ꓡꓯ ꓘꓳ ꓗꓷ ꓢꓲ꓾ ꓐꓶꓻ ꓓꓵꓽ ꓟꓵꓽ ꓐꓴ ꓐꓰ ꓣꓳ-ꓟ Empire ꓕꓶꓻ ꓞꓹ ꓓꓴ ꓐꓱ ꓶ ꓢꓯꓼ ꓕꓵꓼ ꓗꓷꓳ=

600 ꓘꓳꓼ ꓖꓼ ꓡꓯꓼ ꓖꓼ ꓙꓲ ꓕꓯ ꓪ ꓔꓲ Gregory ꓡꓰ ꓪꓴꓸ ꓔꓴ ꓗꓷ ꓟ ꓔꓲꓺ ꓒ ꓪ ꓔꓲ ꓙꓵꓽ ꓪ ꓐꓰ ꓙꓲ-ꓢꓴ ꓢꓲ ꓤ ꓐꓴ ꓙꓵˍ ꓟ ꓦꓬꓼ ꓠꓬꓲ ꓓꓳ ꓡ ꓗꓷꓳ= Europe ꓟꓵꓽ ꓗꓪ ꓙꓲ-ꓢꓴ ꓢꓲ ꓤ ꓙꓵꓽ ꓪ ꓙꓳ ꓢꓴ ꓐꓴ ꓓꓳ ꓡ ꓟ ꓡꓰ ꓐꓰ ꓔꓲꓺ ꓒ ꓪ ꓔꓲ ꓐꓰ ꓣꓳ-ꓟ ꓠꓬ ꓦ ꓡꓱ ꓢꓴ ꓐꓴ ꓐꓱ ꓶ ꓟꓽ ꓙꓳ ꓟꓽ ꓓ ꓟ ꓕꓲ ꓖꓺ ꓒꓬꓱꓼ ꓡ ꓗꓷ ꓟ ꓥꓳ=

ꓡꓳ ꓒꓱ ꓟꓬꓱ ꓔꓯ ꓘꓶꓽ ꓫꓵꓽ ꓡꓵ ꓗꓪ ꓟꓳꓸ ꓖꓶ ꓔ ꓟ ꓠꓬ ꓟꓽ ꓙꓳ ꓐꓯˍ ꓥ ꓟꓲ꓾ ꓘꓶꓽ ꓫꓵꓽ ꓫꓵꓼ ꓗꓪ ꓠꓬ ꓮ ꓟꓬꓹ ꓟꓳꓸ ꓖꓶ ꓔ ꓡꓳ = ꓣꓳ-ꓟ ꓠꓬ ꓘꓶꓽ ꓫꓵꓽ ꓡꓵ ꓐꓰ ꓘꓶꓽ ꓫꓵꓽ ꓫꓵꓼ ꓠꓬꓲꓽ ꓗꓴꓸ ꓚꓸꓼ ꓗꓪ ꓬꓲꓸ ꓞꓲꓼ 400 ꓘꓳꓼ ꓛꓲꓺ ꓟꓬꓱ ꓓꓳꓽ ꓙꓳ ꓗꓷꓳ= ꓦꓬꓼ ꓠꓬꓲ ꓖꓳ ꓟ ꓘꓴꓽ ꓗꓪ ꓬꓲ-ꓢꓷ-ꓡꓲ ꓞꓳ ꓫꓵꓽ ꓐꓴ ꓠꓬ ꓘꓷ-ꓕꓲ-ꓟꓷ(Greek) ꓙꓵꓽˍ ꓟ ꓠꓯꓸꓼ ꓗꓪ ꓓꓹ ꓟ ꓥ ꓢꓲ꓾ ꓗꓸ ꓠꓯꓸ ꓠꓬ ꓣꓳ-ꓟ Empire ꓙꓵꓽˍ ꓟ ꓠꓯꓸ ꓗꓪ ꓓꓵꓽ ꓡꓰꓳ= ꓖꓳ ꓕꓯ ꓟꓲ-ꓠꓯ-ꓔꓱ-ꓦꓲ-ꓬꓲ-ꓡꓴꓽ-ꓐꓱ ꓗꓪ ꓟ ꓟꓵꓽ ꓮ ꓟꓬꓹ ꓔꓯ ꓣꓳ-ꓟ ꓐꓴ ꓡꓰ ꓙꓵꓽ ꓗꓷ ꓟ ꓥꓳ= ꓣꓳ-ꓟ Empire ꓘꓴꓽ ꓔꓬꓹ ꓟ ꓣꓳ-ꓟ ꓞꓳ ꓫꓵꓽ ꓐꓴ ꓠꓬ ꓠꓬꓲꓺ ꓙ ꓡꓳꓸ ꓙˍ ꓟ ꓟꓶˍ ꓡꓳ= ꓗꓸ ꓠꓯꓸ ꓟꓵꓽ ꓔꓯ ꓓꓶꓽ ꓧꓪꓸ ꓡꓰ ꓢꓲ ꓡꓳꓽ ꓔ ꓟ ꓟꓶ ꓢꓴ ꓞꓳ ꓫꓵꓽ ꓐꓴ ꓠꓬ ꓠꓬꓲꓺ ꓙ ꓡꓳꓸ ꓙˍ ꓟ ꓟꓽ ꓟꓶ= ꓣꓳ-ꓟ Empire ꓘꓴꓽ ꓗꓪ ꓔꓬꓹ ꓐꓯꓸ ꓥˍ ꓟꓲ ꓣꓳ-ꓟ ꓡ ꓞꓳ ꓒꓬꓱꓼˍ ꓟ ꓙꓵꓽ ꓪ ꓟꓽ ꓟꓶ=

ꓣꓳ-ꓟ ꓪ ꓔꓲ ꓢꓲ-ꓢ ꓮ-ꓗꓴꓸ-ꓢꓶ-ꓔꓴ ꓡꓰ ꓞꓳ ꓵ ꓟꓬꓱ ꓐꓳ ꓠꓹ ꓟ ꓕꓵꓼ ꓪ ꓖꓶˍ ꓟ ꓪꓴꓸ ꓠꓬꓲ꓾ꓬꓰ-ꓢꓴ ꓦꓵꓻ ꓡˍ ꓟ ꓬꓲꓸ ꓙꓵꓹ ꓛꓲꓺ ꓡ ꓕꓯ ꓟ-ꓡꓲ ꓐꓰ ꓬꓳ-ꓢꓷ ꓐꓴ ꓔꓯ ꓐꓱ-ꓡꓱ-ꓦꓱ ꓗꓪ ꓙꓰ ꓝꓲˍ ꓟ ꓗꓪ ꓐꓰ ꓟꓷꓽ ꓠꓷꓹ ꓝꓸ ꓔ ꓟ ꓔꓯ ꓐꓲꓻ ꓡꓰ ꓝꓲ ꓗꓷꓳ (ꓡꓴ-ꓘ 2ꓽ1-6)= ꓐꓱ-ꓡꓱ-ꓦꓱ ꓐꓰ ꓖꓳ ꓗꓪ ꓟ 2 ꓘꓳꓼ ꓐꓰ 2 ꓘꓳꓼ ꓠꓯꓸ ꓗꓪ ꓟ ꓤ ꓠꓱ ꓤ ꓑꓸ ꓤ ꓐꓴ ꓔꓯ ꓢꓰꓼ ꓗꓷ ꓟ ꓩꓴ-ꓡꓲ ꓪ ꓔꓲ ꓠꓬ ꓣꓳ-ꓟ Empire ꓪ ꓔꓲ ꓡꓰ ꓪ ꓔꓲꓸ ꓙꓵꓽ ꓪ ꓖꓶˍ ꓟ ꓟꓶ ꓗꓷꓳ= ꓬꓰ-ꓢꓴ ꓙꓲ-ꓢꓴ ꓐꓰ ꓬꓲꓸ ꓝꓲ ꓓꓴ ꓐꓴ ꓠꓬ ꓙꓱ-ꓣꓴ-ꓢ-ꓡꓱ ꓐꓰ ꓩꓱ-ꓡꓲ-ꓫꓵ ꓗꓪ ꓟ ꓣꓳ-ꓟ ꓟꓯꓼ ꓐꓴ ꓐꓰ ꓙꓺ ꓡꓯꓽ ꓘꓳꓹ ꓟ ꓙꓳˍ ꓡꓳ= ꓬꓰ-ꓢꓴ ꓠꓬ ꓟꓯꓼ ꓢꓲꓽ ꓒ ꓬꓲꓸ ꓚꓳ ꓑꓸ ꓔꓯ ꓠꓻ ꓫꓬꓹ ꓖꓶ ꓗꓷꓳ= (ꓡꓴ-ꓘ = 7ꓽ1-10)

ꓡꓳꓹ ꓬꓰˍ ꓔꓯ ꓬꓳ-ꓔ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ ꓬꓰ-ꓢꓴ ꓔꓯ ꓢꓰꓼ ꓠꓹ ꓟ ꓓꓵꓽ ꓙꓽ ꓞꓷꓹ ꓕꓯ ꓣꓳ-ꓟ ꓐꓴ ꓔꓯ ꓬꓰ ꓙ ꓠꓹ ꓟ ꓓꓰꓽ ꓗꓷꓳ= ꓒꓲ-ꓡ ꓠꓬ ꓣꓳ-ꓟ ꓪ ꓔꓲꓺ ꓢꓲꓺ ꓥ ꓢꓲ ꓡꓳꓹ ꓬꓰˍ ꓕꓯ ꓢꓰꓼ ꓠꓹ ꓟ ꓡꓯꓼ ꓙꓱ ꓖꓶꓽ ꓗꓷ ꓢꓴ ꓥ ꓡꓳ= ꓬꓳ-ꓦ 19ꓽ12-16 ꓗꓪ ꓬꓴ-ꓔ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓡꓰ ꓒꓲ-ꓡ ꓔꓯ ꓪ ꓔꓲ ꓢꓲ-ꓢ ꓔꓯ ꓠ ꓡꓳꓸ ꓟꓽ ꓠ ꓡꓳꓸ ꓟ ꓔꓯ ꓠ ꓠꓬꓲ ꓗꓷ ꓢꓲ꓾ ꓬꓰ-ꓢꓴ ꓔꓯ ꓢꓰꓼ ꓝꓲ ꓠꓹ ꓟ ꓬꓲ ꓔꓯ ꓕꓵꓼ ꓪ ꓖꓶˍ ꓡꓳ=

ꓗꓸ ꓠꓯꓸ ꓕꓯ ꓠꓬ꓾ ꓒꓳ-ꓡꓳ ꓠꓬ ꓪ ꓔꓲ ꓢꓲ-ꓢ ꓟꓲꓽ ꓙꓬꓼ ꓗꓪ ꓓꓰꓺ ꓘꓶꓽ ꓟꓶ ꓠꓹ ꓟ ꓐꓱ ꓶ ꓣꓳ-ꓟ ꓡꓳ ꓒꓱ ꓗꓪ ꓙꓰˍ ꓡꓳ= ꓣꓳ-ꓟ ꓡꓳ ꓒꓱ ꓗꓪ ꓘꓴ-ꓜꓲ-ꓞꓳ ꓔꓯ ꓬꓲꓸ ꓡꓰ ꓟꓽ ꓪꓴꓸ ꓔꓴ ꓔ ꓥˍ ꓟꓲ꓾ ꓣꓳ-ꓟ ꓡꓳ ꓒꓱ ꓢꓴ ꓐꓴ ꓔꓯ ꓐꓳ ꓔ ꓟ ꓬꓲꓸ ꓕꓳꓽ ꓶ ꓠꓬ ꓣꓳ-ꓟ ꓗꓪ ꓘꓴ-ꓜꓲ-ꓞꓳ ꓮ ꓡꓰ ꓐꓰ ꓪꓴꓸ ꓔꓴ ꓗꓷ ꓟ ꓔꓯ ꓖꓴ ꓟꓳꓸ ꓖꓶ ꓔ ꓟ ꓕꓳꓽ ꓶ ꓥ ꓡꓳ ꓐꓰ ꓐꓯ ꓓꓹ ꓡꓳ= ꓣꓳ-ꓟ ꓡꓳ ꓒꓱ ꓢꓴ ꓐꓴ ꓠꓬ ꓬꓲ ꓒꓬꓱꓽ ꓔꓯ ꓟꓽ ꓟꓳ ꓠꓬꓲ ꓢꓲ ꓬꓲꓸ ꓟꓸ ꓖꓶˍ ꓟ ꓔꓯꓸ ꓡꓰꓽ ꓑ ꓙ ꓠꓬꓲ ꓢꓴ ꓐꓴ ꓥ ꓡꓳ=

ꓟꓵꓽ ꓢꓲꓺ ꓡꓲꓺ ꓗꓷ ꓡꓰ ꓠ ꓣꓳ-ꓟ ꓐꓴ ꓡꓰ ꓬꓰ ꓐ ꓡˍ ꓟ ꓪꓴꓸ ꓠꓬꓲ ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚˍ ꓟ ꓟꓵꓽ ꓠꓬ ꓞꓼ ꓞꓼ ꓒꓬꓱꓻ ꓙꓰˍ ꓡꓳ= ꓣꓳ-ꓟ ꓙꓵꓽˍ ꓟ ꓠꓯꓸ ꓗꓪ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓒꓬꓱꓻ ꓓꓴ ꓐꓱ ꓶ ꓮ ꓙꓵꓽ ꓣꓱꓽˍ ꓟ ꓥꓳꓽ ꓕꓲ ꓫꓵꓽ ꓙꓳˍ ꓡꓳ= ꓬꓲꓸ ꓪ ꓐꓴ ꓡꓰ ꓙ ꓖꓴ ꓮ ꓫꓵꓹ ꓫꓵ ꓫꓬꓹ ꓗꓷ ꓟ ꓪꓴꓸ ꓠꓬꓲ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓓꓴ ꓐꓱ ꓶ ꓪ ꓙꓲ ꓢ ꓡꓰ ꓟ ꓥꓳ= ꓝꓮꓲꓸ ꓕꓲ ꓫꓵꓽ ꓟ ꓠꓬ꓾ ꓣꓳ-ꓟ ꓙꓵꓽ ꓪ ꓠꓯꓸ ꓗꓪ ꓫꓵꓽ ꓪꓴꓽ ꓮ ꓟꓬꓹ ꓟꓽ ꓓꓳ ꓡ ꓟ ꓪꓴꓸ ꓠꓬꓲ꓾ ꓕꓲꓽ ꓦꓬ ꓘꓳꓼ ꓖꓼ ꓡꓯꓼ ꓖꓽ ꓙꓲ ꓗꓪ ꓘꓴ-ꓜꓲ-ꓞꓳ ꓪꓴꓽ ꓡ ꓠꓹ ꓟ ꓬꓰˍ ꓟ ꓗꓪ ꓝꓲ ꓓꓴ ꓐꓴ ꓐꓰ ꓶꓼ ꓓꓳ ꓫꓱꓹ ꓓꓳ ꓚꓺ ꓢꓴ ꓐꓴ ꓙꓳꓺ ꓗꓽ ꓓꓴ ꓟꓽ ꓙꓳ ꓙꓳ ꓟꓬꓱꓽ ꓬꓰ ꓐ ꓡ ꓗꓷꓳ=

ꓣꓳ-ꓟ ꓐꓴ ꓐꓱ ꓶ ꓬꓲꓸ ꓔꓶ ꓙꓱꓼ ꓠꓬ ꓬꓲꓸ ꓪ ꓐꓴ ꓡꓰ ꓫ ꓟꓶ ꓔ ꓟ ꓟꓵꓽ ꓘꓴꓽ ꓗꓪ ꓢꓲꓺ ꓡꓲꓺ ꓟ ꓙꓳ ꓔꓬꓹ ꓠꓹ ꓟ ꓥ ꓡꓳ= ꓬꓲꓸ ꓪ ꓐꓴ ꓠꓬ ꓣꓳ-ꓟ ꓐꓰ ꓣꓳ-ꓟ ꓪ ꓔꓲ ꓔꓯ ꓣꓱꓽ ꓙ ꓔꓬꓹ ꓕ ꓑꓳꓸꓼ꓾ ꓬꓲꓸ ꓪ ꓐꓴ ꓠꓲꓹ ꓫꓵˍ ꓟ ꓔꓯ ꓦꓻ ꓡꓱ ꓪꓴꓸ ꓓꓵ ꓕꓱꓽ ꓓꓹ ꓡꓳ= ꓣꓳ-ꓟ Emperor ꓗꓪ ꓟ ꓡꓽ ꓞꓳ ꓐꓴ ꓠꓬ ꓣꓳ-ꓟ ꓢꓲꓺ ꓐꓴ (ꓥ ꓠꓬ) ꓣꓳ-ꓟ ꓪ ꓔꓲꓸ ꓔꓯ ꓢꓰꓼ ꓔꓲꓺ ꓓꓴ ꓬꓰ ꓖꓶꓽ ꓔꓬ ꓕ ꓑꓳꓸꓼ ꓠꓬ ꓬꓲꓸ ꓪ ꓐꓴ ꓦꓻ ꓡꓱ ꓔ ꓟ ꓪꓴ-ꓢ ꓔꓯˍ ꓟꓲ ꓔꓲꓺ ꓖꓶ ꓐ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓕꓱ ꓟ ꓠꓬ ꓬꓳ-ꓔ ꓢꓳ ꓐꓰ ꓙꓲ-ꓢꓴ ꓢꓲ ꓤ ꓐꓴ ꓐꓱ ꓶ ꓬꓰ ꓫꓸ ꓓꓴ ꓕꓲꓽ ꓫꓵꓽ ꓒꓬꓱꓼ ꓡˍ ꓡꓳ= ꓮꓸ ꓫꓵꓽ ꓪꓴꓸ ꓠꓬꓲ ꓥ ꓐꓯˍ ꓠꓬ ꓾ ꓬꓴ-ꓔ ꓐꓴ ꓬꓲꓸ ꓦꓬꓼ ꓠꓬꓲ ꓟꓶ ꓤ ꓣꓱꓽ ꓗꓳꓸ ꓡ ꓟ ꓡꓲꓽ ꓒꓲꓼ ꓐꓴ ꓪꓴꓸ ꓠꓬꓲ ꓣꓳ-ꓟ ꓐꓴ ꓠꓬ ꓬꓲꓸ ꓪ ꓐꓴ ꓔꓯ ꓡꓲꓹ ꓗꓷ ꓝꓲ ꓔ ꓟ ꓥꓳ= ꓙꓲ-ꓢꓴ ꓢꓲ ꓤ ꓐꓴ ꓠꓬ ꓬꓴ-ꓔ ꓦ ꓡꓱ ꓚꓱꓹ ꓗꓪ ꓐˍ ꓥꓳ ꓐꓰ ꓓꓵꓽ ꓙ ꓔ ꓠꓬꓲ ꓾ ꓙꓲ-ꓢꓴ ꓢꓲ ꓤ ꓐꓴ ꓟꓲ ꓣꓳ-ꓟ ꓢꓲꓺ ꓐꓴ ꓔꓯ ꓢꓰꓼ ꓔꓲˍ ꓟ ꓙꓵꓽ ꓗ ꓗꓪ ꓐꓰ ꓡꓲꓹ ꓗꓷ ꓐ ꓡˍ ꓟ ꓥꓳ=

ꓖꓳ ꓡꓱ ꓥ ꓟꓲ ꓬꓳ-ꓔ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓠꓲꓹ ꓙꓳꓺˍ ꓟ ꓪꓴꓸ ꓠꓬꓲ ꓬꓰ ꓫꓸ ꓓꓴ ꓒꓬꓱꓼ ꓡ ꓟ ꓥꓳ= ꓝꓮꓲ ꓕꓲ ꓒꓳꓹ ꓐꓯˍ ꓠꓬ꓾ ꓬꓳ-ꓔ ꓢꓳ ꓐꓴ ꓠꓬ ꓘꓶꓻ ꓙꓵ ꓠꓹ ꓟ ꓐꓱ ꓶ ꓣꓳ-ꓟ ꓙꓵꓽ ꓪ ꓔꓯ ꓣꓱꓽ ꓗꓷ ꓟ ꓥꓳ= ꓝꓲ ꓓꓴ ꓕꓳꓽ ꓶ ꓗꓪ ꓟꓬꓽ ꓠꓬꓲ ꓠꓬ ꓾ ꓙꓲ-ꓢꓴ ꓢꓲ ꓤ ꓐꓴ ꓠꓬ ꓣꓳ-ꓟ ꓙꓵꓽ ꓪ ꓙꓳ ꓢꓴ ꓐꓴ ꓐꓰ ꓙ ꓡꓯꓽ ꓘꓳꓹ ꓟ ꓗꓪ ꓟꓽ ꓐ ꓥˍ ꓟꓲ꓾ ꓬꓴ-ꓔ ꓞꓳ ꓫꓵꓽ ꓐꓴ ꓐꓰ ꓐꓶꓽ ꓞꓳ ꓐꓴ ꓠꓬ ꓙꓲ-ꓢꓴ ꓢꓲ ꓤ ꓐꓴ ꓓꓳꓽ ꓔꓯ ꓗꓽ ꓕꓸ ꓠꓹ ꓟ ꓣꓳ-ꓟ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓟꓽ ꓠꓽ ꓠꓽ ꓕꓵꓼ ꓪꓽ ꓖꓶ ꓗꓷꓳ= ꓝꓲ ꓓꓴ ꓒꓳꓹ-ꓡꓳ ꓚꓱꓹ ꓗꓪ꓾ꓒꓳꓹ-ꓡꓳ ꓔꓯ ꓣꓳ-ꓟ ꓞꓳ ꓫꓵꓽ ꓕꓲ ꓐꓱꓻ ꓡꓰ ꓬꓲꓸ ꓔꓯ ꓓꓰꓺˍ ꓟ ꓗꓪ ꓐꓰ ꓚꓬꓴꓸ ꓓꓳ ꓡ ꓗꓷꓳ=

ꓟꓳꓸ ꓖꓶ ꓓꓴ ꓕꓳꓽ ꓶ ꓗꓪ ꓠꓬ ꓣꓳ-ꓟ ꓟꓬꓱ ꓔꓯ ꓟꓳꓸ ꓖꓶ ꓔ ꓟ ꓟꓽ ꓙꓳ ꓥˍ ꓟꓲ ꓡꓳ ꓒꓱ ꓖꓳ ꓟ ꓔꓯ ꓖꓴ ꓟꓳꓸ ꓖꓶ ꓔ ꓡꓳ= ꓟꓳꓸ ꓖꓶ ꓓꓴ ꓕꓳꓽ ꓶ 17ꓽ ꓗꓪ ꓾ ꓐ-ꓐꓲ-ꓡꓶꓽ ꓗꓪ ꓟ ꓖꓳ ꓪꓴꓽ ꓟ ꓠꓬ ꓪꓴꓸ ꓓꓵꓺ ꓫꓵꓽ ꓟ ꓐꓰ ꓪꓴꓸ ꓛꓲ ꓞꓲ ꓗꓸ ꓙꓳˍ ꓟ ꓓꓴꓽ ꓪꓴ ꓜꓶꓽ ꓔ ꓟ ꓔꓯ ꓟꓳˍ ꓡꓳ = ꓪꓴꓸ ꓓꓵ ꓫꓵꓽ ꓟ ꓠꓬ ꓪ ꓚꓲ ꓫꓵꓽ ꓚꓲ ꓔꓯ ꓐꓯ ꓔ ꓟ ꓥ ꓡꓳ= ꓪ ꓚꓲ ꓫꓵꓽ ꓚꓲ ꓕꓯꓽ ꓢꓲ ꓗꓪ ꓫꓬꓹ ꓔꓶ ꓔ ꓟ ꓣꓳ-ꓟ ꓔꓯ ꓮ ꓠꓱ ꓕꓯ ꓾ꓮ ꓟˍ ꓟꓲ ꓟꓽ ꓢꓷꓸ ꓗꓷ ꓟ ꓥꓳ= ꓟꓳꓸ ꓖꓶ ꓓꓴ ꓕꓳꓽ ꓶ 17 ꓗꓪ ꓟꓳꓸ ꓖꓶ ꓔ ꓟ ꓔꓯ ꓡꓳꓸ ꓠꓬꓲ ꓗꓷ ꓠꓬ꓾ ꓣꓳ-ꓟ ꓠꓬ ꓙꓲꓻ ꓫꓬ ꓢꓴ ꓐꓴ ꓔꓯ ꓗꓸ ꓧꓪ ꓠꓹ ꓟ ꓐꓱ ꓶ ꓐ-ꓐꓲ-ꓡꓶ ꓤ ꓟꓶ ꓤ ꓐꓴ ꓔꓯ ꓣꓱꓽ ꓗꓷ ꓟ ꓫꓵꓽ ꓪꓴꓽ ꓡꓰ ꓛꓲ ꓗꓸ ꓧꓪ ꓗꓷ ꓟ ꓾ ꓘꓶꓻ ꓙꓵ ꓗꓷ ꓟ ꓟꓽ ꓙꓳ= ꓕꓱ ꓟ ꓠꓬ ꓶꓼ ꓓꓳꓽ ꓫꓱꓹ ꓓꓳꓽ ꓕꓳ ꓶ ꓐꓰ ꓝꓲ ꓓꓴ ꓕꓳꓽ ꓶ ꓗꓪ ꓟꓳ ꓪ ꓓꓹ ꓟ ꓡꓰ ꓐꓰ ꓥ ꓡꓳ=

ꓣꓳ-ꓟ ꓠꓬ ꓟꓬꓽ ꓠꓬꓲ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓐꓴ ꓟꓵꓽ ꓙꓵꓽ ꓚꓱꓹ ꓐꓰ ꓦ ꓡꓱ ꓚꓱꓹ ꓐꓴ ꓪꓴꓽˍ ꓟ ꓐꓰ꓾ ꓘꓴ-ꓜꓲ-ꓞꓳ ꓚꓺ ꓟꓲꓽ ꓐꓰ ꓐꓶ ꓓꓵꓽ ꓟꓵꓽ ꓡꓲꓽ ꓒꓲꓼ ꓚꓺ ꓟꓲꓽ ꓗꓪ ꓟꓽ ꓓꓽ ꓟꓬꓱ ꓓꓳꓽ ꓙꓳˍ ꓟ ꓕꓲ ꓟ ꓐꓯ ꓢꓲ ꓾ ꓮ ꓟꓶ ꓗꓪ ꓛꓲꓺ ꓙꓳ ꓔꓬ ꓟ ꓥ ꓡꓳ=