ꓤꓼ ꓠꓱ ꓬꓲ ꓟꓳꓹ ꓤꓼ ꓣꓴˍ ꓟ ꓚꓱꓹ (Q & A)

ꓬꓲ ꓚꓰ ꓬꓲ ꓪꓴꓸ ꓕꓳꓽ ꓶ 1ꓽ 28 ꓗꓪ ꓠꓴ ꓪꓽ ꓠꓬ ꓤ ꓦꓱ ꓠꓱ ꓦꓱ ꓢꓲ ꓮꓽ ꓟꓬꓹ ꓟꓬꓽ ꓡ ꓢꓲ ꓠꓬꓲ ꓟꓲ ꓠꓯ ꓗꓪ ꓐꓲ ꓡ ꓝꓲ ꓢꓲ ꓟꓲ ꓠꓯ ꓕꓱ ꓟ ꓔꓯ ꓙꓵꓽ ꓝꓲ ꓐꓰ ꓐꓯˍ ꓡꓳ= ꓖꓳ ꓪꓴꓸ ꓠꓬꓲ ꓪꓴ-ꓢ ꓟꓲ ꓠꓯ ꓞꓳ ꓤꓽ ꓔꓯ ꓚꓰꓼ ꓔ ꓟ ꓠꓬ ꓟꓬꓽ ꓡ ꓐꓶꓹ ꓡ ꓠꓹ ꓟ꓾ ꓤ ꓦꓱ ꓠꓱꓸ ꓦꓱ ꓠꓹ ꓟ ꓐꓱ ꓶ ꓚꓰꓼ ꓔ ꓟ ꓥˍ ꓡꓳ=  ꓟꓽ ꓟꓬꓽ ꓡ ꓠ ꓬꓰˍ ꓟ ꓠꓬ ꓪꓴ-ꓢ ꓠꓲꓹ ꓡꓶꓽ ꓟꓽ ꓥ ꓐꓰ ꓕꓱ ꓡꓰ ꓐꓯ ꓠꓲꓹ ꓫꓵˍ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓪꓴ-ꓢ ꓠꓬ ꓠꓮꓔꓴꓣꓮꓡ ꓡꓮꓪ ꓐꓯˍ ꓟ ꓟꓵꓽ ꓘꓳꓼ ꓒꓳꓹ ꓡ ꓢꓲ ꓒꓬꓱꓼ ꓡ ꓟ ꓔꓯ ꓛꓳ ꓠꓬꓲ ꓔ ꓟ ꓗ ꓫꓵ꓾ ꓛꓳ ꓠꓬꓲ ꓔ ꓟ ꓙꓵꓽ ꓗ ꓕꓱ ꓡꓰˍ ꓫꓵ ꓙꓳ ꓐꓶ= ꓕꓱ ꓟ ꓠꓬ ꓟꓲ ꓠꓯ ꓞꓳ ꓤꓽ ꓟꓽ ꓛꓳ ꓟꓽ ꓓˍ ꓟ ꓥˍ ꓡꓳ= ꓕꓯ ꓥꓳꓽ ꓕꓲꓽ ꓟ ꓐꓯ ꓠꓬ ꓙꓬ ꓝꓲꓸ ꓕꓽ ꓠꓬ ꓬꓲ ꓠꓬꓲ ꓓꓴ ꓔ ꓢ ꓘꓪ ꓫꓵˍ ꓡꓳ= ꓞ ꓝꓲꓸ ꓕ ꓠꓬ ꓬꓲ ꓠꓬ ꓬꓲ ꓠꓬꓲ ꓫꓵꓽ ꓢꓲ ꓢ ꓘꓪ ꓓꓴꓸ ꓔ ꓡꓳ= ꓕꓱ ꓟ ꓔꓯ ꓣꓳ ꓗꓽ ꓕꓸ ꓟꓽ ꓐ ꓡ= 

ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓚꓰꓼ ꓔ ꓟ ꓠꓬ ꓟꓻꓽ ꓡ ꓐꓶꓹ ꓡ ꓠꓹ ꓟ ꓐꓱ ꓶ ꓥ ꓪ= ꓖꓳ ꓡꓰ ꓥˍ ꓟꓲ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓒꓬꓱꓼ ꓡ ꓟ ꓕꓯ ꓛꓳ ꓢꓲ ꓤꓼ ꓠꓱ ꓟꓽ ꓟꓬꓽ ꓡ ꓠꓹ ꓟ ꓬꓰˍ ꓟ ꓔꓯ ꓠꓬ ꓘꓴ ꓜꓲꓼ ꓞꓳ ꓠꓬ ꓙꓵꓽ ꓪꓽ ꓖꓶ ꓔ ꓟ ꓥˍ ꓡꓳ= ꓤꓽ ꓠꓱ ꓮꓽ ꓟꓬꓹ ꓟꓽ ꓣꓴ ꓣꓴ ꓣꓴ ꓠꓲꓹ ꓫꓵˍ ꓟ ꓬꓲ ꓣꓳ ꓡꓰ ꓢꓲ ꓣꓴ ꓟ ꓔꓯ ꓐꓲꓣꓔꓧ ꓚꓳꓠꓔꓣꓳꓡ ꓐꓯˍ ꓟ ꓥ ꓪ= ꓐꓲꓣꓔꓧ ꓚꓳꓠꓔꓣꓳꓡ ꓐꓯˍ ꓟ ꓠꓯꓸꓼ ꓗꓪ ꓕꓱ ꓡꓰ 2 ꓫꓵꓽ ꓙꓳˍ ꓡꓳ= 1 ꓫꓵꓽ ꓠꓬ ꓠꓬꓲꓹ ꓠꓬꓲ ꓟꓲ ꓠꓯ ꓗꓪ ꓟꓲ ꓠꓯ ꓢꓷꓸ ꓠꓲꓹ ꓪꓴ ꓠꓬꓲ ꓤꓼ ꓠꓱ ꓟꓽ ꓪ ꓡ ꓠ ꓗꓽ ꓕꓸ ꓔ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓠꓬꓲꓹ ꓠꓬꓲ ꓟꓲ ꓠꓯ ꓗꓪ ꓟꓬ ꓞꓲꓼ ꓜˍ ꓟ꓾  ꓤꓼ ꓠꓱ ꓟꓽ ꓪ ꓡ ꓠ ꓶ ꓤꓼ ꓶ ꓟꓲ ꓣꓱˍ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓤꓼ ꓠꓱ ꓧꓳꓹ ꓞꓲ ꓡꓰ ꓠ ꓟꓬ ꓞꓲꓼ ꓜˍ ꓟ ꓖꓳ ꓓꓱꓽ ꓠꓬꓽ ꓕꓱ ꓟꓽ ꓗꓶ ꓡꓰ ꓠꓹ ꓟ ꓐꓱ ꓶ ꓟꓬ ꓞꓲꓼ ꓜˍ ꓟ꓾ ꓕꓱ ꓡꓰˍ ꓫꓵꓽ ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓜˍ ꓟ ꓥˍ ꓡꓳ= 

2 ꓫꓵꓽ ꓕꓲꓽ ꓠꓬ ꓟꓵꓽ ꓘꓳꓼ ꓪꓴꓸ ꓠꓬꓲ ꓤꓽ ꓠꓱ ꓮꓽ ꓟꓬꓹ ꓟꓽ ꓣꓴ ꓟ ꓚꓱꓹ ꓥˍ ꓡꓳ= ꓟꓬꓽ ꓠꓬꓲ ꓠꓬ ꓤ ꓟꓶꓼ ꓤꓼ ꓦ ꓐ ꓕꓲꓽ ꓕꓯ ꓕꓲꓽ ꓧꓪꓹ ꓐꓵ ꓞꓲꓽ ꓡꓶꓸ ꓔ ꓟ ꓥˍ ꓠꓬ ꓫꓵꓽ ꓡꓶꓸ ꓔ ꓟ ꓔꓯ ꓛꓳ ꓢꓲ ꓤꓽ ꓠꓱ ꓟꓽ ꓪ ꓡ ꓠ ꓬꓰˍ ꓟ ꓚꓱꓹ ꓥˍ ꓡꓳ= ꓓꓽ ꓪꓴꓸ ꓫꓵꓽ ꓡꓶꓸ ꓔ ꓟ ꓦꓬꓼ ꓠꓬꓲ ꓗꓪ ꓚꓳ  10 ꓦꓬꓼ ꓠꓬꓲ ꓛꓲ ꓠꓬ ꓤꓼ ꓠꓱ ꓟꓽ ꓪ ꓢꓹ ꓟ ꓙꓵꓹ ꓥˍ ꓡꓳ= ꓝꓮꓲ 10 ꓦꓬꓼ ꓛꓲ ꓠꓬ ꓤ ꓠꓱ ꓪ ꓡꓹ ꓙꓵꓹ ꓥˍ ꓡꓳ= ꓖꓳ ꓓꓳ ꓡꓰ ꓗꓸ ꓠꓯꓸ ꓝꓮꓲ 10 ꓦꓬꓼ ꓛꓲ ꓠꓬ ꓤꓼ ꓠꓱ ꓟꓽ ꓪ ꓡ ꓠˍ ꓟ ꓙꓵ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓚꓵ ꓚꓵ ꓟ ꓪ ꓡ ꓠ ꓠꓬ ꓐꓯ ꓟ ꓙꓲ= ꓮ ꓡꓰꓳ ꓐꓯ ꓠꓬ ꓗꓳ ꓓꓱꓽ ꓟꓽ ꓢꓹ ꓕꓯ ꓠꓬ ꓬꓲ ꓙꓵ ꓑ ꓡꓰ ꓡꓶꓸ ꓡꓰˍ ꓟ ꓪꓴꓸ ꓠꓬꓲ ꓥˍ ꓡꓳ= 

ꓕꓱ ꓡꓰ ꓟꓵꓽ ꓘꓳꓼ ꓔꓯ ꓛꓳ ꓢꓲ ꓤꓽ ꓠꓱ ꓟꓽ ꓪ ꓡ ꓠ ꓬꓰˍ ꓟ ꓠꓬ ꓪꓴ-ꓢ ꓠꓲꓹ ꓔꓯ ꓛꓳˍ ꓟ ꓥˍ ꓡꓳ=