ꓤ-ꓐꓱ-ꓘꓹ (ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓤ ꓟꓶ ꓤ)

ꓮ-ꓐ-ꓡ-ꓦ꓾ ꓢ-ꓣ ꓐꓰ ꓬꓲ ꓪ ꓤ ꓬꓲ-ꓢ ꓐꓴ ꓠꓬ ꓪꓴ-ꓢ ꓡꓰ ꓶꓼ ꓙꓳ ꓫꓱꓹ ꓙꓳ ꓝꓲˍ ꓠꓬꓲ ꓬꓲ ꓪ ꓠꓬ ꓕꓲ ꓠꓬꓲ ꓗ ꓠꓯꓸ ꓕꓲ ꓠꓬꓲ ꓮ ꓘꓶꓸ ꓐꓳ ꓡ꓾ ꓐꓳ ꓶ ꓮ ꓟꓬꓹ ꓙꓳ ꓡˍ ꓡꓳ= ꓬꓲ ꓪ ꓠꓬ ꓘꓷ-ꓠ ꓟꓵꓽ ꓗꓪ ꓡꓰꓽ ꓔꓬ ꓢꓲ ꓪꓴ-ꓢ ꓡꓰ ꓬꓲ ꓪ ꓔꓯ ꓕꓵꓼ ꓪ ꓖꓶ ꓡˍ ꓟ ꓮ ꓙꓵꓽ ꓔꓯ ꓛꓳ ꓫꓱꓽ ꓔꓬ ꓡꓳ= ꓗ ꓠꓯ ꓕꓯ ꓢ-ꓣ ꓠꓬ ꓬꓲ ꓞꓲꓼ 127 ꓘꓳꓼ ꓕꓯ ꓫꓵꓻꓳ= ꓮ-ꓐ-ꓡ-ꓦ ꓠꓬ ꓘꓷ-ꓠ ꓟꓵꓽ ꓢꓴ ꓕꓲ ꓣꓳ ꓔꓬ ꓗꓪ ꓪꓴꓻ ꓔ ꓟ ꓟꓵꓽ ꓗꓪ ꓟ ꓭꓸ ꓘꓴꓽ ꓗꓪ ꓢ-ꓣ ꓔꓯ ꓔꓵꓸ ꓗꓷꓳ=

ꓮ ꓟꓶ ꓕꓯ ꓬꓲ-ꓢ ꓠꓬ ꓬꓲ ꓞꓲꓼ ꓪꓴꓽ ꓡ ꓥ ꓟꓲ ꓤ ꓟꓶ ꓟꓽ ꓙꓳ ꓡꓰ ꓢꓰꓽ= ꓖꓳ ꓡꓱ ꓠꓬꓲ ꓬꓲ ꓐꓹ ꓐ ꓮ-ꓐ-ꓡ-ꓦ ꓠꓬ ꓬꓲ ꓔꓯ ꓣꓱꓽ ꓙ ꓢꓴ ꓐꓴ ꓔꓯ ꓙꓵꓽ ꓢꓴ ꓔꓯ ꓘꓴꓻ ꓢꓲ “ꓠꓴ ꓠꓬ ꓥꓪ ꓟꓵꓽ ꓥꓪ ꓡꓳꓻ ꓗꓪ ꓙꓰ ꓢꓲ ꓥꓪ ꓤ ꓐꓱ ꓶ ꓤ ꓟꓶ ꓧꓪ ꓖꓶˍ ꓥꓳ꓾ ꓐꓰ ꓪꓵꓼ ꓙꓱꓼ ꓡꓯ” ꓐꓯ ꓖꓶˍ ꓡꓳ= ꓪꓴ-ꓢ ꓡꓰ ꓮ-ꓐ-ꓡ-ꓦ ꓔꓯ “ꓥꓪ ꓠꓬ ꓕꓱ ꓕꓲ ꓟꓵꓽ ꓔꓯ ꓠꓴ ꓞꓲꓼ ꓤ ꓡꓯꓹ ꓤ ꓔꓯ ꓖꓶˍ ꓥꓳ꓾” ꓐꓰ ꓐꓯ ꓔ ꓟ ꓐꓯ ꓘꓶꓽ ꓐꓲ ꓡꓰ ꓝꓲ ꓠꓹ ꓟ ꓐꓱ ꓶ ꓬꓲ ꓠꓬ ꓬꓲ ꓓꓳ ꓡ ꓗꓷ ꓟ ꓟꓵꓽ ꓗꓪ ꓐꓰ ꓬꓲ ꓤ ꓐꓱ ꓶ ꓤ ꓟꓶ ꓕꓲ ꓣꓳ ꓧꓪ ꓖꓶ ꓠꓲꓹ ꓫꓵˍ ꓟ ꓥ ꓡꓳ= ꓖꓳ ꓕꓯ ꓣꓱꓽ ꓙ ꓢꓴ ꓠꓬ ꓮ-ꓐ-ꓡ-ꓦ ꓬꓲ ꓡꓳꓽ ꓕꓳ ꓞꓲ ꓟ ꓐꓰ ꓒꓵꓽ ꓶꓽ ꓮ ꓟꓬꓹ ꓚꓰꓹ ꓢꓲ ꓬꓲ ꓢꓲ ꓒꓽ ꓮ-ꓐ-ꓡ-ꓦ ꓬꓲ ꓫꓵꓽ ꓬꓲ ꓧꓪ ꓔꓬ ꓟ ꓟꓲ-ꓢꓳ-ꓒꓳ-ꓔ-ꓟꓲ ꓟꓵꓽ ꓗꓪ ꓓꓳ ꓙꓰˍ ꓡꓳ=

ꓣꓱꓽ ꓙ ꓢꓴ ꓖꓳ ꓕꓲ ꓣꓳ ꓠꓬ ꓮ-ꓐ-ꓡ-ꓦ ꓬꓲ ꓕꓲ ꓦꓲ ꓢꓴ ꓔꓬ ꓗꓷ ꓟ ꓟꓵꓽ ꓗꓪ ꓛꓲ ꓬꓰ ꓕꓯ ꓬꓲ ꓡꓳꓽ ꓕꓳ ꓐꓴ ꓔꓯ ꓬꓲꓻ ꓙꓬ ꓖꓶ ꓓꓳꓻ ꓠꓹ ꓟ ꓬꓲꓻ ꓙꓬ ꓘꓴ ꓕꓲ ꓟ ꓗꓪ ꓠꓽ ꓗꓷꓳ= ꓬꓲ-ꓢ ꓐꓱ ꓶ ꓪꓴ-ꓢ ꓡꓰ ꓢꓲꓺ ꓚꓰꓸ ꓔ ꓟ ꓤ ꓟꓶ ꓤ ꓮ ꓡꓲ ꓕꓲ ꓣꓳ ꓥ ꓟ ꓢꓷꓸ ꓡꓰ ꓠꓹ ꓟ ꓐꓱ ꓶ ꓬꓲ ꓠꓬ ꓕꓱ ꓡꓱ ꓪꓽ ꓘꓴˍ ꓡꓳ= “ꓪꓴ-ꓢꓺꓳ꓾ ꓠꓬꓲꓸ ꓠꓬꓲ ꓠꓴ ꓥꓪ ꓔꓯ ꓬꓰ ꓙ ꓡ ꓢꓲ꓾ ꓥꓪ ꓢꓲ ꓒꓽ ꓮ-ꓐ-ꓡ-ꓦ ꓔꓯ ꓠꓴ ꓫꓱꓸ ꓤ ꓠꓲꓹ ꓟꓳꓸ ꓖꓶ ꓡꓯ= ꓥꓪ ꓡꓰ ꓤ ꓟꓶ ꓡꓯꓸ ꓮ ꓡꓲ ꓕꓲ ꓣꓳ ꓔꓯ ꓠꓴ ꓠꓱꓸ ꓐꓬꓻ ꓣꓴ ꓬꓯꓼ ꓡꓰ ꓢꓲ ꓥꓪ ꓔꓯ ꓬꓲꓻ ꓙꓬ ꓮ ꓔꓲꓸ ꓖꓶ ꓓꓳ ꓡꓯ ꓐꓯ ꓖꓶˍ ꓠꓬ꓾ ꓓꓳꓻ ꓡꓯ꓾ ꓠꓴ ꓡꓳꓽ ꓕꓳ ꓔꓯˍ ꓟꓲ ꓥꓪ ꓖꓶ ꓓꓳ ꓛꓵˍ ꓡꓳ꓾ ꓐꓰ ꓒꓳꓹ ꓖꓶ ꓡ ꓝꓲ= ꓖꓳ ꓕꓲ ꓣꓳ ꓠꓬ ꓬꓲ-ꓢ ꓐꓱ ꓶ ꓠꓴ ꓡꓰ ꓢꓲꓺ ꓔ ꓢꓴ ꓒꓬꓱꓼ ꓡ ꓝꓲ” ꓐꓰ ꓪꓽ ꓘꓴˍ ꓡꓳ=

ꓣꓱꓽ ꓙ ꓢꓴ ꓠꓬ ꓖꓳ ꓡꓱ ꓪꓽ ꓘꓴ ꓔꓬ ꓕꓯ꓾ ꓮ ꓘꓶꓸ ꓡꓳꓸ ꓐꓲꓻˍ ꓟ ꓤ ꓟꓶ ꓤ ꓕꓲ ꓣꓳ ꓠꓬ ꓬꓲ ꓠꓱꓸ ꓐꓬꓻ ꓗꓪ ꓬꓲꓻ ꓙꓬ ꓧꓳꓽ ꓠꓹ ꓟ ꓐꓱ ꓶ ꓬꓲꓻ ꓙꓬ ꓘꓴ ꓗꓪ ꓛꓲ ꓡˍ ꓡꓳ= ꓣꓱꓽ ꓙ ꓢꓴ ꓠꓬ ꓔꓷꓹ ꓙꓰ ꓢꓲ꓾ “ꓠꓴ ꓠꓱꓸ ꓐꓬꓻ ꓗꓪ ꓟ ꓬꓲꓻ ꓙꓬ ꓥꓪ ꓔꓯ ꓮ ꓔꓲꓸ ꓖꓶ ꓓꓳꓻ ꓡꓯ” ꓐꓯ ꓖꓶˍ ꓕꓯ ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ “ꓠꓱꓸ ꓐꓬꓻ ꓕꓱ ꓟ ꓗꓪ ꓐꓰ ꓓꓳꓻ꓾ ꓝꓮꓲ ꓠꓴ ꓡꓳꓽ ꓕꓳ ꓐꓴ ꓔꓯˍ ꓟꓲ ꓓꓳ ꓐꓳ ꓡꓰˍ ꓗꓪ ꓛꓲ꓾ ꓬꓲꓻ ꓙꓬ ꓚꓵꓹ ꓖꓶ ꓛꓵˍ ꓡꓳ꓾” ꓐꓰ ꓒꓳꓹ ꓖꓶˍ ꓡꓳ= ꓤ ꓟꓶ ꓤ ꓠꓬ ꓬꓲꓻ ꓙꓬ ꓚꓵꓹ ꓠꓬꓲ ꓡꓳꓽ ꓕꓳ ꓐꓴ ꓔꓯ ꓬꓲꓻ ꓙꓬ ꓖꓶ ꓓꓳꓻ ꓠꓬꓲ ꓐꓰ ꓟꓬꓱꓽ ꓟꓬꓽ ꓔꓬ ꓕꓯ ꓮ-ꓐ-ꓡ-ꓦ ꓬꓲ ꓣꓱꓽ ꓙ ꓢꓴ ꓠꓬ ꓤ ꓟꓶ ꓤ ꓕꓱ ꓕꓲ ꓣꓳ ꓠꓬ ꓬꓲ-ꓢ ꓐꓱ ꓶ ꓪꓴ-ꓢ ꓡꓰ ꓢꓲ ꓔ ꓟ ꓥ ꓟꓽ ꓥ ꓢꓷꓸ ꓠꓹ ꓟ ꓟꓽ ꓪꓳꓹ ꓔꓬ ꓢꓲ ꓡꓳꓸ ꓠꓬꓲ ꓔꓬ ꓡꓳ=

ꓖꓳ ꓗ ꓠꓯꓸ ꓬꓲ ꓡꓰ “ꓠꓴ ꓟꓬꓱꓺ ꓮ ꓡꓲ ꓥ ꓡ? ꓠꓴ ꓠꓬ ꓮꓽ ꓟ ꓮꓸ ꓟꓲꓽ ꓥ ꓡ?” ꓐꓰ ꓠꓺ ꓠꓬꓲˍ ꓕꓯ ꓤ ꓟꓶ ꓤ ꓡꓰ “ꓥꓪ ꓠꓬ ꓤ-ꓐꓱ-ꓘꓹ ꓥꓳ= ꓠ-ꓧꓳ ꓐꓰ ꓟꓲ-ꓡꓷ-ꓘꓷ ꓬꓲ ꓤ ꓐꓱ-ꓕꓴ-ꓡꓷ ꓬꓲ ꓮ ꓟꓲꓽ ꓥꓳ” ꓐꓰ ꓒꓳꓹ ꓖꓶˍ ꓡꓳ= ꓖꓳ ꓕꓯ ꓣꓱꓽ ꓙ ꓢꓴ ꓖꓳ ꓕꓲ ꓣꓳ ꓠꓬ ꓛꓲ ꓝꓲꓸ ꓖꓶꓽ ꓢꓲ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ “ꓥꓪ ꓢꓲ ꓒ ꓮ-ꓐ-ꓡ-ꓦ ꓬꓲ ꓫꓵꓽ ꓤ ꓧꓪ ꓤ ꓦꓲ ꓗꓪ ꓔꓱꓹ ꓔꓱꓹˍ ꓧꓳꓽ ꓛꓲ ꓡ ꓠꓬꓲ ꓪꓴ-ꓢ ꓔꓯ ꓥꓪ ꓫꓱꓸ ꓖꓶˍ ꓥꓳ= ꓮ ꓟꓶ ꓠꓬ ꓪꓴ-ꓢ ꓬꓲ ꓐꓲꓻˍ ꓟ ꓤ ꓟꓶ ꓤ ꓠꓬ ꓬꓲ-ꓢ ꓬꓲ ꓤ ꓟꓶ ꓬꓰ ꓠꓹ ꓟ ꓐꓱ ꓶ ꓥꓪ ꓐꓰ ꓕꓲ ꓛꓳˍ ꓛꓳ ꓙꓰ ꓠꓹ ꓟ ꓐꓱ ꓶ ꓥꓪ ꓪꓽ ꓘꓴˍ ꓥꓳ” ꓐꓰ ꓐꓯ ꓢꓲ ꓪꓽ ꓘꓴˍ ꓡꓳ=

ꓤ-ꓐꓱ-ꓘꓹ ꓥ ꓟꓲ ꓬꓲ ꓦꓲ ꓗꓪ ꓔꓷꓹ ꓙꓰ ꓢꓲ ꓬꓲꓻ ꓙꓬ ꓘꓴ ꓗꓪ ꓒꓬꓱꓼ ꓗꓷ ꓟ ꓐꓴ ꓔꓯ ꓬꓲ ꓟꓹ ꓟ ꓔꓯ ꓐꓯ ꓟꓸ ꓖꓶˍ ꓡꓳ= ꓤ-ꓐꓰ-ꓘꓹ ꓬꓲ ꓮ ꓬꓲꓼ ꓡ-ꓑ-ꓠˍ ꓟꓲ ꓬꓲꓻ ꓙꓬ ꓘꓴ ꓗꓪ ꓔꓷꓹ ꓙꓰ ꓢꓲ ꓣꓱꓽ ꓙ ꓢꓴ ꓐꓰ ꓡꓳꓽ ꓕꓳ ꓐꓴ ꓔꓯ ꓜꓽ ꓓꓴ ꓖꓶ ꓜꓽ ꓠꓹ ꓟ ꓐꓰ ꓪꓴꓽ ꓧꓶ ꓠꓽ ꓝꓲ ꓠꓹ ꓟ ꓬꓲ ꓦꓲꓻ ꓗꓪ ꓘꓴ ꓔꓯꓹ ꓙꓰˍ ꓡꓳ=

ꓣꓱꓽ ꓙ ꓢꓴ ꓖꓳ ꓕꓲ ꓣꓳ ꓠꓬ ꓮ-ꓐ-ꓡ-ꓦ ꓡꓰ ꓬꓲ ꓔꓯ ꓮ ꓡꓲ ꓬꓰ ꓝꓲˍ ꓟ ꓐꓰ ꓤ-ꓐꓱ-ꓘꓹ ꓔꓯ ꓮ ꓡꓲ ꓟꓳꓻ ꓗꓷ ꓟ ꓔꓯ ꓤ-ꓐꓱ-ꓘꓹ ꓕꓲ ꓦꓲꓻ ꓢꓴ ꓔꓯ ꓐꓯ ꓟꓸ ꓖꓶ ꓗꓷꓳ= ꓝꓮꓲ ꓤ-ꓐꓰ-ꓘꓹ ꓔꓯ ꓬꓲ ꓐꓰ ꓕꓲ ꓪ ꓬꓲꓼ ꓙꓰ ꓢꓲ ꓬꓲ-ꓢ ꓤ ꓟꓶ ꓬꓰˍ ꓥꓳ ꓪ꓾ ꓐꓰ ꓠꓺ ꓠꓬꓲˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓡꓰ ꓙꓽ ꓖꓶ ꓔ ꓟ ꓥ ꓠꓬꓲ ꓬꓲ ꓕꓲ ꓦꓲꓻ ꓢꓴ ꓠꓬ ꓮ ꓫꓵꓽ ꓟꓽ ꓐꓯ ꓞꓷꓹ= ꓤ-ꓐꓱ-ꓘꓹ ꓔꓯ ꓓꓵꓽ ꓙꓽ ꓝꓲˍ ꓡꓳ=

ꓤ-ꓐꓱ-ꓘꓹ ꓥ ꓟꓲ ꓘꓷ-ꓠ ꓟꓵꓽ ꓗꓪ ꓙꓰ ꓢꓲ ꓬꓲ-ꓢ ꓬꓲ ꓤ ꓟꓶꓻ ꓬꓰ ꓠꓹ ꓟ ꓢꓪꓸ ꓞꓷꓹ ꓗꓷꓳ= ꓖꓳ ꓗ ꓠꓯꓸ ꓣꓱꓽ ꓙ ꓢꓴ ꓠꓬ ꓮ-ꓐ-ꓡ-ꓦ ꓡꓰ ꓖꓶ ꓝꓲˍ ꓟ ꓒꓴ ꓐꓰ ꓫꓵꓺ ꓡꓰ ꓫꓬꓹ ꓔ ꓟ ꓓꓱꓼ ꓓꓴ ꓖꓪꓽ ꓓꓴ ꓣꓴ ꓓꓳ ꓡ ꓢꓲ ꓤ-ꓐꓱ-ꓘꓹ ꓐꓰ ꓬꓲ ꓕꓲ ꓦꓲ ꓢꓴ ꓔꓯ ꓖꓶˍ ꓡꓳ= ꓗ ꓠꓯꓸ ꓕꓲ ꓠꓯꓼ ꓤ-ꓐꓱ-ꓘꓹ ꓠꓬ ꓬꓲ ꓕꓲ ꓦꓲ ꓢꓴ ꓐꓴ ꓡꓰ ꓶꓼ ꓥꓳꓽ ꓙꓱꓽ ꓖꓶ ꓡˍ ꓟ ꓔꓯ ꓘꓳꓹ ꓣꓴ ꓗꓷ ꓗ ꓠꓯꓸ ꓬꓲ ꓠꓬ ꓬꓲ ꓔꓯ ꓡꓳꓸ ꓙ ꓢꓴ ꓔꓯ ꓧꓳꓽ ꓔ ꓢꓲ ꓮ-ꓐ-ꓡ-ꓦ ꓔꓯ ꓣꓱꓽ ꓙ ꓢꓴ ꓐꓰ ꓕꓲ ꓛꓳˍ ꓙꓰˍ ꓡꓳ=

ꓮ ꓟꓬꓹ ꓠꓬꓲ ꓙꓰ ꓗꓷ ꓗ ꓠꓯꓸ ꓤ-ꓐꓱ-ꓘꓹ ꓡꓳꓸ ꓠꓬꓲ ꓗꓷ ꓕꓯ ꓦ ꓟꓲ ꓗꓪ ꓦꓰꓼ ꓔꓬ ꓟ ꓡ ꓞꓳ ꓕꓲ ꓣꓳ ꓬꓲ ꓪ ꓔꓬ ꓗꓪ ꓡ ꓔꓬ ꓟ ꓔꓯ ꓟꓳꓻ ꓡꓰꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓡꓳꓽ ꓕꓳ ꓕꓯꓽ ꓢꓲ ꓗꓪ ꓐꓰ ꓬꓯꓼ ꓡꓰ ꓢꓲ “ꓣꓳ ꓔꓯ ꓞꓵ ꓡˍ ꓟ ꓖꓳ ꓕꓲ ꓣꓳ ꓠꓬ ꓮꓽ ꓟ ꓥ ꓡ?” ꓐꓰ ꓠꓺ ꓠꓬꓲˍ ꓡꓳ= ꓣꓱꓽ ꓙ ꓢꓴ ꓥˍ ꓟꓲ “ꓥꓪ ꓢꓲ ꓒꓽ ꓬꓲ-ꓢ ꓥꓳ” ꓐꓰ ꓒꓳ ꓖꓶˍ ꓡꓳ= ꓖꓳ ꓗ ꓠꓯꓸ ꓬꓲ-ꓢ ꓐꓰ ꓤ-ꓐꓱ-ꓘꓹ ꓐꓴ ꓡꓯꓽ ꓒꓯꓹ ꓝꓸ ꓗꓷꓳ= ꓬꓲ-ꓢ ꓠꓬ ꓤ-ꓐꓱ-ꓘꓹ ꓔꓯ ꓮ ꓘꓶꓸ ꓠꓲꓹ ꓠꓵˍ ꓡꓳ=

ꓬꓲ ꓘꓳꓼ ꓟꓶ ꓤ ꓗꓷ ꓡꓰˍ ꓗꓪ ꓛꓲ ꓬꓲ ꓪ ꓠꓬꓲꓽ ꓣꓳ ꓔꓯ ꓤ ꓠꓱ ꓟꓽ ꓙꓳ ꓡꓰ= ꓖꓳ ꓡꓱ ꓠꓬꓲ ꓬꓲ-ꓢ ꓠꓬ ꓠꓲꓹ ꓟ ꓟꓽ ꓙꓬ ꓙꓬ ꓟꓶꓽ ꓘꓶꓼ ꓠꓯꓼ ꓠꓯꓼ ꓪꓴ-ꓢ ꓔꓯ ꓪꓽ ꓘꓴˍ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓬꓲ ꓪꓽ ꓘꓴ ꓘꓶ ꓔꓯ ꓓꓽ ꓔꓳꓹ ꓖꓶ ꓢꓲ ꓤ-ꓐꓱ-ꓘꓹ ꓐꓰ ꓬꓲ-ꓢ ꓐꓴ ꓔꓯ ꓤ ꓙꓱꓻ ꓖꓶ ꓡ ꓗꓷꓳ= ꓤ ꓙꓱꓻ ꓖꓳ ꓠꓬꓲꓽ ꓣꓳ ꓠꓬ ꓬꓲ-ꓢꓳ ꓐꓰ ꓬ-ꓗꓴ ꓥ ꓡꓳ= ꓬꓲ-ꓢꓳ ꓐꓰ ꓬ-ꓗꓴ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓳ ꓚꓲꓸ ꓔ ꓟ ꓬꓲ ꓪꓴꓸ ꓟ ꓤ ꓙꓱꓻ ꓐꓴ ꓥ ꓡꓳ= ꓬꓲ ꓪ ꓠꓬꓲꓽ ꓣꓳ ꓠꓬ ꓬꓲ ꓪ ꓟꓹ ꓟ ꓤ-ꓐꓱ-ꓘꓹ ꓦꓰꓽ ꓛꓲ ꓗꓪ ꓔꓬ ꓕꓯ ꓡꓰ꓾ ꓟꓽ ꓦꓵꓻ ꓓꓳ ꓡˍ ꓕꓯ ꓡꓰ ꓶꓸ ꓡꓯꓽ ꓘꓳ ꓔꓬ ꓡꓳ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓤ-ꓐꓱꓘꓹ ꓠꓬ  ꓕꓱ ꓟ ꓮ ꓡꓲ ꓗꓹ ꓡ? ꓐꓰ ꓪꓴ-ꓢ ꓔꓯ ꓠꓺ ꓠꓬꓲ ꓗꓷˍ ꓠꓬ꓾ ꓪꓴ-ꓢ ꓡꓰ ꓬꓲ ꓔꓯ “ꓠꓴ ꓤ ꓘꓶꓻ ꓗꓪ ꓞꓳ ꓫꓵꓽ ꓠꓬꓲꓽ ꓫꓵꓽ ꓓꓯꓹ ꓡꓳ= ꓞꓳ ꓫꓵꓽ ꓕꓱ ꓕꓲ ꓫꓵꓽ ꓠꓬ ꓖꓳ ꓕꓲ ꓫꓵꓽ ꓕꓯꓽ ꓢꓲ ꓪꓽ ꓠꓬꓲ ꓢꓲ꓾ ꓪꓴꓽ ꓢꓴ ꓠꓬ ꓣꓳ ꓢꓴ ꓔꓯ ꓣꓱꓽ ꓙ ꓠ ꓗꓷ ꓡꓰˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=