ꓧ-ꓠ [ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓤ ꓟꓶ ꓤ]

ꓟꓷꓽ ꓠꓷꓹ ꓝ ꓒ ꓢ-ꓟꓴ-ꓬꓰ ꓐꓯ ꓟ ꓠꓬ ꓪꓴ-ꓢ ꓬꓲ ꓡ ꓞꓳ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓧꓳꓽ ꓣꓱꓽ ꓠꓹ ꓟ ꓐꓱ ꓶ ꓢꓲꓺ ꓔ ꓟ ꓘꓶꓽ ꓫꓵꓽ ꓡꓵꓺ ꓦꓬꓼ ꓠꓬꓲ ꓗꓪ ꓐꓯ ꓟꓴ ꓫꓬꓹ ꓒ ꓬꓲ ꓟꓶꓽ ꓕꓲ ꓣꓳ ꓡꓳꓹ ꓬꓰˍ ꓕꓲ ꓣꓳ ꓥ ꓟˍ ꓡꓰ ꓐꓰ꓾ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓫꓬꓹ ꓒ ꓐꓴ ꓡꓰ ꓙꓵꓽˍ ꓟ ꓗꓪ ꓐꓰ ꓪ ꓔꓲꓸ ꓡꓰ ꓙꓵꓽˍ ꓟ ꓠꓯꓸꓼ ꓗꓪ ꓓꓵꓽ ꓡꓰˍ ꓟ ꓗꓪˍ ꓟꓲ ꓢꓳ-ꓡꓳ ꓔꓯ ꓬꓲ-ꓢꓷ-ꓡꓰ ꓐꓴ ꓬꓲ ꓪꓴꓸ ꓟ ꓪ ꓔꓲꓸ ꓙꓵꓽ ꓪ ꓖꓶ ꓢꓴ ꓟꓰ ꓞꓶꓻ ꓟꓰ ꓖꓶ ꓗꓷ ꓢꓴ ꓟꓷꓽ ꓠꓷꓹ ꓝ ꓒ ꓕꓲ ꓣꓳˍ ꓟꓲ ꓥ ꓡꓳ= ꓖꓳ ꓡꓱ ꓠꓬ ꓟꓷꓽ ꓠꓷꓹ ꓝ ꓒ ꓢ-ꓟꓴ-ꓬꓰ ꓮ ꓡꓲ ꓒꓬꓱꓼ ꓪꓴꓸ ꓔꓴˍ ꓟ ꓔꓯ 1 ꓢ-ꓟꓴ-ꓬꓰ 1ꓽ ꓗꓪ ꓢꓳ ꓣꓴ ꓪˍ ꓟ ꓥ ꓡꓳ=

ꓪꓴ-ꓢ ꓐꓯ ꓘꓶꓽ ꓕꓲ ꓘꓶꓽ ꓡꓰ ꓕꓲ ꓘꓶꓽ ꓔꓯ ꓔꓱꓹ ꓔꓱꓹ ꓚꓵ ꓚꓵ ꓛꓳ ꓫꓱꓽ ꓢꓲ ꓪꓴ-ꓢ ꓬꓲ ꓑ ꓫꓬ ꓐꓴ ꓔꓯ ꓬꓲ ꓙꓲꓻ ꓧꓳꓽ ꓣꓱꓽ ꓔꓬ ꓟ ꓐꓯ ꓟꓴ ꓫꓬꓹ ꓒ ꓢ-ꓟꓴ-ꓬꓰ ꓕꓲ ꓣꓳ ꓟꓲ ꓠꓯ ꓗꓪ ꓙꓳ ꓡ ꓠꓹ ꓟ ꓐꓱ ꓶ ꓬꓲ ꓟꓹ ꓟ ꓧ-ꓠ ꓟꓸ ꓟꓲꓽ ꓠꓬ ꓮ ꓘꓶꓸ ꓬꓳꓸ ꓚꓵˍ ꓟ ꓥ ꓡꓳ=

ꓧ-ꓠ ꓬꓲ ꓤ ꓖꓴ꓾ ꓢ-ꓟꓴ-ꓬꓰ ꓬꓲ ꓐꓹ ꓐ ꓠꓬ ꓬꓲ-ꓡꓲ-ꓘꓷ-ꓠ ꓐꓰ ꓘꓴˍ ꓟ꓾ ꓪꓴ-ꓢ ꓔꓯ ꓮ ꓘꓶꓸ ꓙꓳꓺ ꓒꓵꓽˍ ꓟ ꓙꓲˍ ꓟ ꓡ ꓞꓳ ꓒ ꓕꓲ ꓣꓳ ꓥ ꓡꓳ= ꓬꓲ ꓪ ꓠꓬꓲꓽ ꓫꓵꓸ ꓡꓯꓽ ꓒꓯꓹ ꓝ ꓗꓷ ꓟ ꓮ ꓟꓬꓹ ꓘꓳꓼ ꓙꓳ ꓡˍ ꓥ ꓟꓲ ꓧ-ꓠ ꓔꓯ ꓤ ꓠꓱ ꓟꓽ ꓙꓳ ꓡ ꓟ ꓑꓶꓸ ꓓꓴ꓾ ꓡꓳꓹ ꓬꓰˍ ꓕꓯ ꓬꓲ ꓪ ꓠꓬ ꓬꓲ ꓪ ꓕꓲ ꓦꓲꓻ ꓗꓪ ꓤ ꓠꓱ ꓙꓳ ꓡ ꓠꓹ ꓟ ꓐꓱ ꓶ ꓬꓲ ꓪ ꓚꓳ ꓟ ꓕꓲ ꓣꓳ ꓥ ꓟ ꓒꓱ-ꓠꓲ-ꓠ ꓔꓯ ꓧ-ꓠ ꓤ ꓖꓴ ꓬꓲ-ꓡꓲ-ꓘꓷ-ꓠ ꓐꓰ ꓬꓲꓼ ꓔ ꓝꓲ ꓢꓲ ꓤ ꓠꓱ ꓙꓳ ꓡ ꓝꓲˍ ꓕꓯ ꓬꓲ-ꓡꓲ-ꓘꓷ-ꓠ ꓐꓰ ꓒꓱ-ꓠꓲ-ꓠ ꓐꓴ ꓔꓯ ꓤ ꓠꓬꓲꓽ ꓣꓳ ꓙꓳ ꓡꓺꓳ=

ꓚꓵ ꓚꓵ ꓦꓲ ꓕꓴꓽˍ ꓟ ꓐꓰ ꓗꓴꓸ ꓙꓲꓽ ꓙꓳ ꓢꓲ ꓪꓴ-ꓢ ꓡꓰ ꓤ ꓑ ꓤ ꓐꓰ ꓤ ꓟꓶ ꓤ ꓬꓲ ꓪ ꓠꓬꓲꓽ ꓫꓵꓸ ꓠꓬ ꓕꓲ ꓣꓳˍ ꓡꓰꓽ ꓗꓷ ꓡꓰ ꓝꓲˍ ꓥꓳ ꓐꓰ ꓐꓯ ꓔ ꓥ ꓟꓲ꓾ ꓤ ꓠꓱ ꓮ ꓟꓬꓹ ꓙꓳˍ ꓟ ꓠꓬ ꓦꓲꓻ ꓕꓲ ꓦꓲꓻ ꓐꓱ ꓶ ꓬꓲ ꓫꓵꓽ ꓟꓽ ꓒꓲꓼ ꓡꓰ ꓟ ꓟꓬꓱ ꓓꓳꓽ꓾ ꓤ ꓐꓴ ꓠꓬ ꓐꓹ ꓐ ꓬꓰˍ ꓟ ꓟꓬꓱꓽ ꓐꓴ ꓗꓪ ꓬꓰ ꓙˍ ꓟ ꓑꓶꓸ ꓓꓴ ꓦꓲꓻ ꓘꓴꓽ ꓗꓪ ꓙꓳ ꓢꓻ ꓡˍ ꓟ꓾ ꓤ ꓠꓱ ꓮ ꓟꓬ ꓣꓳ ꓙꓳˍ ꓟ ꓗꓪ ꓡꓳꓸ ꓢꓲ ꓦꓲꓻ ꓘꓴ ꓙꓳꓻ ꓢꓻˍ ꓟ ꓔꓯ ꓟꓸ ꓖꓶ ꓐ ꓡˍ ꓟ ꓑꓶꓸ ꓓꓴ ꓤ ꓠꓱ ꓦꓵꓻ ꓠꓹ ꓟ ꓠꓬ ꓤ ꓖꓴ ꓤ ꓟꓶ ꓣꓱꓽ ꓢꓴ ꓐꓴ ꓐꓱ ꓶ ꓬꓳꓸ ꓚꓵˍ ꓟ ꓟꓬꓱꓽ ꓕꓲ ꓟˍ ꓡꓰ ꓐꓰ ꓚꓬꓹ ꓔ ꓢꓲ ꓚꓲꓸ ꓛꓬ ꓣꓴ ꓔ ꓟ ꓤ ꓟꓶ ꓗꓪ ꓤ ꓠꓱ ꓟꓽ ꓙꓳ ꓡ ꓕꓯ ꓣꓴ ꓔ ꓟ ꓤ ꓟꓶ ꓔꓯ ꓒꓰ ꓗꓷ ꓠꓹ ꓟ꓾ ꓟꓽ ꓥ ꓠꓬ꓾ ꓤ ꓠꓱ ꓙꓳ ꓡ ꓠꓹ ꓟ ꓐꓱ ꓶ ꓚꓲꓸ ꓚꓬ ꓤ ꓖꓴ ꓔꓯ ꓠꓱꓸ ꓐꓯ ꓤ ꓟꓶ ꓤ ꓐꓰ ꓬꓲꓼ ꓔ ꓝꓲ ꓠꓯꓹ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓠꓲꓹ ꓡꓶꓽ ꓔꓯ ꓒꓳꓹ ꓔꓳꓹ ꓢꓲ ꓞꓳ ꓤ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓠꓬꓲ ꓚꓲꓸ ꓛꓬ ꓠꓲꓹ ꓫꓵˍ ꓟ ꓬꓰˍ ꓕꓯ ꓠꓲꓹ ꓟ ꓫꓸ ꓓꓴ ꓫꓵꓽ ꓪꓴ ꓓꓳ ꓡˍ ꓟ ꓔꓯ 1 ꓢ-ꓟꓴ-ꓬꓰ ꓕꓳꓽ ꓶ 1ꓽ1-20 ꓗꓪ ꓟꓳꓻ ꓪˍ ꓟ ꓥ ꓡꓳ= ꓢꓲꓽ ꓫꓬ ꓕꓳꓽ ꓶ ꓝꓲꓸ ꓕꓱ ꓟ ꓗꓪ ꓟꓳꓻ ꓪˍ ꓟ ꓡ ꓞꓳ 4 ꓣꓳ ꓔꓯ ꓐꓯ ꓖꓶ ꓩꓴ ꓡˍ ꓥꓳ=

ꓬꓲ ꓪꓴꓸ ꓕꓲ ꓣꓳ ꓠꓬ ꓧ-ꓠ ꓬꓲ ꓤ ꓖꓴ ꓬꓲ-ꓡꓲ-ꓘꓷ-ꓠ

ꓚꓵ ꓚꓵ ꓬꓲ-ꓡꓲ-ꓘꓷ-ꓠ ꓠꓬ ꓮ ꓘꓶꓸ ꓙꓲˍ ꓟ ꓤ ꓖꓴ ꓕꓲ ꓣꓳ ꓥ ꓡꓳ= ꓪꓴ-ꓢ ꓡꓰ ꓖꓶ ꓔ ꓟ ꓕꓵꓼ ꓪ ꓮ ꓙꓵꓽ ꓔꓯ ꓛꓳ ꓫꓱꓽ ꓢꓲ ꓪꓴ-ꓢ ꓔꓯ ꓙꓳꓺ ꓒꓵꓽˍ ꓟ ꓬꓲ-ꓡꓲ-ꓘꓷ-ꓠ ꓠꓬ ꓬꓲ ꓤ ꓟꓶ ꓧ-ꓠ ꓔꓯ ꓟꓽ ꓒꓰꓹ ꓗꓷ ꓟˍ ꓡꓰ ꓐꓰ ꓕꓲ ꓘꓳꓼ ꓕꓲ ꓧꓪꓹ ꓫ-ꓬꓲ-ꓡꓳ ꓗꓪ ꓙꓰ ꓢꓲ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓔꓲ ꓓꓴ ꓢꓰꓼ ꓔꓲˍ ꓕ ꓑꓳꓸ ꓒꓱ-ꓠꓲ-ꓠ ꓐꓰ ꓬꓲ ꓤ ꓠꓬꓲꓽ ꓣꓳ ꓐꓱ ꓶ ꓔꓲ ꓧꓪꓽ ꓕꓲ ꓣꓷ ꓐꓱ ꓖꓶ ꓢꓲ꓾ ꓧ-ꓠ ꓔꓯ ꓠꓽ ꓬꓲ ꓮ ꓘꓶꓸ ꓠꓲꓹ ꓠꓵˍ ꓠꓬꓲ ꓔꓲ ꓧꓪꓽ ꓠꓬꓲꓽ ꓣꓷꓽ ꓐꓱ ꓖꓶˍ ꓡꓳ=

ꓪꓴ-ꓢ ꓟꓲꓽ ꓙꓬ ꓞꓳ ꓤ ꓟꓲꓽ ꓙꓬ ꓗꓪ ꓡꓯꓽ ꓒꓯꓹ ꓝꓸ ꓗꓷ ꓢꓲ ꓚꓲꓸ ꓛꓬ ꓦꓲꓻ ꓢꓴ ꓠꓬ ꓶꓻ ꓡꓯꓼ ꓬꓰˍ ꓟ ꓚꓱꓹ ꓗꓪ ꓟꓽ ꓧꓪꓸ ꓡꓰ꓾ ꓥ ꓠꓬ꓾ ꓤ ꓠꓱ ꓙꓳ ꓟꓽ ꓐ ꓡ ꓟ ꓔꓳꓹ ꓜꓳꓽˍ ꓕꓯ ꓬꓲ ꓔꓯ ꓟꓽ ꓡꓳ ꓔ ꓔ꓾ ꓒ ꓕꓲꓺ ꓗꓪ ꓔꓬ ꓢꓲ ꓠꓵꓻ ꓠꓲꓹ ꓟꓸ ꓖꓶ ꓐ ꓡˍ ꓟ ꓙꓲˍ ꓟ ꓦꓲꓻ ꓢꓲ ꓒ ꓬꓲ ꓫꓱꓹ ꓔꓯ ꓬꓲ-ꓡꓲ-ꓘꓷ-ꓠ ꓔꓬꓹ ꓗꓪ ꓟꓳꓻ ꓐ ꓡˍ ꓟ ꓥ ꓡꓳ=

ꓧꓶꓸ ꓕꓯ ꓚꓳ ꓟ ꓗꓪ ꓐꓰ ꓤ ꓟꓶ ꓒꓬꓱꓼ ꓡ ꓢꓲ ꓤ ꓠꓱ ꓦꓵꓻ ꓐ ꓡ ꓗꓷ ꓟ ꓚꓳ ꓟ ꓒꓱ-ꓠꓲ-ꓠ ꓡꓰ ꓧ-ꓠ ꓔꓯ ꓠꓬꓲꓸ ꓤꓲ ꓢꓲ ꓠꓲꓹ ꓟ ꓫꓸ ꓡꓰ ꓝꓲˍ ꓕ ꓑꓳꓸ ꓧ-ꓠ ꓠꓬ ꓟꓽ ꓜꓽ꓾ ꓟꓽ ꓓꓳꓻ ꓥꓴꓻ ꓔꓬ ꓕꓯ ꓬꓲ-ꓡꓲ-ꓘꓷ-ꓠ ꓠꓬ ꓮ ꓕꓯ ꓟꓲ ꓧ-ꓠ ꓔꓯ ꓠꓲꓹ ꓟ ꓗꓴ ꓖꓶˍ ꓡꓳ= ꓧ-ꓠꓺꓳ꓾ ꓠꓴ ꓮ ꓫꓵꓽ ꓬꓴꓸ ꓠꓬꓲ ꓥꓴꓻ ꓔꓬ ꓡ? ꓮ ꓫꓵꓽ ꓪꓴꓸ ꓠꓬꓲ ꓜ ꓜꓽ ꓠꓲꓹ ꓟꓽ ꓫꓵ ꓡ? ꓮ ꓫꓵꓽ ꓪꓴꓸ ꓠꓬꓲ ꓕꓱ ꓘꓶ ꓠꓲꓹ ꓟ ꓫꓸˍ ꓡ? ꓥꓪ ꓠꓬ ꓠꓴ ꓐꓱ ꓶ ꓤ ꓞꓲ ꓫꓵꓸ ꓢꓶꓸ ꓟꓽ ꓞꓲꓺ ꓒꓵꓽˍ ꓡꓳ ꓟꓽ ꓥ ꓡ? ꓐꓯ ꓢꓲ ꓠꓲꓹ ꓟ ꓗꓴ ꓖꓶˍ ꓡꓳ=

ꓠꓬꓲꓽ ꓣꓳ ꓕꓲ ꓣꓳ ꓠꓬ ꓚꓳ ꓟ ꓒꓱ-ꓠꓲ-ꓠ

ꓗ ꓠꓯꓸ ꓣꓴ ꓔ ꓟ ꓒꓱ-ꓠꓲ-ꓠ ꓠꓬ ꓧ-ꓠ ꓐꓰ ꓬꓲ-ꓡꓲ-ꓘꓷ-ꓠ ꓐꓴ ꓦꓲꓻ ꓗꓪ ꓟ ꓚꓳ ꓟ ꓕꓲ ꓣꓳ ꓥ ꓢꓲ꓾ ꓤ ꓠꓱ ꓟꓽ ꓙꓳ ꓟ ꓧ-ꓠ ꓐꓱ ꓶ ꓤ ꓠꓱ ꓦꓵꓻ ꓖꓶ ꓠꓹ ꓟ ꓬꓲ-ꓡꓲ-ꓘꓷ-ꓠ ꓬꓲ ꓤ ꓟꓶꓻ ꓔꓬꓹ ꓖꓴ ꓗꓪ ꓛꓲ ꓡ ꓕꓯ ꓬꓲ ꓔꓯ ꓤ ꓠꓬꓲꓽ ꓫꓵꓸ ꓙꓳ ꓡ ꓗ ꓠꓯꓸ꓾ ꓬꓲ ꓢꓲꓺ ꓟ ꓧ-ꓠ ꓔꓯ ꓮ ꓟꓬꓹ ꓚꓱꓹ ꓗꓪ ꓐꓰ ꓠꓲꓹ ꓟ ꓫꓸ ꓡꓰ ꓝꓲˍ ꓡꓳ=

ꓦꓲ ꓗꓪ ꓚꓳ ꓟ ꓕꓲ ꓣꓳ ꓗꓪ ꓐꓰ ꓤ ꓟꓶꓻ ꓔꓬꓹ ꓖꓴ ꓗꓪ ꓖꓶꓽ ꓔ ꓥˍ ꓟꓲ ꓖꓳ ꓟ ꓐꓱ ꓶ ꓧ-ꓠ ꓔꓯ ꓫꓸ ꓟꓳˍ ꓟ ꓟꓽ ꓬꓰ= ꓬꓲ ꓔꓯ ꓮ ꓕꓯ ꓟꓲ ꓠꓬꓲꓸ ꓤꓲ ꓔꓬ ꓡꓳ=

ꓒꓱ-ꓠꓲ-ꓠ ꓔꓯ ꓡꓳꓸ ꓢꓲ ꓣꓳ ꓔꓯ ꓪꓴ-ꓢ ꓡꓰ ꓖꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓐꓴ ꓠꓬ ꓣꓳ ꓟꓬ ꓛꓲꓺ ꓟꓽ ꓐꓲ ꓜꓲꓼ ꓢꓴ ꓐꓴ ꓔꓯ ꓧꓪꓸ ꓜꓽˍ ꓟ꓾ ꓠꓬꓲꓸ ꓤꓲˍ ꓟ꓾ ꓫꓸ ꓝꓲˍ ꓟ ꓬꓰ ꓓꓴ ꓟꓽ ꓥ ꓐꓯ ꓟ ꓔꓯ ꓢꓷꓸ ꓔ ꓠ ꓗꓹ ꓡꓳ=

ꓢ ꓣꓳ ꓕꓲ ꓣꓳ ꓠꓬ ꓔꓲ ꓒ ꓬꓲ-ꓡꓮꓲ

ꓕꓲ ꓘꓳꓼ ꓕꓲ ꓧꓪꓹ ꓫ-ꓬꓲ-ꓡꓳ ꓡꓳ ꓒꓱ ꓗꓪ ꓙꓰ ꓢꓲ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓔꓲ ꓓꓴ ꓢꓰꓼ ꓔꓲˍ ꓟ ꓬꓰ ꓢꓲ ꓜ ꓜꓽ ꓗꓷ ꓗ ꓠꓯꓸ꓾ ꓧ-ꓠ ꓠꓬ ꓬꓲ ꓔꓳꓹ ꓜꓳꓽ ꓔꓬ ꓟ ꓠꓲꓹ ꓫꓸ ꓓꓴ꓾ ꓤ ꓠꓱ ꓟꓽ ꓙꓳ ꓞꓳ ꓡꓱꓽ ꓟ ꓒꓬꓱꓼ ꓔꓬ ꓟ ꓠꓲꓹ ꓫꓸ ꓓꓴ꓾ ꓬꓲ ꓚꓳ ꓟ ꓒꓱ-ꓠꓲ-ꓠ ꓡꓰ ꓠꓬꓲꓸ ꓤꓲˍ ꓟ ꓑꓶꓸ ꓓꓴ ꓠꓲꓹ ꓟ ꓫꓸ ꓓꓴ ꓠꓬ ꓮ ꓘꓶꓸ ꓡꓲꓽ ꓢꓲ ꓜꓲꓽ ꓟꓽ ꓐ ꓡ ꓗꓷ ꓡꓰ ꓠꓬꓲ ꓬꓲ ꓠꓬ ꓔꓴ ꓙꓰ ꓢꓲ ꓪꓴ-ꓢ ꓢꓲꓽ ꓫꓬ ꓦꓲꓻ ꓗ ꓘꓶꓽ ꓒ ꓕꓲ ꓗꓪ ꓠꓬꓲꓸ ꓠꓸ ꓢꓲ ꓪꓽ ꓘꓴˍ ꓡꓳ=

“ꓮ ꓫꓵꓽˍ ꓟꓲ ꓐ ꓡˍ ꓟ ꓟꓯꓼ ꓜꓴ ꓐꓴ ꓪꓴ-ꓢꓺꓳ꓾ ꓠꓴ ꓚꓳ ꓟ ꓥꓪ ꓫꓸ ꓙꓵˍ ꓟ ꓗꓪ ꓔꓱꓹ ꓠꓬꓲ ꓖꓶ ꓡꓯ= ꓠꓴ ꓚꓳ ꓟ ꓥꓪ ꓔꓯ ꓟꓽ ꓟꓲ ꓡꓰ ꓡꓰ ꓤ ꓕꓲ ꓣꓳ ꓖꓶ ꓡ ꓠꓬ꓾ ꓬꓲ ꓕꓲ ꓤꓶꓻ ꓡꓱꓸꓼ ꓪꓴꓸ ꓓꓵ ꓟꓽ ꓛꓳꓹ ꓛꓳꓹ ꓠꓴ ꓔꓯ ꓣꓱꓽ ꓙ ꓢꓴ ꓬꓰ ꓝꓲˍ ꓥꓳ꓾” ꓐꓰ ꓪꓽ ꓘꓴ ꓔꓬ ꓕꓯ ꓬꓲ ꓠꓬ ꓟꓷꓽ ꓠꓷꓹ ꓡꓰꓽ ꓡꓵ ꓔꓬ ꓢꓲ ꓬꓲ ꓢꓯꓼ ꓟꓽ ꓓꓳ ꓓꓳ ꓪꓽ ꓘꓴ ꓔꓬ ꓟ ꓧ-ꓠ ꓔꓯ ꓡꓳꓸ ꓔꓬ ꓟ ꓔꓲ ꓒ ꓬꓲ-ꓡꓮꓲ ꓠꓬ ꓧ-ꓠ ꓙꓲꓻ ꓒꓶ ꓬꓲꓼ ꓔꓬ ꓡꓳ ꓐꓰ ꓓꓵꓽ ꓙ ꓢꓲ꓾ “ꓮ ꓟꓲꓽꓳ꓾ ꓠꓴ ꓝꓮꓲ ꓙꓲꓻ ꓒꓶꓽ ꓟꓽ ꓬꓲꓼ ꓡ ꓠꓹ ꓟ꓾ ꓠꓴ ꓙꓲꓻ ꓒꓶꓽ ꓓꓳˍ ꓟ ꓠꓽ ꓗꓷ” ꓐꓯ ꓖꓶˍ ꓡꓳ=

ꓕꓱ ꓕꓲ ꓘꓴ ꓗꓪˍ ꓟꓲ ꓚꓲꓸ ꓛꓬ ꓟꓬ ꓢꓶꓽ ꓐꓰ ꓟꓳꓻ ꓪˍ ꓟ ꓮ ꓙꓵꓽ ꓔꓯ ꓚꓲꓸ ꓛꓬ ꓠꓲꓹ ꓫꓵˍ ꓟ ꓡꓰ ꓟꓽ ꓓꓵꓽ ꓙ ꓠꓹ ꓟ꓾ ꓟꓳꓻˍ ꓟ ꓡꓰ ꓟꓽ ꓓꓵꓽ ꓙ ꓞꓷꓹ ꓠꓹ ꓟ ꓔꓲ ꓒ ꓬꓲ-ꓡꓮꓲ ꓚꓱꓹ ꓗꓪ ꓐꓰ ꓣꓳ ꓢꓳ ꓣꓴ ꓐ ꓡˍ ꓟ ꓥ ꓡꓳ=

ꓖꓳ ꓡꓱ ꓥ ꓟꓲ ꓧ-ꓠ ꓠꓬ ꓔꓲ ꓒ ꓬꓲ-ꓡꓮꓲ ꓔꓯ ꓠꓲꓹ ꓟ ꓟꓽ ꓦꓶ= “ꓔꓲ ꓒ ꓓꓽ ꓟꓺꓳ꓾ ꓥꓪ ꓠꓬ ꓙꓲꓻ ꓒꓶꓽ ꓓꓳ ꓬꓲꓼ ꓔꓬ ꓟ ꓟꓽ ꓥ= ꓠꓲꓹ ꓫꓸ ꓟꓬ ꓫꓸ ꓠꓬꓲ ꓪꓴ-ꓢ ꓔꓯ ꓓꓰꓽ ꓔꓬ ꓟ ꓥꓳ= ꓠꓴ ꓚꓳ ꓟ ꓥꓪ ꓔꓯ ꓞꓳ ꓥꓶ ꓕ ꓚꓬꓹ ꓖꓶ ꓡꓯ= ꓥꓪ ꓠꓬ ꓠꓲꓹ ꓗꓷꓹ ꓟꓬ ꓗꓷꓹ ꓠꓬꓲ ꓐꓰ ꓪꓴ-ꓢ ꓔꓯ ꓶꓼ ꓓꓰꓽ ꓔꓬ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓖꓳ ꓕꓯ ꓔꓲ ꓒ ꓬꓲ-ꓡꓮꓲ ꓥ ꓟꓲ ꓧ-ꓠ ꓔꓯ꓾ ꓢꓲ ꓡꓲ ꓐꓰ ꓙꓰ= ꓠꓴ ꓡꓰ ꓪꓴ-ꓢ ꓔꓯ ꓓꓰꓽ ꓗꓷ ꓟ ꓬꓲ ꓡꓰ ꓠꓴ ꓔꓯ ꓖꓶ ꓡ ꓝꓲ꓾ ꓐꓰ ꓐꓯ ꓖꓶˍ ꓡꓳ=

ꓚꓵ ꓚꓵ ꓪꓴ-ꓢ ꓡꓰ ꓙꓽ ꓖꓶ ꓔ ꓟ ꓙꓵꓹ ꓟꓽ ꓛꓲ ꓡ ꓢꓰꓽ ꓠꓬꓲ ꓠꓲꓹ ꓫꓸ ꓟꓬ ꓫꓸ ꓔꓬ ꓢꓴ ꓐꓴ ꓔꓯ ꓟꓳꓻ ꓡꓰ ꓕꓯ ꓔꓳꓹ ꓜꓳꓽ ꓡꓰ ꓕꓯ꓾ ꓒꓱ-ꓠꓲ-ꓠ ꓡꓰ ꓐꓰ ꓫꓸ ꓝꓲˍ ꓟ ꓠꓬꓲꓸ ꓤꓲˍ ꓟ ꓝꓴꓲꓸ ꓓꓰˍ ꓟ ꓟꓽ ꓬꓰ ꓬꓰ꓾ ꓚꓲꓸ ꓛꓬ ꓖꓳ ꓓꓱꓽ ꓬꓰ ꓙ ꓟꓽ ꓐ ꓡ ꓥ ꓟꓲ ꓠꓲꓹ ꓗꓴ ꓟꓬ ꓗꓴ ꓖꓶˍ ꓟ ꓔꓲ ꓒ ꓬꓲ-ꓡꓮꓲ ꓔꓯ ꓔꓯ ꓢꓳ ꓠ ꓗꓹ ꓡꓳ=

ꓡꓲꓸ ꓣꓳ ꓕꓲ ꓣꓳ ꓠꓬ ꓙꓵꓻ ꓠꓲꓹ ꓪꓴꓽ ꓢꓴ ꓧ-ꓠ

ꓮ ꓕꓯ ꓥ ꓟꓲ ꓪꓴ-ꓢ ꓔꓬ ꓗꓪ ꓟꓽ ꓠꓽ ꓠꓽ ꓙꓽ ꓣꓳˍ ꓟ ꓠꓲꓹ ꓟ ꓡꓰ ꓙꓵꓻ ꓠꓲꓹ ꓙꓳ ꓙꓳ ꓡꓰꓽ ꓣꓱꓽ ꓞꓹ ꓟ ꓶꓼ ꓤ ꓫꓱꓹ ꓤ ꓓꓰꓽˍ ꓕꓯ ꓪꓴ-ꓢ ꓡꓰ ꓖꓶꓽ ꓡˍ ꓟ ꓬꓲ ꓙꓵꓹ ꓛꓲ ꓡꓰ ꓕꓯ ꓣꓳ ꓓꓰꓽ ꓔ ꓟ ꓔꓯ ꓪꓴ-ꓢ ꓓꓽ ꓔꓳꓹ ꓖꓶ ꓢꓲ ꓶꓼ ꓤ ꓫꓱꓹ ꓤ ꓖꓶ ꓡˍ ꓡꓳ ꓐꓯ ꓟ ꓔꓯ ꓧ-ꓠ ꓟꓸ ꓟꓲꓽ ꓗꓪ ꓐꓰ ꓣꓳ ꓢꓳ ꓣꓴ ꓐ ꓡˍ ꓟ ꓥ ꓡꓳ=

ꓬꓲ ꓪꓴꓸ ꓕꓯ ꓠꓲꓹ ꓟ ꓫꓸ ꓠꓬꓲ ꓟꓽ ꓜꓽ ꓟꓽ ꓓꓳ ꓠꓲꓹ ꓫꓸ ꓟꓬ ꓫꓸ ꓔꓬ ꓥ ꓟꓲ꓾ ꓪꓴ-ꓢ ꓔꓯ ꓥꓳ ꓡꓳꓸ ꓔ ꓟ ꓔꓯ ꓮ ꓕꓯ ꓟꓲ ꓔꓵꓹ ꓔ ꓢꓲ꓾ ꓚꓲꓸ ꓛꓬ ꓟꓽ ꓐ ꓡ ꓟ ꓗꓪ ꓪꓴ-ꓢ ꓔꓯ ꓮ ꓙꓵꓽ ꓡꓯꓼ ꓙꓱ ꓗꓷ ꓗ ꓠꓯꓸ ꓪꓴ-ꓢ ꓠꓬ ꓧ-ꓠ ꓔꓯ ꓤ ꓕꓲ ꓣꓳ ꓖꓶ ꓗꓷ ꓟ ꓥ ꓡꓳ=

ꓧ-ꓠ ꓠꓬ ꓬꓲ ꓡꓰ ꓪꓵꓼ ꓘꓶꓽ ꓖꓶ ꓔ ꓟˍ ꓡꓰ ꓐꓰ ꓬꓲ ꓤ ꓢ-ꓟꓴ-ꓬꓰ ꓔꓯ ꓪꓴ-ꓢ ꓔꓯ ꓡꓯꓼ ꓙꓱ ꓗꓷ ꓗ ꓠꓯꓸ꓾ ꓪꓴ-ꓢ ꓠꓬ ꓬꓲ-ꓡꓲ-ꓘꓷ-ꓠ ꓐꓰ ꓧ-ꓠ ꓔꓯ ꓟꓷꓽ ꓠꓷꓹ ꓝ ꓒ ꓢ-ꓟꓴ-ꓬꓰ ꓡꓰꓽ ꓟꓽ ꓞꓲꓺ ꓝꓮꓲ ꓤ 3 ꓫꓵꓸ ꓐꓰ ꓮ ꓟꓲꓽ 2 ꓫꓵꓸ ꓝ ꓢꓲ ꓖꓶ ꓗꓷ ꓟ ꓑꓶꓸ ꓓꓴ ꓪꓽ ꓘꓴˍ ꓟ ꓬꓲ ꓬꓳꓸ ꓚꓵˍ ꓟ ꓔꓯ ꓟꓽ ꓟꓲ ꓡꓰ ꓠꓹ ꓟ ꓧ-ꓠ ꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓢꓳ ꓣꓴ ꓐ ꓡˍ ꓟ ꓥ ꓡꓳ=