ꓩꓱ-ꓡꓲ-ꓫꓵ ꓟꓵꓽ (Palestine)

ꓩꓱ-ꓡꓲ-ꓫꓵ ꓟꓵꓽ ꓐꓬꓱꓽꓩꓱ-ꓡꓲ-ꓫꓵ ꓟꓵꓽ ꓐꓬꓱꓽ

Palestine ꓔꓯ  Palestine ꓗꓴꓷꓼ ꓐꓯ ꓢꓲ ꓢꓷꓸ ꓙ ꓟꓳ ꓙ ꓔ ꓟ ꓥ ꓡꓳ=Palestine ꓠꓬ  ꓗꓴꓷꓼ ꓙꓵꓽ ꓢꓲꓽ ꓒꓽ ꓜꓴꓻ ꓐꓰ ꓠꓱꓸ ꓐꓯꓼ ꓜꓴꓻ  ꓗꓪ ꓟ de jure ꓗꓪ ꓐꓰ ꓙꓵꓽˍ ꓟ ꓗꓴꓷꓼ ꓕꓲ ꓟ ꓥ ꓡꓳ= ꓐꓶ ꓓꓵꓽ Asia ꓗꓪ ꓐꓰ ꓬꓲ-ꓢꓷ-ꓡꓲ ꓐꓰ Jordan ꓟꓵꓽ ꓫꓸ ꓗ ꓗꓪ ꓟ ꓐꓶꓻ ꓓꓵꓽ ꓬꓲꓻ ꓙꓬꓻ ꓘꓶꓽ ꓟꓵꓽ ꓐꓰ ꓬꓲ-ꓢꓷ-ꓡꓲ ꓟꓵꓽ ꓐꓰ ꓬꓲ-ꓙꓲ ꓟꓵꓽ ꓫꓸ ꓗ ꓗꓪ ꓟ ꓖ-ꓜ ꓬꓲꓻ ꓙꓬꓻ ꓘꓶꓽ ꓟꓵꓽ ꓠꓬ ꓙꓱ-ꓣꓴ-ꓢ-ꓡꓱ ꓔꓯ ꓬꓲꓸ ꓪꓽ ꓟꓵꓽ ꓗꓪ ꓟ ꓡꓳ ꓒꓱ ꓓꓽ ꓟ ꓐꓯ ꓢꓲ ꓢꓷꓸ ꓙ ꓟꓳ ꓙ ꓔ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓪ ꓐꓴ ꓙꓵꓽ ꓔꓶꓸ ꓠꓬ ꓬ-ꓟ-ꓡ ꓗꓪ ꓓꓹ ꓡꓳ=

Palestine ꓗꓴꓷꓼ ꓗꓪ ꓐꓰ ꓓꓰꓽ ꓔ ꓟ ꓟꓵꓽ ꓕꓲꓽ ꓟ ꓡꓱꓸꓼ ꓔꓯ 1948 ꓗꓪ ꓐꓰ ꓪꓴꓸ ꓔꓴ ꓢꓲ ꓾ ꓓꓽ ꓪꓴꓸ ꓬꓲ-ꓙꓲ ꓾ Jordan ꓐꓰ ꓬꓲ-ꓢꓷ-ꓡꓲ ꓞꓳ ꓫꓵꓽ ꓐꓴ ꓠꓬ 1967 ꓘꓳꓼ ꓕꓯ ꓬꓰ ꓗꓷ ꓟ 6 ꓠꓬꓲ ꓟꓯꓼ ꓓꓶꓽ ꓡꓯꓽ ꓘꓳ ꓟ ꓗꓳꓸ ꓗꓷ ꓗꓸ ꓠꓯꓸꓼ ꓟꓵꓽ ꓖꓳ ꓟ ꓔꓯ ꓣꓴ ꓟꓶ ꓡꓰ ꓗꓷꓳ= 2020 ꓘꓳꓼ 2 ꓦ ꓕꓯ Palestine ꓗꓪ ꓡ ꓞꓳ 5051953 ꓣꓳ (50 ꓫꓬꓹ ꓣꓳ ꓟꓽ ꓛꓲꓺ ) ꓙꓳ ꓢꓲ꓾ ꓟꓲ ꓠꓯ ꓗꓪ ꓞꓳ ꓤ ꓟꓬꓽˍ ꓟ ꓟꓵꓽ No 121 ꓥ ꓡꓳ=

Palestine ꓟꓵꓽ ꓔꓯ ꓧꓶꓸ ꓕꓯ Philistine ꓞꓳ ꓫꓵꓽ ꓐꓴ ꓔꓬꓹ ꓟ ꓟꓵꓽ ꓬꓲ ꓡꓴꓽ ꓐꓱ ꓘꓶꓽ ꓔꓯ ꓡꓰꓽ ꓟꓸ ꓖꓶ ꓔ ꓡꓳ=( ꓓꓳ ꓙꓰ 15ꓽ14꓾ ꓬꓲ-ꓢ-ꓬ 14ꓽ29 ꓾ ꓬꓲ-ꓢ-ꓬ 14ꓽ31 ꓾ ꓬꓳ-ꓶ 3ꓽ4 ꓾) ꓖꓳ ꓟ ꓡꓰ ꓟꓽ ꓛꓲ ꓦꓲ-ꓐꓱ-ꓣꓴ ꓟꓬꓱ ꓗꓪ ꓐꓰ Pelesheth (Philistia) ꓐꓰ ꓐꓯ ꓔ ꓡꓳ= ꓟꓴ ꓖꓪ 60ꓽ8 ꓾ 83ꓽ 7 ꓾ 87ꓽ4 ꓾ 108ꓽ9 ) ꓗꓪ ꓟꓳ ꓪ ꓓꓹ ꓡꓳ=

ꓟꓬꓽ ꓠꓬꓲ ꓠꓬ “ꓦꓲ-ꓐꓱ-ꓣꓴ ꓟꓵꓽ” ꓔꓯ ꓐꓯ ꓠꓹ ꓟ ꓟꓬꓱ ꓖꓳ ꓟ ꓔꓯ ꓬꓴ-ꓔ ꓚꓺ ꓟꓲꓽ ꓡꓳꓹ ꓬꓰ ꓟ ꓦꓬꓼ ꓠꓬꓲ ꓗꓪ ꓛꓲ ꓡꓰꓽ ꓣꓱꓽ ꓗꓷ ꓟ ꓥꓳ=( ꓬꓲ ꓚꓰ ꓬꓲ ꓪꓴ 40ꓽ15) = ꓖꓳ ꓟ ꓔꓯ “ꓢꓲꓽ ꓫꓬꓹ ꓟ ꓟꓵꓽ ( ꓢ-ꓚꓬ-ꓡꓲ-ꓬ 2ꓽ12)꓾ ꓬꓰ-ꓧꓳ-ꓧꓪ ꓟꓵꓽ( ꓧꓳ-ꓫꓲ-ꓬ 11ꓽ9 ꓾ ꓟꓴ ꓖꓪ 85ꓽ1)꓾ ꓙ ꓟꓳ ꓔˍ ꓟ ꓟꓵꓽ (ꓦꓲ-ꓐꓱ-ꓣꓴ 11ꓽ9)꓾ ꓘꓷ-ꓠ ꓟꓵꓽ ( ꓬꓲ ꓚꓰ ꓬꓲ ꓪꓴ 12ꓽ5) ꓬꓲ-ꓢꓷ-ꓡꓲ ꓟꓵꓽ (1 ꓢ-ꓟꓴ-ꓬꓰ 13ꓽ19) ꓐꓰ ꓬꓴ-ꓔ ꓟꓵꓽ (ꓬꓲ-ꓢ-ꓬ 19ꓽ17) ꓐꓰˍ ꓟꓲ ꓘꓴˍ ꓡꓳ=

ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓖꓶˍ ꓥꓳ ꓐꓰ ꓙ ꓟꓳ ꓔ ꓟ ꓟꓵꓽ (ꓬꓲ ꓚꓰ ꓬꓲ ꓪꓴ 15ꓽ18-21꓾ ꓑ ꓫꓬ ꓵ 34ꓽ1-12) ꓠꓬ ꓐꓶꓻ ꓓꓳ ꓗꓪ ꓫꓲ-ꓓꓲ-ꓘꓷ ꓠꓯ ꓬꓲ ꓾ ꓐꓶꓻ ꓓꓵꓽ ꓗꓪ ꓟꓲ-ꓠꓯ-ꓔꓱ-ꓦꓲ-ꓬꓲ-ꓡꓴ-ꓐꓱ ꓾ ꓖꓴ ꓪꓴꓸ ꓧꓷ-ꓟꓯ-ꓕꓷ ꓗꓪ ꓐꓰ ꓾ ꓖꓴ ꓟꓶꓸ ꓬꓲ-ꓙꓲ ꓠꓯ ꓬꓲ ꓗꓪ ꓛꓲ ꓥ ꓡꓳ= ꓟꓵꓽ ꓖꓳ ꓟ ꓗꓪ ꓟ ꓕꓲ ꓐꓱ ꓔꓯ ꓪ ꓔꓲ ꓓ-ꓪꓵ ꓡꓰ ꓓꓶꓽ ꓧꓪꓸ ꓡꓰ ꓢꓲ꓾ ꓬꓲꓸ ꓤ ꓢꓳ-ꓡꓳ-ꓟꓳ ꓡꓰ ꓙꓵꓽ ꓗꓷ ꓟ ꓥ ꓡꓳ=( 2 ꓢ-ꓟꓴ-ꓬꓰ 8ꓽ ꓾ 1 ꓚꓺ ꓟꓲꓽ 18ꓽ ꓾ 1 ꓪ ꓔꓲ 4ꓽ1 ꓾ 1 ꓪ ꓔꓲ 4ꓽ21) =ꓕꓱ ꓟꓬ ꓗꓪ ꓛꓲ ꓪꓴꓽˍ ꓟ ꓟꓵꓽ ꓠꓬ ꓙ ꓟꓳ ꓔˍ ꓟ ꓟꓵꓽ ꓥ ꓡꓳ= ꓖꓳ ꓡꓱ ꓥˍ ꓟꓲ ꓩꓱ-ꓡꓲ-ꓫꓵ ꓠꓬ ꓙ ꓟꓳ ꓔˍ ꓟ ꓟꓵꓽ ꓘꓴꓽ ꓗꓪ ꓟ ꓕꓲ ꓟ ꓡꓰꓽ ꓥ ꓢꓲ ꓡꓰ-ꓐꓯ-ꓠꓷ ꓖꓴ ꓪꓴꓸ ꓗꓪ ꓐꓰ ꓖꓴ ꓟꓶꓸ ꓗꓪ ꓟ ꓒ-ꓣ-ꓠ ꓡꓲ ꓛꓲ ꓗꓪ ꓛꓲ ꓡꓰꓽ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓫꓵꓺ ꓙ ꓠꓽ 144 ꓕꓷꓹ ꓙꓳˍ ꓡꓳ= ꓦꓲꓺ ꓙ ꓠꓬ ꓐꓶ ꓓꓵꓽ ꓟꓲ-ꓠꓯ-ꓔꓱ-ꓦꓲ-ꓬꓲ-ꓡꓴ-ꓐꓱ ꓗꓪ ꓐꓰ Jordan ꓗꓰ ꓛꓲ 60 ꓕꓷꓹ ꓛꓲ ꓙꓳˍ ꓡꓳ=

ꓠꓱꓸ ꓐꓯꓼ ꓟꓵꓽ ꓘꓴꓽ ꓗꓪ ꓟ Palestine ꓩꓱ-ꓡꓲ-ꓫꓵ ꓠꓬ ꓔꓱꓹ ꓫꓵ ꓗꓪ ꓓꓹ ꓢꓲ (ꓬꓲ-ꓫꓲ-ꓚꓰ 5ꓽ5) ꓟꓲ ꓠꓯ ꓕꓯ ꓢꓲ ꓗꓪ ꓟꓽ ꓓ ꓟꓬꓱ ꓓꓳ ꓙꓳˍ ꓟ ꓗꓴꓷꓼ ꓥ ꓡꓳ=ꓕꓱ ꓟ ꓡꓰ ꓛꓲ ꓟꓶꓽ ꓘꓳꓼ ꓬꓲꓸ ꓫꓵꓽ ꓬꓲꓸ ꓙꓰꓽ꓾ ꓜꓽ ꓪꓳꓽ ꓡꓳ ꓪꓳꓽ ꓬꓲꓸ ꓫꓵꓽ ꓬꓲꓸ ꓙꓰꓽ ꓐꓰ ꓙꓱꓽ ꓤ ꓬꓲꓸ ꓫꓵꓽ ꓬꓲꓸ ꓙꓰꓽ ꓙꓳˍ ꓟ ꓟꓵꓽ ꓠꓱꓸ ꓐꓯꓼ ꓗꓴꓷꓼ ꓗꓪ ꓟꓽ ꓙꓳ= ꓟꓳ-ꓫꓲ ꓡꓰ “ ꓬꓲ ꓙꓬ ꓡꓳꓻˍ ꓐꓰ꓾ ꓡꓳꓻ ꓖꓳˍ ꓐꓰ ꓪ ꓡꓴꓸ ꓗꓪ ꓐꓰ ꓚꓴꓺ ꓓꓳ ꓡˍ ꓟ ꓬꓲ ꓝꓳꓹ ꓟꓶ ꓐꓰ꓾ ꓬꓲꓻ ꓓꓴꓽ ꓙꓳˍ ꓟ ꓟꓵꓽ꓾ ꓟꓵꓽ ꓙꓲˍ ꓟ ꓟꓵꓽ”꓾ ꓾ “ꓫꓪ ꓾ ꓤꓴꓺ꓾ ꓛꓱꓼ ꓡꓱ ꓚꓺ ꓾ ꓘꓶꓽ ꓢꓶꓽ ꓜꓲꓻ ꓐꓰ ꓢꓷꓼ ꓡꓷ ꓢꓶ ꓙꓳˍ ꓟ ꓟꓵꓽ”꓾ ꓮ ꓛꓬ ꓞꓶꓻ ꓐꓰ ꓐꓬꓽ ꓬꓲ ꓙꓳˍ ꓟ ꓟꓵꓽ” ꓾ “ꓜꓽ ꓓꓴ ꓟꓽ ꓠꓲꓸ ꓡꓰ ꓢꓲ ꓖꓳ ꓗꓪ ꓛꓺ ꓓꓴ ꓕꓲ ꓫꓵˍ ꓟꓲ ꓟꓽ ꓙꓳ ꓟ ꓟꓵꓽ” ꓾ “ꓭꓸ ꓛꓲ ꓠꓬ ꓧꓳꓻ ꓥ ꓢꓲ꓾ ꓪ ꓚꓲ ꓗꓪ ꓐꓰˍ ꓟꓲ ꓙꓲꓽ ꓓꓵꓽ ꓓꓳ ꓡ ꓓˍ ꓟ ꓟꓵꓽ” ꓐꓰ ꓐꓯ ꓔ ꓡꓳ= ( ꓙꓵꓽ ꓗ ꓐꓯ ꓟꓸ 8ꓽ7-9)

ꓬꓰ-ꓢꓴ ꓦꓬꓼ ꓠꓬꓲ ꓕꓯ ꓗꓴꓷꓼ ꓖꓳ ꓟ ꓠꓬ ꓮ ꓟꓶ ꓟ ꓗꓴꓷꓼ ꓡꓰ ꓐꓰ ꓗꓹ ꓡꓳ ꓐꓰ ꓐꓯ ꓓꓹ ꓡꓳ=ꓕꓲ ꓟꓵꓽ ꓡꓱꓸꓼ ꓗꓪ Esdraelon ꓭꓸ ꓛꓲ ꓡꓰꓽ ꓐꓲ ꓓꓹ ꓡꓳ=ꓧꓶꓸ ꓕꓯ ꓟ ꓢꓲꓹ ꓠꓯ ꓠꓬ ꓬꓲꓸ ꓘꓳꓼ ꓟꓶ ꓤ ꓗꓪ ꓛꓲ ꓟꓶꓽ ꓡꓰ ꓐꓯˍ ꓥ ꓟꓲ꓾ ꓠꓬꓲꓸ ꓠꓬꓲ ꓟ ꓡꓳꓻ ꓖꓳ ꓗꓪ ꓠꓬ ꓘꓶꓽ ꓢꓶꓽ ꓜꓲ꓾ ꓮ ꓛꓬ ꓜꓲ ꓐꓰ꓾ ꓟꓵꓽ ꓙꓲˍ ꓟ ꓗꓪ ꓠꓱꓸ ꓐꓯꓼ ꓢꓲꓹ ꓢꓶꓽ ꓜꓲ ꓔꓯ ꓟꓳ ꓪ ꓓ ꓢꓰꓽ ꓡꓳ=ꓮ ꓟꓶ ꓮꓸ ꓫꓵꓽ ꓜꓲˍ ꓟꓲ ꓟꓽ ꓣꓱ ꓢꓲ ꓙꓴꓺ ꓡꓰ ꓟ ꓪ ꓚꓲ ꓐꓴ ꓠꓬ ꓾ ꓮ ꓠꓱ ꓕꓯ ꓮ ꓛꓬ ꓜꓲ꓾ ꓛꓱꓼ ꓡꓱ ꓜꓲ ꓾ ꓫꓪ ꓐꓰ ꓤꓴꓺ ꓔꓶ ꓗꓷ ꓟ ꓡꓳꓻ ꓖꓳ ꓐꓴ ꓥ ꓡꓳ= ꓮ ꓠꓱ ꓕꓯ ꓡ ꓞꓳ ꓮ ꓟꓬ ꓔꓬ ꓟ ꓟꓵꓽ ꓠꓬ ꓮ ꓟꓶ ꓔꓬ ꓢꓴ ꓟꓽ ꓙꓳ ꓟ ꓟꓵꓽ ꓒꓬꓱꓼ ꓡꓻ ꓳ= ꓭꓸ ꓐꓬꓼ ꓐꓴ ꓔꓯ ꓬꓲꓸ ꓘꓴ ꓕꓴꓺ ꓔ ꓟ ꓛꓱꓼ ꓡꓱ ꓙꓵꓺ ꓫꓬ ꓹ ꓖꓴ ꓠꓬ ꓮ ꓟꓶ ꓟꓳꓼ ꓮ ꓟꓬꓹ ꓣꓱꓽ ꓖꓴ ꓒꓬꓱꓼ ꓡꓻ ꓳ=

ꓘꓷ-ꓠ ꓞꓲꓼ ꓤ ꓡꓯꓹ ꓤ ꓐꓴ ꓠꓬ ꓢꓲ-ꓓꓳ ꓗꓪ ꓐꓰ ꓖꓷ-ꓢ ꓗꓪ ꓛꓲ ꓾ ꓕꓲꓽ ꓟꓵꓽ ꓡꓱꓸꓼ ꓔꓯ ꓣꓴ ꓗꓷ ꓟ ꓪꓴꓸ ꓠꓬꓲ ꓾ ꓟꓵꓽ ꓖꓳ ꓟ ꓔꓯ ꓬꓳ-ꓫꓴ ꓓꓶꓽ ꓧꓪꓸ ꓡꓰˍ ꓗꓪ ꓛꓲ꓾ ꓞꓳ ꓫꓵꓽ 12 ꓙꓰꓽ ꓡꓰ ꓣꓴ ꓗꓷꓳ= ꓟꓳ-ꓫꓲ ꓡꓰ ꓬꓳ-ꓔ ꓬꓲꓽ ꓟ ꓐꓶ ꓓꓳ ꓕꓲꓽ ꓛꓱꓽ ꓗꓪ ꓟ ꓟꓵꓽ ꓔꓯ ꓞꓳ ꓫꓵꓽ ꓕꓲ ꓫꓵꓽ ꓔꓯ ꓟꓵꓽ ꓕꓲ ꓐꓶꓽ ꓐꓰ꓾ ꓞꓳ ꓫꓵꓽ ꓠꓬꓲꓽ ꓫꓵꓽ ꓔꓯ ꓐꓱ ꓖꓶ ꓗꓷꓳ=( ꓙꓵꓽ ꓗ ꓐꓯ ꓟꓸ 3ꓽ12-20 ꓾ ꓑ ꓫꓬ ꓵ 1ꓽ17-46꓾ ꓬꓳ-ꓫꓴ 4ꓽ12-13) ꓤꓰ ꓓꓹ ꓟ ꓞꓳ ꓫꓵꓽ ꓐꓴ ꓠꓬ ꓬꓳ-ꓔ ꓬꓲꓽ ꓟ ꓐꓶꓻ ꓓꓵꓽ  ꓕꓲꓽ ꓛꓱꓽ ꓗꓪ ꓔꓬ ꓡꓳ=

ꓟꓯꓼ ꓓꓶꓽ ꓡꓯ ꓘꓳˍ ꓟ ꓗꓪ ꓐꓰ ꓢꓳ-ꓡꓳ ꓦꓬꓼ ꓠꓬꓲ ꓥ ꓟ 400 ꓘꓳꓼ ꓗꓪ ꓛꓲ꓾ ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓫꓬꓹ ꓒꓽ ꓐꓴ ꓗꓪ ꓐꓰ ꓙꓵꓽ ꓗꓷ ꓟ ꓥ ꓡꓳ= ꓪ ꓔꓲ ꓢꓳ-ꓡꓳ ꓾ ꓪ ꓔꓲ ꓓ-ꓪꓵ ꓐꓰ ꓢꓳ-ꓡꓳ-ꓟꓳ ꓪ ꓔꓲ ꓐꓴ ꓙꓵꓽˍ ꓟ ꓦꓬꓼ ꓠꓬꓲ ꓐꓴ ꓗꓪ ꓠꓬ ꓟꓵꓽ ꓖꓳ ꓟ ꓠꓬ ꓪ ꓔꓲ ꓟꓵꓽ ꓒꓬꓱꓼ ꓡ ꓢꓲ꓾ ꓟꓵꓽ ꓮ ꓙꓵꓽ ꓔꓯ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓝꓲꓳ= ꓢꓳ-ꓡꓳ-ꓟꓳ ꓪ ꓔꓲ ꓫꓵꓻ ꓗꓷ ꓠꓬ ꓾ ꓬꓲꓸ ꓤ ꓣꓱ-ꓧꓳ-ꓐꓳ ꓪ ꓔꓲ ꓣꓱꓽˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓙꓵꓽˍ ꓟ ꓠꓯꓸꓼ ꓗꓪ ꓞꓳ ꓫꓵꓽ 10 ꓙꓰꓽ ꓐꓴ ꓗꓪ ꓐꓰ ꓒꓳꓹ ꓔꓴ ꓢꓲ꓾ ꓢꓲꓺ ꓡꓲˍ ꓟ ꓪ ꓔꓲ ꓟꓵꓽ ꓔꓯ ꓫꓬꓹ ꓔꓶ ꓢꓲ ꓖꓳ ꓟ ꓔꓯ ꓬꓲ-ꓢꓷ-ꓡꓲ ꓗꓴꓷꓼ ( ꓥ ꓠꓬ) ꓖꓴ ꓪꓴꓸ ꓗꓴꓷꓼ ꓐꓰ ꓘꓴˍ ꓡꓳ= ꓗꓴꓷꓼ ꓗꓪ ꓟ ꓡꓳ ꓒꓱ ꓓꓽ ꓟ ꓠꓬ ꓫꓱ-ꓘꓷ-ꓟꓷ ꓡꓳ ꓒꓱ ꓥ ꓢꓲ꓾ ꓗꓸ ꓠꓯ ꓠꓬ ꓢ-ꓟ-ꓡꓲ ꓡꓳ ꓒꓱ ꓥ ꓡꓳ= ꓗꓴꓷꓼ ꓖꓳ ꓟ ꓠꓬ ꓒꓬꓻ ꓗꓷˍ ꓟ ꓟꓶ ꓗꓷꓳ= ꓗꓴꓷꓼ ꓫꓬ ꓔꓶꓻ ꓔ ꓟ 253 ꓘꓳꓼ ꓗꓸ ꓠꓯ ꓐꓸꓚꓸ 722 ꓕꓯ Assyria ꓪ ꓔꓲ Shelmanezer ꓡꓰ ꓬꓲ-ꓢꓷ-ꓡꓲ ꓞꓳ ꓫꓵꓽ ꓐꓴ ꓔꓯ ꓡꓳꓽ ꓔꓯꓹ ꓙꓰˍ ꓡꓳ= ꓬꓲ-ꓢꓷ-ꓡꓲ ꓞꓳꓽ ꓫꓵꓽ ꓐꓴ ꓔꓯ ꓡꓳꓽ ꓔꓯꓹ ꓙꓰ ꓗꓷ ꓟ ꓟꓵꓽ ꓔꓯ ꓠꓬ ꓐꓶ ꓓꓳ ꓕꓲ ꓛꓱꓽ ꓗꓪ ꓟ ꓞꓳ ꓫꓵꓽ ꓐꓴ ꓡꓰ ꓣꓴ ꓔꓯ ꓙꓰ ꓢꓲ꓾ ꓖꓳ ꓗꓪ ꓢ-ꓟ-ꓡꓲ ꓟꓵꓽ ꓔꓯ ꓫꓬꓹ ꓔꓶˍ ꓡꓳ= (2 ꓪ ꓔꓲ 17ꓽ24-29)

ꓬꓲ-ꓢꓷ-ꓡꓲ ꓗꓴꓷꓼ ꓐꓬ ꓡꓰ ꓗꓸ ꓠꓯ 234 ꓘꓳꓼ ꓛꓲ ꓕꓯ ꓪ ꓔꓲ ꓠꓱ-ꓐꓴ-ꓘ-ꓠꓱ-ꓤ ꓡꓰ ꓙꓴ-ꓣꓴ-ꓢ-ꓡꓱ ꓡꓳ ꓒꓱ ꓥ ꓟ ꓬꓳ-ꓔ ꓟꓵꓽ ꓔꓯ ꓣꓴ ꓡꓻˍ ꓡꓳ= ꓬꓲ ꓠꓬ ꓡꓳ ꓒꓱ ꓔꓯ ꓒꓬ ꓗꓷ ꓢꓲ꓾ ꓪ ꓘꓴ ꓦꓲ ꓐꓴ ꓔꓯ ꓒꓬ ꓐꓬ ꓗꓷ ꓢꓲ ꓠꓬꓲ ꓡꓳ ꓒꓱ ꓗꓪ ꓟ ꓞꓳ ꓫꓵꓽ ꓐꓴ ꓔꓯ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰˍ ꓡꓳ= ꓬꓲ ꓪ ꓐꓴ ꓠꓬ ꓖꓳ ꓗꓪ 70 ꓘꓳꓼ ꓛꓲ ꓔꓬ ꓠ ꓗꓷ ꓡꓰꓳ=ꓗꓸ ꓠꓯ ꓬꓲ ꓪ ꓐꓴ ꓠꓬ ꓘꓴ-ꓣ-ꓫꓵ ꓪ ꓔꓲ ꓕꓵꓼ ꓪ ꓗꓪ ꓐꓰ ꓬꓲ ꓪ ꓐꓴ ꓔꓬ ꓗꓷ ꓟ ꓟꓵꓽ ꓗꓪ ꓬꓯꓼ ꓙꓰ ꓗꓷꓳ=(ꓱ-ꓢꓶ-ꓡ 1ꓽ1-4) ꓬꓲ ꓪ ꓐꓴ ꓠꓬ ꓡꓳ ꓒꓱ ꓐꓰ ꓜꓲꓼ ꓦꓲ ꓐꓴ ꓔꓯ ꓝꓮꓲ ꓕꓲ ꓧꓪꓹ ꓫꓬꓹ ꓜꓶꓻ ꓗꓷꓳ=

ꓡꓳ ꓒꓱ ꓔꓯ ꓝꓮꓲ ꓕꓲ ꓧꓪꓹ ꓫꓬ ꓜꓶꓻ ꓗꓷ ꓗꓸ ꓠꓯꓸ ꓬꓳ-ꓔ ꓞꓳ ꓫꓵꓽ ꓐꓴ ꓔꓯ ꓜꓷ-ꓣꓴ-ꓐ-ꓐꓷ ꓹ ꓱ-ꓢꓶ-ꓡ ꓐꓰ ꓠꓲ-ꓬ-ꓟ-ꓬ ꓐꓴ ꓙꓵꓽ ꓗꓷ ꓗꓸ ꓠꓯ ꓠꓬ꓾ Sanhedrin ꓡꓰ ꓣꓱꓽ ꓙ ꓗꓷ ꓟ ꓔꓲ ꓒ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓡꓰ ꓙꓵꓽ ꓗꓷꓳ= ꓐꓸꓚꓸ 323꓾ ꓐ-ꓐꓲ-ꓡꓶ ꓗꓪ Alexander the Great ꓫꓵꓻ ꓗꓷ ꓗꓸ ꓠꓯ ꓠꓬ ꓬꓲꓸ ꓫꓬꓹ ꓡꓳꓽ ꓔ ꓟ ꓟꓵꓽ ꓐꓴ ꓠꓬ ꓬꓲꓸ ꓟꓯꓼ ꓢꓲꓽ ꓒ ꓐꓴ 4 ꓣꓳ ꓘꓴꓽ ꓗꓪ ꓬꓲꓸ ꓗꓪꓺ ꓗꓪ ꓡꓰꓳ= ꓬꓲ-ꓙꓲ ꓾ Arabic ꓾ ꓩꓱ-ꓡꓲ-ꓫꓵ  ꓐꓰ Coele-Syria  ꓠꓬ Ptolemy Lagus ꓠꓯꓸꓼ ꓗꓪ ꓓꓵꓽ ꓡꓰꓳ= Ptolemy ꓠꓬ ꓐꓚ 320 ꓕꓯ ꓩꓱ-ꓡꓲ-ꓫꓵ ꓟꓵꓽ ꓔꓯ ꓓꓶꓽ ꓧꓪꓸ ꓢꓲ꓾ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓢꓴ ꓕꓲ ꓫꓬꓹ ꓛꓲ ꓔꓯ ꓬꓲ-ꓙꓲ ꓟꓵꓽ ꓗꓪ ꓡꓳꓽ ꓔꓯꓹ ꓙꓰꓳ= ꓬꓲꓸ ꓠꓬ Alexandria ꓟꓵꓽ ꓔꓯ ꓬꓲ ꓡꓳ ꓒꓱ ꓒꓬꓱꓼ ꓡ ꓝꓲ ꓢꓲ꓾ ꓬꓳ-ꓔ ꓞꓳ ꓫꓵꓽ ꓐꓴ ꓔꓯ ꓔꓱꓹ ꓔꓱꓹ ꓡꓰꓽ ꓙꓵꓽ ꓗꓷꓳ=

ꓐꓚ 68 ꓕꓯ ꓠꓬ ꓾ Pompey the Great ꓡꓰ ꓩꓱ-ꓡꓲ-ꓫꓵ ꓟꓵꓽ ꓔꓯ ꓣꓳ-ꓟ ꓟꓵꓽ ꓗꓪ ꓒꓬꓱꓻ ꓗꓷˍ ꓡꓳ= ꓬꓲ ꓠꓬ ꓡꓳ ꓒꓱ ꓚꓬꓹ ꓐꓰꓽ ꓔꓯ ꓒꓬꓹ ꓦ ꓗꓷ ꓢꓲ ꓾ ꓡꓳ ꓒꓱ ꓢꓴ 12000 ꓣꓳ ꓛꓲ ꓔꓯ ꓢꓰꓼ ꓗꓷˍ ꓡꓳ= ꓬꓳ-ꓔ ꓞꓳ ꓫꓵꓽ ꓐꓴ ꓠꓬ ꓬꓲ ꓪ ꓐꓴ ꓔꓯ ꓒꓳꓹ ꓔꓴ ꓢꓲ꓾ ꓣꓳ-ꓟ ꓚꓳꓺ ꓑ ꓬꓰˍ ꓟ ꓔꓯ ꓠꓽ ꓗꓷꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓴ ꓠꓬ ꓩꓱ-ꓡꓲ-ꓫꓵ ꓪ ꓔꓲ ꓙꓵꓽˍ ꓟ ꓠꓯꓸꓼ ꓗꓪ ꓓꓵꓽ ꓪ ꓡꓰꓳ= ꓡꓳ ꓒꓱ ꓐꓰ ꓜꓲꓼ ꓦꓲ ꓐꓴ ꓔꓯ ꓒꓬ ꓗꓷ ꓢꓲ꓾ ꓡꓳ ꓒꓱ ꓢꓴ ꓐꓴ ꓠꓬ ꓢꓰꓼˍ ꓟ ꓟꓶ ꓗꓷꓳ= ꓐꓸꓚꓸ 20 ꓛꓲ ꓕꓯ ꓩꓴ-ꓡꓲ ꓪ ꓔꓲ ꓠꓬ ꓡꓳ ꓒꓱ ꓔꓯ ꓫꓬꓹ ꓜꓶꓻ ꓢꓲ ꓐꓬ ꓡꓰ ꓟ ꓪꓽ ꓘꓴ ꓦꓲ ꓐꓴ ꓔꓯˍ ꓟꓲ ꓝꓮꓲ ꓕꓲ ꓧꓪꓹ ꓫꓬꓹ ꓗꓷꓳ= 9 ꓘꓳꓼ ꓐꓶꓽ ꓛꓲ ꓡꓕꓯ ꓠꓬ ꓔꓱꓹ ꓚꓵˍ ꓟ ꓚꓱꓹ ꓣꓱꓽ ꓢꓲ ꓑ ꓫꓬꓼ ꓐꓴ ꓔꓯ ꓙꓵꓽˍ ꓡꓳ= (ꓬꓳ-ꓦ 2ꓽ20)

ꓩꓱ-ꓡꓲ-ꓫꓵ ꓠꓬ ꓣꓳ-ꓟ ꓙꓵꓽˍ ꓟ ꓠꓯꓸ ꓗꓪ ꓓꓹ ꓕꓯ꓾ ꓟꓵꓽ ꓔꓯ (1) ꓬꓳ-ꓔ ꓟꓵꓽ ꓾(2) ꓢ-ꓟ-ꓡꓲ ꓟꓵꓽ (3) ꓖ-ꓡꓲ-ꓡꓲ ꓟꓵꓽ ꓐꓰ (4) Peraea ꓟꓵꓽ ꓐꓯ ꓢꓲ ꓗꓴꓷꓼ ꓫꓴ 4 ꓟ ꓙꓳˍ ꓡꓳ=  

Credit photo

Add new comment

7 + 1 =