ꓩꓴ‐ꓡꓲ ꓪ ꓔꓲ ꓡꓰ ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓔꓯ ꓢꓰꓼ ꓟ ꓚꓱ, (Church history)

#creditphoto #PERSECUTION OF CHRISTIANS DEATH OF PETER AND PAUL

Monday, March 20, 2023

ꓩꓴ‐ꓡꓲ ꓪ ꓔꓲ ꓡꓰ ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓔꓯ ꓢꓰꓼ ꓟ ꓚꓱ,

ꓮ. ꓓ 64 ꓘꓳꓼ ꓕꓯ ꓣꓳ‐ꓟ ꓗꓴꓷꓼ ꓗꓪ ꓮ. ꓔꓳ. ꓐꓬ ꓡꓰ ꓟ ꓔꓳ, ꓜꓳ ꓡꓰꓳ꓿ ꓕꓱ ꓮ. ꓔꓳ. ꓐꓬ ꓡꓰ ꓟ ꓠꓬ ꓬꓴ‐ꓔ ꓞꓳ ꓫꓵꓽ ꓐꓴ ꓔꓬ ꓔꓶ. ꓗꓪ ꓐꓰ ꓬꓲ. ꓪꓴ. ꓐꓬ ꓡ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓢꓴ ꓠꓬ ꓪ ꓔꓲ ꓩꓴ‐ꓡꓲ ꓥ ꓡꓳ꓿ ꓪ ꓔꓲ ꓩꓴ‐ꓡꓲ ꓠꓬ ꓬꓲ. ꓚꓲ ꓛꓬ ꓮ. ꓔꓳ. ꓛꓴꓻ ꓢꓴ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓪ ꓔꓲ ꓩꓴ‐ꓡꓲ ꓠꓬ ꓮ. ꓔꓳ. ꓛꓴꓻ ꓥ ꓐꓯ ꓠꓬ ꓬꓴ‐ꓔ ꓞꓳ ꓫꓵꓽ ꓐꓴ ꓔꓬ ꓟ ꓔꓶ. ꓗꓪ ꓦꓲꓻ ꓓꓽ ꓟ ꓫꓬ, ꓠꓲ, ꓫꓵꓽ ꓟ ꓪꓴ. ꓠꓬꓲ ꓥ ꓡꓳ꓿

ꓕꓱ ꓮ. ꓔꓳ. ꓐꓬ ꓡꓰ ꓟ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓛꓴꓻ ꓔ ꓟ ꓥ ꓡꓳ ꓐꓰ ꓪ ꓔꓲ ꓩꓴ‐ꓡꓲ ꓡꓰ ꓑ ꓫꓬ ꓐꓴ ꓔꓯ ꓐꓯ ꓗꓷ ꓟ ꓥ ꓡꓳ꓿ ꓣꓳ‐ꓟ ꓑ ꓫꓬ ꓐꓴ ꓠꓬ ꓮ ꓟꓬ, ꓛꓲ ꓠꓲ, ꓢꓲꓼˍ ꓟ ꓔꓳ, ꓜꓳ ꓡꓰꓳ꓿ ꓕꓱ ꓑ ꓫꓬ ꓐꓴ ꓠꓲ, ꓢꓲꓼˍ ꓟ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓝꓴꓲ ꓓꓲ. ꓗꓷꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ‐ꓟ ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓛꓳ ꓢꓲ ꓠꓬꓲ ꓗꓴꓷꓼ ꓐꓯ ꓟꓴ ꓘꓶꓽ ꓔꓶ. ꓗꓪ ꓧꓳꓽ ꓡ ꓪ꓿

ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ. ꓔꓳ. ꓐꓬ ꓡꓰ ꓟ ꓚꓱ, ꓔꓯ ꓠꓽ ꓠꓬꓲˍ ꓥ ꓟꓲ ꓬꓲ. ꓪ ꓠꓬ ꓟꓽ ꓛꓴꓻ ꓟ ꓪꓴ. ꓠꓬꓲ ꓟꓽ ꓢꓷ. ꓐꓰ ꓐꓯ ꓖꓶ ꓔ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪ ꓔꓲ ꓐꓰ ꓑ ꓫꓬ ꓐꓴ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓗꓴꓷꓼ ꓛꓴꓽ ꓙꓳ ꓢꓴ ꓐꓰ ꓐꓯ ꓗꓷꓳ꓿

ꓣꓳ‐ꓟ ꓗꓴꓷꓼ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓠꓬ ꓮ.ꓓ (68) ꓘꓳꓼ ꓪ ꓔꓲ ꓩꓴ‐ꓡꓲ ꓫꓵꓻ ꓗꓪ ꓛꓲ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓠꓬ ꓣꓳ‐ꓟ ꓗꓴꓷꓼ ꓕꓲ ꓗꓴꓷꓼ ꓡꓱ ꓗꓪ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓡ ꓞꓳ ꓮ ꓟꓬ, ꓔꓬ ꓟ ꓗꓪ ꓢꓰꓼ ꓟ ꓝꓮꓲ ꓙꓱ ꓙ ꓜꓽ ꓖꓶ ꓜꓽ ꓗꓷ ꓟ꓾ ꓮ. ꓔꓳ. ꓛꓴꓻ ꓢꓰꓼ ꓟ ꓮ ꓟꓬ, ꓫꓵꓽ ꓬꓰ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿

ꓣꓳ‐ꓟ ꓗꓴꓷꓼ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓙꓵ, ꓕꓯ ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓐꓴ ꓠꓬ ꓐꓽ ꓕꓲ ꓗꓪ ꓔꓬ ꓗꓷ ꓟ ꓥ ꓡꓳ꓿ ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓐꓴ ꓣꓳ‐ꓟ ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓯꓼ ꓕꓵꓼ ꓪ ꓖꓶ ꓠ, ꓟ ꓣꓳ‐ꓟ ꓡꓳ ꓒꓱ ꓗꓪ ꓙꓰ ꓢꓲ ꓠꓬꓲ ꓔꓬ ꓗꓷ ꓟ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓜꓳ ꓗꓷ ꓟ ꓔꓯ ꓔꓳ, ꓜꓳ ꓡꓰꓳ꓿

ꓖꓳ ꓡꓱ ꓥ ꓟꓲ ꓪꓴ. ꓠꓬꓲ ꓝꓲ ꓓꓴ ꓒꓲ‐ꓕꓱ ꓔꓯ ꓠꓬ ꓡꓯ ꓐꓳ ꓔꓶ ꓓꓴ ꓗꓪ ꓢꓰꓼ ꓗꓷꓳ꓿ ꓝꓲ ꓓꓴ ꓒꓳ‐ꓡꓳ ꓔꓯ ꓠꓬ ꓡꓯ ꓐꓲ (ꓛꓳꓽ ꓐꓲꓻ ) ꓔꓯ ꓓꓶꓺ ꓢꓰꓼ ꓗꓷꓳ꓿ ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓐꓴ ꓫꓵꓻ ꓟꓳ ꓔꓯ ꓣꓳ‐ꓟ ꓡꓳ ꓒꓱ Vatican city ꓗꓪ ꓮ ꓟꓶ ꓣꓳ ꓔꓬ ꓟ ꓙꓵ, ꓗꓪ ꓛꓲ ꓙꓳˍ ꓟ ꓥ ꓡꓳ꓿