ꓪꓴ-ꓢ ꓐꓰ ꓞꓳ ꓤ ꓘꓶꓽ ꓫꓵꓽ ꓬꓰˍ ꓟ

ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ=

ꓮ ꓟꓶ ꓠꓬ ꓣꓳ ꓘꓶꓽ ꓫꓵꓽ ꓬꓰˍ ꓟ ꓚꓱꓹ ꓔꓯ ꓠ ꓠꓹ ꓔꓬ ꓟ ꓥ ꓡꓳ= ꓘꓶꓽ ꓫꓵꓽ ꓬꓰ ꓢꓴ ꓡ ꓞꓳ ꓠꓬꓲꓽ ꓣꓳ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓙ ꓡꓯ ꓘꓳˍ ꓟ꓾ ꓢꓯꓼ ꓟꓬ ꓖꓶ ꓡꓯ ꓘꓳˍ ꓟ꓾ ꓶꓻ ꓤ ꓑꓯꓹ ꓡꓯ ꓘꓳˍ ꓟ꓾ ꓕꓱ ꓡꓱ ꓫꓵꓽ ꓬꓲ ꓔꓶ ꓙꓱꓼ ꓙꓳˍ ꓡꓳ= ꓖꓳ ꓡꓱ ꓠꓬꓲ ꓘꓶꓽ ꓫꓵꓽ ꓬꓰˍ ꓟ ꓠꓬ ꓮ ꓘꓶꓸ ꓠꓯꓸˍ ꓟ ꓚꓵ ꓘꓶꓽ ꓕꓲ ꓟ ꓥ ꓡꓳ= ꓗꓳꓸ ꓡ ꓟ ꓕꓲ ꓠꓽ ꓗꓪ ꓘꓶꓽ ꓫꓵꓽ ꓬꓰˍ ꓟ ꓬꓲ ꓝꓲꓸ ꓗꓴ ꓝꓲꓸ ꓙꓳˍ ꓡꓳ ꓐꓰ ꓣꓳ ꓐꓯ ꓗꓷꓳ= ꓠꓬꓲꓸ ꓠꓬꓲ ꓪꓴ-ꓢ ꓐꓰ ꓞꓳ ꓤ ꓘꓶꓽ ꓫꓵꓽ ꓬꓰˍ ꓟ ꓗꓪ ꓮ ꓡꓲ ꓐꓰ ꓬꓰ ꓗꓳꓸ ꓡˍ ꓡ ꓐꓯ ꓟ ꓔꓯ ꓕꓱ ꓗꓴꓺ ꓝꓲꓸ ꓗꓪ ꓐꓰ ꓠꓬꓲꓸ ꓠꓬꓲ ꓣꓳ ꓡꓳꓸ ꓠꓬꓲ ꓡꓯ=

ꓘꓶꓽ ꓫꓵꓽ ꓬꓰˍ ꓟ ꓬꓲꓸ ꓪꓴꓸ ꓕꓲ ꓝꓲꓸ ꓟ ꓗꓪ ꓐꓵꓻ ꓞꓶꓽ ꓑ ꓡꓯ ꓘꓳˍ ꓟ ꓔꓯ ꓣꓳ ꓠ ꓠꓹ ꓗꓷꓳ= ꓕꓱ ꓡꓱ ꓪꓴ-ꓢ ꓐꓰ ꓞꓳ ꓤ ꓐꓵꓻ ꓞꓶꓽ ꓑ ꓡꓯ ꓘꓳꓹˍ ꓟ ꓠꓬ ꓮ ꓡꓲ ꓟ ꓔꓯ ꓐꓯˍ ꓡ? ꓐꓯ ꓟ ꓔꓯ ꓡꓳꓸ ꓠꓬꓲˍ ꓕꓯ꓾ ꓐꓹ ꓐ ꓪꓴ-ꓢ ꓐꓰ ꓞꓳ ꓤ ꓘꓶꓽ ꓫꓵꓽ ꓬꓰˍ ꓟ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓞꓳ ꓤ ꓒꓬꓱꓼ ꓡ ꓢꓲ ꓠꓬꓲ꓾ ꓬꓲ ꓠꓬ ꓣꓳ ꓝꓴꓲꓸ ꓔꓯ ꓬꓲ ꓖꓳ ꓓꓱꓽ ꓗꓪ ꓣꓴ ꓟꓯꓻ ꓗꓷ ꓟ ꓣꓳ ꓡꓳꓸ ꓟꓳꓻˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓝꓴꓲꓸ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓔꓯꓹ ꓙꓰ ꓢꓲ꓾ ꓣꓳ ꓐꓵꓻ ꓞꓶꓽ ꓟꓶ ꓞꓲ ꓥ ꓟ ꓝꓴꓲꓸ ꓠꓬ ꓢꓲ ꓒ ꓬꓰ-ꓢꓴ ꓔꓯꓹ ꓙꓰ ꓢꓲ ꓬꓲ ꓠꓬ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ=

ꓖꓳ ꓡꓱ ꓣꓳ ꓠꓬ ꓔꓱꓹ ꓜꓳꓽ ꓢꓴ ꓒꓬꓱꓼ ꓡꓺꓳ= ꓪꓴ-ꓢ ꓟꓲꓽ ꓙꓬ ꓗꓪ ꓔꓱꓹˍ ꓟ ꓐꓵꓻ ꓞꓶꓽ ꓣꓳ ꓪ ꓖꓪꓽ ꓡꓰꓳ= ꓕꓱ ꓟ ꓠꓬ ꓬꓲ ꓪꓴꓸ ꓕꓲ ꓝꓲꓸ ꓥ ꓡꓳ=

ꓝꓮꓲ ꓕꓲ ꓝꓲꓸ ꓙꓽ ꓧꓷꓹ ꓑ ꓡꓯ ꓘꓳˍ ꓟ ꓔꓯ ꓣꓳ ꓡꓳꓸ ꓠꓬꓲˍ ꓕꓯ ꓬꓲ ꓟꓸ ꓟꓲꓽ ꓠꓬ꓾ ꓡ ꓞꓳ ꓠꓬꓲꓽ ꓣꓳ ꓙꓽ ꓧꓷꓹ ꓑ ꓡꓯ ꓘꓳꓹˍ ꓟ ꓠꓬ ꓙꓵꓽ ꓪ ꓑ ꓡꓯ ꓘꓳꓹˍ ꓟ꓾ ꓮ ꓡꓲꓳ ꓐꓯ ꓠꓬ ꓮ ꓠꓱ ꓕꓯ ꓙꓽ ꓧꓷꓹ ꓗꓪ ꓮꓸ ꓕꓽ ꓓꓱꓼ ꓖꓴ꓾ ꓮꓸ ꓕꓽ ꓑꓬ ꓖꓴ꓾ ꓛꓬꓹ ꓢꓶꓽ ꓗꓷ ꓖꓴ꓾ ꓕꓱ ꓡꓱ ꓗꓷ ꓔ ꓟ ꓑꓶꓸ ꓓꓴ ꓙꓵꓽ ꓪ ꓑ ꓡꓯ ꓘꓳˍ ꓟ ꓥ ꓡꓳ= ꓪꓴ-ꓢ ꓐꓰ ꓞꓳ ꓤ ꓘꓶꓽ ꓫꓵꓽ ꓬꓰˍ ꓕꓯ ꓢꓲ ꓒ ꓬꓰ-ꓢꓲ ꓠꓬ ꓣꓳ ꓐꓱ ꓶ ꓫꓸ ꓙꓵ ꓜꓲꓽ ꓢꓲ ꓣꓳ ꓔꓯ ꓬꓲ ꓢꓯꓼ ꓪ ꓖꓶ ꓡˍ ꓡꓳ=

ꓖꓳ ꓡꓱ ꓠꓬꓲ 2 ꓘꓳ-ꓡꓱ-ꓕꓴ 12ꓽ10 ꓗꓪ ꓣꓳ ꓡꓳꓸ ꓠꓬꓲˍ ꓠꓬ꓾ ꓢꓲ ꓒ ꓬꓰ-ꓢꓴ ꓐꓱ ꓢꓯꓼ ꓐꓽˍ ꓟ꓾ ꓫꓸ ꓝꓲˍ ꓟ꓾ ꓫꓸ ꓙꓵ ꓟꓶ ꓙꓵˍ ꓟ ꓔꓳꓹ ꓜꓳꓽˍ ꓟ ꓑꓶꓸ ꓓꓴ ꓥꓪ ꓗꓹ ꓛꓲˍ ꓡꓳ= ꓮ ꓡꓲꓳ ꓐꓯ ꓠꓬ ꓥꓪ ꓢꓯꓼ ꓐꓽˍ ꓕꓯ ꓥꓪ ꓠꓬ ꓢꓯꓼ ꓙꓳˍ ꓡꓳ ꓐꓰ ꓐꓯ ꓡꓳ= ꓕꓱ ꓟ ꓠꓬ ꓙꓲꓻ ꓫꓬ ꓢꓴ ꓒꓳ-ꓡꓳ ꓡꓰ ꓐꓯ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ꓾ ꓢꓲ ꓒ ꓬꓰ-ꓢꓴ ꓠꓯꓸꓼ ꓗꓪ ꓓꓵꓽ ꓡ ꓢꓴ ꓠꓬ ꓢꓯꓼ ꓙꓳˍ ꓡꓳ꓾ ꓪꓽ ꓠꓬꓲˍ ꓡꓳ꓾ ꓐꓯ ꓟ ꓣꓳ ꓡꓳꓸ ꓟꓳˍ ꓡꓳ=

ꓝꓮꓲ 3 ꓝꓲꓸ ꓕꓲ ꓝꓲꓸ ꓥ ꓟ꓾ ꓫꓵꓽ ꓤꓲ ꓞꓹ ꓟ ꓕꓲ ꓝꓲꓸ ꓗꓪ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓚꓲꓸ ꓛꓬ ꓡꓰ ꓪꓴ-ꓢ ꓐꓰ ꓞꓳ ꓤ ꓟꓲꓽ ꓙꓬ ꓗꓪ ꓜꓶꓽ ꓟꓴꓽ ꓬꓰˍ ꓟ ꓗꓪ ꓬꓲ ꓠꓬ ꓮ ꓣꓳ ꓤ ꓕꓲ ꓟ ꓥ ꓢꓲ ꓠꓬꓲ꓾ ꓫꓵꓽ ꓓꓳ ꓡˍ ꓗꓪ ꓛꓲ꓾ ꓬꓲ ꓠꓬ ꓢꓯꓼ ꓟꓬ ꓖꓶ ꓗꓷꓳ= ꓞꓳ ꓤ ꓐꓰ ꓟꓲ ꓠꓯ ꓠꓬꓲꓽ ꓗꓴꓸ ꓚꓸꓼ ꓗꓪ ꓘꓶꓽ ꓫꓵꓽ ꓬꓰˍ ꓟ ꓗꓪ ꓬꓲ ꓠꓬ ꓘꓶꓽ ꓫꓵꓽ ꓮ ꓣꓳ ꓤ ꓒꓬꓱꓼ ꓡꓺꓳ꓾ ꓐꓯ ꓟ ꓢꓲ ꓒ ꓬꓰ-ꓢꓴ ꓬꓲ ꓤꓶꓻ ꓔꓯ ꓡꓳꓸ ꓠꓬꓲˍ ꓕꓯ ꓣꓳ ꓢꓷꓸ ꓓꓻˍ ꓡꓳ=

ꓝꓮꓲ ꓘꓶꓽ ꓫꓵꓽ ꓕꓲ ꓟ ꓥ ꓟ ꓫꓵꓽ ꓔꓯ ꓑꓯ ꓡꓯ ꓘꓳꓹˍ ꓟ ꓔꓯ ꓣꓳ ꓡꓳꓸ ꓠꓬꓲˍ ꓕꓯ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓢꓲ ꓒ ꓬꓰ-ꓢꓴ ꓠꓯꓸꓼ ꓗꓪ ꓓꓵꓽ ꓡ ꓢꓴ ꓠꓬ ꓫꓵꓽ ꓑꓯ ꓡꓯ ꓘꓳꓹˍ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ ꓬꓲ ꓠꓯꓸꓼ ꓗꓪ ꓓꓵꓽ ꓡ ꓢꓴ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵꓽ ꓐꓰ ꓣꓳ ꓫꓵꓽ ꓠꓬ ꓑꓯ ꓡꓯ ꓘꓳ ꓡꓰꓳ= ꓖꓳ ꓡꓱ ꓠꓬꓲ ꓘꓶꓽ ꓫꓵꓽ ꓬꓰˍ ꓟ ꓡꓲꓺ ꓝꓲꓸ ꓗꓪ ꓠꓬ ꓫꓵꓽ ꓑꓯ ꓡꓯ ꓘꓳꓹˍ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓔꓯ ꓬꓲ ꓗ ꓠꓯꓸ ꓛꓳ ꓢꓴ꓾ ꓬꓲ ꓠꓯꓸꓼ ꓗꓪ ꓓꓵꓽ ꓙꓰ ꓢꓴ ꓠꓬ ꓬꓲ ꓫꓵꓽ ꓔꓯ ꓑꓯ ꓟꓶ ꓡꓯ ꓘꓳ ꓡꓰˍ ꓟ ꓥ ꓡꓳ= 

ꓝꓮꓲ ꓬꓲ ꓝꓲꓸ ꓥꓪꓽ ꓝꓲꓸ ꓗꓪ ꓠꓬ ꓟꓬꓱꓺ ꓑꓯ ꓡꓯ ꓘꓳꓹˍ ꓟ ꓔꓯ ꓣꓳꓽ ꓡꓳꓸ ꓠꓬꓲˍ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓢꓯꓼ ꓙꓳ ꓪꓽ ꓠꓬꓲ ꓢꓴ꓾ ꓢꓲ ꓒ ꓬꓰ-ꓢꓴ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓥ ꓢꓲ ꓠꓬꓲ꓾ ꓣꓳ ꓬꓲ ꓔꓯ ꓙꓵꓻ ꓢꓲ ꓠꓬꓲ ꓬꓲ ꓫꓵꓽ ꓘꓶꓽ ꓫꓵꓽ ꓫꓵꓼ ꓗꓪ ꓣꓳ ꓓꓵꓽ ꓙꓰˍ ꓔꓯ ꓣꓳ ꓠꓬ ꓬꓲ ꓟꓬꓱ ꓔꓯ ꓑꓯ ꓟꓶ ꓡꓰꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓗꓹ ꓛꓲꓽ ꓓꓴ꓾ ꓣꓳ ꓐꓱ ꓶ ꓢꓯꓼ ꓪ ꓟꓶ ꓓꓴ ꓥ ꓡꓳ= ꓘꓶꓽ ꓫꓵꓽ ꓬꓰ ꓢꓴ ꓬꓲ ꓣꓳ ꓠꓬ ꓬꓲ ꓟꓬꓱ ꓑꓯ ꓡꓯ ꓘꓳꓹˍ ꓟ ꓡꓰ ꓐꓰ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓠꓬ ꓢꓲ ꓒ ꓬꓰ-ꓢꓴ ꓟꓬꓱꓺ ꓑꓯ ꓟꓶˍ ꓟ ꓟꓶ ꓡꓰꓳ= 

ꓝꓮꓲ ꓛꓳꓼ ꓝꓲꓸ ꓕꓲ ꓝꓲꓸ ꓗꓪ ꓠꓬ ꓬꓲ ꓑ ꓓꓴ ꓡꓰˍ ꓗꓪ ꓛꓲ ꓬꓰ ꓠꓹ ꓟ ꓬꓲꓸ ꓝꓲꓸ ꓥ ꓡꓳ= ꓕꓰ ꓡꓰ ꓬꓲ ꓑ ꓓꓴ ꓡꓰˍ ꓐꓰ ꓐꓯ ꓕꓯ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ ꓖꓳ ꓓꓱꓽ ꓔꓲꓹ ꓗꓷ ꓕꓯ꓾ ꓢꓲ- ꓫꓬ-ꓟ-ꓦ ꓬꓲ ꓑ ꓖꓳ ꓟ ꓣꓳ ꓠꓯꓸꓼ ꓗꓪ ꓣꓳ ꓕꓲ ꓤꓶꓻ ꓡꓱꓸꓼ ꓣꓳ ꓖꓳ ꓓꓱꓽ ꓗꓪ ꓙꓳ ꓡꓰꓳ= ꓣꓳ ꓦꓻ ꓗꓪ ꓙꓳ ꓡꓰꓳ= ꓖꓳ ꓡꓱ ꓠꓬꓲ ꓪꓴ-ꓢ ꓐꓰ ꓘꓶꓽ ꓫꓵꓽ ꓬꓰ ꓔ ꓟ ꓬꓲ ꓢꓷꓸ ꓡꓰ ꓓꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ ꓐꓹ ꓐ꓾ ꓤ ꓔꓲꓸ꓾ ꓢꓲ-ꓫꓬ-ꓟ-ꓦ ꓗꓪ ꓐꓰ ꓖꓳ ꓓꓱꓽ ꓔꓲꓹ ꓔ ꓢꓴ ꓠꓬ ꓢꓲ-ꓫꓬ-ꓟ-ꓐ ꓬꓲ ꓑ ꓖꓳ ꓟ ꓓꓴ ꓡꓰ ꓟ ꓑꓶꓸ ꓓꓴ ꓣꓳ ꓠꓬ ꓪꓴ-ꓢ ꓐꓰ ꓘꓶꓽ ꓫꓵꓽ ꓬꓰ ꓔ ꓡꓳ ꓐꓯ ꓟ ꓬꓲ ꓢꓷꓸ ꓡꓰ ꓓꓴ ꓕꓱ ꓟ ꓥ ꓡꓳ=

ꓝꓮꓲ ꓫꓵꓽ ꓝꓲꓸ ꓔꓲ ꓝꓲꓸ ꓗꓪ ꓠꓬ ꓘꓶꓽ ꓫꓵꓽ ꓬꓰˍ ꓟ ꓗꓪ ꓟꓷꓽ ꓠꓷꓹ ꓗꓪ ꓐꓰ ꓐꓯ ꓡꓯ ꓘꓳꓹˍ ꓟ ꓥ ꓡꓳ= ꓥ ꓡꓳ꓾ ꓣꓳ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ ꓬꓲ ꓗ ꓠꓯꓸ ꓛꓳˍ ꓕꓯ ꓣꓳ ꓟꓷꓽ ꓠꓷꓹ ꓗꓪ ꓐꓰ ꓣꓳ ꓠꓬ ꓠꓲꓽ ꓔꓯ ꓟꓽ ꓦ ꓡꓱꓻ꓾ ꓠꓲꓽ ꓔꓯ ꓖꓼ ꓓꓳ ꓗꓷˍ ꓥꓳ꓾ ꓠꓲꓽ ꓟꓬꓱꓽ ꓐꓰ ꓠꓲꓽ ꓬꓰˍ ꓟ ꓠꓲꓽ ꓚꓱꓹ ꓥ ꓕ ꓑꓳꓸꓼ ꓔꓯ ꓥꓪ ꓟꓽ ꓬꓰꓳ꓾ ꓐꓰ ꓪꓴ-ꓢ ꓐꓯ ꓘꓶꓽ ꓗꓪ ꓪꓵꓼ ꓘꓶꓽ ꓖꓶ ꓠ ꓗꓹ ꓡꓳ= ꓖꓳ ꓟ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓘꓶꓽ ꓫꓵꓽ ꓬꓰ ꓔꓬ ꓥꓳ꓾ ꓐꓯ ꓟ ꓔꓯ ꓓꓵꓽ ꓙꓽ ꓠꓹ ꓟ ꓬꓳꓸ ꓚꓵˍ ꓡꓳ=

ꓝꓮꓲ ꓦꓰꓼ ꓝꓲꓸ ꓕꓲ ꓝꓲꓸ ꓗꓪ ꓠꓬ ꓦꓻ ꓜꓻ ꓜꓽˍ ꓟ ꓬꓲ ꓝꓲꓸ ꓗꓪ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓜꓽ ꓠꓹ ꓟ ꓐꓱ ꓶ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓬꓲ ꓟꓶꓽ ꓘꓶꓽ ꓜꓻ ꓜꓽ ꓑꓮꓲꓽ ꓗꓪ ꓑ ꓑ ꓐꓰ ꓛꓱꓼ ꓡꓱꓼ ꓙꓵꓻ ꓔꓯ ꓣꓴ ꓢꓲ ꓠꓬꓲ ꓟꓶꓽ ꓘꓶꓼ ꓜꓻ ꓜꓽˍ ꓡꓳ= ꓝꓮꓲ ꓬꓲ ꓔꓯ ꓛꓳꓻ ꓢꓴ ꓐꓴ ꓔꓯ ꓥˍ ꓟꓲ ꓜꓽ ꓠꓹ ꓟ ꓐꓱ ꓶ ꓬꓲ ꓠꓬ ꓕꓵꓼ ꓪ ꓖꓶ ꓔ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓐꓰ ꓘꓶꓽ ꓫꓵꓽ ꓬꓰ ꓢꓴ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓜꓽ ꓠꓯꓹ ꓡꓳ= ꓬꓳ-ꓦ 6ꓽ53ꓹ54 ꓗꓪ "ꓠꓴ ꓪ ꓠꓬ ꓡ-ꓞꓳ-ꓮ-ꓐꓲ ꓬꓲ ꓫꓵꓽ ꓬꓲ ꓧꓪꓽ ꓟꓽ ꓜꓽ ꓠꓬ ꓠꓴ ꓪ ꓔꓯ ꓢꓯꓼ ꓟꓬ ꓟꓽ ꓓꓹ= ꓥꓪ ꓫꓵꓽ ꓥꓪ ꓧꓪꓽ ꓜꓽ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶˍ ꓥꓳ"꓾ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓚꓲꓸ ꓛꓬ ꓡꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓬꓲ ꓘꓶꓽ ꓫꓵꓽ ꓗꓪ ꓓꓵꓽ ꓙꓰ ꓠꓲꓹ ꓫꓵ ꓢꓴ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓜꓽ ꓠ ꓗꓹ ꓡꓳ= ꓟꓽ ꓥ ꓠꓬ꓾ ꓢꓲ ꓒ ꓬꓰ-ꓢꓴ ꓬꓲ ꓘꓶꓽ ꓫꓵꓽ ꓠꓯꓸꓼ ꓗꓪ ꓣꓳ ꓟꓽ ꓓꓵˍ=

ꓝꓮꓲ ꓬꓲ ꓟꓶꓽ ꓕꓲ ꓟ꓾ ꓗꓴ ꓝꓲꓸ ꓗꓪ ꓠꓬ꓾ ꓢꓷꓸ ꓡꓰ ꓓꓴ ꓕꓲ ꓟ ꓬꓰˍ ꓟ ꓥ ꓡꓳ= ꓢꓷꓸ ꓡꓰ ꓓꓴ ꓕꓲ ꓟ ꓬꓰˍ ꓟ ꓗꓪ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓫꓵꓳ= ꓖꓳ ꓡꓱ ꓠꓬꓲ ꓡꓯꓼ ꓐꓳ ꓔꓶꓸ ꓓꓴ ꓐꓰ ꓢꓲ ꓒ ꓬꓰ-ꓢꓴ ꓐꓰ ꓘꓶꓽ ꓟꓽ ꓠ= ꓢꓲ ꓒ ꓬꓰ-ꓢꓴ ꓔꓯ ꓟꓳꓻˍ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓟꓳꓻˍ ꓡꓳ= ꓡꓯꓼ ꓐꓳ ꓔꓶꓸ ꓓꓴ ꓔꓯ ꓟꓳꓻ ꓡꓰ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓳꓻˍ ꓥꓳ꓾ ꓕꓱ ꓟ ꓠꓬ ꓬꓲ ꓢꓷꓸ ꓡꓰ ꓓꓴ ꓕꓲ ꓟ ꓥ ꓡꓳ= 

ꓢꓲ ꓒ ꓬꓰ-ꓢꓴ ꓗ ꓠꓯꓸ ꓛꓳꓻ ꓢꓴ ꓣꓳ ꓠꓬ ꓪꓴ-ꓢ ꓐꓰ ꓘꓶꓽ ꓫꓵꓽ ꓬꓰ ꓔ ꓢꓴ ꓣꓳ ꓠꓬ ꓢꓷꓸ ꓡꓰ ꓓꓴ ꓕꓱ ꓟ ꓔꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓮ ꓕꓯ ꓟꓲ ꓗꓷ ꓔ ꓠ ꓗꓹ ꓡꓳ= ꓮ ꓫꓵꓽ ꓥ ꓐꓯˍ ꓠꓬ꓾ ꓡꓯꓼ ꓐꓳ ꓔꓶꓸ ꓓꓴ ꓥꓳ= ꓡꓯꓼ ꓐꓳ ꓔꓶꓸ ꓓꓴ ꓕꓱ ꓟ ꓙꓳˍ ꓕ ꓑꓳꓸꓼ꓾ ꓡꓯꓼ ꓐꓳ ꓔꓶꓸ ꓓꓴ ꓕꓱ ꓟ ꓣꓳ ꓠꓯꓸꓼ ꓗꓪ ꓓꓹ ꓕ ꓑꓳꓸꓼ ꓕꓱ ꓟ ꓠꓬ ꓪꓴ-ꓢ ꓐꓰ ꓣꓳꓽ ꓘꓶꓽ ꓫꓵꓽ ꓬꓰ ꓔ ꓡꓳ ꓐꓯ ꓟ ꓣꓳ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓡꓳ= ꓣꓳ ꓦꓲꓻ ꓗꓪ ꓣꓳ ꓪꓽ ꓘꓴ ꓦꓲꓻ ꓗꓪ ꓡꓯꓼ ꓐꓳ ꓔꓶꓸ ꓓꓴ ꓫꓬꓹ ꓔ ꓟ ꓠꓬ꓾ ꓪꓴ-ꓢ ꓐꓰ ꓣꓳ ꓘꓶꓽ ꓫꓵꓽ ꓬꓰ ꓔ ꓡꓳ꓾ ꓐꓯ ꓟ ꓔꓯ ꓣꓳ ꓢꓷꓸ ꓡꓰ ꓓꓴ꓾ ꓙꓵꓻ ꓡꓰ ꓓꓴ꓾ ꓚꓬꓹ ꓪ ꓓꓴ ꓥ ꓡꓳ=

ꓖꓳ ꓡꓱ ꓠꓬꓲ ꓕꓱ ꓬꓲ ꓝꓲꓸ ꓗꓴꓺ ꓝꓲꓸ ꓗꓪ ꓐꓰ ꓪꓴ-ꓢ ꓐꓰ ꓞꓳ ꓤ ꓥ ꓟꓲ ꓘꓶꓽ ꓫꓵꓽ ꓬꓰ ꓔ ꓟ ꓥ ꓡꓳ= ꓘꓶꓽ ꓫꓵꓽ ꓬꓰ ꓔ ꓟ ꓬꓲ ꓔꓶ ꓙꓱꓼ ꓠꓬ ꓪꓴ-ꓢ ꓐꓰ ꓞꓳ ꓤ ꓙꓻ ꓡꓯ ꓘꓳ ꓟꓶ ꓡꓰꓳ꓾ ꓐꓯ ꓟ ꓬꓲꓸ ꓬꓲ ꓢꓲ ꓥ ꓡꓳ=

Add new comment

2 + 4 =