ꓪꓴ-ꓢ ꓠꓬ ꓔꓱꓹ ꓚꓵˍ ꓟ ꓐꓰ ꓠꓵꓻ ꓠꓲꓹ ꓥ ꓡꓳ꓾

ꓪꓴ-ꓢ ꓠꓬ ꓬꓲ ꓟꓬꓱ ꓔꓯ ꓞꓳ ꓤ ꓔꓯ ꓢꓷꓸ ꓡꓰ ꓝꓲꓳ= ꓡ ꓞꓳ ꓕꓲ ꓣꓳ ꓡꓰ ꓬꓲ ꓟꓬꓱ ꓔꓯ ꓐꓯ ꓟꓳꓸ ꓖꓶ ꓡˍ ꓕꓯ꓾ ꓬꓲ ꓠꓬ ꓬꓲ ꓟꓬꓱꓺ ꓔꓯ ꓘꓴꓻ ꓝꓲ ꓠꓹ ꓟ ꓐꓰ꓾ ꓬꓲ ꓐꓰ ꓗꓴꓸ ꓙꓲ ꓙꓳ ꓠꓹ ꓟ ꓐꓱ ꓶ ꓠꓲꓹ ꓡꓶꓽ ꓙꓳˍ ꓟ ꓡꓰ ꓐꓰ꓾ ꓪꓴ-ꓢ ꓥˍ ꓟꓲ ꓬꓲ ꓟꓬꓱꓺ ꓔꓯ ꓐꓯ ꓟꓳꓸ ꓖꓶˍ ꓕꓯ ꓞꓳ ꓤ ꓐꓰ ꓬꓲ ꓠꓬ ꓗꓴꓸ ꓙꓲ ꓙꓳ ꓡꓰꓳ= ꓖꓳ ꓡꓱ ꓠꓬ ꓪꓴ-ꓮ ꓠꓬ ꓮ ꓡꓲ ꓫꓵꓽ ꓪꓴ-ꓢ ꓥ ꓡ꓾ ꓐꓯ ꓟ ꓔꓯ ꓣꓳ ꓡꓯꓼ ꓫꓵ ꓡꓳꓸ ꓠꓬꓲˍ ꓕꓯ꓾  ꓪꓴ-ꓢ ꓬꓲ ꓧꓪꓺ ꓠꓬꓲꓽ ꓫꓵꓽ ꓙꓳˍ ꓡꓳ= ꓬꓲꓸ ꓪꓴꓸ ꓕꓲ ꓫꓵꓽ ꓟ ꓠꓬ Truth ꓐꓯˍ ꓟ ꓪꓴ-ꓢ ꓠꓬ ꓔꓱꓹ ꓚꓵˍ ꓟ ꓥ ꓡꓳ=

ꓬꓲ ꓠꓬ ꓬꓲ ꓚꓲꓸ ꓛꓬ ꓔꓱꓹ ꓚꓵˍ ꓟ ꓥ ꓡꓳ= ꓬꓲ ꓔꓯ ꓔꓱꓹ ꓚꓵˍ ꓟ ꓙꓳˍ ꓟ ꓟꓽ ꓥ= ꓬꓲ ꓚꓲꓸ ꓛꓬ ꓡꓰ ꓔꓱꓹ ꓚꓵˍ ꓟ ꓥ ꓡꓳ= ꓬꓲ ꓠꓯꓸꓼ ꓗꓪ ꓖꓳꓼ ꓠꓲꓹ ꓟꓽ ꓙꓳ= ꓬꓲ ꓠꓯꓸꓼ ꓗꓪ ꓗꓶꓸ ꓘꓶꓽ ꓟꓽ ꓙꓳ= ꓬꓲ ꓠꓯꓸꓼ ꓗꓪ ꓟꓽ ꓔꓱꓹ ꓟꓽ ꓜꓳꓽ ꓟ ꓟꓽ ꓙꓳ= ꓖꓳ ꓡꓱ ꓠꓬꓲ ꓬꓲ ꓬꓰˍ ꓟ ꓮ ꓙꓵꓽ ꓫꓸ ꓕꓱˍ ꓟ ꓮ ꓙꓵꓽ ꓠꓬ ꓔꓱꓹ ꓜꓳꓽˍ ꓟ ꓥ ꓡꓳ= 

ꓖꓳ ꓡꓱ ꓠꓬꓲ ꓠꓴ ꓐꓰ ꓥꓪ ꓠꓬ꓾ ꓪꓴ-ꓢ ꓠꓬ ꓗꓶꓸ ꓟꓽ ꓗꓴꓸ ꓟ ꓙꓵꓻˍ ꓕꓯ꓾ ꓬꓲ ꓠꓬ ꓔꓱꓹ ꓜꓳꓽˍ ꓟ ꓣꓳ ꓢꓷꓸˍ ꓕꓯ꓾ ꓕꓲ ꓠꓲꓹ ꓟ ꓡꓱꓸꓼ ꓕꓲ ꓙꓽ ꓠꓲꓹ ꓡꓱꓸꓼ ꓬꓲ ꓔꓯ ꓙꓵꓻ ꓠꓹ ꓟ ꓬꓳꓸ ꓚꓵˍ ꓡꓳ= ꓕꓲ ꓠꓲꓹ ꓟ ꓡꓱꓸꓼ ꓕꓲ ꓙꓽ ꓠꓲꓹ ꓡꓱꓸꓼ ꓬꓲ ꓔꓯ ꓙꓵꓻ ꓓꓻˍ ꓡꓳ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓗꓶꓸ ꓟꓽ ꓗꓴꓸ=

ꓟꓲ ꓠꓯ ꓕꓱ ꓟ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓑꓶꓸ ꓓꓴ ꓮ ꓫꓵꓽ ꓥˍ ꓟꓲ ꓬꓲ ꓔꓱꓹ ꓜꓳꓽˍ ꓟ ꓬꓲ ꓙꓳˍ ꓡꓳ= ꓔꓯꓺ ꓥꓳꓽ꓾ ꓣꓳ ꓦꓲꓻ ꓗꓪ ꓣꓱꓽ ꓔꓬ ꓟ ꓮ ꓔꓳꓸ ꓠꓬ ꓮ ꓠꓱ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓫꓬꓹ ꓔ ꓥ ꓟꓲ꓾ ꓕꓱ ꓟ ꓠꓬ ꓬꓲ ꓪ ꓡꓰ ꓬꓲ ꓫꓵꓼ ꓚꓰꓼ ꓔ ꓟ ꓟꓽ ꓥ= ꓬꓲ ꓪ ꓧꓪ ꓟꓳꓻ ꓡꓰ ꓟ꓾  Discovered ꓐꓯˍ ꓟ ꓙꓳˍ ꓟ ꓚꓱꓹ ꓔꓯ ꓬꓲ ꓪ ꓧꓪ ꓟꓳꓻ ꓡꓰ ꓟ ꓥ ꓡꓳ= ꓣꓳ ꓜꓶꓽ ꓔꓬ ꓟ ꓟꓳ-ꓓꓳ ꓥˍ ꓟꓲ ꓮ ꓡꓲ ꓐꓰ ꓑꓳꓹ ꓗꓷ ꓠꓬ ꓙꓰ ꓙꓲꓻˍ ꓡꓳ꓾ ꓫꓵꓸ ꓙꓲꓻˍ ꓡꓳ꓾ ꓐꓯ ꓟ ꓔꓯ ꓞꓳ ꓤ ꓐꓴ ꓧꓪ ꓟꓳꓻ ꓡꓰ ꓫꓵꓽ꓾ ꓔꓱꓹ ꓚꓵˍ ꓟ ꓬꓲ ꓑꓶꓸ ꓬꓲ ꓡꓯꓼ ꓔꓯ ꓧꓪ ꓟꓶ ꓡꓰ ꓟ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓗꓪ ꓐꓰ ꓓꓳ ꓡˍ ꓟ ꓔꓱꓹ ꓚꓵˍ ꓟ ꓬꓲ ꓧꓹ ꓬꓲ ꓟꓲˍ ꓥ ꓡꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓚꓵ ꓚꓵ ꓔꓱꓹ ꓚꓵˍ ꓡꓳ ꓐꓰ ꓐꓯ ꓕꓯ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓔꓱꓹ ꓚꓵˍ ꓟ ꓮ ꓟꓬꓹ ꓙꓳˍ ꓟ ꓔꓯ ꓡꓳꓸ ꓠꓬꓲ ꓢꓲ ꓣꓳ ꓢꓷꓸ ꓓꓻˍ ꓡꓳ= ꓣꓳ ꓧꓪ ꓟꓽ ꓟꓶ ꓡꓰ ꓗꓷ ꓟ ꓠꓱꓸ ꓐꓯ ꓔꓱꓹ ꓚꓵˍ ꓟˍ ꓟꓲ ꓮ ꓟꓬꓹ ꓙꓳˍ ꓢꓰꓽ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓚꓵ ꓚꓵ ꓔꓱꓹ ꓚꓵˍ ꓡꓳ꓾ ꓐꓯ ꓟ ꓪꓴ-ꓢ ꓬꓲ ꓧꓪ ꓬꓲ ꓪꓴꓸ ꓕꓲ ꓟ ꓟ ꓥ ꓡꓳ=

ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓠꓬ꓾ ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓡꓳ= Love itself ꓐꓯ ꓟ꓾ ꓪꓴ-ꓢ ꓠꓬ ꓬꓲ ꓚꓲꓸ ꓛꓬ ꓠꓵꓻ ꓠꓲꓹ ꓥ ꓡꓳ= ꓬꓲ ꓔꓯ ꓠꓵꓻ ꓠꓲꓹ ꓙꓳˍ ꓟ ꓟꓽ ꓥ꓾ ꓬꓲ ꓚꓲꓸ ꓛꓬ ꓠꓬ ꓠꓵꓻ ꓠꓲꓹ ꓥ ꓡꓳ= ꓖꓳ ꓡꓱ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓠꓬ ꓮ ꓙꓵꓽ ꓬꓲ ꓠꓵꓻ ꓠꓲꓹ ꓗꓪ ꓐꓰ ꓙꓵꓽ ꓔꓬ ꓡꓳ= ꓬꓲ ꓠꓵꓻ ꓠꓲꓹ ꓗꓪ ꓐꓰ ꓓꓳ ꓡ ꓟ ꓥ ꓡꓳ=

ꓪꓴ-ꓢ ꓠꓬ ꓬꓲ ꓟꓬꓱꓺ ꓔꓯ ꓞꓳ ꓤ ꓐꓴ ꓢꓷꓸ ꓠꓹ ꓟ ꓐꓱ ꓶ ꓐꓯ ꓟꓸ ꓖꓶˍ ꓕꓯ꓾ ꓣꓳ ꓬꓲ ꓔꓯ ꓡꓳꓸ ꓟꓳꓻ ꓓˍ ꓟ ꓠꓬ ꓬꓲ ꓠꓬ ꓕꓲ ꓞꓲꓼ ꓔꓱꓹ ꓚꓵˍ ꓟ ꓐꓰ ꓕꓲ ꓞꓲꓼ ꓠꓵꓻ ꓠꓲꓹ ꓥ ꓡꓳ꓾ ꓐꓯ ꓟ ꓣꓳ ꓢꓷꓸ ꓪ ꓡꓳ= ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽˍ ꓕꓯ꓾ ꓔꓱꓹ ꓔꓱꓹ ꓚꓵ ꓚꓵ ꓡꓰꓽ ꓫꓸ ꓕꓱˍ ꓕꓯ꓾ ꓗꓶꓸ ꓘꓶꓽ ꓟꓽ ꓣꓱꓽ ꓣꓱꓽ ꓥ ꓟ ꓔꓯ ꓥꓳ ꓐꓯ ꓢꓲ꓾ ꓟꓽ ꓥ ꓟ ꓔꓯ ꓟꓽ ꓥ ꓐꓯ ꓑꓶꓸˍ ꓕꓯ ꓣꓳ ꓠꓬ ꓪꓴ-ꓢ ꓤ ꓠꓱ ꓚꓵ ꓒꓬꓱꓼ ꓡꓻꓳ= 

ꓝꓮꓲ ꓪꓴ-ꓢ ꓠꓬ ꓠꓵꓻ ꓠꓲꓹ ꓥ ꓟ ꓡꓰ ꓐꓰ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓠꓵꓻ ꓠꓲꓹ ꓓꓯꓹ ꓕꓯ ꓠꓵꓻ ꓠꓲꓹ ꓗꓪ ꓐꓰ ꓛꓳ ꓫꓱꓽ ꓐ ꓡ ꓕꓯ꓾ ꓣꓳ ꓠꓬ ꓪꓴ-ꓢ ꓐꓰ ꓗꓴꓸ ꓙꓲ ꓙꓳˍ ꓟ ꓒꓬꓱꓼ ꓡꓻꓳ= ꓪꓴ-ꓢ ꓠꓬ ꓬꓲ ꓟꓬꓱꓺ ꓔꓯ ꓐꓯ ꓟꓳꓸ ꓖꓶ ꓗꓷ ꓗ ꓠꓯꓸ ꓬꓲ ꓠꓬ ꓔꓱꓹ ꓚꓵˍ ꓟ ꓐꓰ ꓠꓵꓻ ꓠꓲꓹ ꓥ ꓟ ꓣꓳ ꓢꓷꓸ ꓪ ꓡꓰꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓛꓳ ꓫꓱꓽ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓔꓱꓹ ꓚꓵˍ ꓟ ꓐꓰ ꓠꓵꓻ ꓠꓲꓹ ꓠꓯꓸꓼ ꓗꓪ ꓫꓱꓽ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ=

Add new comment

5 + 8 =