ꓪꓴ-ꓢ ꓡꓰ ꓐꓯ ꓟꓴ ꓘꓶꓽˍ ꓟ ꓟꓸ ꓟꓲꓽ

ꓪꓴ-ꓢ ꓡꓰ ꓐꓯ ꓟꓴ ꓘꓶꓽˍ ꓟ ꓟꓸ ꓟꓲꓽ

ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓝ ꓟꓶˍ ꓟ ꓪꓴ-ꓢ ꓐꓯ ꓘꓶꓽ ꓔꓯ ꓟꓷꓼ ꓢꓲꓼ ꓢꓲ꓾ ꓠꓲꓹ ꓠꓵ ꓢꓲ ꓠ ꓠꓹ ꓘꓳꓹ ꓣꓴ ꓔꓬ ꓟ ꓬꓲꓼ ꓤ ꓠꓬꓲ ꓤ ꓮ ꓐ ꓮ ꓟ ꓐꓴ꓾ ꓠ ꓠꓹ ꓘꓳꓹ ꓣꓴ ꓔꓬ ꓢꓴ ꓮ ꓙꓵꓽ  ꓢꓴ ꓕꓯꓽ ꓢꓲ ꓗꓪ ꓢꓲꓺ ꓡꓲꓺ ꓟ ꓟꓶ ꓝꓲ=  ꓕꓱ ꓕꓲ ꓙꓵꓹ ꓗꓪ ꓠꓬ ꓪꓴ-ꓢ ꓡꓰ ꓐꓯ ꓟꓴ ꓘꓶˍ ꓟ ꓟꓸ ꓟꓲꓽ ꓒꓶ ꓖꓶ ꓠꓹ ꓫꓵˍ ꓡꓳ=

ꓢꓲꓽ ꓫꓬ ꓕꓳ ꓶ ꓚ ꓟꓲꓽ ꓗꓪ ꓡꓳꓸ ꓠꓬꓲˍ ꓕꓯ ꓪꓴ-ꓢ ꓡꓰ ꓘꓶꓽ ꓫꓵꓽ ꓐꓰꓽ ꓦꓬꓼ ꓠꓬꓲ ꓗꓪ ꓥˍ ꓟꓲ ꓬꓲ ꓓꓽ ꓟ ꓐꓯ ꓟꓴ ꓘꓶꓽ ꓢꓲ ꓡ ꓞꓳ ꓮ ꓙꓵꓽ ꓔꓯ ꓞꓰ ꓡꓰ ꓝꓲˍ ꓟ ꓟꓸ ꓟꓲꓽ ꓙꓳˍ ꓡꓳ= ꓬꓲ ꓚꓰ ꓬꓲ ꓪꓴꓸ ꓕꓳꓽ ꓶ 7ꓕꓱ ꓗꓪ ꓡꓳꓸ ꓠꓬꓲ ꓠꓬ꓾ ꓠꓳ-ꓪ ꓦꓬꓼ ꓠꓬꓲ ꓗꓪ ꓟꓵꓽ ꓟꓷꓸ ꓟꓲ ꓟꓷꓸ ꓗꓷ ꓢꓲ ꓡ ꓞꓳ ꓮ ꓙꓵꓽ ꓫꓵꓻ ꓖꓴ ꓡꓰ ꓝꓲˍ ꓟ ꓟꓸ ꓟꓲꓽ ꓓꓯˍ ꓡꓳ= ꓝꓮꓲ ꓢꓳ-ꓓꓳ-ꓟ ꓡꓳ ꓒꓱ ꓔꓯ ꓟꓴꓽ ꓗꓪ ꓗꓪ ꓐꓰ ꓮ ꓔꓳꓸ ꓡꓰ ꓛꓴ ꓖꓴ ꓡꓰˍ ꓟ ꓬꓲ ꓚꓰ ꓬꓲ ꓪꓴꓸ ꓕꓳ ꓶꓽ 19 ꓕꓱ ꓗꓪ ꓐꓳ ꓔ ꓡꓳ= 

ꓬꓰ-ꓢꓴ ꓝꓮꓲ ꓕꓲ ꓧꓪꓹ ꓡ ꓢꓲ ꓡꓳꓹ ꓬꓰˍ ꓟ ꓐꓯ ꓟꓴ ꓘꓶꓽˍ ꓐꓰ ꓡˍ ꓕꓯ ꓟꓲ ꓠꓯ ꓡ ꓞꓳ ꓦꓬꓼ ꓠꓬꓲ ꓔꓯ ꓖꓴ ꓢꓲ ꓠꓬꓲ ꓐꓯ ꓔ ꓟ ꓐꓯ ꓘꓶꓽ ꓙꓳˍ ꓡꓳ= ꓡꓴ-ꓘ 17ꓽ 26ꓹ 30 "ꓠꓳ-ꓪ ꓦꓬꓼ ꓠꓬꓲ ꓗꓪ ꓮ ꓡꓲ ꓥ ꓠꓬ ꓡ-ꓞꓳ-ꓮ-ꓐꓲ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓡꓱ ꓗˍ ꓥꓳ= ꓠꓳ-ꓪ ꓦꓲ ꓡꓲ ꓗꓪ ꓓꓵꓽ ꓡꓰˍ ꓗꓪ ꓛꓲ ꓜꓽ ꓠꓬꓲ ꓓꓳ ꓠꓬꓲ꓾ ꓤ ꓟꓶ ꓘꓴ ꓠꓬꓲ꓾ ꓮ ꓟꓲꓽ ꓩꓴ ꓠꓬꓲ ꓬꓰ ꓔꓬ ꓟ ꓗꓪ ꓟꓵꓽ ꓟꓷꓸ ꓡ ꓢꓲ ꓬꓲ ꓪ ꓮ ꓙꓵꓽ ꓔꓲꓹ ꓫꓵꓻꓳ= ꓡꓳ-ꓕꓷ ꓦꓬꓼ ꓠꓬꓲ ꓗꓪ ꓥˍ ꓟꓲ ꓖꓳ ꓟ ꓡꓰ ꓐꓰ ꓬꓲ ꓪ ꓠꓬ ꓜꓽ ꓠꓬꓲ ꓓꓳ ꓠꓬꓲ꓾ ꓪꓴꓻ ꓠꓬꓲ ꓪꓴꓽ ꓠꓬꓲ꓾  ꓓꓳ ꓠꓬꓲ ꓫꓵꓸ ꓠꓬꓲ꓾ ꓦꓲꓻ ꓫꓬꓹ ꓠꓬꓲ ꓬꓰ ꓔꓬ ꓡꓳ= ꓖꓳ ꓡꓱ ꓥˍ ꓟꓲ ꓡꓳ-ꓕꓷ ꓠꓬ ꓢꓳ-ꓓꓳ-ꓟ ꓗꓪ ꓐꓰ ꓓꓳ ꓡˍ ꓕꓲ ꓠꓬꓲ ꓗꓪ ꓟꓴꓽ ꓗꓪ ꓗꓪ ꓐꓰ ꓮ ꓔꓳꓸ ꓐꓰ ꓡꓳ ꓟ ꓦ ꓩꓴ ꓡ ꓢꓲ ꓬꓲ ꓪ ꓮ ꓙꓵꓽ ꓛꓴ ꓐꓲ ꓡꓰ ꓝꓲꓳ= ꓡ-ꓞꓳ-ꓮ-ꓐꓲ ꓟꓳꓸ ꓖꓶ ꓡˍ ꓟ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓟ ꓡꓰ ꓐꓰ ꓗꓷ ꓡꓰˍ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ=

ꓐꓯ ꓘꓶꓽ ꓙꓳˍ ꓡꓳ= ꓟꓸ ꓟꓲꓽ ꓕꓱ ꓕꓲ ꓝꓲꓸ ꓗꓪ ꓬꓲ ꓓꓽ ꓟ ꓣꓳ ꓔꓯ ꓬꓲꓼ ꓠꓬꓲꓸ ꓖꓶˍ ꓟ ꓮ ꓫꓵꓽ ꓥ ꓡꓳ= (1) ꓟꓽ ꓙꓲꓻ ꓟꓽ ꓫꓬꓻ ꓟ ꓬꓰˍ ꓟ ꓤꓶꓻ ꓦꓬꓼ ꓠꓬꓲ ꓗꓪ ꓐꓰ ꓡ ꓞꓳ ꓠꓬ ꓓꓵꓽ ꓙ ꓒꓳꓹ ꓬꓲꓼ ꓡ ꓟꓽ ꓢꓳ= ꓠꓲꓹ ꓟ ꓟꓽ ꓡꓶꓸ ꓡ ꓠꓬꓲ ꓪꓴ-ꓢ ꓐꓯ ꓟꓴ ꓘꓶꓽ ꓗꓷ ꓟ ꓥ ꓡꓳ= ꓡ-ꓞꓳ-ꓮ-ꓐꓲ ꓢꓲꓺ ꓒ ꓬꓰ-ꓢꓴ ꓝꓮꓲ ꓕꓲ ꓧꓪꓹ ꓡˍ ꓟ ꓦꓬꓼ ꓠꓬꓲ ꓗꓪ ꓥˍ ꓟꓲ ꓟꓲ ꓠꓯ ꓡ ꓞꓳ ꓠꓬ ꓠꓳ-ꓪ ꓦꓬꓼ ꓠꓬꓲ ꓐꓰ ꓢꓳ-ꓓꓳ-ꓟ ꓦꓬꓼ ꓠꓬꓲ ꓗꓪ ꓟ ꓕꓲ ꓡꓰꓹꓼ ꓐꓰ ꓗꓷ ꓡꓰˍ ꓥꓳ꓾ ꓐꓰ ꓠꓲꓹ ꓟ ꓟꓽ ꓡꓶꓸ ꓢꓳˍ ꓟ ꓫꓷꓹ ꓤꓶꓻ ꓔꓯ ꓒꓬꓱꓼ ꓔꓬ ꓢꓴ ꓔꓯ ꓬꓲꓼ ꓠꓬꓲꓸ ꓖꓶˍ ꓡꓳ= ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ ꓪꓴ-ꓢ ꓙ ꓖꓴ ꓗꓪ ꓫꓱꓽ ꓙꓰ ꓡꓯ= 

ꓡꓳꓹ ꓬꓰˍ ꓟ ꓕꓲ ꓘꓶꓽ꓾ ꓢꓲꓺ ꓒ ꓬꓰ-ꓢꓴ ꓬꓲ ꓪꓴꓸ ꓕꓲ ꓧꓪꓹ ꓟꓲ ꓠꓯ ꓗꓪ ꓡˍ ꓕꓯ ꓠꓵ ꓠꓲꓹ ꓡꓰ ꓶꓼ ꓓꓳ ꓫꓱꓸ ꓓꓳ ꓟꓸ ꓢꓲ ꓝꓴꓲꓸ ꓙꓳ ꓢꓴ ꓔꓯ ꓚꓬꓴꓸ ꓙ ꓗꓷꓳ=  ꓝꓮꓲ ꓠꓬꓲꓽ ꓧꓪꓹ ꓕꓲ ꓧꓪꓹ ꓡˍ ꓕꓯ ꓙꓲꓻ ꓫꓬ ꓢꓴ ꓐꓰ ꓟꓽ ꓙꓲꓻ ꓫꓬ ꓢꓴ ꓔꓯ ꓐꓱ ꓗꓷ ꓢꓲ ꓟꓽ ꓙꓲꓻ ꓢꓴ ꓔꓯ ꓠꓬ ꓐꓯ ꓟꓴ ꓘꓶꓽˍ ꓥꓳ= ꓙꓲꓻ ꓫꓬ ꓢꓴ ꓔꓯ ꓠꓽ ꓬꓲ ꓗꓴꓷꓼ ꓗꓪ ꓧꓳꓽ ꓙꓰˍ ꓥꓳ= (ꓟ-ꓕꓲ 13ꓽ41ꓹ43) ꓐꓯ ꓟꓴ ꓘꓶꓽˍ ꓟ ꓟꓽ ꓟꓶ ꓠꓹ ꓟ ꓪꓴ-ꓢ ꓙ ꓖꓴ ꓗꓪ ꓫꓱꓽ ꓙꓰ ꓡꓯ=