ꓪ ꓔꓲ ꓓ-ꓪꓵ (ꓬꓲ-ꓢꓷ-ꓡꓰ ꓪ ꓔꓲ)

ꓐꓚ 879 ꓕꓯ ꓪ ꓔꓲ ꓢꓳ-ꓡꓳ ꓠꓬ ꓾ ꓬꓲ-ꓢꓷ-ꓡꓰ ꓟꓵꓽ ꓗꓪ ꓬꓲꓸ ꓪꓴꓸ ꓓꓽ ꓪꓴꓸ ꓟ꓾ ꓪ ꓔꓲ ꓙꓵꓽ ꓪꓴꓸ ꓛꓴꓽ ꓟꓶ ꓗꓷꓳ= ꓬꓲ ꓠꓬ ꓟꓽ ꓓ ꓬꓳꓸ ꓚꓵˍ ꓟ ꓪꓴ-ꓢ ꓕꓵꓼ ꓪ ꓔꓯ ꓟꓽ ꓛꓳ ꓟ ꓪꓴꓸ ꓠꓬꓲ꓾ ꓪꓴ-ꓢ ꓠꓬ ꓪ ꓙꓲ ꓙꓲˍ ꓟ ꓕꓲ ꓣꓳ ꓔꓯ ꓪ ꓔꓲ ꓣꓱꓽ ꓝꓲˍ ꓥꓳ ꓐꓰ ꓪꓵꓼ ꓘꓶꓽ ꓖꓶ ꓗꓷꓳ=

ꓗꓸ ꓠꓯꓸ ꓪꓴ-ꓢ ꓠꓬ ꓟꓷꓽ ꓠꓷꓹ ꓝ ꓒ ꓢ-ꓟꓴ-ꓬꓰ ꓔꓯ ꓬꓴ-ꓔ ꓞꓳ ꓫꓵꓽ ꓘꓴꓽ ꓗꓪ ꓟ ꓬꓰ-ꓢꓲ ꓔꓬ ꓗꓪ ꓙꓰ ꓢꓲ ꓾ ꓬꓰ-ꓢꓲ ꓬꓲꓸ ꓤ 8 ꓣꓳ ꓘꓴꓽ ꓗꓪ ꓟꓽ ꓓ ꓣꓳˍ ꓟ ꓕꓲ ꓣꓳ ꓔꓯ ꓪ ꓔꓲ ꓟꓰ ꓞꓶꓻ ꓟꓰ ꓖꓶ ꓠꓹ ꓟ ꓢ-ꓟꓴ-ꓬꓰ ꓔꓯ ꓘꓳ ꓫꓱ ꓫꓱ ꓝꓲ ꓩꓴ ꓗꓷˍ ꓡꓳ=

ꓓ-ꓪꓵ ꓠꓬ ꓬꓲ-ꓢꓷ-ꓡꓰ ꓗꓪ ꓛꓲ ꓐꓶ ꓛꓰꓹ ꓗꓴ ꓒꓽ ꓥ ꓢꓲ꓾ ꓢꓯꓼ ꓙꓳ ꓪꓽ ꓠꓬꓲ ꓢꓴˍ ꓐꓰ ꓟꓯꓼ ꓬꓰ ꓒ ꓥ ꓢꓲ ꓠꓬꓲ꓾ ꓫꓸ ꓕꓱˍ ꓟ ꓗꓪˍ ꓟꓲ ꓙ ꓜꓲꓼ ꓠꓲꓸ ꓙꓳˍ ꓟ ꓡꓰꓽ ꓟꓽ ꓞꓲ ꓖꓪˍ ꓟꓲ ꓖꓪꓺ ꓜꓳˍ ꓟ ꓟꓴꓽ ꓖꓪ ꓖꓪ ꓒꓽ ꓕꓲ ꓣꓳ ꓥ ꓡꓳ= ꓖꓳ ꓡꓱ ꓥˍ ꓟꓲ꓾ ꓖꓳ ꓕꓲ ꓙꓵꓹ ꓕꓯ ꓓ-ꓪꓵ ꓠꓬ ꓡꓲꓺ ꓛꓲꓺ ꓗꓪ ꓕꓲ ꓣꓳ ꓔꓵꓸꓼ ꓔꓬꓹ ꓢꓲ ꓾ ꓮꓸ ꓫꓵꓽ ꓔꓯˍ ꓟꓲ ꓙꓳꓺ ꓟꓽ ꓗꓴꓸ ꓟ ꓮꓸ ꓣꓳ ꓡꓳꓸ ꓒ ꓕꓲ ꓣꓳ ꓥ ꓡꓳ= ꓬꓲꓸ ꓔꓯ ꓬꓲꓸ ꓕꓲ ꓠꓱꓻ ꓗꓪ ꓟ ꓬꓲꓸ ꓮ ꓬꓲꓼ ꓐꓴ ꓡꓰ ꓬꓲ ꓔꓯ ꓟꓽ ꓠꓲꓹ ꓠꓵ꓾ ꓖꓳ ꓡꓱ ꓥˍ ꓟꓲ ꓓ-ꓪꓵ ꓠꓬ ꓬꓲꓸ ꓮ ꓬꓲꓼ ꓐꓴ ꓕꓯꓽ ꓢꓲꓺ ꓙꓲˍ ꓟ ꓔꓯ ꓪꓴ-ꓢ ꓢꓷˍ ꓡꓳ=

ꓢꓳ-ꓡꓳ ꓪ ꓔꓲ ꓠꓬ ꓥꓶˍ ꓟ ꓦ ꓘꓶꓻ ꓡꓶ ꓡˍ ꓕꓯ ꓓ-ꓪꓵ ꓠꓬ ꓛꓲ ꓐꓶ ꓣꓴ ꓢꓲ ꓛꓰꓹˍ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓢꓳ-ꓡꓳ ꓠꓬ ꓢꓰꓺ ꓡꓰ ꓢꓲ ꓔꓬ ꓢ ꓡꓰˍ ꓡꓳ= ꓥꓶˍ ꓟ ꓦˍ ꓟꓲ ꓬꓲ ꓔꓯ ꓐꓰ ꓧꓹ ꓙꓰˍ ꓡꓳ=

ꓩꓱ-ꓡꓲ-ꓫꓵ ꓡ ꓞꓳ ꓓꓽ ꓟ ꓖꓳ-ꓡꓲ-ꓬ ꓠꓬ ꓮ ꓣꓳ ꓡꓳꓸ ꓒ ꓡꓰ ꓢꓰꓼ ꓗꓷˍ ꓟ ꓟꓽ ꓟꓶ ꓧꓶꓸ ꓕꓯ ꓗꓪ ꓛꓲꓺ ꓬꓲ ꓠꓬ ꓬꓲ-ꓢꓷ-ꓡꓰ ꓟꓯꓼ ꓒ ꓐꓴ ꓔꓯ ꓤꓲꓺ ꓢꓴ ꓥ ꓡꓳ= 

ꓩꓱ-ꓡꓲ-ꓫꓵ ꓡ ꓞꓳ ꓓꓽ ꓟ ꓐꓰ ꓓ-ꓪꓵ ꓟꓸ ꓟꓲꓽ ꓠꓬ ꓕꓱ ꓡꓱ ꓥꓳ

ꓓ-ꓪꓵ ꓠꓬ ꓮ ꓣꓳ ꓡꓳꓸ ꓢꓴ ꓥ ꓟ ꓕꓲꓽ ꓡꓰꓹꓼ ꓾ ꓕꓲ ꓠꓬꓲ ꓡꓱꓸꓼ ꓟꓳꓼ ꓠꓲꓹ ꓛꓵꓼ ꓟꓲ ꓗꓪ ꓮ ꓣꓳ ꓡꓳꓸ ꓔꓬ ꓡꓳ=ꓖꓳ ꓕꓲ ꓙꓵꓹ ꓗꓪ ꓬꓲꓸ ꓮ ꓬꓲꓼ ꓢꓽ ꓣꓳ ꓠꓬ ꓩꓱ-ꓡꓲ-ꓫꓵ ꓐꓴ ꓐꓰ ꓟꓯꓼ ꓬꓰ ꓡꓯꓽ ꓘꓳ ꓠꓹ ꓟ ꓾ ꓬꓲ-ꓢꓷ-ꓡꓰ ꓟꓯꓼ ꓐꓴ ꓐꓰ ꓕꓲ ꓡꓰꓹꓼ ꓔꓬ ꓡꓳ= ꓖꓳ ꓡꓱ ꓠꓬꓲ ꓕꓲ ꓠꓬꓲ ꓙꓳˍ ꓕꓯ ꓓ-ꓪꓵ ꓬꓲ ꓐꓹ ꓐ ꓠꓬ ꓾ ꓬꓲꓸ ꓮ ꓬꓲꓼ ꓐꓴ ꓔꓯ ꓜꓽ ꓓꓴ ꓔꓯꓹ ꓖꓶ ꓬꓰ ꓝꓲˍ ꓡꓳ= ꓖꓳ ꓡꓱ ꓥˍ ꓟꓲ ꓓ-ꓪꓵ ꓡꓰ ꓬꓲ-ꓢꓷ-ꓡꓰ ꓟꓯꓼ ꓜꓴ ꓗꓪ ꓛꓲꓺ ꓬꓰˍ ꓕꓯ ꓾ ꓬꓲꓸ ꓮ ꓬꓲꓼ ꓐꓴ ꓠꓬ ꓓ-ꓪꓵ ꓔꓯ ꓠꓲꓹ ꓟ ꓮ ꓘꓶꓸ ꓦꓶ ꓢꓲ꓾ ꓟꓯꓼ ꓬꓰ ꓡꓯ ꓘꓳˍ ꓟ ꓡꓳ ꓗꓷ ꓢꓲ ꓮ ꓣꓳ ꓜꓴ ꓔꓯ ꓡꓳꓸ ꓬꓰ ꓠꓹ ꓟ ꓐꓯ ꓖꓶˍ ꓡꓳ=

ꓖꓳ ꓕꓯ ꓓ-ꓪꓵ ꓠꓬ ꓩꓱ-ꓡꓲ-ꓫꓵ ꓟꓯꓼ ꓜꓴ ꓗꓪ ꓐꓰ ꓛꓳꓼ ꓛꓬꓹ ꓕꓲ ꓕꓵꓻ  ꓟꓴˍ ꓟ  ꓡ ꓞꓳ ꓒ ꓕꓲ ꓣꓳ ꓔꓯ ꓟꓳ ꓗꓷꓳ= ꓬꓲ ꓠꓬ ꓬꓲꓸ ꓪꓴꓸ ꓓꓵ ꓗꓪ ꓙꓲꓽ ꓡꓰ ꓫꓬꓹ ꓔ ꓟ ꓟꓯꓼ ꓠꓽ ꓦꓳꓹ ꓘꓳꓹ ꓔ ꓢꓲ꓾ ꓬꓲ ꓓꓵꓼ ꓙꓳˍ ꓟ ꓟꓯꓼ ꓐꓵ ꓞꓶˍ ꓟꓲ ꓖꓪ ꓔ ꓟ ꓡꓰꓽ ꓟ ꓞꓲ ꓙꓲꓽ ꓡꓰ ꓫꓬꓹ ꓔ ꓟ ꓐ ꓥꓷꓹ ꓓꓽ ꓟ ꓕꓲ ꓕꓷꓹ ꓟꓯ ꓔ ꓡꓳ=ꓬꓲ ꓟꓬꓱꓺ ꓠꓬ ꓖꓳ-ꓡꓲ-ꓬ ꓥ ꓡꓳ=

“ꓥꓪ ꓔꓯ ꓞꓳ ꓑ ꓤ ꓕꓲ ꓣꓳ ꓝꓲ ꓩꓴ ꓖꓶ ꓢꓲ꓾ ꓥꓪ ꓐꓰ ꓓꓶꓽ ꓡꓯ ꓘꓳ ꓝꓲ ꓡꓯ” ꓐꓰ ꓡꓲ ꓞꓲ ꓠꓬꓲ ꓛꓲ ꓤꓲꓺ ꓔꓬ ꓟ ꓔꓯ ꓓ-ꓪꓵˍ ꓟꓲ ꓢꓷˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ-ꓢꓷ-ꓡꓰ ꓟꓯꓼ ꓜꓴ ꓐꓴ ꓗꓪ ꓐꓰ ꓾ ꓖꓳ-ꓡꓲ-ꓬ ꓐꓰ ꓓꓶꓽ ꓡꓯ ꓘꓳ ꓐ ꓡ ꓢꓴ ꓟꓽ ꓙꓳ= ꓓ-ꓪꓵ ꓠꓬ ꓪꓴ-ꓢ ꓡꓰ ꓢꓲꓺ ꓚꓰꓸ ꓔ ꓟ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓤꓲꓺ ꓔꓬ ꓟ ꓡ ꓞꓳ ꓓꓽ ꓟ ꓔꓯ ꓟꓽ ꓠꓲꓹ ꓒꓴ꓾ ꓪꓴ-ꓢ ꓠꓬ ꓬꓲ ꓪ ꓐꓴ ꓐꓰ ꓕꓲ ꓪꓺꓽ ꓔꓬ ꓟ ꓪꓴꓸ ꓠꓬꓲ ꓬꓲꓸ ꓪ ꓐꓴ ꓧꓪꓸ ꓡꓰˍ ꓥꓳ ꓐꓰ ꓾ ꓓ-ꓪꓵ ꓙꓵꓻ ꓔ ꓡꓳ=

ꓖꓳ ꓟ ꓪꓴꓸ ꓠꓬꓲ ꓟꓯꓼ ꓒꓽ ꓟꓽ ꓥ ꓟ ꓓ-ꓪꓵ ꓠꓬ ꓪ ꓔꓲ ꓔꓯ ꓙꓰ ꓢꓲ꓾”ꓥꓪ꓾ ꓬꓲ ꓐꓰ ꓓꓶꓽ ꓡꓯ ꓘꓳˍ ꓥꓳ” ꓐꓰ ꓐꓯ ꓖꓶˍ ꓡꓳ= ꓪ ꓔꓲ ꓠꓬ ꓓ-ꓪꓵ ꓞꓲꓼ ꓣꓳˍ ꓟ ꓔꓯ ꓢꓷˍ ꓥˍ ꓟꓲ ꓖꓳ-ꓡꓲ-ꓬ ꓐꓰ ꓓꓶꓽ ꓡꓯ ꓘꓳ ꓑꓶꓸ ꓢꓴ ꓟꓯꓼ ꓟꓽ ꓙꓳ ꓟ ꓪꓴꓸ ꓠꓬꓲ ꓾ ꓓ-ꓪꓵ ꓔꓯ ꓓꓶꓽ ꓡꓯ ꓘꓳ ꓝꓲˍ ꓡꓳ=  ꓓ-ꓪꓵ ꓠꓬ ꓢꓯꓼ ꓟꓽ ꓙꓳˍ ꓟꓲ ꓪꓴ-ꓢ ꓠꓬ ꓬꓲ ꓐꓰ ꓕꓲ ꓪꓺꓽ ꓔꓬ ꓟ ꓔꓯ ꓙꓵꓻˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓲꓸ ꓠꓬ “ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓥꓪ ꓔꓯ ꓩꓱ-ꓡꓲ-ꓫꓵ ꓡꓯꓽ ꓒꓯꓹ ꓗꓪ ꓐꓰ ꓚꓬꓴꓸ ꓙˍ ꓥꓳ” ꓐꓰ ꓐꓯ ꓖꓶˍ ꓡꓳ=

ꓓ-ꓪꓵꓽ ꓐꓯˍ ꓟ ꓠꓬ ꓙꓲˍ ꓟ ꓔꓯ ꓪ ꓔꓲ ꓢꓷˍ ꓟ ꓪꓴꓸ ꓠꓬꓲ ꓢꓳ-ꓡꓳ ꓠꓬ꓾ ꓬꓲꓸ ꓟꓯꓼ ꓶꓽ ꓖꓪ ꓓ-ꓪꓵ ꓔꓯ ꓖꓪꓽ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓟꓯꓼ ꓶꓼ ꓖꓪ ꓠꓬ ꓬꓲꓸ ꓐꓱ ꓶ ꓮ ꓘꓶꓸ ꓡꓲꓽˍ ꓟ ꓪꓴꓸ ꓠꓬꓲ ꓡꓵꓸ ꓦ ꓗꓷˍ ꓡꓳ=ꓖꓳ ꓗ ꓠꓯꓸ ꓓ-ꓪꓵ ꓠꓬ ꓬꓲ ꓮ ꓣꓳ ꓡꓳꓸ ꓒ ꓙꓽ ꓥꓳꓽ ꓔꓯꓹ ꓔ ꓢꓲ ꓓꓳ ꓙꓰ ꓢꓲ ꓠꓬꓲ꓾ ꓒ  ꓕꓲ ꓗꓪ ꓟ ꓡꓳ ꓗꓸ ꓗꓪ ꓐꓰ ꓡꓳ ꓓꓰ ꓤ ꓥꓪꓽ ꓢꓶꓽ ꓖꓳ ꓢꓲ ꓬꓲ ꓓꓱꓼ ꓔ ꓟ ꓡꓯꓼ ꓙꓬꓻ ꓗꓪ ꓗꓶ ꓔ ꓢꓲ꓾ ꓬꓲ ꓡꓳ ꓷꓹˍ ꓟꓲ ꓔꓯꓹ ꓔ ꓢꓲ ꓠꓬꓲ꓾ ꓩꓱ-ꓡꓲ-ꓫꓵ ꓒꓽ ꓖꓳ-ꓡꓲ-ꓬ ꓔꓯ ꓠꓶꓽ ꓙꓰˍ ꓡꓳ=

ꓖꓳ-ꓡꓲ-ꓬ ꓓ-ꓪꓵ ꓔꓯ ꓡꓳꓸ ꓟꓳꓻ ꓠꓬ꓾ ꓬꓲꓸ ꓠꓽ ꓞꓳ ꓡꓯꓸ ꓤˍ ꓡꓰꓽ ꓥ ꓢꓲ ꓠꓬꓲ ꓬꓲ ꓔꓯ ꓟꓳꓻ ꓟꓽ ꓟꓵ= ꓬꓲꓸ ꓠꓬ ꓬꓲ-ꓢꓷ-ꓡꓲ ꓗꓪ ꓟ ꓢꓯꓼ ꓙꓳ ꓪꓽ ꓠꓬꓲˍ ꓟ ꓟꓯꓼ ꓒ ꓐꓰ ꓓꓶꓽ ꓡꓯꓽ ꓘꓳ ꓪˍ ꓥꓳ꓾ ꓐꓰ ꓡꓰꓽ ꓓꓵꓽ ꓙ ꓔ ꓡꓳ= ꓖꓳ ꓡꓱ ꓢꓲ ꓬꓲ ꓡꓰ ꓓ-ꓪꓵ ꓔꓯ ꓾ “ꓥꓪ ꓠꓬ ꓮ ꓠꓽ ꓥ ꓠꓬꓲ ꓔꓲꓸ ꓓꓴ ꓢꓲꓹ ꓗꓸ ꓔꓯꓹ ꓠꓬꓲ ꓥꓪ ꓔꓯ ꓡˍ ꓡ? ꓠꓴ ꓧꓪꓽ ꓠꓬ ꓥꓪ ꓡꓰ ꓡꓲ ꓛꓲ ꓗꓪ ꓟ ꓠꓬꓹˍ ꓐꓰ꓾ ꓬꓲ ꓡꓽ ꓬꓲ ꓗꓳꓸ ꓔꓯ ꓖꓶ ꓜꓽˍ ꓥꓳ꓾” ꓐꓯˍ ꓡꓳ=

ꓓ-ꓪꓵ ꓠꓬ ꓞꓳ ꓔꓰꓼ ꓡꓰꓼ ꓥˍ ꓟꓲ ꓮ ꓘꓶꓸ ꓪꓽ ꓠꓬꓲˍ ꓡꓳ= ꓬꓲꓸ ꓠꓬ ꓮ ꓫꓵꓽ ꓔꓯˍ ꓟꓲ ꓙꓳꓺ ꓟꓽ ꓗꓴꓸ ꓟ ꓪꓴꓸ ꓠꓬꓲ ꓮ ꓣꓳ ꓡꓳꓸ ꓔꓬ ꓕꓯ ꓮ ꓣꓳ ꓜꓴ ꓔꓯ ꓒꓬꓹ ꓡˍ ꓟ ꓪꓳꓻ ꓒ ꓐꓰ ꓡꓽ ꓢꓯꓹ ꓔꓯ ꓢꓰꓼ ꓗꓷˍ ꓡꓳ= ꓮ ꓡꓲꓳ ꓐꓯˍ ꓠꓬ ꓬꓲꓸ ꓮ ꓣꓳ ꓜꓴ ꓔꓯ ꓡꓳꓸ ꓠꓹ ꓟ ꓪꓴ-ꓢ ꓡꓰ ꓬꓲꓸ ꓔꓯ ꓬꓰ ꓙˍ ꓟ ꓪꓴꓸ ꓠꓬꓲ ꓥ ꓡꓳ=

ꓓ-ꓪꓵ ꓡꓰ ꓖꓳ-ꓡꓲ-ꓬ ꓔꓯ “ꓠꓴ ꓠꓬ ꓥꓪ ꓔꓯ ꓢꓰꓼ ꓠꓹ ꓟ ꓮꓸ ꓕꓽ ꓪꓴꓸ ꓒꓲꓹ ꓔꓯꓹ ꓢꓲ ꓡˍ ꓡꓳ꓾ ꓖꓳ ꓡꓱ ꓥˍ ꓟꓲ ꓥꓪ ꓠꓽ ꓠꓴ ꓡꓰ ꓟꓳꓻ ꓟꓽ ꓟꓵ ꓟ ꓬꓲ-ꓢꓷ-ꓡꓰ ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪ ꓟꓬꓱꓺ ꓗꓪ ꓐꓰ ꓠꓴ ꓔꓯ ꓡˍ ꓥꓳ” ꓐꓰ ꓐꓯˍ ꓡꓳ= ꓪꓴ-ꓢ ꓠꓬ ꓮ ꓙꓵꓽ ꓟ ꓕꓯꓽ ꓢꓲꓺ ꓪꓽ ꓠꓬꓲˍ ꓟ ꓔꓯ ꓐꓯ ꓟꓸ ꓖꓶ ꓔꓬꓹ ꓟ ꓥ ꓡꓳ= ꓝꓸ ꓢꓲ ꓬꓲ ꓠꓬ꓾ ꓖꓳ-ꓡꓲ-ꓬ ꓧꓪꓽ ꓔꓯ ꓟꓴ ꓗꓪ ꓗꓪ ꓟ ꓠꓬꓹˍ ꓐꓰ ꓟꓲ ꓠꓯ ꓗꓪ ꓟ ꓠꓲꓸ ꓙꓱꓽ ꓔꓯ ꓖꓶꓽ ꓜˍ ꓥꓳ꓾ ꓐꓰˍ ꓟꓲ ꓐꓯ ꓖꓶˍ ꓡꓳ=

ꓖꓳ-ꓡꓲ-ꓬ ꓠꓬ ꓓ-ꓪꓵ ꓔꓯ ꓢꓰꓼ ꓠꓹ ꓟ ꓠꓶꓽ ꓡˍ ꓕꓯ꓾ ꓓ-ꓪꓵˍ ꓟꓲ ꓖꓳ-ꓡꓲ-ꓬ ꓔꓯ ꓢꓰꓼ ꓠꓹ ꓟ ꓔꓷꓹ ꓙꓰ ꓢꓲ꓾ ꓬꓲ ꓡꓯꓽ ꓙꓬꓻ ꓗꓪ ꓐꓰ ꓡꓳ ꓓꓰ ꓕꓲ ꓢꓶꓽ ꓣꓴ ꓓꓳ ꓡ ꓢꓲ ꓠꓬꓲ꓾ ꓡꓳ ꓷꓹ ꓡꓰ ꓕꓲ ꓕꓷꓹ ꓷꓹ ꓗꓷ ꓠꓬ꓾ ꓖꓳ-ꓡꓲ-ꓬ ꓥꓷꓼ ꓛꓲ(ꓠ ꓖꓼ) ꓗꓪ ꓬꓯꓼ ꓡꓰ ꓢꓲ ꓾ ꓬꓲ ꓠꓬ ꓟꓳꓼ ꓟꓳꓼ ꓢꓲ ꓓꓳꓽ ꓡꓰꓳ= ꓖꓳ ꓕꓯ ꓓ-ꓪꓵ ꓠꓬ ꓮꓸ ꓕꓽ ꓟꓽ ꓣꓱꓽ ꓣꓱꓽ ꓾ ꓡꓳ ꓷꓹ ꓕꓲ ꓟˍ ꓐꓰ ꓡꓳ ꓓꓰ ꓕꓲ ꓢꓶꓽ ꓣꓱꓽ ꓢꓲ ꓖꓳ-ꓡꓲ-ꓬ ꓔꓯ ꓢꓰꓼ ꓟꓶ ꓡꓰꓳ=ꓕꓱ ꓟ ꓔꓯ ꓟꓯꓼ ꓜꓴ ꓮ ꓟˍ ꓟꓲ ꓙꓵꓻ ꓟꓽ ꓐ ꓡ= ꓖꓳ ꓕꓯ ꓓ-ꓪꓵ ꓠꓬ ꓠꓲꓹ ꓞ ꓔꓷꓹ ꓙꓰ ꓢꓲ꓾ ꓖꓳ-ꓡꓲ-ꓬ ꓬꓲ ꓮ ꓕꓽ ꓪꓴꓸ ꓒꓲꓹ ꓚꓵꓹ ꓓꓳ ꓢꓲ ꓠꓬꓲ꓾ ꓬꓲ ꓔꓯ ꓗꓸ ꓢꓰꓼ ꓢꓲ꓾ ꓬꓲꓸ ꓪꓴꓸ ꓓꓵ ꓓꓶ ꓗꓷˍ ꓡꓳ=

ꓬꓲ ꓪ ꓧꓪꓸ ꓒ ꓢꓰꓼ ꓗꓷˍ ꓟ ꓔꓯ ꓩꓱ-ꓡꓲ-ꓫꓵ ꓟꓯꓼ ꓜꓴ ꓐꓴ ꓟꓳ ꓗꓷ ꓠꓬ ꓔꓲꓸ ꓒꓳꓹ ꓢꓲ ꓛꓰꓹ ꓙꓰˍ ꓡꓳ= ꓓ-ꓪꓵ ꓡꓰ ꓖꓳ-ꓡꓲ-ꓬ ꓪꓴꓸ ꓓꓵ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓔꓯꓹ ꓬꓲꓼ ꓙꓰˍ ꓡꓳ= ꓬꓲ-ꓢꓷ-ꓡꓰ ꓞꓳꓽ ꓫꓵꓽ ꓐꓴ ꓠꓬ꓾ ꓩꓱ-ꓡꓲ-ꓫꓵ ꓟꓯꓼ ꓜꓴ ꓔꓯ ꓖꓼ ꓙꓰˍ ꓡꓳ= ꓬꓲ-ꓢꓷ-ꓡꓰ ꓐꓴ ꓧꓪꓸ ꓡꓰꓳ= ꓪꓴ-ꓢ ꓠꓬ ꓬꓲꓸ ꓡ ꓞꓳ ꓐꓴ ꓔꓯ ꓚꓬꓴꓸ ꓙ ꓠꓹ ꓟ ꓐꓱ ꓶ ꓞꓳ ꓡꓯꓸ ꓤ ꓥ ꓟ  ꓓ-ꓪꓵ ꓔꓯ ꓣꓱꓽ ꓗꓷꓳ=

ꓖꓳ-ꓡꓲ-ꓬ ꓔꓯ ꓢꓰꓼ ꓗꓷ ꓗꓸ ꓠꓯ ꓓ-ꓪꓵ ꓠꓬ ꓞꓼ ꓐꓰ ꓟꓬꓱꓺ ꓓꓳ ꓪꓴꓽ ꓡˍ ꓡꓳ= ꓓ-ꓪꓵ ꓠꓬ ꓟꓯꓼ ꓒ ꓪꓴꓸ ꓓꓴꓺ ꓣꓱꓽ ꓢꓲ ꓬꓴ-ꓔ ꓡ ꓞꓳ ꓮ ꓙꓵꓽ ꓬꓲ ꓔꓯ ꓠ ꓡꓳˍ ꓡꓳ=ꓓ-ꓪꓵ ꓠꓬ  ꓪꓴ-ꓢ ꓡꓰ ꓙ ꓖꓶ ꓔ ꓟ ꓬꓲ-ꓢꓷ-ꓡꓰ ꓪ ꓔꓲ ꓫꓵꓼ ꓥ ꓟ ꓔꓯ ꓮ ꓟˍ ꓟꓲ ꓘꓳꓹ ꓣꓴˍ ꓡꓳ= ꓖꓳ ꓡꓱ ꓥˍ ꓟꓲ ꓪ ꓔꓲ ꓢꓳ-ꓡꓳ ꓠꓽ ꓬꓲ ꓔꓯ ꓟꓬ ꓔꓳꓹ ꓡꓳ=

ꓪ ꓔꓲ ꓢꓳ-ꓡꓳ ꓠꓬ ꓓ-ꓪꓵ ꓔꓯ ꓮ ꓘꓶꓸ ꓠꓲꓹ ꓙꓳ ꓡꓰ ꓢꓲ ꓾ ꓬꓲ ꓔꓯ ꓢꓰꓼ ꓠꓹ ꓟ ꓢꓯꓼ ꓕꓵˍ ꓡꓳ=ꓓ-ꓪꓵ ꓠꓬ  ꓪ ꓔꓲ ꓢꓳ-ꓡꓳ ꓐꓰ ꓧꓳꓹ ꓡꓰ ꓠꓹ ꓟ ꓮ ꓟꓬꓹ ꓧꓪꓹ ꓢꓯꓼ ꓕꓵꓼˍ ꓟꓲ ꓾ ꓪ ꓔꓲ ꓢꓳ-ꓡꓳ ꓠꓽ ꓓ-ꓪꓵ ꓔꓯ ꓢꓰꓼ ꓠꓹ ꓟ ꓡꓰꓽ ꓬꓰˍ ꓟ ꓪꓴꓸ ꓠꓬꓲ ꓓ-ꓪꓵ ꓠꓬ ꓪ ꓔꓲ ꓡꓯꓽ ꓒꓯꓹ ꓗꓪ ꓐꓰ ꓡꓲꓹ ꓗꓷ ꓠꓹ ꓟ ꓮ ꓟꓬꓹ ꓧꓪꓹ ꓢꓯꓼ ꓕꓵꓼ ꓪ ꓡꓰꓳ = ꓠꓲꓹ ꓟ ꓙꓲˍ ꓟ ꓓ-ꓪꓵ ꓙꓳꓺ ꓗꓽ ꓖꓶ ꓔꓬꓹ ꓟ ꓘꓴꓽ ꓗꓪ ꓪ ꓔꓲ ꓢꓳ-ꓡꓳ ꓠꓬ ꓩꓱ-ꓡꓲ-ꓫꓵ ꓐꓴ ꓐꓰ ꓟꓯꓼ ꓓꓶꓽ ꓡꓯ ꓘꓳ ꓠꓹ ꓟ ꓬꓰˍ ꓡꓳ꓾ ꓪ ꓔꓲ ꓢꓳ-ꓡꓳˍ ꓟꓲ ꓖꓳ ꓗꓪ ꓫꓵꓻ ꓗꓷꓳ=ꓓ-ꓪꓵ ꓠꓬ ꓐꓚ 877 ꓕꓯ ꓬꓴ-ꓔ ꓞꓳ ꓫꓵꓽ ꓪ ꓔꓲ ꓒꓬꓱꓼ ꓡ ꓗꓷꓳ= ꓗꓸ ꓠꓯꓸ ꓬꓲꓸ ꓞꓲꓼ 30 ꓘꓳꓼ ꓛꓲꓺ ꓡˍ ꓕꓯ ꓠꓬ ꓬꓲ-ꓢꓷ-ꓡꓲ ꓞꓳ ꓫꓵꓽ ꓮ ꓙꓵꓽ ꓐꓴ ꓪ ꓔꓲ ꓒꓬꓱꓼ ꓡ ꓗꓷꓳ=

ꓓ-ꓪꓵ ꓠꓬ ꓙꓱ-ꓣꓴ-ꓢ-ꓡꓱ ꓔꓯ ꓓꓶꓽ ꓧꓪꓸ ꓡꓰ ꓢꓲ꓾ ꓬꓲ ꓡꓳ ꓒꓱ ꓬꓰ ꓗꓷˍ ꓡꓳ= ꓬꓲ ꓠꓬ ꓪ ꓔꓲ ꓦꓲ ꓓꓽ ꓟ ꓕꓲ ꓟ ꓫꓬꓹ ꓗꓷ ꓢꓲ ꓾ ꓪꓴ-ꓢ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓔꓯꓹ ꓡˍ ꓡꓳ=  ꓓ-ꓪꓵ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓓꓽ ꓪꓴꓸ ꓬꓲꓸ ꓪꓴꓸ ꓟ ꓟꓶ ꓔꓶꓸ ꓦꓲ ꓔꓯ ꓫꓬꓹ ꓠꓹ ꓟ ꓙꓽ ꓖꓶˍ ꓟꓲ꓾ ꓪꓴ-ꓢ ꓠꓬ ꓬꓲꓸ ꓤ ꓢꓳ-ꓡꓳ-ꓟꓳ ꓔꓯ ꓫꓬꓹ ꓝꓲ ꓠꓹ ꓟ ꓐꓯ ꓖꓶˍ ꓡꓳ=  

ꓓ-ꓪꓵ ꓪ ꓔꓲ ꓬꓲ ꓞꓲꓼ ꓤ ꓡꓯꓹ ꓤ ꓐꓴ ꓠꓬ ꓕꓲ ꓞꓲꓼ ꓕꓲ ꓑ ꓕꓶ ꓞꓹ ꓟ ꓡꓰꓽ ꓟꓽ ꓞꓲ ꓾ ꓟꓲ-ꓢ-ꓬ ꓚꓬꓴꓸ ꓢꓲꓺ ꓒ ꓥˍ ꓟꓲ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓗꓪ ꓐꓰ ꓓꓳ ꓡ ꓝꓲˍ ꓥꓳ ꓾ ꓐꓰ ꓪꓴ-ꓢ ꓡꓰ ꓪꓵꓼ ꓘꓶꓽ ꓖꓶꓽ ꓗꓷ ꓟ ꓥ ꓡꓳ=

 

Add new comment

12 + 8 =