ꓪ ꓔꓲ ꓢꓳ-ꓡꓳ-ꓟꓳ ꓟꓸ ꓟꓲꓽ

ꓪ ꓔꓲ ꓓ-ꓪꓵ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓙꓵꓽ ꓢꓴ ꓪ ꓔꓲ ꓥ ꓢꓲ꓾ ꓬꓲ ꓠꓬ ꓪꓴ-ꓢ ꓔꓯ ꓮ ꓘꓶꓸ ꓙꓵꓻ ꓢꓴ ꓕꓲ ꓣꓳ ꓥꓳ= ꓬꓲ ꓬꓲ-ꓢꓷ-ꓡꓰ ꓪ ꓔꓲ ꓣꓱꓽ ꓔꓬ ꓟ ꓙꓵꓹ ꓗꓪ ꓬꓲ-ꓢꓷ-ꓡꓰ ꓟꓵꓽ ꓠꓬ ꓪ ꓔꓲ ꓢꓳ-ꓡꓳ ꓙꓵꓹ ꓟ ꓢꓲꓸ ꓟꓽ ꓞꓲ ꓞꓲꓺ ꓩꓴꓸ ꓟꓽ ꓛꓲꓺ ꓪꓴꓽ ꓡ ꓟꓴ ꓡ ꓗꓷ ꓟ ꓥ ꓪ= ꓖꓳ ꓡꓱ ꓥˍ ꓟꓲ ꓮ ꓟꓶ ꓬꓲꓸ ꓠꓬ ꓞꓲꓼ ꓟꓳꓽ ꓡꓰ ꓢꓲ꓾ ꓠ ꓔꓬ ꓡꓳ= ꓬꓲꓸ ꓠꓬ ꓟꓽ ꓓ ꓪꓴꓽˍ ꓟ ꓬꓲ-ꓢꓷ-ꓡꓰ ꓗꓴꓷꓼ ꓔꓯ ꓙꓵꓽˍ ꓟ ꓗꓪ ꓮ ꓘꓶꓸ ꓪꓴꓽ ꓧꓶꓽ ꓡꓰꓳ= ꓪ ꓔꓲ ꓟꓬꓱꓽ ꓣꓱꓽˍ ꓟ ꓗꓪ ꓐꓰ ꓠꓽ ꓠꓹ ꓟ ꓙꓵꓹ ꓛꓲꓺ ꓡ ꓪ= ꓪ ꓔꓲ ꓓ-ꓪꓵ ꓔꓯ ꓠꓬ ꓤ ꓮ ꓟꓬꓹ ꓙꓳˍ ꓡꓳ= ꓬꓲ ꓪ ꓐꓴ ꓗꓪ ꓟ ꓕꓲ ꓣꓳ ꓔꓯ ꓠꓬ ꓯ-ꓓꓳ-ꓠ-ꓬ ꓐꓰ ꓟꓬꓱ ꓔ ꓡꓳ=ꓯ-ꓓꓳ-ꓠ-ꓬ ꓐꓯˍ ꓟ ꓠꓬ꓾ ꓥꓪ ꓢꓲꓺ ꓒ ꓠꓬ ꓪꓴ-ꓢ ꓥ ꓡꓳ꓾ ꓐꓰ ꓐꓯˍ ꓟ ꓥˍ ꓟꓲ ꓬꓲꓸ ꓠꓬ ꓙꓲˍ ꓟ ꓡꓽ ꓞꓳ ꓕꓲ ꓣꓳ ꓟꓽ ꓥ=

ꓬꓲ ꓠꓬ ꓑ ꓫꓬꓼ ꓐꓴ ꓔꓯ ꓾ ꓕꓲꓽ ꓠꓬꓲ ꓙꓳˍ ꓠꓬ ꓥꓪ ꓠꓽ ꓪ ꓔꓲ ꓣꓱꓽˍ ꓥꓳ꓾ ꓐꓯˍ ꓡꓳ=ꓝꓮꓲ ꓠꓬ ꓬꓲ ꓐꓹ ꓐ ꓙꓵꓽ ꓠꓬꓲꓸ ꓕꓲꓽ ꓦꓴꓻ ꓠꓹ ꓟ ꓢꓯꓼ ꓕꓵˍ ꓡꓳ= ꓪ ꓔꓲ ꓓ-ꓪꓵ ꓠꓬ ꓖꓳ ꓟ ꓔꓯ ꓔꓳꓹ ꓠꓹ ꓟ ꓢꓯꓼ ꓟꓽ ꓙꓳ ꓥˍ ꓟꓲ꓾ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓐꓴ ꓐꓱ ꓶ ꓪꓴ-ꓢ ꓙꓽ ꓖꓶ ꓔ ꓟ ꓟꓽ ꓥ=

ꓓ-ꓪꓵ ꓬꓲ ꓤ ꓟꓶ ꓐꓯ-ꓫꓱ-ꓐ ꓠꓬ ꓾ ꓬꓲꓸ ꓗꓪ ꓐꓰ ꓦꓵꓻ ꓔ ꓟ ꓤ ꓢꓳ-ꓡꓳ-ꓟꓳ ꓠꓬ ꓬꓲ-ꓢꓷ-ꓡꓰ ꓪ ꓔꓲ ꓣꓱꓽ ꓒꓵꓽˍ ꓟ ꓢꓷˍ ꓠꓬꓲ꓾ ꓓꓳꓽ ꓖꓳ ꓟ ꓔꓯ ꓪ ꓔꓲ ꓔꓬ ꓗꓪ ꓐꓯ ꓖꓶ ꓬꓰˍ ꓡꓳ= ꓖꓳ ꓕꓯ ꓓ-ꓪꓵ ꓠꓬ ꓔꓲꓺ ꓒ ꓐꓴ ꓐꓰ ꓞꓳꓻ ꓪꓴꓽ ꓞꓳ ꓔꓲꓺ ꓐꓴ ꓔꓯ ꓔꓯ ꓘꓴ ꓡꓳꓽ ꓢꓲ꓾ ꓢꓳ-ꓡꓳ-ꓟꓳ ꓠꓬ ꓪ ꓔꓲ ꓫꓵꓼ ꓥ ꓟ ꓐꓯ ꓖꓶˍ ꓡꓳ=

ꓖꓳ ꓗꓸ ꓠꓯ ꓓ-ꓪꓵ ꓠꓬ ꓮ ꓘꓶꓸ ꓔꓬꓹ ꓟꓽ ꓢ ꓗꓷ ꓡꓰꓳ= ꓬꓲꓸ ꓟꓽ ꓫꓵꓻ ꓕꓯ ꓬꓲꓸ ꓠꓬ ꓬꓲꓸ ꓑ ꓫꓬꓼ ꓐꓴ ꓔꓯ ꓾ ꓢꓳ-ꓡꓳ-ꓟꓳ ꓔꓯ ꓙꓵꓻ ꓾ ꓬꓲ ꓠꓬ ꓠꓴ ꓪ ꓪꓺ ꓔꓲ ꓣꓱꓽ ꓠꓹ ꓟ ꓪꓴ-ꓢ ꓡꓰ ꓢꓲꓺ ꓔ ꓟ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴˍ ꓟꓲ ꓪ ꓔꓲ ꓓ-ꓪꓵ ꓐꓯ ꓔꓲꓸ ꓬꓰ ꓟ ꓔꓯ ꓙꓵˍ ꓡꓳ=

ꓬꓲꓸ ꓐꓹ ꓐ ꓫꓵꓻ ꓗꓷ ꓗꓸ ꓠꓯ ꓾ ꓪ ꓔꓲ ꓢꓳ-ꓡꓳ-ꓟꓳ ꓠꓬ ꓬꓲꓸ ꓐꓹ ꓐ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓢꓲ꓾ ꓬꓲ-ꓢꓷ-ꓡꓲ ꓗꓴꓷꓼ ꓔꓯ ꓙꓵꓽˍ ꓡꓳ= ꓖꓳ ꓡꓰ ꓙꓵꓽ ꓔꓬ ꓕꓯ ꓬꓲꓸ ꓐꓹ ꓐ ꓐꓯ ꓔꓲ ꓬꓰ ꓟ ꓔꓯ ꓬꓲꓸ ꓙꓲ ꓠ ꓡꓳˍ ꓡꓳ= ꓬꓲꓸ ꓐꓹ ꓐ ꓓ-ꓪꓵ ꓠꓬ ꓬꓲꓸ ꓔꓯ ꓾ ꓪꓴ-ꓢ ꓐꓯ ꓘꓶꓽ ꓔꓯ ꓮ ꓕꓯˍ ꓟꓲ ꓠ ꓡꓳꓸ ꓾ ꓖꓳ ꓡꓱ ꓠꓬ ꓠꓴ ꓬꓰˍ ꓟ ꓥ ꓕ ꓑꓳꓸ ꓧꓪꓸ ꓡꓰˍ ꓥꓳ꓾ ꓐꓰ ꓐꓯ ꓖꓶ ꓗꓷ ꓟ ꓥꓳ=

ꓕꓲ ꓧꓪꓹ ꓙꓳˍ ꓠꓬ ꓾ꓢ ꓘꓪ ꓕꓯ ꓢꓳ-ꓡꓳ-ꓟꓳ ꓬꓲꓼ ꓟꓬ ꓘꓳˍ ꓟ ꓗꓪ ꓪꓴ-ꓢ ꓟꓳꓸꓖꓶ ꓡ ꓢꓲ꓾ ꓠꓴ ꓮ ꓫꓵꓽ ꓠꓵˍ ꓟꓲ ꓓꓰꓽ ꓡꓯ꓾ꓠꓴ ꓓꓰˍ ꓟ ꓮ ꓙꓵꓽ ꓥꓪ ꓖꓶˍ ꓥꓳ꓾ ꓐꓯ ꓡꓳ= ꓳ꓾ ꓪꓴ-ꓢ ꓳ꓾ ꓥꓪ ꓔꓯ ꓙꓲˍ ꓟ ꓪ ꓔꓲ ꓕꓲ ꓣꓳ ꓒꓬꓱꓼ ꓠꓹ ꓟ ꓐꓱ ꓶ ꓙꓲˍ ꓟ ꓐꓰ ꓟꓽ ꓙꓲ ꓟ ꓔꓯ ꓦꓰꓽ ꓗꓴꓸˍ ꓟ ꓙꓽ ꓗꓴꓸ ꓠꓲꓹ ꓖꓶ ꓡꓯ꓾ ꓐꓯ ꓖꓶˍ ꓡꓳ=ꓢꓳ-ꓡꓳ-ꓟꓳ ꓠꓬ ꓤꓶ ꓫꓵ ꓡ ꓠꓹ ꓟˍ ꓐꓰ꓾ ꓐꓳ ꓶꓽ ꓟꓬꓽ ꓡ ꓠꓹ ꓟˍ ꓐꓰ ꓛꓴꓽ ꓙꓳ ꓢꓴ ꓔꓯ ꓧꓪꓸ ꓡꓰ ꓠꓹ ꓟ ꓟꓽ ꓓꓰꓽ ꓓꓰꓽ ꓾ ꓗꓴꓷꓼ ꓔꓯ ꓙꓵꓽ ꓠꓹ ꓟ ꓙꓽ ꓗꓴꓸ ꓠꓲꓹ ꓓꓰꓽˍ ꓠꓬꓲ ꓪꓴ-ꓢ ꓠꓬ ꓮ ꓘꓶꓸ ꓠꓲꓹ ꓒꓴ ꓡꓰꓳ=

ꓕꓲ ꓠꓬꓲ ꓙꓳˍ ꓕꓯ ꓤ ꓟꓶ ꓤ ꓠꓬꓲ ꓣꓳ ꓠꓬ ꓐꓯ ꓟꓴ ꓫꓬꓹ ꓖꓶ ꓝꓲ ꓠꓹ ꓟ ꓪ-ꓔꓲ ꓢꓳ-ꓡꓳ-ꓟꓳ ꓔꓯ ꓡˍ ꓡꓳ= ꓬꓲ ꓪ ꓗꓪ ꓟ ꓕꓲ ꓣꓳ ꓠꓬ ꓪ ꓔꓲꓸ ꓛꓲꓺ ꓓꓴ ꓗꓪ ꓟꓳꓼ ꓡꓰ ꓢꓲ꓾ ꓕꓱ ꓕꓲ ꓣꓳ ꓟ ꓤ ꓠꓬ ꓢ ꓘꓪ ꓕꓯ ꓫꓵꓻ ꓢꓲ ꓥꓪ ꓬꓲꓼ ꓟꓶ ꓔꓬ ꓕꓯ ꓬꓲꓸ ꓠꓬ ꓾ ꓢꓯꓸ ꓔꓬ ꓟ ꓥꓪ ꓤ ꓔꓯ ꓣꓴ ꓔꓯꓹ ꓙꓰ ꓢꓲ꓾ ꓫꓵꓻ ꓗꓷ ꓟ ꓬꓲ ꓤ ꓔꓯ ꓠꓬ ꓥꓪ ꓡꓯꓽ ꓖꓳꓼ ꓗꓪ ꓗꓷ ꓔ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓤ ꓟꓶ ꓤ ꓝꓮꓲ ꓕꓲ ꓣꓳ ꓟˍ ꓟꓲ꓾ ꓢꓯꓸ ꓔꓬ ꓟ ꓠꓬ ꓥꓪ ꓤ ꓥꓳ= ꓫꓵꓻ ꓗꓷ ꓟ ꓠꓽ ꓬꓲ ꓤ ꓥ ꓡꓳ꓾ ꓐꓯˍ ꓡꓳ= ꓕꓱ ꓟ ꓠꓬ ꓢꓳ-ꓡꓳ-ꓟꓳ ꓐꓰ ꓮꓽ ꓟ ꓐꓱ ꓶˍ ꓟꓲ ꓮ ꓘꓶꓸ ꓫ ꓓꓴ ꓕꓲꓽ ꓫꓵꓽ ꓥꓳ=

ꓖꓳ ꓡꓱ ꓥˍ ꓟꓲ ꓪ ꓔꓲ ꓠꓬ ꓬꓲ ꓔꓯ ꓣꓱꓽ ꓙ ꓢꓴ ꓕꓲ ꓣꓳ ꓔꓯ ꓾ ꓥꓪ ꓔꓯ ꓮꓸ ꓕꓽ ꓕꓲ ꓛꓲ ꓔꓯꓹ ꓖꓶ ꓡꓯ ꓾ ꓐꓯ ꓠꓬ ꓬꓲꓸ ꓟꓯꓼ ꓗꓪ ꓟ ꓕꓲ ꓣꓳ ꓬꓲ ꓔꓯ ꓮꓸ ꓕꓽ ꓔꓯꓹ ꓖꓶ ꓡˍ ꓡꓳ= “ ꓮ ꓟꓶ ꓥꓪ ꓠꓬ ꓢꓯꓸ ꓔꓬ ꓟ ꓮ ꓐꓲ ꓔꓯ ꓠꓬꓲꓽ ꓐꓶꓽ ꓘꓶꓽ ꓗꓷ ꓢꓲ꓾ ꓕꓲ ꓣꓳ ꓕꓲ ꓐꓶꓽ ꓣꓴ”꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓕꓯ ꓮ ꓐꓲ ꓬꓲ ꓟꓹ ꓟ ꓚꓵ ꓠꓬ ꓾ ꓪ ꓔꓲꓳ꓾ ꓮ ꓐꓲ ꓔꓯ ꓕꓽ ꓢꓰꓼ꓾ ꓬꓲ ꓔꓯ ꓖꓶ꓾ ꓐꓯˍ ꓡꓳ= ꓖꓳ ꓡꓱ ꓥˍ ꓟꓲ ꓤ ꓟꓶ ꓣ ꓠꓱꓸ ꓐꓯ ꓕꓲ ꓣꓳ ꓟ ꓡꓰ꓾ ꓥꓪ ꓔꓯˍ ꓟꓲ ꓕꓽ ꓖꓶ ꓡꓯ꓾ ꓬꓲ ꓔꓯˍ ꓟꓲ ꓕꓽ ꓖꓶ꓾ ꓠꓬꓲꓽ ꓐꓶꓽ ꓘꓶꓽ ꓦ ꓗꓷ ꓛꓵˍ ꓡꓳ꓾ ꓐꓯ ꓡꓳ= ꓪ ꓔꓲ ꓡꓰ꓾ꓮ ꓡꓰ ꓕꓲ ꓣꓳ ꓟ ꓠꓬ ꓮ ꓐꓲ ꓟꓹ ꓟ ꓚꓵ ꓥ ꓟ ꓔꓯ ꓞꓼ ꓐꓰ ꓢꓷꓸ ꓡꓰˍ ꓡꓳ= ꓬꓲꓸ ꓡꓰ ꓬꓲꓸ ꓟꓯꓼ ꓔꓯ “ꓮ ꓐꓲ ꓠꓬ ꓬꓲ ꓪꓴꓸ ꓫ ꓕꓱ ꓡ ꓢꓴ ꓤ ꓟꓶ ꓤ ꓖꓳ ꓕꓲ ꓣꓳ ꓔꓯꓸ ꓟ ꓥꓳ꓾ ꓬꓲ ꓔꓯ ꓡꓲꓸ ꓖꓶ”꓾ ꓐꓰ ꓕꓵꓼ ꓪ ꓖꓶˍ ꓡꓳ= ꓬꓲ-ꓢꓷ-ꓡꓰ ꓐꓴ ꓠꓬ ꓖꓳ ꓟ ꓔꓯ ꓑ ꓙꓽˍ ꓕꓯ ꓾ ꓬꓲ ꓪ ꓐꓴ ꓠꓬ ꓪꓴ-ꓢ ꓡꓰ ꓪ ꓔꓲ ꓔꓯ ꓔꓱꓹ ꓜꓳꓽˍ ꓟ ꓐꓯ ꓟꓴ ꓫꓬꓹ ꓐ ꓡˍ ꓟ ꓙꓽ ꓗꓴꓸ ꓠꓲꓹ ꓖꓶ ꓔ ꓟ ꓔꓯ ꓢꓷꓸ ꓡꓰ ꓠꓬꓲ꓾ ꓪ ꓔꓲ ꓢꓳ-ꓡꓳ-ꓟꓳ ꓔꓯ ꓮ ꓘꓶꓸ ꓞꓳ ꓒꓵꓽˍ ꓡꓳ=

ꓪ ꓔꓲ ꓓ-ꓪꓵ ꓦꓬꓼ ꓠꓬꓲ ꓕꓯ ꓾ ꓬꓲ-ꓢꓷ-ꓡꓰ ꓐꓴ ꓐꓱ ꓶ ꓪꓴꓸ ꓓꓵ ꓕꓱꓼ ꓠꓹ ꓟ ꓢꓲ ꓫꓬ ꓦꓲ ꓟꓽ ꓙꓳ ꓠꓬꓲ꓾ ꓪ ꓔꓲ ꓡꓰ ꓢꓲ ꓫꓬ ꓦꓲ ꓫꓬꓹ ꓠꓹ ꓟ ꓙꓽ ꓖꓶˍ ꓡꓳ= ꓖꓳ ꓕꓯ ꓪꓴ-ꓢ ꓡꓰ ꓪ ꓔꓲ ꓔꓯ꓾ ꓥꓪ ꓟꓬꓱꓺ ꓗꓪ ꓐꓰ ꓢꓲꓽ ꓫꓬ ꓦꓲ ꓫꓬꓹ ꓢꓴ ꓠꓬ ꓠꓴ ꓤ ꓥ ꓡꓳ꓾ ꓐꓰ ꓐꓯ ꓔꓲꓸ ꓬꓰ ꓟ ꓕꓲ ꓡꓰꓹꓼ꓾ ꓢꓳ-ꓡꓳ-ꓟꓳ ꓠꓬ ꓪꓴ-ꓢ ꓢꓲ ꓫꓬ ꓦꓲ ꓜꓶˍ ꓡꓳ= ꓢꓲ ꓫꓬ ꓦꓲ ꓫꓬꓹ ꓪꓴꓸ ꓔꓴˍ ꓟ ꓗꓪ ꓐꓰ ꓫꓬꓹ ꓓꓳ ꓡꓰ ꓗꓪ ꓛꓲ ꓫꓵꓽ ꓘꓳꓼ ꓗꓷ ꓡꓰꓳ=

ꓢꓳ-ꓡꓳ-ꓟꓳ ꓠꓬ ꓑ ꓫꓬꓼ ꓮ ꓙꓵꓽ ꓔꓯ ꓘꓴ ꓡꓳꓽ ꓢꓲ ꓪꓴ-ꓢ ꓔꓯ ꓔꓲ ꓓꓴ ꓬꓰˍ ꓡꓳ= ꓑ ꓫꓬ ꓐꓴ ꓐꓰ ꓪ ꓔꓲ ꓠꓬ ꓢꓲ ꓫꓬ ꓦꓲ ꓗꓪ ꓪꓴ-ꓢ ꓔꓯ ꓪꓽ ꓘꓴ ꓠꓬꓲ ꓾ ꓔꓲꓺ ꓖꓶ ꓠꓬꓲ ꓬꓰ ꓗꓷꓳ=ꓖꓳ ꓟ ꓡꓰꓽ ꓟ ꓞꓲ ꓬꓲ ꓠꓬ ꓫꓬꓹ ꓓꓳ ꓡꓰ ꓟ ꓑꓮꓲꓽ ꓔꓯ ꓠꓬꓲꓽ ꓠ ꓛꓲꓺ ꓬꓰ ꓗꓷꓳ=

ꓗꓸ ꓠꓯꓸ ꓪꓴ-ꓢ ꓠꓬ ꓾ ꓢꓳ-ꓡꓳ-ꓟꓳ ꓔꓯ ꓝꓮꓲ ꓟꓳꓸ ꓖꓶ ꓢꓲ꓾ ꓪ ꓔꓲ ꓡꓰ ꓪꓴ-ꓢ ꓕꓵꓼ ꓘꓶꓽ ꓔꓯ ꓒꓵꓽ ꓛꓳˍ ꓠꓬ ꓬꓲꓸ ꓙꓵꓽ ꓠꓬꓲꓸ ꓕꓲ ꓔꓯ ꓕꓶꓻ ꓡꓰ ꓝꓲˍ ꓥꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓠꓲꓹ ꓟ ꓫꓸ ꓓꓴ ꓕꓲ ꓫꓵꓽ ꓠꓬ꓾ ꓪ ꓔꓲ ꓐꓰ ꓬꓲ-ꓢꓷ-ꓡꓰ ꓐꓴ ꓠꓬ ꓪꓴ-ꓢ ꓕꓵꓼ ꓘꓶꓽ ꓔꓯˍ ꓐꓰ ꓧꓹ ꓙꓰ ꓗꓷꓳ= ꓖꓳ ꓡꓰ ꓐꓰ ꓪ ꓔꓲ ꓢꓳ-ꓡꓳ-ꓟꓳ ꓠꓬ ꓪꓴ-ꓢ ꓕꓵꓼ ꓘꓶꓽ ꓔꓯ ꓟꓽ ꓒꓵꓽ ꓛꓳ ꓛꓳ ꓐꓰ ꓬꓰ ꓔꓬ ꓕꓯ꓾ ꓬꓲꓸ ꓚꓳ ꓑ ꓙꓱ-ꓣꓳ-ꓐꓳ ꓔꓬꓹ ꓗꓪ ꓓꓵꓽ ꓙ ꓟꓶ ꓓꓴ ꓕꓲ ꓫꓵꓽ ꓓꓳ ꓡˍ ꓡꓳ=

ꓕꓲ ꓠꓬꓲ ꓙꓳˍ ꓕꓯ ꓾ ꓙꓱ-ꓣꓳ-ꓐꓳ ꓠꓬ ꓟꓷꓽ ꓠꓷꓹ ꓝ ꓒ ꓕꓲ ꓣꓳ ꓐꓰ ꓙ ꓖꓴ ꓗꓪ ꓔꓳꓹ ꓜꓳˍ ꓕꓯ ꓾ ꓬꓲꓸ ꓡꓰ “ ꓪꓴ-ꓢ ꓔꓯˍ ꓐꓰ ꓧꓹ ꓙꓰˍ ꓟ ꓪꓴꓸ ꓠꓬꓲ ꓢꓳ-ꓡꓳ-ꓟꓳ ꓟꓵꓽ ꓔꓯ ꓪꓴ-ꓢ ꓡꓰ ꓠꓬꓲꓽ ꓐꓶꓽ ꓗꓷ ꓡꓰ ꓝꓲˍ ꓥꓳ= ꓝꓮꓲ ꓠꓴ ꓠꓬ ꓞꓳ ꓫꓵꓽ 12 ꓙꓰꓽ ꓔꓯ ꓙꓵꓽ ꓢꓴ ꓒꓬꓱꓼ ꓡˍ ꓥꓳ”꓾ ꓐꓰ ꓐꓯ ꓖꓶˍ ꓡꓳ= ꓐꓯ ꓘꓶꓽ ꓖꓳ ꓟ ꓔꓯ ꓑ ꓙꓽˍ ꓕꓯ ꓾ ꓢꓳ-ꓡꓳ-ꓟꓳ ꓡꓰ ꓬꓲ ꓔꓯ ꓢꓰꓼ ꓚꓱꓹ ꓧꓪˍ ꓟ ꓪꓴꓸ ꓠꓬꓲ꓾ ꓙꓱ-ꓣꓳ-ꓐꓳ ꓠꓬ ꓬꓲ-ꓙꓲ ꓪ ꓔꓲ ꓣꓱ-ꓧꓳ-ꓐꓳ ꓔꓬ ꓗꓪ ꓛꓰꓹ ꓑꓬ ꓙꓰˍ ꓡꓳ=

ꓬꓲꓸ ꓘꓳꓼ ꓟꓶ ꓤ ꓗꓳꓸ ꓗꓷ ꓗꓸ ꓠꓯ꓾ ꓪ ꓔꓲ ꓢꓳ-ꓡꓳ-ꓟꓳ ꓞꓲꓼ ꓟꓳꓽ ꓡꓰ ꓢꓲ ꓫꓵꓻ ꓗꓷꓳ= ꓬꓲꓸ ꓤ ꓣꓱ-ꓧꓳ-ꓐꓳ ꓠꓬ ꓬꓲꓸ ꓔꓯ ꓝꓸ ꓢꓲ ꓪ ꓔꓲ ꓣꓱꓽ ꓢꓲ ꓬꓲꓸ ꓐꓹ ꓐ ꓦꓬꓼ ꓠꓬꓲ ꓕꓯ ꓢꓲꓸ ꓟꓽ ꓞꓲ ꓑ ꓫꓬ ꓐꓴ ꓔꓯ ꓬꓲꓸ ꓒꓵꓽ ꓮ ꓟꓬꓹ ꓣꓴˍ ꓡꓳ= ꓕꓱ ꓡꓰ ꓬꓰˍ ꓟ ꓠꓬ ꓞꓳꓽ ꓫꓵꓽ ꓐꓴ ꓔꓯ ꓠꓲꓹ ꓟ ꓦꓶ ꓡꓰ ꓝꓲˍ ꓟ ꓪꓴꓸ ꓠꓬꓲ ꓞꓳ ꓫꓵꓽ 10 ꓙꓰꓽ ꓠꓬ ꓣꓱ-ꓧꓳ-ꓐꓳ ꓔꓯ ꓒꓳꓹ ꓔꓳꓹˍ ꓡꓳ=

ꓖꓳ ꓕꓯ ꓢꓳ-ꓡꓳ-ꓟꓳ ꓟꓵꓽ ꓠꓬ ꓠꓬꓲꓽ ꓗꓪꓺ ꓗꓪ ꓡꓰ ꓢꓲ ꓾ ꓟꓷꓽ ꓠꓷꓹ ꓝ ꓒ ꓐꓯ ꓗꓷ ꓟ ꓕꓲ ꓡꓰꓹꓼ ꓞꓳꓽ ꓫꓵꓽ 10 ꓙꓰꓽ ꓐꓴ ꓠꓬ ꓾ ꓬꓲꓸ ꓪ ꓐꓴ ꓪ ꓔꓲ ꓣꓱꓽ ꓠꓹ ꓟ ꓙꓱ-ꓣꓳ-ꓐꓳ ꓔꓯ ꓢꓲꓺ ꓗꓷꓳ=