ꓪ ꓔꓲ ꓢꓳ-ꓡꓳ (ꓢꓲꓽ ꓫꓬ ꓕꓳ ꓶꓽ ꓗꓪ ꓟ ꓪ ꓔꓲ)

ꓟꓷ ꓠꓷꓹ ꓝ ꓒ ꓢ-ꓟꓴ-ꓬꓰ ꓦꓬꓼ ꓠꓬꓲ ꓗꓪ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓟꓷ ꓠꓷꓹ ꓝ ꓒ ꓐꓴ ꓐꓰ ꓐꓯ ꓟꓴ ꓫꓬꓹ ꓒ ꓐꓴ ꓧꓳꓽ ꓣꓱꓽˍ ꓟ ꓠꓯꓸꓼ ꓗꓪ ꓪꓴ-ꓢ ꓡꓰ ꓙꓵꓽˍ ꓟ ꓞꓳ ꓫꓵꓽ ꓒꓬꓱꓼ ꓗꓷ ꓟ ꓥꓳ=

ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓠꓬ ꓠꓱꓸ ꓐꓯꓼ ꓞꓳ ꓫꓵꓽ ꓐꓴ ꓡꓰ ꓐꓰ ꓪ ꓔꓲ ꓕꓲ ꓣꓳ ꓙꓳ ꓠꓲꓹ ꓫꓵˍ ꓡꓳ= ꓬꓲꓸ ꓪ ꓐꓴ ꓠꓬ ꓬꓲꓸ ꓪ ꓐꓴ ꓔꓯ ꓙꓵꓽ ꓠꓹ ꓟ ꓡ ꓞꓳ ꓕꓲ ꓣꓳ ꓔꓯ ꓬꓲꓸ ꓪ ꓚꓲꓸ ꓛꓬ ꓢꓲꓺ ꓣꓴ ꓠꓲꓹ ꓫꓵˍ ꓡꓳ= ꓖꓳ ꓟ ꓑꓶꓸ ꓓꓴ ꓟꓷ ꓠꓷꓹ ꓝ ꓒ ꓢ-ꓟꓴ-ꓬꓰ  ꓠꓬ ꓮ ꓘꓶꓸ ꓓꓵꓽ ꓙ ꓪꓴꓽ ꓧꓶ ꓡꓰ ꓢꓲ꓾ꓬꓲ-ꓢꓷ-ꓡꓲ ꓐꓴ ꓖꓳ ꓡꓱ ꓓꓵꓽ ꓙ ꓔ ꓟ ꓠꓬ ꓟꓽ ꓙꓲꓻ ꓟ ꓬꓲꓸ ꓢꓷˍ ꓡꓳ= ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓠꓬ ꓪ ꓔꓲ ꓕꓲ ꓣꓳ ꓖꓶꓽ ꓠꓹ ꓟ ꓓꓰꓽˍ ꓡꓳ=ꓢ-ꓟꓴ-ꓬꓰ ꓠꓬ ꓬꓲꓸ ꓬꓰ ꓝꓳ ꓡꓰ ꓐꓰ ꓪꓴ-ꓢ ꓔꓯ ꓪꓽ ꓘꓴ ꓗꓓ ꓢꓲ ꓾ ꓪꓴ-ꓢ ꓠꓬ ꓬꓲꓸ ꓔꓯ  “ꓑ ꓫꓬꓼ ꓐꓴ ꓡꓰ ꓠꓴ ꓔꓯ ꓓꓰꓽˍ  ꓟ ꓮ ꓙꓵꓽ ꓔꓯ ꓓꓽ ꓔꓳꓹ ꓖꓶꓽ=ꓬꓲ ꓪ ꓡꓰ ꓠꓴ ꓔꓯ ꓡꓳ ꓗꓷ ꓟ ꓟꓽ ꓥ= ꓥꓪ ꓔꓯ ꓬꓲ ꓪ ꓪ ꓔꓲ  ꓣꓱꓽ ꓝꓲ ꓠꓲꓹ ꓟꓽ ꓫꓵ ꓠꓬꓲ ꓥꓪ ꓔꓯ ꓡꓳ ꓗꓷ ꓟ ꓥ ꓡꓳ=ꓖꓳ ꓡꓱ ꓥˍ ꓟꓲ ꓬꓲ ꓪ ꓔꓯ ꓙꓵꓽ ꓢꓴ ꓪ ꓔꓲ ꓡꓰ ꓬꓲ ꓪ ꓔꓯ ꓮ ꓡꓲ ꓬꓰ ꓖꓶ ꓡ ꓠꓯꓹ ꓟ ꓮ ꓙꓵꓽ ꓬꓲ ꓜꓶ ꓐꓯ ꓟꓸ ꓖꓶ ꓢꓲ ꓙꓳꓺ ꓗꓽ ꓖꓶ꓾ ꓐꓯˍ ꓡꓳ=

ꓖꓳ ꓕꓯ ꓢ-ꓟꓴ-ꓬꓰ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓾ “ꓠꓴ ꓪ ꓠꓬ ꓠꓴ ꓪ ꓪ ꓔꓲ ꓔꓯ ꓠꓲꓹ ꓟ ꓐꓬ ꓡꓰˍ ꓥꓳ=ꓬꓲꓸ ꓠꓬ ꓠꓴ ꓪ ꓔꓯ ꓝꓲꓸ ꓫ ꓡˍ ꓥꓳ꓾ ꓠꓴ ꓪ ꓦ ꓟꓲ ꓔꓯ ꓦꓴꓺ ꓔꓯꓹ ꓙꓰ ꓗꓷ ꓢꓲ꓾ ꓠꓴ ꓪ ꓜꓽ ꓪꓳꓽ ꓡꓳ ꓪꓳꓽˍ ꓐꓰ ꓠꓴ ꓪ ꓞꓲ ꓐꓱ ꓕꓲ ꓐꓱ ꓔꓯ ꓬꓲ ꓡꓰ ꓣꓴ ꓔꓯ ꓙꓰˍ ꓥꓳ”꓾ ꓐꓰ ꓐꓯˍ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓴ ꓔꓯ ꓠ ꓠꓹ ꓟꓽ ꓫꓳ=ꓐꓰ-ꓠꓬ-ꓟꓲ ꓕꓲ ꓪꓳꓼ ꓗꓪ ꓢꓳ-ꓡꓳ ꓟꓬꓱ ꓔ ꓟ ꓤ ꓑ ꓤ ꓕꓲ ꓣꓳ ꓙꓳˍ ꓡꓳ= ꓬꓲꓸ ꓠꓬ ꓬꓲ-ꓢꓷ-ꓡꓰ ꓐꓴ ꓮ ꓙꓵꓽ ꓕꓯꓽ ꓢꓲ ꓟꓴ ꓢꓲ ꓡꓳꓸ ꓐꓲꓻˍ ꓟ ꓕꓲ ꓣꓳ ꓥ ꓡꓳ= ꓕꓱꓻ ꓟ ꓠꓬ ꓬꓲ-ꓢꓷ-ꓡꓰ ꓐꓴ ꓠꓲꓹ ꓫꓵˍ ꓟ ꓪ ꓔꓲ ꓥꓳ= ꓢ-ꓟꓴ-ꓬꓰ ꓠꓬ ꓢꓳ-ꓡꓳ ꓔꓯ ꓟꓴ ꓔꓶꓸ ꓪꓴꓸ ꓓꓵ ꓕꓱꓼ ꓖꓴ ꓗꓪ ꓬꓲ-ꓢꓷ-ꓡꓰ ꓪ ꓔꓲ ꓒꓬꓱꓼ ꓠꓹ ꓟ ꓟꓰ ꓞꓶ ꓟꓰ ꓖꓶˍ ꓡꓳ=

ꓖꓳ ꓕꓯ ꓑ ꓫꓬꓼ ꓐꓴ ꓡꓰ ꓾ ꓪ ꓔꓲ ꓠꓬ ꓤꓶ ꓙꓳ ꓟꓯ ꓙꓳ ꓝꓲ꓾ ꓐꓰ ꓘꓴˍ ꓡꓳ=ꓬꓲ-ꓢꓷ-ꓡꓰ ꓐꓴ ꓔꓯ ꓛꓴꓽ ꓙꓳ ꓢꓴ ꓕꓲ ꓪꓳꓼ ꓠꓬ ꓬꓲ-ꓢꓷ-ꓡꓰ ꓡꓳ ꓒꓱ ꓔꓯ ꓣꓴ ꓡˍ ꓐꓰ ꓬꓰˍ ꓡꓳ= ꓖꓳ ꓕꓯ ꓪ ꓔꓲ ꓢꓳ-ꓡꓳ ꓠꓬ ꓑ ꓫꓬꓼ ꓐꓴ ꓔꓯ ꓘꓴ ꓜꓲꓼˍ ꓕꓯ ꓾ ꓬꓲ-ꓢꓷ-ꓡꓰ ꓡ ꓞꓳ ꓵ ꓟꓬꓱ ꓮ ꓙꓵꓽ ꓠꓬ ꓢ ꓫꓬꓹ ꓣꓳ ꓙꓳ ꓢꓲ꓾ ꓬꓴ-ꓔ ꓕꓲ ꓪꓳꓼ ꓗꓪ ꓐꓰ ꓢ ꓟꓶꓽ ꓣꓳ ꓛꓲ ꓜꓲꓼ ꓡˍ ꓡꓳ=ꓬꓲ ꓪ ꓐꓴ ꓠꓬ ꓡꓳ ꓒꓱ ꓗꓪ ꓟ ꓛꓴ ꓙꓳ ꓢꓴ ꓟꓯꓼ ꓮ ꓟꓬꓹ ꓔꓯ ꓢꓰꓼ ꓗꓷˍ ꓡꓳ=

ꓗꓸ ꓠꓯ ꓢꓳ-ꓡꓳ ꓠꓬ ꓬꓲꓸ ꓟꓯꓼ ꓜꓴ ꓐꓴ ꓐꓰ ꓕꓲ ꓪꓽ ꓠꓱꓸ ꓐꓯꓼ ꓟꓯꓼ ꓔꓯ ꓢꓰꓼˍ ꓡꓳ= ꓢꓳ-ꓡꓳ ꓠꓬ ꓓꓶꓽ ꓡꓯ ꓘꓳꓹ ꓟ ꓗꓪ ꓮ ꓟꓬꓹ ꓧꓪꓸ ꓡꓰꓳ=ꓖꓳ ꓡꓱ ꓐꓰ ꓧꓪꓸ ꓡꓰˍ ꓟ ꓪꓴꓸ ꓠꓬꓲ ꓪ ꓔꓲ ꓢꓳ-ꓡꓳ ꓠꓬ ꓬꓲꓸ ꓚꓲ ꓛꓬ ꓬꓲ ꓓꓳ ꓟꓴꓹ ꓡꓳ= ꓬꓲ-ꓢꓷ-ꓡꓰ ꓡ ꓞꓳ ꓐꓰ ꓬꓲ-ꓢꓷ-ꓡꓰ ꓟꓵꓽ ꓐꓴ ꓠꓬ ꓬꓲ ꓪ ꓐꓴ ꓔꓯ ꓧꓪꓸ ꓡꓰ ꓝꓲ ꓢꓴ ꓠꓬ ꓪꓴ-ꓢ ꓥ ꓟ ꓔꓯ ꓬꓲ ꓪ ꓐꓴ ꓟꓲ ꓡꓰ ꓗꓷꓳ= ꓢꓳ-ꓡꓳ ꓠꓬ ꓪꓴ-ꓢ ꓟꓲ ꓙꓬꓽ ꓗꓪ ꓢꓰꓼ ꓔꓲ ꓓꓴˍ ꓐꓰ ꓧꓳꓹ ꓡꓰˍ ꓟ ꓔꓲ ꓓꓴ ꓔꓲ ꓖꓶ ꓠꓹ ꓟ ꓐꓱ ꓶ ꓾ ꓟꓷ ꓠꓷꓹ ꓝ ꓒ ꓢ-ꓟꓴ-ꓬꓰ ꓡˍ ꓗꓪ ꓛꓲꓺ ꓦꓴꓻ ꓠꓬꓹ ꓔꓬ ꓪˍ ꓡꓳ= ꓢ-ꓟꓴ-ꓬꓰ ꓛꓲꓺ ꓡ ꓕꓯ ꓢꓲꓸ ꓡꓰꓽ ꓔꓲ ꓓꓴ ꓔꓲ ꓖꓶꓽ ꓐ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓠꓬ ꓾ ꓪꓴ-ꓢ ꓔꓯ ꓔꓲ ꓖꓶꓽ ꓠꓹ ꓟ ꓐꓱ ꓶ ꓬꓲꓸ ꓚꓲꓸ ꓛꓬ ꓔꓯ ꓒꓵꓽˍ ꓟ ꓚꓬꓹ ꓗꓷꓳ= ꓖꓳ ꓟ ꓠꓬ ꓮ ꓓꓲꓽ ꓪꓴꓽˍ ꓟ ꓝꓴꓲꓸ ꓕꓲ ꓫꓵꓽ ꓥꓳ=

ꓢ-ꓟꓴ-ꓬꓰ ꓛꓲꓺ ꓡ ꓢꓲ ꓪ ꓔꓲ ꓔꓯ “ ꓠꓴ ꓠꓬ ꓝꓴꓲꓸ ꓬꓰ ꓗꓷꓳ=ꓪꓴ-ꓢ ꓡꓰ ꓪ ꓔꓲ ꓢꓳ-ꓡꓳ ꓔꓯ ꓖꓶꓽ ꓔ ꓟ ꓶꓼ ꓤ ꓫꓱꓹ ꓤ ꓮ ꓙꓵꓽ ꓠꓬ ꓟꓶꓽ ꓬꓰˍ ꓥꓳ꓾” ꓐꓰ ꓐꓯ ꓖꓶˍ ꓡꓳ= ꓢꓳ-ꓡꓳ ꓠꓬ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓮ ꓙꓵꓽ ꓧꓪꓸ ꓡꓰˍ ꓟꓲ ꓬꓲ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓟꓽ ꓛꓳ= ꓢꓳ-ꓡꓳ ꓠꓬ ꓟꓯꓼ ꓓꓶꓽ ꓡꓯ ꓘꓳ ꓠꓹ ꓟ ꓡꓳ ꓒꓱ ꓕꓲ ꓟ ꓡꓰ ꓕꓲ ꓟ ꓗꓪ ꓛꓲꓺ ꓬꓰ ꓕꓯ꓾ ꓡꓳ ꓒꓱ ꓔꓯ ꓓꓶꓽ ꓧꓪꓸ ꓡꓰ ꓠꓹ ꓟ ꓐꓱ ꓶ ꓟꓳꓹ ꓟ ꓮ ꓙꓵꓽ ꓔꓯ ꓛꓴ ꓛꓰꓹ ꓡꓰ ꓝꓲ ꓐꓯˍ ꓟꓲ ꓢꓳ-ꓡꓳ ꓠꓬ ꓟꓽ ꓠ ꓠꓹ= ꓬꓲꓸ ꓐꓱ ꓶ ꓙꓲˍ ꓟ ꓖꓴꓽ ꓙꓴꓽ ꓮ ꓙꓵꓽ ꓔꓯ ꓬꓲꓸ ꓟꓽ ꓛꓴ ꓛꓰꓹ ꓡꓰ ꓝꓲ ꓗꓷ ꓢꓲ꓾ ꓖꓳ ꓟ ꓔꓯ ꓘꓴꓽ ꓔꓯꓹ ꓡˍ ꓡꓳ=

ꓪꓴ-ꓢ ꓠꓬ ꓢꓳ-ꓡꓳ ꓔꓯ ꓬꓲ-ꓢꓷ-ꓡꓰ ꓪ ꓔꓲ ꓣꓱꓽˍ ꓟ ꓗꓪ ꓐꓰ ꓡꓳ ꓒꓰꓹ ꓗꓷꓳ= ꓗꓸ ꓠꓯꓸ ꓪꓴ-ꓢ ꓠꓬ ꓓ-ꓪꓵ ꓔꓯ ꓬꓲ-ꓢꓷ-ꓡꓰ ꓪ ꓔꓲ ꓣꓱꓽ ꓠꓹ ꓟ ꓢꓲꓺ ꓗꓷꓳ=ꓖꓳ ꓕꓯ ꓢꓳ-ꓡꓳ ꓠꓲꓹ ꓟ ꓮ ꓘꓶꓸ ꓦꓶ ꓡˍ ꓡꓳ= ꓬꓲ ꓠꓬ ꓓ-ꓪꓵ ꓔꓯ ꓟꓬ ꓔꓳꓹ ꓢꓲ ꓾ ꓓ-ꓪꓵ ꓔꓯ ꓢꓰꓼ ꓝꓲ ꓠꓹ ꓟ ꓬꓲꓸ ꓟꓯꓼ ꓒ ꓐꓴ ꓔꓯ ꓝꓲ ꓩꓴ ꓗꓷˍ ꓡꓳ= ꓢꓳ-ꓡꓳ ꓬꓲ ꓤꓶ ꓠꓬ ꓩꓱ-ꓡꓲ-ꓫꓵ ꓡ ꓞꓳ ꓐꓴ ꓐꓰ ꓢꓰꓼ ꓡꓯꓽ ꓘꓳꓹ ꓕꓯ ꓢꓯꓼ ꓟꓬ ꓞꓷꓹ ꓗꓷꓳ= ꓐꓶꓽ ꓒ ꓐꓴ ꓡꓰ ꓬꓲ ꓔꓯ ꓐꓶ ꓬꓯꓼ ꓗꓷ ꓟ ꓪꓴꓸ ꓠꓬꓲ ꓮ ꓘꓶꓸ ꓠꓻ ꓡꓰˍ ꓡꓳ= ꓖꓳ ꓕꓯ ꓬꓲ ꓠꓬ ꓐꓶꓽ ꓒ ꓐꓴ ꓡꓰ ꓢꓳ-ꓡꓳ ꓔꓯ ꓢꓰꓼ ꓡ ꓝꓲ ꓠꓲꓹ ꓟꓽ ꓫꓵ ꓟ ꓪꓴꓸ ꓠꓬꓲ ꓮ ꓕꓽ ꓪꓴꓸ ꓒꓲꓸ ꓚꓵꓹ ꓓꓳ ꓡ ꓢꓲ ꓚꓲ ꓛꓬ ꓔꓯ ꓗꓸ ꓢꓰꓼˍ ꓡꓳ= ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓓꓽ ꓪꓴꓸ ꓟ ꓪ ꓔꓲ ꓬꓲ ꓤꓶ ꓠꓬ ꓠꓲꓹ ꓟ ꓫꓸ ꓫˍ ꓡꓰ ꓡꓳꓹ ꓬꓰ ꓗꓷꓳ= ꓬꓲ ꓪ ꓐꓴ ꓠꓬ ꓪ ꓔꓲ ꓕꓲ ꓣꓳ ꓙꓳ ꓠꓲꓹ ꓫꓵˍ ꓡꓳ=  ꓬꓲꓸ ꓪ ꓐꓴ ꓠꓬ ꓬꓲꓸ ꓔꓯ ꓟꓴ ꓢꓲ ꓒꓬꓱꓽ ꓐꓲꓻˍ ꓟ ꓪꓴꓸ ꓠꓬꓲ ꓮ ꓘꓶꓸ ꓪꓽ ꓠꓬꓲˍ ꓥ ꓐꓰ ꓓꓵꓽ ꓙ ꓔ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓠꓬ ꓪꓴ-ꓢ ꓔꓯ ꓡꓳ ꓒꓰꓹ ꓗꓷˍ ꓟ ꓪꓴꓸ ꓠꓬꓲ ꓾ ꓪꓴ-ꓢ ꓠꓬ ꓬꓲꓸ ꓔꓯ ꓡꓳ ꓒꓰꓹ ꓗꓷ ꓟ ꓥꓳ=