ꓪ ꓔꓲ Constantine ꓡꓰ Milan ꓡꓳ ꓒꓱ ꓗꓪ ꓑ ꓫꓬ ꓐꓴ ꓛꓳꓽ ꓠ, ꓟ ꓙꓵꓽ ꓗ ꓔꓶ. ꓔ ꓟ ꓚꓱ, (The Edict of Milan)

#credit photo #King Constantine and Licinius

Monday, August 28, 2023

ꓪ ꓔꓲ Constantine ꓡꓰ Milan ꓡꓳ ꓒꓱ ꓗꓪ ꓑ ꓫꓬ ꓐꓴ ꓛꓳꓽ ꓠ, ꓟ ꓙꓵꓽ ꓗ ꓔꓶ. ꓔ ꓟ ꓚꓱ,

ꓣꓳ‐ꓟ ꓗꓴꓷꓼ ꓖꓴ ꓪꓴ. ꓕꓲ ꓒꓳ, ꓔꓯ ꓙꓵꓽ ꓢꓴ Galerius ꓫꓵꓻ ꓡꓰ ꓗ. ꓠꓯ ꓬꓲ. ꓤ Maximian Daia ꓝꓮꓲ ꓙꓵꓽ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ Licinius ꓔꓯ ꓟꓯꓼ ꓢꓰꓼ ꓡꓯ ꓘꓳ ꓓꓶꓽ ꓡꓯꓽ ꓘꓳ ꓕꓯ ꓧꓪ. ꓟꓽ ꓘꓴ꓿ ꓝꓮꓲ ꓪ ꓔꓲ Contantine ꓠꓬ Italy ꓗꓴꓷꓼ Milan ꓡꓳ ꓒꓱ ꓗꓪ ꓛꓲ ꓡ ꓢꓲ ꓠꓬꓲ ꓢꓲꓽ ꓒꓽ Licinius ꓐꓰ ꓟꓳ ꓡꓯꓽ ꓘꓳ ꓡꓳ꓿ ꓖꓳ ꓗ. ꓠꓯ ꓪ ꓔꓲ Constantine ꓐꓰ Licinius ꓐꓴ ꓠꓬꓲꓽ ꓣꓳ ꓠꓬ ꓪꓴ‐ꓢ ꓔꓯ ꓟꓽ ꓦꓻ ꓡꓱ ꓢꓴ Pagan ꓐꓴ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓛꓳꓽ ꓠ, ꓟ ꓙꓵꓽ ꓗ ꓔꓯ ꓐꓳ ꓔ ꓟ ꓥ ꓡꓳ꓿

ꓖꓳ ꓗ. ꓠꓯ. ꓪ ꓔꓲ Contantine ꓠꓬ ꓪꓴ‐ꓢ ꓟꓬꓱꓽ ꓟꓯ ꓢꓴ ꓔꓲꓺ ꓒ ꓐꓴ ꓠꓬ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓔꓯ ꓖꓶ ꓠ, ꓟ ꓒꓴ ꓔꓯ ꓖꓶ ꓟꓽ ꓛꓲ ꓐꓰ ꓐꓯ ꓑꓶ ꓗꓷꓳ꓿ ꓗꓴꓷꓼ ꓘꓴꓽ ꓗꓪ ꓟꓯꓼ ꓬꓰ ꓟ ꓗꓪ ꓐꓰ ꓟꓲ ꓠꓽ ꓠ, ꓟ ꓙꓵꓽ ꓪ ꓪꓽ ꓡꓰꓳ꓿ ꓘꓴ ꓜꓲ ꓞꓳ ꓠꓯ ꓗꓪ ꓥ ꓟꓲ ꓮꓽ ꓡꓴ ꓔꓲ ꓟ ꓐꓰ ꓮꓽ ꓡꓴ ꓘꓳ ꓣꓴ ꓓ ꓟ ꓙꓵꓽ ꓪ ꓔꓯ ꓐꓯ ꓑꓶꓻ ꓗꓷꓳ꓿

ꓢꓲꓺ ꓒ ꓦꓬꓼ ꓠꓬꓲ ꓔꓯ ꓟꓬꓱꓽ ꓠꓽ ꓠꓬꓲ ꓐꓰ ꓮ ꓘꓶ. ꓛꓲ ꓟꓬꓱꓽ ꓬꓰ ꓝꓲ. ꓟ ꓔꓯ ꓠꓽ ꓡꓰ ꓝꓲ ꓡꓳ꓿ ꓣꓳ‐ꓟ ꓡ ꓞꓳ ꓐꓴ ꓡ ꓞꓳ ꓔꓯ ꓡꓯꓼ ꓐꓳ ꓔꓶ ꓓꓴ ꓗꓪ ꓢꓰꓼ ꓟ ꓚꓱ, ꓔꓯ ꓠꓽ ꓡꓰ ꓝꓲꓳ꓿ ꓖꓳ ꓕꓲ ꓙꓵꓽ ꓪ ꓪ ꓔꓲ Constantine ꓠꓬ ꓙꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓟꓽ ꓒꓬꓱꓼ ꓢꓲ ꓥ ꓟꓲ ꓘꓴ ꓜꓲꓼ ꓞꓳ ꓔꓯ ꓙꓵꓽ ꓟ ꓟꓬꓱꓽ ꓮ ꓟꓬ, ꓬꓰ ꓒꓬꓱꓼ ꓡ ꓝꓲ ꓟ ꓥ ꓡꓳ꓿

ꓪ ꓔꓲ Constantine ꓠꓬ ꓪꓽ ꓘꓴ ꓦꓲꓻ ꓮ ꓟꓬ, ꓫꓬ, ꓖꓶ ꓢꓴ ꓪ ꓔꓲ ꓕꓲ ꓣꓳ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓒꓲ‐ꓕꓱ ꓡꓯꓼ ꓜꓳꓻ ꓕꓯꓽ ꓢꓲ ꓗꓪ ꓮ ꓟꓬ, ꓪꓴꓽ ꓟ ꓪꓽ ꓘꓴ ꓦꓲꓻ ꓕꓲ ꓦꓲꓻ ꓫꓬ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓪꓽ ꓘꓴ ꓦꓲꓻ ꓠꓬ ꓬꓲ. ꓙꓵ, ꓟꓶ ꓫꓵˍ ꓫꓵˍ ꓙꓳˍ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓝꓲ ꓓꓴ ꓒꓳ‐ꓡꓳ ꓡꓯꓼ ꓜꓳ ꓕꓯ ꓢꓲ ꓗꓪ ꓥ ꓟꓲ ꓮ ꓘꓶ. ꓪꓴꓽ ꓟ ꓪꓽ ꓘꓴ ꓦꓲꓻ ꓓ ꓕꓲ ꓦꓲꓻ ꓫꓬ, ꓖꓶ ꓔ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓔꓬ ꓠ, ꓟ ꓠꓬ ꓕꓱ ꓪꓽ ꓘꓴ ꓒ ꓕꓲ ꓗꓪ ꓫꓬ, ꓖꓶ ꓗꓷ ꓟ ꓥ ꓡꓳ꓿

ꓠꓱ. ꓐꓯꓼ ꓪꓽ ꓘꓴ ꓦꓲꓻ ꓥ ꓟ Nicomedia Antioch Tyre ꓡꓳ ꓒꓱ ꓐꓰ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓗꓪ ꓫꓬ, ꓖꓶ ꓔ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓔꓯ ꓫ. ꓟꓳ ꓪ꓿