ꓪ ꓔꓲ Constantine ꓫꓵꓻ ꓡꓰ ꓟ ꓚꓱ, (Constantine the great)

#creditphoto #Constantine the great

Monday, September 11, 2023

ꓪ ꓔꓲ Constantine ꓫꓵꓻ ꓡꓰ ꓟ ꓚꓱ,

AD (337) ꓘꓳꓼ ꓕꓯ ꓪ ꓔꓲ Constantine ꓫꓵꓻ ꓡꓰ ꓟ ꓥ ꓡꓳ꓿ ꓪ ꓔꓲ ꓠꓬ ꓫꓵꓻ ꓘꓶꓽ ꓗꓪ ꓛꓲ ꓝꓴꓲ ꓟꓽ ꓔꓲ ꓔ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ. ꓟꓶ ꓗꓪ ꓠꓬ ꓝꓴꓲ ꓔꓲ ꓟꓶ ꓡꓰ ꓢꓴ ꓥ ꓡꓳ꓿ ꓪ ꓔꓲ Constantine ꓠꓬ ꓬꓲ. ꓟꓽ ꓫꓵꓻ ꓢꓲ ꓕꓯ ꓬꓲ ꓤ ꓢꓽ ꓣꓳ ꓔꓯ ꓟꓵꓽ ꓕꓲ ꓣꓳ ꓕꓲ ꓐꓱ ꓐꓻ ꓖꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪ ꓔꓲ ꓫꓵꓻ ꓡꓰ ꓟ ꓙꓵ, ꓕꓯ ꓪ ꓔꓲ ꓬꓲ. ꓤ ꓢꓽ ꓣꓳ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓢꓰꓼ ꓡꓯ ꓘꓳ ꓓꓶꓽ ꓡꓯ ꓘꓳ ꓟ ꓥ ꓡꓳ꓿

ꓬꓲ. ꓟꓶ ꓗꓪ ꓠꓬ ꓪ ꓔꓲ ꓬꓲ. ꓤ ꓥ ꓟꓲ Constantius ꓠꓬ ꓧꓪ. ꓡꓰ ꓢꓲ ꓠꓬꓲ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓟ ꓟꓲ ꓥ ꓡꓳ꓿ ꓬꓲ. ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ Pagan ꓐꓴ ꓔꓯ ꓙꓲˍ ꓟ ꓕꓲ ꓒꓳ, ꓗꓪ ꓐꓰ ꓫꓵꓽ ꓘꓶꓼ ꓖꓶ ꓟ ꓥ ꓡꓳ꓿ ꓝꓮꓲ ꓣꓳ‐ꓟ ꓗꓴꓷꓼ ꓘꓴꓽ ꓗꓪ ꓠꓲꓽ ꓔꓯ ꓟꓽ ꓦꓻ ꓡꓱ ꓠ, ꓟ ꓪꓴ. ꓓꓵ ꓟꓽ ꓔꓵ ꓠ, ꓟ ꓐꓯ ꓑꓶ ꓗꓷ ꓢꓲ ꓠꓬꓲ ꓠꓲꓽ ꓔꓯ ꓦꓻ ꓡꓱ ꓢꓴ ꓔꓯ ꓢꓰꓼ ꓟ ꓟꓲ ꓥ ꓡꓳ꓿

ꓪ ꓔꓲ ꓠꓬ ꓠꓲꓽ ꓔꓯ ꓦꓻ ꓡꓱ ꓢꓴ ꓐꓴ ꓢꓳꓻ ꓦꓲꓻ ꓔꓯ ꓐꓬ ꓩꓴ ꓗꓷ ꓟ ꓟꓲ ꓥ ꓡꓳ꓿ ꓝꓮꓲ ꓠꓲꓽ ꓔꓯ ꓦꓻ ꓡꓱ ꓢꓴ ꓐꓴ ꓢꓳꓻ ꓦꓲꓻ ꓔꓯ ꓙꓲˍ ꓟ ꓕꓲ ꓒꓳ, ꓗꓪ ꓣꓱ ꓟ ꓥ ꓡꓳ꓿ ꓪ ꓔꓲ ꓐꓴ ꓡꓰ ꓥꓳꓽ ꓡꓰ ꓟ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓟ. ꓒ ꓓꓽ ꓐꓴ ꓔꓯ ꓠꓱ. ꓐꓯ ꓙꓲ‐ꓢꓴ ꓢꓲꓺꓤ ꓢꓳꓻ ꓦꓲꓻ ꓗꓪ ꓕꓳꓽ ꓶ ꓟ. ꓙꓵꓽ ꓪ ꓖꓶ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓳ, ꓔ ꓟ ꓟꓽ ꓙꓲˍ ꓐꓯ ꓟ ꓫ. ꓕꓱ ꓘꓶꓽ ꓐꓰ ꓓꓵꓽ ꓙ ꓚꓱ, ꓮ ꓟꓬ, ꓔꓯ ꓢꓳꓻ ꓦꓲꓻ ꓟ. ꓒꓽ ꓐꓴ ꓡꓰ ꓟ. ꓖꓶ ꓟ ꓥ ꓡꓳ꓿ ꓪꓴ‐ꓢ ꓔꓯ ꓟꓽ ꓦꓻ ꓡꓱ ꓟ ꓠꓲꓽ ꓙꓵꓻ ꓠꓲ, ꓔꓯ ꓢꓳꓻ ꓤ ꓐꓴ ꓔꓯ ꓟ. ꓖꓶ ꓠ, ꓟ ꓙꓳ ꓦꓲꓻ ꓗꓪ ꓟ. ꓒ ꓓꓽ ꓐꓴ ꓡꓰ ꓬꓰ ꓟ ꓥ ꓡꓳ꓿