ꓫꓵꓺ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ (Q & A)

ꓠꓬꓲꓸ ꓠꓬꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓯꓸꓼ ꓗꓪ ꓫꓵ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓐꓰ ꓟꓽ ꓘꓴ ꓖꓶˍ ꓟ ꓐꓯˍ ꓟ ꓕꓱ ꓡꓰ ꓙꓳˍ ꓟ ꓥ ꓪ= ꓕꓱ ꓟ ꓠꓬ ꓣꓳꓽ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓯꓸꓼ ꓗꓪ ꓡꓰ ꓙꓳˍ ꓟ ꓟꓽ ꓥ= ꓬꓴ-ꓓ ꓙꓵ ꓠꓲꓹ ꓠꓯꓸꓼ ꓗꓪ ꓥˍ ꓟꓲ ꓒꓽ-ꓡꓲ-ꓢꓷ ꓐꓴ ꓠꓬ ꓧꓪꓽ ꓗꓳ ꓓꓱꓽ ꓢꓯꓸ ꓬꓲꓼ ꓡˍ ꓟ ꓔꓯ ꓙꓵ ꓔꓬ ꓢꓲ ꓢ-ꓓꓴ-ꓗꓷ ꓐꓴ ꓠꓬ ꓧꓪꓽ ꓗꓳ ꓓꓱ ꓢꓯꓸ ꓬꓲꓼ ꓡˍ ꓟ ꓔꓯ ꓙꓵ ꓔꓬˍ ꓟ ꓟꓽ ꓙꓳ ꓐꓰ ꓙꓵ ꓔꓬˍ ꓟ ꓚꓱꓹ ꓔꓯ ꓟꓳꓸ ꓢꓲꓽ ꓫꓬ ꓕꓳ ꓶ ꓗꓪ ꓣꓳꓽ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓡꓰ ꓠꓬꓲ ꓙꓵ ꓠꓲꓹ ꓕꓲꓽ ꓟ ꓠꓯꓸꓼ ꓗꓪ ꓠꓬꓲꓽ ꓫꓵꓽ ꓕꓱ ꓡꓰ ꓙꓳˍ ꓟ ꓡꓰ ꓐꓰ ꓕꓲꓽ ꓡꓰꓻ ꓠꓬꓲꓸ ꓠꓬꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓯꓸꓼ ꓗꓪ ꓥˍ ꓟꓲ ꓫꓵ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓐꓰ ꓟꓽ ꓘꓴ ꓖꓶˍ ꓟ ꓐꓯˍ ꓟ ꓕꓱ ꓡꓰ ꓠꓬꓲꓽ ꓫꓵꓽ ꓙꓳˍ ꓟ ꓔꓯ ꓣꓳꓽ ꓡꓳꓸ ꓟꓳ ꓪ ꓓˍ ꓡꓳ= ꓫꓵ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓚꓱꓹ ꓔꓯ ꓟꓳꓸ ꓣꓳꓽ ꓛꓳꓽ ꓠꓬꓲ ꓠꓬ ꓓꓽ ꓪꓴꓸ ꓬꓲ-ꓢꓷ-ꓡꓲꓼ ꓡꓽ ꓞꓳ ꓐꓴ ꓙꓵ ꓠꓲꓹ ꓔꓯ ꓮꓸ ꓔꓲꓸ ꓛꓳꓽ ꓠ ꓗˍ ꓡꓳ= ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓠꓯꓸꓼ ꓗꓪ ꓠꓬ ꓫꓵ ꓢꓴ ꓐꓴ ꓠꓬ ꓢꓧꓰꓳꓡ ꓐꓯˍ ꓟ ꓧꓪꓽ ꓒꓴ ꓫꓵꓼ ꓥꓳꓽ ꓗꓪ ꓚꓳ ꓴꓠꓓꓰꓣꓠꓰꓮꓔꓧ ꓐꓯˍ ꓟ ꓣꓳꓽ ꓡꓲ-ꓢꓴ ꓥꓳꓽ ꓗꓪ ꓚꓳꓸ ꓠꓽ ꓟꓸ ꓟꓲ ꓟꓵꓽ ꓐꓰ ꓕꓱ ꓡꓰ ꓐꓯ ꓔ ꓟ ꓙꓳˍ ꓐꓭ= ꓕꓲꓽ ꓐꓱ ꓠꓬ ꓪꓳꓽ ꓟꓵꓽ ꓥˍ ꓟꓲ ꓐꓯˍ ꓡꓳ= ꓕꓱ ꓟ ꓠꓬ ꓮ ꓡꓲꓳ ꓫꓵꓽ ꓔꓯ ꓐꓯꓹ ꓡ ꓐꓯˍ ꓠꓬ ꓴꓠꓰꓣꓠꓰꓮꓔꓧ ꓐꓯˍ ꓟ ꓠꓬ ꓟꓲ ꓠꓯ ꓠꓯꓸ ꓘꓪ ꓗꓪ ꓙꓳˍ ꓟ ꓕꓲꓽ ꓔꓳꓸ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓞꓳ ꓤꓽ ꓮꓽ ꓙꓵꓽ ꓠꓬ ꓫꓵ ꓕꓯ ꓢꓧꓰꓳꓡ ꓐꓯˍ ꓟ ꓠꓯꓸꓼ ꓗꓪ ꓛꓲˍ ꓡꓳ ꓐꓰ ꓐꓯˍ ꓡꓳ= ꓖꓳ ꓡꓰ ꓥˍ ꓟꓲ ꓔꓱꓹ ꓚꓵˍ ꓟ ꓔꓯ ꓛꓳ ꓢꓴ ꓠꓬ ꓢꓧꓰꓳꓡ ꓗꓪ ꓚꓳꓸ ꓡꓲꓹ ꓙꓵˍ ꓟ ꓠꓯꓸꓼ ꓗꓪ ꓛꓲˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓬꓲ ꓪꓽ ꓠꓬ ꓮ ꓕꓯꓽ ꓥˍ ꓟꓲ ꓟꓽ ꓫꓵ= ꓮ ꓕꓯ ꓥˍ ꓟꓲ ꓢꓯꓸ ꓔꓬ ꓥ ꓐꓰ ꓕꓱ ꓡꓰ ꓐꓯˍ ꓡꓳ= ꓖꓳ ꓡꓰ ꓢꓲ ꓖꓣꓰꓰꓗ ꓥꓳꓽ ꓗꓪ ꓚꓳꓸ ꓠꓲ ꓢꓧꓰꓳꓡ ꓔꓯ ꓠꓬ ꓧꓮꓓꓰꓢ ꓐꓰ ꓕꓱ ꓡꓰ ꓐꓯˍ ꓐꓭ ꓟ-ꓕꓲ 16ꓽ 18 ꓗꓪ ꓕꓱ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=

ꓖꓳ ꓟ ꓡꓰ ꓐꓰ ꓕꓲꓽ ꓡꓰꓻ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓠꓬ ꓖꓮꓠ ꓰꓓꓰꓠ ꓐꓯˍ ꓟ ꓕꓱ ꓡꓲꓳ ꓫꓵꓽ ꓔꓯ ꓥˍ ꓟꓲ ꓙꓵ ꓔꓬˍ ꓐꓭ= ꓖꓮꓠ ꓰꓓꓰꓠ ꓐꓯˍ ꓟ ꓠꓬ ꓚꓳ ꓡꓳ ꓡꓳ ꓕꓴꓽ ꓦˍ ꓟ ꓬꓰ-ꓓꓰ ꓐꓱ ꓐꓱˍ ꓟ ꓬꓲ ꓟꓸ ꓟꓲꓽ ꓥˍ ꓡꓳ= ꓖꓳ ꓡꓰ ꓢꓲ ꓠꓬꓲ ꓬꓲ ꓪꓽ ꓠꓬ ꓑꓮꓣꓓꓰꓢ ꓐꓯˍ ꓟ ꓔꓯ ꓥˍ ꓟꓲ ꓙꓵ ꓔꓬ ꓐꓭ= ꓖꓳ ꓟ ꓠꓬ ꓖꓮꓠ ꓰꓓꓰꓠ ꓔꓯ ꓐꓯˍ ꓟ ꓥˍ ꓡꓳ ꓥˍ ꓟꓲ ꓕꓲꓽ ꓔꓳꓸ ꓔꓳꓸ ꓗꓪ ꓠꓬ ꓕꓱ ꓡꓰ ꓐꓯˍ ꓡꓳ= ꓖꓳ ꓗꓪ ꓑꓮꓣꓓꓰꓢ ꓗꓪ ꓚꓳꓸ ꓠꓲ ꓡꓮꓔꓲꓠ ꓥꓳꓽ ꓐꓰ ꓑꓮꓣꓮꓓꓲꓢꓴꓢ ꓐꓯˍ ꓟ ꓥ ꓢꓲ ꓧꓪꓽ-ꓒꓴ-ꓫꓵ ꓥꓳꓽ ꓗꓪ ꓚꓳꓸ ꓑꓮꓣꓮꓓꓲꓢꓰ ꓡꓲ-ꓢꓴ ꓥꓳꓽ ꓚꓳꓸ ꓒ-ꓣ-ꓓꓲ-ꓢꓴ ꓥˍ ꓠꓬ ꓒ-ꓡ-ꓓꓲ-ꓢꓴ ꓐꓯ ꓡˍ ꓟ ꓥ ꓪ= ꓖꓳ ꓟ ꓡꓰ ꓐꓰ ꓕꓲꓽ ꓡꓰꓻ ꓬꓲ ꓪꓽ ꓠꓯꓼ ꓗꓪ ꓖꓰꓧꓰꓠꓠꓮ ꓐꓯˍ ꓟ ꓙꓳˍ ꓐꓭ= ꓖꓰꓧꓰꓠꓠꓮ ꓐꓯˍ ꓟ ꓠꓬ ꓛꓬꓼ ꓟꓵꓽ ꓮꓸ ꓔꓳꓸ ꓔꓯ ꓐꓯˍ ꓟ ꓥ ꓪ= ꓠꓱꓸ ꓐꓯꓼ ꓕꓲꓽ ꓫꓵꓽ ꓠꓬ ꓢꓧꓮꓟꓮꓬꓲꓟ ꓐꓯˍ ꓟ ꓪꓴ-ꓢ ꓐꓰ ꓕꓲꓽ ꓪꓼ ꓔꓬˍ ꓟ ꓬꓲ ꓔꓶꓸ ꓔꓯ ꓐꓯˍ ꓟ ꓥ ꓪ= ꓖꓳ ꓟ ꓔꓯ ꓠꓬ ꓧꓰꓮꓦꓰꓠ ꓟꓴ ꓗꓪ ꓗꓴꓷꓼ ꓐꓰ ꓕꓱ ꓡꓰ ꓐꓯˍ ꓟ ꓥ ꓪ= ꓖꓳ ꓕꓯ ꓕꓱ ꓕꓲꓽ ꓘꓴꓸ ꓗꓪ ꓛꓳꓽ ꓠꓬꓲ ꓠꓬ ꓢꓧꓰꓳꓡ ꓗꓪ ꓛꓲ ꓢꓴ ꓠꓬ ꓕꓱꓹ ꓚꓵˍ ꓟ ꓔꓯ ꓛꓳ ꓢꓴ ꓠꓬ ꓟꓲ ꓠꓯ ꓠꓯꓸ ꓘꓪ ꓗꓪ ꓚꓳ ꓠꓯ ꓞꓲꓹ ꓟ ꓗꓪ ꓚꓳꓸ ꓓꓳ ꓪ ꓡꓰ ꓢꓲ ꓖꓮꓠ ꓰꓓꓰꓠ ꓐꓯˍ ꓟ ꓠꓯꓸꓼ ꓗꓪ ꓔꓬˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓖꓳ ꓟ ꓠꓬ ꓠꓲꓹ ꓫꓸ ꓟꓬ ꓫꓸ ꓓꓴ ꓟꓽ ꓙꓳ ꓮꓸ ꓫꓵꓽˍ ꓟꓲ ꓐꓲ ꓜꓲꓼˍ ꓟ ꓔꓶꓸ ꓐꓰ ꓕꓱ ꓡꓰ ꓑꓮꓣꓓꓰꓢ ꓐꓯˍ ꓟ ꓑꓮꓣꓮꓓꓲꓢꓰ ꓐꓯˍ ꓟ ꓒ-ꓣ-ꓓꓲ-ꓢꓴ ꓗꓪ ꓕꓱ ꓡꓰ ꓛꓲˍ ꓟ ꓥ ꓪ ꓐꓰ ꓕꓱ ꓡꓰ ꓐꓯˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓙꓵ ꓠꓲꓹ ꓔꓯ ꓛꓳꓽ ꓠꓬꓲ ꓠꓬ ꓬꓲ ꓪꓽ ꓙꓵ ꓔꓬˍ ꓟ ꓠꓬ ꓦ ꓕꓲꓽ ꓒꓳꓸ ꓔꓯ ꓢꓲ ꓔꓯ ꓪꓴꓸ ꓓꓵ ꓛꓹ ꓢꓲ ꓐꓯˍ ꓟ ꓥ ꓪ= ꓞꓳ ꓤꓽ ꓠꓬ ꓫꓵꓻ ꓕꓯ ꓠꓬ ꓦ ꓠꓬ ꓢꓧꓰꓳꓡ ꓗꓪ ꓛꓲ꓾ ꓖꓳ ꓕꓯ ꓦ ꓠꓬ ꓕꓱꓹ ꓚꓵˍ ꓟ ꓔꓯ ꓬꓰ ꓢꓴ ꓠꓬ ꓖꓳ ꓗꓪ ꓚꓳꓸ ꓡꓲꓹ ꓙꓲ ꓢꓲ ꓖꓮꓠ ꓰꓓꓰꓠ ꓐꓯˍ ꓟ ꓗꓪ ꓛꓲ ꓡꓰ ꓡ ꓓꓴ ꓥꓳ=

ꓖꓳ ꓡꓰ ꓥˍ ꓟꓲ ꓢꓲꓺ ꓒꓽ ꓬꓰ-ꓢꓴ ꓟꓲ ꓠꓯ ꓗꓪ ꓬꓯꓼ ꓡ ꓕꓯ ꓠꓬ ꓧꓪꓽ ꓗꓳ ꓓꓱꓽ ꓕꓲꓽ ꓒꓳꓹ ꓔꓯ ꓢꓲ ꓐꓹ ꓟ ꓐꓯˍ ꓟ ꓐꓹ ꓟ ꓧꓰꓮꓦꓰꓠ ꓮꓠꓓ ꓧꓰꓡꓡ ꓐꓯˍ ꓟ ꓖꓰꓧꓰꓠꓠꓮ ꓐꓰ ꓢꓧꓮꓟꓮꓬꓲꓟ ꓐꓯˍ ꓟ ꓕꓱ ꓟ ꓠꓬꓲꓽ ꓫꓵꓽ ꓔꓯ ꓕꓱ ꓡꓰ ꓙꓵ ꓡˍ ꓟ ꓥ ꓪ= ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓞꓳ ꓤꓽ ꓠꓬ ꓧꓪꓽ ꓗꓳ ꓓꓱˍ ꓐꓰ ꓦꓺ ꓕꓲꓽ ꓡꓰꓹ ꓕꓲꓽ ꓪꓼ ꓕꓱ ꓡꓰ ꓢꓯꓸ ꓬꓲꓼ ꓡ ꓓꓴ ꓥꓳ ꓐꓰ 1 ꓘꓳ-ꓡꓱ-ꓕꓴ 5ꓽ 35- 58 ꓗꓪ ꓕꓱ ꓡꓰ ꓐꓯ ꓔ ꓡꓳ= ꓡꓴ-ꓘ 20ꓽ 27- 40ꓹ ꓟ-ꓕꓲ 22ꓽ 25ꓹ ꓟ-ꓘꓳ 12ꓽ 22-24 ꓗꓪ ꓧꓪꓽ ꓗꓳ ꓓꓱꓽ ꓝꓮꓲ ꓢꓯꓸ ꓬꓲꓼ ꓡ ꓟ ꓚꓱꓹ ꓔꓯ ꓟꓳꓸ ꓕꓱ ꓡꓰ ꓐꓯ ꓔ ꓟ ꓙꓳˍ ꓡꓳ= ꓖꓳ ꓡꓰ ꓢꓲ ꓦꓺ ꓐꓰ ꓧꓪꓽ ꓗꓳ ꓓꓱꓽ ꓐꓯ ꓡꓯꓽ ꓘꓳ ꓢꓲ ꓝꓮꓲ ꓢꓯꓸ ꓬꓲꓼ ꓡ ꓕꓯ ꓠꓬ ꓬꓲ ꓟꓶꓽ ꓕꓲꓽ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬꓲꓽ ꓧꓪꓹ ꓕꓲꓽ ꓧꓪꓹ ꓛꓲ ꓡ ꓕꓯ ꓧꓪꓽ ꓗꓳ ꓓꓱꓽ ꓐꓰ ꓦꓺ ꓠꓬ ꓕꓲꓽ ꓪꓼ ꓢꓯꓸ ꓬꓲꓼ ꓡ ꓢꓲ ꓐꓯ ꓟꓵ ꓘꓶˍ ꓟ ꓔꓯ ꓔꓳꓹ ꓜꓳꓽ ꓡ ꓥꓳ= ꓖꓳ ꓕꓯ ꓐꓯ ꓟꓵ ꓘꓶꓽ ꓡ ꓔꓯ ꓠꓬ ꓟꓽ ꓙꓵ ꓢꓴ ꓠꓬ ꓖꓰꓧꓰꓠꓠꓮ ꓐꓯˍ ꓟ ꓛꓬꓼ ꓟꓵꓽ ꓮꓸ ꓔꓳꓸ ꓗꓪ ꓕꓲꓽ ꓞꓲꓼ ꓕꓲꓽ ꓑ ꓔꓬ ꓠˍ ꓟ ꓗꓷ ꓡꓰˍ ꓓꓴ ꓟ ꓥ ꓪ= ꓖꓳ ꓕꓲꓽ ꓘꓴ ꓗꓪ ꓠꓬ ꓦꓺ ꓐꓰ ꓧꓪꓽ ꓗꓳ ꓓꓱꓽ ꓕꓲꓽ ꓪꓼ ꓛꓬꓼ ꓟꓵꓽ ꓮꓸ ꓔꓳꓸ ꓗꓪ ꓛꓲˍ ꓟ ꓥ ꓪ= ꓙꓲˍ ꓢꓴ ꓠ ꓪꓴ-ꓢ ꓐꓰ ꓕꓲꓽ ꓪꓼ ꓔꓬ ꓪˍ ꓟ ꓠꓯꓸꓼ ꓗꓪ ꓛˍ ꓟ ꓥ ꓪ ꓐꓰ ꓕꓱ ꓡꓰ ꓢꓲꓽ ꓫꓬ ꓕꓳ ꓶ ꓗꓪ ꓕꓱ ꓡꓰ ꓐꓯ ꓔ ꓟ ꓥ ꓪ= ꓖꓳ ꓟ ꓑꓶꓸ ꓓꓴ ꓠꓲ ꓣꓳ ꓠꓯꓸꓼ ꓗꓪ ꓦꓺ ꓕꓲꓽ ꓒꓳꓹ ꓔꓯ ꓢꓲ ꓐꓯˍ ꓟ ꓠꓬ ꓢꓲꓺ ꓒꓽ ꓬꓰ-ꓢꓴ ꓠꓬꓲꓽ ꓧꓪꓹ ꓕꓲꓽ ꓧꓪꓹ ꓥˍ ꓠꓬ ꓐꓯ ꓟꓵ ꓟꓽ ꓘꓶꓽ ꓡ ꓢꓰꓼ ꓗꓪ ꓛꓲ ꓔꓯ ꓐꓯꓳ ꓫꓵꓽ ꓥ ꓪ= ꓖꓳ ꓕꓲꓽ ꓙꓵꓹ ꓗꓪ ꓠꓬ ꓞꓳ ꓤꓽ ꓧꓪꓽ ꓗꓳ ꓓꓱꓽ ꓠꓬ ꓫꓵꓻ ꓕꓯ ꓠꓬ ꓟꓲ ꓠꓯ ꓘꓴꓽ ꓗꓪ ꓔꓵꓸ ꓔ ꓟ ꓔꓯ ꓗꓶ ꓡꓰ ꓢꓲ ꓠꓬꓲ ꓦꓺ ꓠꓬ ꓠꓱꓸ ꓐꓯꓼ ꓕꓲꓽ ꓔꓳꓸ ꓗꓪ ꓙꓰˍ ꓟ ꓥ ꓪ= ꓖꓳ ꓡꓰ ꓢꓲ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓠꓬ ꓫꓵ ꓢꓴ ꓐꓱ ꓶ ꓪꓽ ꓘꓴ ꓖꓶ ꓕꓯ ꓠꓬ ꓟꓲ ꓠꓯ ꓠꓯꓸ ꓘꓪ ꓗꓪ ꓐꓯˍ ꓟ ꓟꓸ ꓟꓲ ꓟꓵꓽ ꓗꓪ ꓚꓳꓸ ꓡꓲꓹ ꓙꓰˍ ꓟ ꓔꓯ ꓑꓯꓹ ꓟꓶꓽˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓫꓵꓻ ꓗꓸ ꓠꓯꓸ ꓕꓲꓽ ꓘꓳꓼ ꓟꓽ ꓡꓳꓼ ꓢꓰ ꓧꓶꓸ ꓕꓯ ꓗꓪ ꓪꓽ ꓘꓴ ꓖꓶ ꓕꓯ ꓟꓬꓽ ꓠꓬꓲ ꓐꓶꓹ ꓠꓬꓲ ꓙꓲ ꓖꓴ ꓙꓳˍ ꓟ ꓥ ꓪ ꓐꓰ ꓬꓲ ꓪꓽ ꓠꓬ ꓘꓳꓹ ꓣꓴ ꓢꓲ ꓪꓽ ꓘꓴ ꓖꓶ ꓔꓬˍ ꓟ ꓥ ꓐꓭ=

ꓖꓳ ꓟ ꓡꓰ ꓐꓰ ꓕꓲꓽ ꓡꓰꓹ ꓘꓴ ꓜꓲꓼ ꓞꓳ ꓚ ꓟꓲꓽ ꓕꓯ ꓛꓳꓽ ꓠꓬꓲ ꓠꓬ ꓓꓽ ꓪꓴꓸ ꓠꓬ ꓙꓲ-ꓢꓴ ꓢꓲꓺ ꓤꓼ ꓐꓴ ꓙꓵ ꓠꓲꓹ ꓬꓲ ꓫꓳꓽ ꓒꓯꓽ ꓔ ꓟ ꓟꓽ ꓙꓳ ꓐꓭ= ꓬꓴ-ꓓ ꓙꓵ ꓠꓲꓹ ꓠꓯꓸꓼ ꓗꓪ ꓡꓰ ꓢꓲ ꓔꓬ ꓠˍ ꓟ ꓕꓱ ꓡꓰ ꓬꓰꓳ ꓫꓵꓽ ꓥ ꓐꓭ= ꓙꓰ-ꓣꓴ-ꓢ-ꓡꓱ ꓪꓽ ꓘꓴ ꓦꓲꓺ ꓗꓪ ꓕꓱ ꓡꓰ ꓕꓲꓽ ꓪꓼ ꓪꓽ ꓘꓴ ꓤꓼˍ ꓟ ꓕꓱ ꓡꓰ ꓬꓰˍ ꓟ ꓥ ꓐꓭ ꓥ= ꓬꓴ-ꓓ ꓙꓵ ꓠꓲꓹ ꓐꓰ ꓙꓲ-ꓢꓴ ꓢꓲꓺ ꓤꓼ ꓐꓴ ꓙꓵ ꓠꓲꓹ ꓠꓬ ꓕꓲꓽ ꓟꓼ ꓬꓴ-ꓓ ꓙꓵ ꓠꓲ ꓠꓯꓸꓼ ꓗꓪ ꓡꓰ ꓢꓲ ꓕꓱ ꓡꓰ ꓔꓬˍ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓐꓷ ꓞꓳ ꓐꓴ ꓠꓬ ꓙꓲ-ꓢꓴ ꓔꓯ ꓙꓵ ꓡˍ ꓢꓴ ꓮꓽ ꓟꓬꓹ ꓗꓷ ꓡˍ ꓠꓬ ꓫꓵꓽ ꓪꓴ ꓢꓲꓹ ꓛꓵꓽ ꓓꓽ ꓟ ꓕꓲꓽ ꓟ ꓗꓷ ꓡꓰꓳ= ꓖꓳ ꓟ ꓠꓬ ꓮꓸ ꓫꓵꓽ ꓥˍ ꓡ ꓐꓯ ꓠꓬ ꓶꓹ ꓟ ꓗ ꓫꓵ ꓥˍ ꓡꓳ= ꓶꓹ ꓟ ꓗ ꓫꓵ ꓪꓴꓸ ꓠꓬꓲ ꓕꓲ ꓐꓱ ꓠꓬ ꓙꓲ-ꓢꓴ ꓢꓲꓺ ꓤꓼ ꓒꓬꓱꓼ ꓠꓲꓹ ꓫꓵ ꓥˍ ꓟꓲ ꓖꓳ ꓟ ꓪꓴ ꓠꓬꓲ ꓠꓲ ꓒꓬꓱꓼ ꓠˍ ꓟ ꓗꓽ ꓕꓸ ꓓꓴ ꓓꓽ ꓟ ꓕꓱ ꓡꓰ ꓗꓷ ꓡꓰˍ ꓓꓴ ꓟ ꓥ ꓪ= ꓖꓳ ꓡꓰ ꓠꓬꓲ ꓝꓲ ꓓꓴ ꓐꓴ ꓠꓬ ꓖꓪ ꓙꓱ ꓡꓯꓽ ꓘꓳ ꓢꓲ ꓶꓹ ꓟ ꓗ ꓫꓵ ꓔꓯ ꓟꓽ ꓬꓰ ꓗꓳ ꓓꓱꓽ ꓔꓲꓹ ꓔ ꓟ ꓔꓯ ꓘꓳꓹ ꓣꓴ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶˍ ꓥꓳ ꓐꓯˍ ꓟ ꓔꓯ ꓪꓴꓸ ꓓꓵ ꓛꓹ ꓢꓲ ꓠꓬꓲ ꓬꓰ ꓡˍ ꓠꓬ ꓬꓴ-ꓓ ꓡꓽ ꓞꓳ ꓐꓴ ꓠꓬ ꓙꓲ-ꓢꓴ ꓢꓲꓺ ꓤꓽ ꓐꓴ ꓔꓯ ꓙꓰ-ꓣꓴ-ꓢ-ꓡꓱ ꓪꓽ ꓘꓴ ꓦꓲꓺ ꓗꓪ ꓟꓽ ꓘꓳꓸ ꓣꓴˍ ꓟ ꓗꓷ ꓡꓰˍ ꓓꓴ ꓟ ꓥ ꓪ= ꓟꓽ ꓓꓵ ꓝꓲˍ ꓟ ꓕꓱ ꓡꓰ ꓗꓷ ꓡꓰˍ ꓓꓴ ꓟ ꓥ ꓪ= ꓖꓳ ꓟ ꓠꓬ ꓮꓓ 50 ꓐꓰ 60 ꓘꓳꓼ ꓠꓬꓲꓽ ꓗꓴꓸ ꓛꓸ ꓗꓪ ꓕꓱ ꓡꓰ ꓫꓵꓽ ꓪꓴ ꓓꓽ ꓪꓴꓸ ꓗꓷ ꓡꓰˍ ꓓꓴ ꓟ ꓥ ꓪ= ꓖꓳ ꓕꓲꓽ ꓙꓵꓹ ꓗꓪ ꓛꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓬ ꓬꓴ-ꓓ ꓙꓵ ꓠꓲꓹ ꓔꓯ ꓛꓳ ꓔꓬˍ ꓟ ꓥ ꓪ= ꓖꓳ ꓡꓰ ꓐꓰ ꓕꓲꓽ ꓡꓰꓻ ꓙꓲ-ꓢꓴ ꓢꓲꓺ ꓤꓼ ꓐꓴˍ ꓐꓰ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓙꓰ-ꓣꓴ-ꓢ-ꓡꓱ ꓗꓪ ꓔꓬˍ ꓟ ꓙꓲˍ ꓟ ꓠꓬ ꓘꓴ ꓜꓲꓼ ꓞꓳ ꓬꓲ ꓚꓰ ꓛꓹ ꓟꓽ ꓙꓲˍ ꓟ ꓠꓬ ꓖꓳ ꓟ ꓠꓬ ꓣꓳ-ꓟ ꓪꓸ ꓔꓲꓸ ꓡꓰ ꓬꓴ-ꓓ ꓗꓴꓷꓼ ꓔꓯ ꓢꓰꓼ ꓡ ꓓꓶꓽ ꓡˍ ꓟ ꓪꓴꓸ ꓠꓬꓲ ꓪꓽ ꓘꓴ ꓦꓲꓺ ꓥˍ ꓟꓲ ꓮꓽ ꓙꓵꓽ ꓐꓬ ꓡꓰ ꓭꓸ ꓕꓲꓽ ꓢꓷꓽ ꓕꓯ ꓢꓲ ꓕꓲꓽ ꓢꓷꓽ ꓟꓽ ꓙꓳ ꓡꓰ ꓕꓱ ꓡꓰ ꓗꓷ ꓡꓰ ꓟ ꓪꓴꓸ ꓠꓬꓲ ꓙꓲ-ꓢꓴ ꓢꓲꓺ ꓤꓽ ꓐꓴ ꓬꓲ ꓚꓰ ꓠꓬ ꓣꓳ-ꓟ ꓡꓳ ꓒꓱ ꓗꓪ ꓢꓲ ꓕꓱ ꓡꓰ ꓗꓷ ꓡꓰˍ ꓓꓴ ꓟ ꓥ ꓪ= ꓖꓳ ꓟ ꓠꓬ ꓮꓓ 70 ꓘꓳꓼ ꓗꓼ ꓡꓯꓼ ꓗꓼ ꓙꓵ ꓗꓪ ꓥ ꓐꓭ=

ꓖꓳ ꓡꓰ ꓥˍ ꓟꓲ ꓙꓲ-ꓢꓴ ꓢꓲ ꓤꓼ ꓐꓴ ꓠꓬ ꓬꓴ-ꓓ ꓡꓽ ꓞꓳ ꓐꓴ ꓣꓱꓽˍ ꓟ ꓫꓵꓻ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓧꓪꓽ ꓗꓳ ꓓꓱꓽ ꓔꓯ ꓒꓵꓽˍ ꓟ ꓕꓱ ꓟ ꓔꓯ ꓝꓸ ꓢꓲ ꓛꓳ ꓔꓬˍ ꓟ ꓥ ꓪ= ꓠꓬꓲꓸ ꓠꓬꓲ ꓗꓪ ꓛꓲ ꓟꓳ ꓪ ꓓꓹ ꓟ ꓚꓮꓔꓰꓚꓳꓟꓐꓢ ꓐꓯˍ ꓟ ꓙꓲ-ꓢꓴ ꓢꓲꓺ ꓤꓼ ꓐꓴ ꓑꓬꓸ ꓟꓬꓹ ꓖꓴ ꓥˍ ꓟ ꓣꓳ-ꓟ ꓡꓳ ꓒꓱ ꓗꓪ ꓙꓳˍ ꓟ ꓟꓲ ꓠꓯ ꓠꓯꓸ ꓘꓪ ꓗꓪ ꓬꓲ ꓘꓵ ꓚꓵꓸ ꓦˍ ꓟ ꓡꓱꓼ ꓢꓲ ꓑꓬꓸ ꓠꓬ ꓠ ꓗꓷ ꓡꓰꓳ= ꓖꓳ ꓕꓲꓽ ꓘꓴ ꓗꓪ ꓠꓬꓲꓸ ꓠꓬꓲ ꓗꓪ ꓛꓲ ꓟꓳ ꓪ ꓓꓹ ꓟ ꓥ ꓪ= ꓖꓳ ꓡꓰ ꓢꓲ ꓬꓲ ꓪꓽ ꓠꓬ ꓫꓵꓻ ꓢꓴ ꓐꓴ ꓧꓪꓽ ꓗꓳ ꓓꓱꓽ ꓔꓯ ꓮꓽ ꓘꓶꓸ ꓕꓱ ꓡꓰ ꓒꓵˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓮ ꓡꓲꓳ ꓐꓯ ꓠꓬ ꓣꓳ-ꓟ ꓪꓸ ꓔꓲ ꓐꓴ ꓐꓰ ꓬꓴ-ꓓ ꓙꓵ ꓠꓲꓹ ꓐꓴ ꓠꓬ ꓢꓯꓸ ꓬꓲꓼ ꓡ ꓟ ꓟꓽ ꓙꓳ ꓐꓯ ꓢꓲ ꓧꓪ ꓗꓳ ꓓꓱꓽ ꓔꓯ ꓐꓬ ꓡꓰ ꓠ ꓒꓬ ꓩꓴˍ ꓟ ꓕꓱ ꓡꓰ ꓬꓰˍ ꓟ ꓥ ꓪ= ꓖꓳ ꓡꓰ ꓠꓬꓲ ꓢꓯꓸ ꓬꓲꓼ ꓡˍ ꓟ ꓙꓳˍ ꓦ ꓐꓰ ꓢꓷꓸ ꓡꓰ ꓓꓴ ꓓꓽ ꓟ ꓠꓬ ꓧꓪꓽ ꓗꓳ ꓓꓱꓽ ꓔꓯ ꓮꓽ ꓘꓶꓸ ꓒꓵꓽ ꓢꓲ ꓔꓵꓸ ꓔ ꓓꓴ ꓟ ꓒꓵꓽ ꓗꓹ ꓬꓰˍ ꓟ ꓕꓱ ꓟ ꓠꓬ ꓝꓮꓲ ꓢꓯꓸ ꓬꓲꓼ ꓡˍ ꓟ ꓢꓷꓸ ꓡꓰ ꓓꓴ ꓓꓽ ꓟ ꓕꓱ ꓡꓰ ꓗꓷˍ ꓓꓴ ꓟ ꓥ ꓪ= ꓖꓳ ꓟ ꓐꓶꓸ ꓓꓴ ꓚꓮꓔꓰꓚꓳꓟꓐꓢ ꓐꓯˍ ꓟ ꓗꓪ ꓠꓬꓲꓸ ꓠꓬꓲ ꓗꓪ ꓛꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓔꓵꓸ ꓦˍ ꓟ ꓞꓳ ꓟꓳ ꓡꓳꓸ ꓟꓳ ꓪ ꓓˍ ꓡꓳ= ꓬꓲ ꓪꓽ ꓪꓴꓽ ꓔꓳ ꓕꓱ ꓡꓲꓳ ꓫꓵꓽ ꓔꓯ ꓥˍ ꓟꓲ ꓠꓬꓲꓸ ꓠꓬꓲ ꓗꓪ ꓛꓲ ꓟꓳ ꓪ ꓓˍ ꓟ ꓥ ꓪ= ꓖꓳ ꓟ ꓡꓰ ꓟꓽ ꓞꓲ ꓙꓵ ꓠꓲꓹ ꓐꓱ ꓶ ꓫꓵꓺ ꓙ ꓢꓴ ꓢꓲꓽ ꓫꓬ ꓢꓴ ꓐꓴ ꓔꓯ ꓒꓵꓽ ꓗꓹ ꓬꓰˍ ꓟ ꓕꓱ ꓡꓲꓳ ꓫꓵꓽ ꓥˍ ꓟꓲ ꓬꓰˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓡꓰ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓫꓵꓻ ꓢꓴ ꓐꓱ ꓶ ꓪꓽ ꓘꓴˍ ꓟ ꓔꓯ ꓕꓱ ꓡꓰ ꓣꓱꓽ ꓡˍ ꓟ ꓥ ꓪ=