ꓬꓰ-ꓢꓴ ꓦꓵꓻ ꓡˍ ꓟ

 ꓮ ꓠꓱ 2000 ꓘꓳꓼ ꓟꓽ ꓞꓲꓺ ꓕꓯ ꓣꓳ-ꓟ ꓪ ꓔꓲ ꓢꓲ-ꓢ ꓮ-ꓗꓴ-ꓢꓶ-ꓔꓴ ꓙꓵꓽˍ ꓟ ꓦꓬꓼ ꓠꓬꓲ ꓗꓪ ꓟꓵꓽ ꓮ ꓙꓵꓽ ꓗꓪ ꓔꓬ ꓢꓴ ꓐꓴ ꓔꓯ ꓞꓳ ꓵ ꓟꓬꓱ ꓐꓳ ꓠꓹ ꓟ ꓚꓲ ꓛꓬ ꓦꓵꓻ ꓟꓵꓽ ꓗꓪ ꓙꓰ ꓝꓲˍ ꓡꓳ= ꓬꓳ-ꓢꓷˍ ꓟꓲ ꓓ-ꓪꓵ ꓞꓲꓼ ꓤ ꓡꓯ ꓤ ꓥ ꓠꓲ꓾ ꓟꓬꓱ ꓧꓳꓽ ꓠꓹ ꓟ ꓟ-ꓡꓲ ꓐꓰ ꓕꓲ ꓛꓳˍ ꓖ-ꓡꓲ-ꓡꓲ ꓟꓵꓽ ꓠ-ꓢ-ꓡꓱ ꓡꓳ ꓒꓱ ꓗꓪ ꓐꓰ ꓬꓴ-ꓔ ꓟꓵꓽ ꓐꓱ-ꓡꓱ-ꓦꓱ ꓡꓳ ꓒꓱ ꓗꓪ ꓙꓰˍ ꓡꓳ= ꓬꓲ ꓪ ꓖꓳ ꓗꓪ ꓔꓬ ꓕꓯ ꓟ-ꓡꓲ ꓠꓬ ꓤ ꓠꓱ ꓦꓵˍ ꓟ ꓦꓬꓼ ꓠꓬꓲ ꓛꓲ ꓡˍ ꓡꓳ= ꓬꓲ ꓡꓰ ꓤ ꓪꓴꓽ ꓕꓲ ꓣꓳ ꓦꓵꓻ ꓡ ꓕꓯ ꓮ ꓑꓱ ꓡꓰ ꓕꓱꓹ ꓢꓲ꓾ ꓪꓰ ꓤ ꓦꓲ ꓗꓪ ꓬꓲ ꓪ ꓐꓱ ꓶ ꓔꓬ ꓖꓴ ꓟꓽ ꓙꓳ ꓠꓬꓲ ꓞꓳ ꓫꓵꓼ ꓤ ꓔꓯ ꓙꓱꓽ ꓡꓴꓻ ꓕꓴ ꓗꓪ ꓫꓵꓸ ꓔ ꓡꓳ=

ꓡꓳ ꓒꓱ ꓖꓳ ꓟ ꓗꓪ ꓮ ꓣꓳ ꓡꓳꓸ ꓢꓴ ꓐꓴ ꓠꓬ ꓟꓶ ꓘꓶ ꓙꓵꓹ ꓕꓯ ꓡꓲꓺ ꓛꓲꓺ ꓗꓪ ꓬꓲ ꓪ ꓮ ꓣꓳ ꓜꓴ ꓔꓯ ꓡꓳꓸ ꓔꓬ ꓡꓳ= ꓪꓴ-ꓢ ꓬꓲ ꓟꓴꓽ ꓗꓪ ꓝꓲ ꓓꓴ ꓠꓬ ꓮ ꓣꓳ ꓡꓳꓸ ꓢꓴ ꓐꓴ ꓗꓳ ꓡꓳ ꓗꓪ ꓓꓳ ꓡ ꓢꓲ꓾ ꓠ ꓠꓹ ꓟꓬꓲꓹ ꓠꓬꓲ ꓓ-ꓪꓵ ꓡꓳ ꓒꓱ ꓗꓪ꓾ ꓠꓴ ꓪ ꓐꓱ ꓶ ꓚꓬꓴꓸ ꓢꓲꓺ ꓒ ꓕꓲ ꓣꓳ ꓦꓵꓻ ꓔ ꓡꓳ= ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓥ ꓡꓳ= ꓖꓳ ꓟ ꓢꓷꓸ ꓡꓰ ꓓꓴ ꓠ꓾ ꓮ ꓑꓱ ꓡꓰ ꓕꓱꓹ ꓢꓲ ꓡꓴꓻ ꓕꓴ ꓗꓪ ꓫꓵꓸ ꓔ ꓟ ꓞꓳ ꓫꓵꓼ ꓤ ꓕꓲ ꓣꓳ ꓔꓯ ꓠꓴ ꓪ ꓟꓳˍ ꓥꓳ꓾ ꓐꓯ ꓡꓳ=

ꓖꓳ ꓕꓯ ꓞꓼ ꓐꓰ ꓟꓴ ꓗꓪ ꓝꓲ ꓓꓴ ꓬꓲ ꓜꓴ ꓠꓬ ꓝꓲ ꓓꓴ ꓖꓳ ꓕꓲ ꓣꓳˍ ꓐꓰ ꓕꓲ ꓛꓳˍ ꓦꓰꓼ ꓡ ꓢꓲ ꓠꓬꓲ꓾ ꓟꓴ ꓡꓳꓹ ꓟ ꓗꓪ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ꓾ ꓟꓲ ꓠꓯ ꓗꓪ ꓬꓲ ꓠꓲꓹ ꓒꓴˍ ꓟ ꓞꓳ ꓤ ꓔꓯ ꓢꓲꓺ ꓡꓲ ꓟ ꓟꓶ ꓝꓲ꓾ ꓐꓯ ꓢꓲ ꓫꓱꓸ ꓖꓶˍ ꓡꓳ=

ꓮ ꓣꓳ ꓡꓳꓸ ꓢꓴ ꓐꓴ ꓥˍ ꓟꓲ ꓦꓱ-ꓡꓱ-ꓦꓱ ꓡꓳ ꓒꓱ ꓗꓪ ꓠꓲꓹ ꓞ ꓙꓰ ꓗꓷ ꓠꓬ ꓟ-ꓡꓲˍ ꓐꓰ ꓬꓳ-ꓢꓷˍ ꓐꓰ ꓡꓴꓻ ꓕꓴ ꓗꓪ ꓫꓵꓸ ꓔ ꓟ ꓞꓳ ꓫꓵꓼ ꓤ ꓔꓯ ꓧꓪ ꓟꓶˍ ꓡꓳ= ꓬꓲ ꓪ ꓡꓰ ꓬꓲ ꓔꓯ ꓟꓳ ꓗꓷ ꓠꓬ꓾ ꓤ ꓠꓱ ꓤ ꓔꓯ ꓖꓴ ꓢꓲ ꓬꓲ ꓪ ꓔꓯ ꓐꓯ ꓖꓶ ꓡˍꓟ ꓐꓯ ꓘꓶ ꓖꓳ ꓟ ꓟ-ꓡꓲ ꓐꓰ ꓬꓳ-ꓢꓷ ꓔꓯ ꓐꓯ ꓖꓶˍ ꓡꓳ= ꓮ ꓣꓳ ꓡꓳꓸ ꓢꓴ ꓐꓴ ꓡꓰ ꓐꓯˍ ꓟ ꓔꓯ ꓑ ꓙꓽ ꓢꓴ ꓮ ꓙꓵꓽ ꓓꓵꓽ ꓙ ꓟꓶ ꓡꓰˍ ꓡꓳ= ꓟ-ꓡꓲ ꓠꓬ ꓐꓯ ꓘꓶꓽ ꓕꓱ ꓟꓬ ꓟ ꓔꓯ ꓬꓲ ꓠꓲꓹ ꓟ ꓗꓪ ꓗꓶ ꓔ ꓢꓲ ꓓꓵꓽ ꓙ ꓠꓬꓲ ꓔꓬ ꓡꓳ=

ꓖꓳ ꓗ ꓠꓯ ꓮ ꓣꓳ ꓡꓳꓸ ꓢꓴ ꓐꓴ ꓠꓬ ꓟꓴ ꓗꓪ ꓝꓲ ꓓꓴ ꓡꓰ ꓬꓲ ꓪ ꓔꓯ ꓐꓯ ꓖꓶ ꓡ ꓟˍ ꓡꓰ ꓐꓰ꓾ ꓑˍ ꓟꓲ ꓑ ꓙꓽ ꓢꓲ ꓟꓳˍ ꓟꓲ ꓟꓳ ꓪ ꓡꓰ ꓠꓬꓲ꓾ ꓬꓲ ꓪ ꓠꓬ ꓪꓴ-ꓢ ꓔꓯ ꓟꓬꓱꓽ ꓓꓳ ꓖꓶ ꓠꓬꓲ ꓫꓱꓸ ꓖꓶ ꓠꓬꓲ ꓐꓰ ꓬꓲꓼ ꓙꓰˍ ꓡꓳ=

Add new comment

4 + 2 =