ꓬꓴ-ꓔ ꓪ ꓔꓲ ꓬꓳ-ꓢꓲ-ꓬ ꓚꓺ ꓟꓲꓽ

ꓬꓴ-ꓔ ꓪ ꓔꓲ ꓬꓳ-ꓢꓲ-ꓬ ꓚꓺ ꓟꓲꓽ

ꓪ ꓔꓲ ꓬꓳ-ꓢꓲ-ꓬ ꓠꓬ ꓐꓚ 640 ꓘꓳꓼ ꓗꓪ ꓐꓰ 609 ꓘꓳꓼ ꓛꓲꓺ ꓕꓯ ꓬꓴ-ꓔ ꓟꓵꓽ ꓔꓯ ꓙꓵꓽ ꓢꓴ ꓪ ꓔꓲ ꓒꓬꓱꓼ ꓗꓷꓳ= ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓬꓲ ꓡꓰ ꓪ ꓔꓲ ꓣꓱꓽˍ ꓟ ꓔꓯ 2 ꓪ ꓔꓲ 22ꓽ-23ꓽ ꓐꓰ 2 ꓚ ꓟꓲꓽ 34ꓽ-35ꓽ ꓗꓪ ꓐꓳ ꓔ ꓡꓳ= ꓬꓳ-ꓢꓲ-ꓬ ꓠꓬ ꓪ ꓔꓲ ꓬ-ꓟꓷ ꓬꓲ ꓤ꓾ ꓪ ꓔꓲ ꓟ-ꓠ-ꓢꓲ ꓬꓲ ꓡꓲꓸ ꓑꓸ ꓥ ꓡꓳ= ꓬꓳ-ꓢꓲ-ꓬ ꓬꓲ ꓐꓹ ꓐ ꓐꓰ ꓬꓲ ꓮ ꓑ ꓠꓬꓲꓽ ꓣꓳ ꓡꓱꓸꓼ ꓠꓬ ꓥꓶˍ ꓟ ꓬꓴ-ꓔ ꓪ ꓔꓲ ꓐꓴ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓳ-ꓢꓲ-ꓬ ꓠꓬ ꓪꓴ-ꓢ ꓔꓯ ꓢꓷꓸˍ ꓟ ꓪ ꓔꓲ ꓕꓲ ꓣꓳ ꓥ ꓢꓲ ꓬꓲ ꓠꓬ ꓟꓲ ꓠꓯ ꓗꓪ ꓬꓲ ꓞꓲꓼ ꓣꓳ ꓓꓰꓺ ꓡꓰˍ ꓟ ꓪ ꓕꓲ ꓣꓳ ꓥ ꓡꓳ꓾ ꓐꓰ ꓢꓷꓸ ꓔ ꓡꓳ= ꓬꓲ ꓐꓹ ꓐ ꓬ-ꓟꓷ ꓔꓯ ꓢꓴ ꓡꓰ ꓢꓷꓼ ꓗꓷ ꓗ ꓠꓯꓸ ꓬꓲ ꓞꓲꓼ 8 ꓘꓳꓼ ꓕꓯ ꓪ ꓔꓲ ꓣꓱꓽˍ ꓡꓳ= ꓬꓳ-ꓢꓲ-ꓬ ꓪ ꓔꓲ ꓣꓱꓽˍ ꓟ ꓗꓪ ꓬꓲ ꓬꓰˍ ꓟ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓝꓮꓲ ꓕꓲ ꓧꓪꓹ ꓧꓪ ꓟꓳꓻˍ ꓟ ꓥ ꓡꓳ=

2 ꓪ ꓔꓲ 22ꓽ2 ꓬꓳ-ꓢꓲ-ꓬ ꓔꓯ ꓕꓱ ꓡꓱ ꓖꓴ ꓟꓳꓸ ꓖꓶ ꓔ ꓡꓳ “ꓬꓳ-ꓢꓲ-ꓬ ꓠꓬ ꓬꓲ ꓒꓵꓽ ꓒ ꓓ-ꓪꓵ ꓬꓰ ꓗꓷ ꓟˍ ꓡꓰ ꓐꓰ꓾ ꓡꓯꓼ ꓘꓳꓽ ꓡꓯꓼ ꓶꓸ ꓟꓽ ꓧꓶꓸ ꓙꓰ ꓙꓰ꓾ ꓬꓰ-ꓧꓳ-ꓧꓪ ꓙꓵꓽ ꓗˍ ꓐꓰ ꓙꓵꓽ ꓚꓱꓹ ꓮ ꓙꓵꓽ ꓔꓯ ꓬꓲ ꓜꓶ ꓒꓵꓽ ꓛꓳˍ ꓡꓳ” ꓐꓰ ꓐꓯ ꓔ ꓡꓳ= ꓬꓲ ꓪ ꓔꓲ ꓣꓱꓽˍ ꓟ ꓞꓲ ꓦꓰꓼ ꓘꓳꓼ ꓕꓲ ꓘꓳꓼ ꓗꓪ ꓠꓬ ꓢꓲ ꓫꓬ ꓦꓲ ꓔꓯ ꓫꓬꓹ ꓑꓱ ꓠꓹ ꓟ ꓒꓴ ꓧꓪ ꓢꓲ ꓫꓬꓹ ꓑꓱ ꓝꓲˍ ꓡꓳ꓾ ꓖꓳ ꓡꓱ ꓫꓬꓹ ꓑꓱ ꓔꓬ ꓕꓯ ꓔꓲ ꓒ ꓦꓱ-ꓘꓷ-ꓬ ꓠꓬ ꓙꓵꓽ ꓗ ꓕꓳꓽ ꓶ ꓑꓷꓠ ꓔꓯ ꓧꓪ ꓟꓳꓻ ꓡꓰꓳ= ꓔꓲ ꓒ ꓦꓱ-ꓘꓷ-ꓬ ꓡꓰ ꓪ ꓔꓲ ꓔꓯ ꓵ ꓟꓸ ꓖꓶ ꓗꓷ ꓕꓯ ꓪ ꓔꓲ ꓠꓬ ꓬꓲ ꓐꓵ ꓞꓶꓽ ꓔꓯ ꓚꓵꓹ ꓧꓽ ꓗꓷꓳ= (2 ꓪ ꓔꓲ 22ꓽ11)

ꓙꓵꓽ ꓗ ꓕꓳꓽ ꓶ ꓔꓯ ꓗꓴꓷꓼ ꓗꓪ ꓟ ꓑ ꓫꓬ ꓐꓴ ꓟꓲꓽ ꓙꓬ ꓗꓪ ꓵ ꓟꓸ ꓖꓶ ꓗꓷ ꓢꓲ ꓪꓴ-ꓢ ꓐꓰ ꓞꓳ ꓤ ꓠꓬꓲꓽ ꓗꓴꓸ ꓝꓸꓼ ꓗꓪ ꓘꓶꓽ ꓫꓵꓽ ꓬꓰˍ ꓡꓳ= (2 ꓪ ꓔꓲ 23ꓽ3 ꓪ ꓔꓲ ꓬꓳ-ꓢꓲ-ꓬ ꓠꓬ ꓜꓲ ꓘꓴ ꓓꓽ ꓟ ꓛꓲ ꓔꓲ ꓗꓪ ꓦꓰꓼ ꓔ ꓢꓲ꓾ ꓕꓳ ꓶ ꓗꓪ ꓐꓳ ꓔ ꓟ ꓬꓰ-ꓧꓳ-ꓧꓪ ꓬꓲ ꓕꓵꓼ ꓪꓽˍ ꓐꓰ ꓬꓲ ꓙꓵꓽ ꓗ ꓮ ꓙꓵꓽ ꓔꓯ ꓕꓲ ꓠꓲꓹ ꓕꓲ ꓦ ꓡꓱꓸꓼ ꓡꓰ ꓒꓵꓽ ꓛꓳˍ ꓥꓳ꓾ ꓐꓰ ꓬꓰ-ꓧꓳ-ꓧꓪ ꓟꓲ ꓙꓬꓽ ꓗꓪ ꓪꓵꓼˍ ꓡꓳ= ꓖꓳ ꓕꓯ ꓑ ꓫꓬꓼ ꓐꓴˍ ꓟꓲ ꓖꓳ ꓗꓪ ꓐꓳ ꓔ ꓟˍ ꓡꓰ ꓐꓰ ꓬꓰˍ ꓥꓳˍ ꓐꓰ ꓐꓯ ꓞꓷꓹˍ ꓡꓳ=)

ꓬꓲ ꓠꓬ ꓗꓴꓷꓼ ꓗꓪ ꓫꓬꓹ ꓔꓱꓹ ꓟ꓾ ꓒꓳꓹ ꓡꓶꓸˍ ꓟ ꓟꓬꓱꓽ ꓮ ꓟꓬꓹ ꓬꓰ ꓗꓷꓳ= ꓠꓲꓽ ꓐꓬꓱꓽ ꓢꓲꓺ ꓐꓬꓱꓽ ꓮ ꓙꓵꓽ ꓔꓯ ꓒꓬꓹ ꓦ ꓗꓷ ꓢꓲ꓾ ꓟꓲꓽ ꓟꓲ ꓦ ꓐ ꓗꓴ ꓤ ꓔꓯ ꓪꓴꓸ ꓓꓵ ꓕꓱꓼˍ ꓕꓯ ꓣꓱꓽˍ ꓟ ꓖꓴꓽ ꓙꓴꓽ ꓮ ꓙꓵꓽ ꓔꓯ ꓢꓲꓽ ꓫꓬ ꓦꓲ ꓗꓪ ꓐꓰ ꓣꓴ ꓓꓳ ꓗꓷ ꓝꓲˍ ꓡꓳ= ꓖꓳ ꓡꓱ ꓢꓲ ꓪ ꓔꓲ ꓬꓳ-ꓢꓲ-ꓬ ꓠꓬ ꓦꓲ-ꓘꓳ-ꓑꓮꓲ ꓬꓰˍ ꓡꓳ (2 ꓪ ꓔꓲ 23ꓽ2-23) ꓝꓮꓲ ꓠꓬ ꓔꓲ ꓖꓴ ꓗꓪ ꓐꓶꓽ ꓒ ꓢꓲꓺ ꓔꓯ ꓣꓱꓽ ꓙ ꓔꓬ ꓟ ꓔꓲ ꓒ ꓐꓴ ꓔꓯˍ ꓟꓲ ꓢꓰꓼ ꓗꓷˍ ꓡꓳ=

2 ꓪ ꓔꓲ 23ꓽ25 ꓗꓪ ꓠꓬ “ꓬꓳ-ꓢꓲ-ꓬˍ ꓡꓰ ꓐꓰꓕꓲ ꓠꓲꓹ ꓕꓲ ꓦ ꓕꓲ ꓢꓯꓼˍ ꓡꓰꓽ ꓬꓰ-ꓧꓳ-ꓧꓪ ꓔꓯ ꓣꓱꓽ ꓙ ꓢꓲ꓾ ꓟꓳ-ꓫꓲ ꓙꓵꓽ ꓗ ꓮ ꓙꓵꓽ ꓔꓯ ꓬꓲ ꓜꓶ ꓒꓵꓽ ꓛꓳˍ ꓟ ꓪ ꓔꓲ ꓠꓬ꓾ ꓬꓲ ꓧꓶꓸ ꓕꓯˍ ꓟꓲ꓾ ꓗ ꓠꓯꓸˍ ꓟꓲ ꓟꓽ ꓙꓳ ꓠꓬꓲ” ꓐꓰ ꓐꓯ ꓔ ꓡꓳ= ꓟ-ꓠ-ꓢꓲ ꓬꓰ ꓗꓷ ꓟ ꓥꓶˍ ꓟ ꓟꓬꓱꓽ ꓑꓶꓸ ꓓꓴ ꓬꓴ-ꓔ ꓟꓵꓽ ꓗꓪ ꓗꓸ ꓠꓯꓸ ꓕꓯ ꓠꓬ ꓪꓴ-ꓢ ꓬꓲ ꓦꓶ ꓠꓲꓹ ꓛꓲꓺ ꓡˍ ꓥꓳ (2 ꓪ ꓔꓲ 23ꓽ26) ꓖꓳ ꓡꓱ ꓥˍ ꓟꓲ ꓪ ꓔꓲ ꓬꓳ-ꓢꓲ-ꓬ ꓡꓰ ꓙꓵꓽ ꓗ ꓚꓱꓹ ꓗꓪ ꓐꓰ ꓑ ꓫꓬ ꓐꓴ ꓔꓯ ꓧꓳꓽ ꓣꓱꓽ ꓗꓷ ꓟ ꓑꓶꓸ ꓓꓴ ꓪꓴ-ꓢ ꓬꓲ ꓦꓶ ꓠꓲꓹ ꓠꓬ ꓬꓲ ꓪ ꓕꓯꓽ ꓢꓲ ꓗꓪ ꓞꓼ ꓞꓼ ꓟꓽ ꓬꓯꓼ ꓡ ꓝꓲ (2 ꓪ ꓔꓲ 22ꓽ20) =

ꓬꓳ-ꓢꓲ-ꓬ ꓠꓬ ꓟꓷ-ꓗꓲ-ꓓꓳ ꓗꓪ ꓬꓲ-ꓙꓲ ꓪ ꓔꓲ ꓠꓱ-ꓘꓳ ꓐꓰ ꓓꓶꓽ ꓡꓯ ꓘꓳˍ ꓕꓯ ꓫꓵꓻ ꓗꓷꓳ=  ꓪ ꓔꓲ ꓬꓳ-ꓢꓲ-ꓬ ꓔꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓟ ꓬꓲ ꓚꓲꓸ ꓛꓬ ꓡꓱꓼ ꓜꓴ ꓗꓪ ꓔꓵꓸ ꓗꓷ ꓢꓲ꓾ ꓬꓲ ꓤ ꓬꓰ-ꓧꓳ-ꓬ-ꓜꓷ ꓡꓰ ꓝꓸ ꓢꓲ ꓪ ꓔꓲ ꓣꓱꓽˍ ꓡꓳ=

ꓪ ꓔꓲ ꓬꓳ-ꓢꓲ-ꓬ ꓤꓶꓻ ꓗꓪ ꓐꓰ ꓣꓳ ꓐꓴ ꓠꓬ ꓙꓲꓻˍ ꓟ ꓮ ꓟꓬꓹ ꓔꓯ ꓢꓳ ꓣꓴ ꓐ ꓡˍ ꓟ ꓥ ꓡꓳ= ꓬꓲ ꓪꓴꓸ ꓠꓬ꓾ ꓬꓳ-ꓢꓲ-ꓬ ꓠꓬ ꓞꓲꓼ ꓣꓳˍ ꓕꓯ ꓙꓳ ꓠꓯꓹ ꓟ ꓙꓵꓽ ꓪ ꓬꓲ ꓔꓯ ꓙꓳˍ ꓟ ꓔꓯ ꓟꓳꓸ ꓖꓶ ꓗꓷꓳ= ꓤ ꓠꓱ ꓤ ꓐꓴ ꓡꓰꓸ ꓪꓴ-ꓢ ꓐꓱ ꓶ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓐꓰ ꓪꓴꓽ ꓓꓰˍ ꓟ ꓔꓶꓺ ꓙꓱꓼ ꓙꓳˍ ꓡꓳ ꓐꓯ ꓟ ꓥ ꓡꓳ= ꓠꓬꓲꓽ ꓟ ꓕꓲ ꓟ ꓠꓬ꓾ ꓙꓳ-ꓢꓲ-ꓬ ꓠꓬ ꓪꓴ-ꓢ ꓔꓯ ꓕꓲ ꓠꓲꓹ ꓕꓲ ꓦ ꓡꓱꓸꓼ ꓪꓵꓼ ꓗꓷ ꓢꓲ ꓠ ꓡꓳꓹ ꓟ ꓗꓪ ꓞꓳ ꓙꓳ ꓢꓯꓸ ꓔꓬ ꓗꓷ ꓢꓲ ꓠꓬꓲ꓾ ꓖꓳ ꓟ ꓐꓱ ꓶ ꓶꓼ ꓤ ꓫꓱꓹ ꓤ ꓘꓳꓹ ꓣꓴ ꓟꓶ ꓗꓷꓳ= ꓢ ꓟ ꓕꓲ ꓟ ꓠꓬ꓾ ꓬꓳ-ꓢꓲ-ꓬ ꓪ ꓔꓲ ꓒꓬꓱꓼ ꓡˍ ꓟ ꓦꓬꓼ ꓠꓬꓲ ꓕꓯ ꓑ ꓫꓬꓼ ꓐꓴ ꓠꓬ ꓢꓲꓽ ꓫꓬ ꓕꓳꓽ ꓶ ꓔꓯ ꓟꓽ ꓒꓵꓽ ꓒꓵꓽ ꓔꓬ ꓟ ꓑꓶꓸ ꓓꓴ ꓬꓲ ꓠꓬ ꓠꓲꓹ ꓟ ꓫꓸ ꓪ ꓡꓰꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓠꓬ ꓑ ꓫꓬꓼ ꓐꓴ ꓔꓯ ꓜꓲꓼ ꓡꓳꓽ ꓝꓲ ꓢꓲ ꓢꓲꓽ ꓫꓬ ꓕꓳ ꓶꓽ ꓔꓯ ꓵꓻ ꓟꓸ ꓖꓶˍ ꓟ ꓔꓯ ꓬꓰ ꓢꓲ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓟꓸ ꓖꓶ ꓔ ꓟ ꓡꓰ ꓐꓰ ꓛꓳ ꓫꓱꓽ ꓠꓹ ꓟ ꓪꓵꓼ ꓘꓶꓽ ꓖꓶˍ ꓟ ꓔꓯ ꓬꓰ ꓝꓲ ꓗꓷꓳ=