ꓮ-ꓐꓲ-ꓗꓷ ꓟꓸ ꓟꓲꓽ

“ꓥꓪ ꓐꓹ ꓐ ꓬꓲ ꓗꓹ ꓛꓲꓽ ꓓꓴ” ꓐꓰ ꓬꓲ ꓟꓸ ꓟꓲꓽ ꓙꓳˍ ꓟ꓾ ꓬꓲ ꓬꓲ ꓢꓲ ꓙꓳˍ ꓟ ꓮ-ꓐꓲ-ꓗꓷ ꓟꓬꓱ ꓔ ꓟ ꓤ ꓟꓶ ꓤ ꓔꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓷꓸ ꓠꓲꓹ ꓙꓳ ꓢꓲ ꓮ ꓘꓶꓸ ꓐꓲꓻˍ ꓟ ꓤ ꓟꓶ ꓤ ꓐꓰ ꓐꓯ ꓔ ꓡꓳ= “ꓢꓷꓸ ꓠꓲꓹ ꓙꓳˍ ꓟ ꓤ ꓟꓶ ꓤ” ꓐꓯ ꓢꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓟꓬꓱ ꓓꓳꓽ ꓙꓳ ꓙꓳ ꓡꓰꓽ ꓐꓯ ꓟꓸ ꓖꓶˍ ꓗꓪ ꓛꓲꓺ ꓚꓵ ꓚꓵ ꓮ-ꓐꓲ-ꓗꓷ ꓠꓬ ꓢꓷꓸ ꓠꓲꓹ ꓮ ꓘꓶꓸ ꓙꓳ ꓢꓴ ꓕꓲ ꓣꓳ ꓥ ꓡꓳ=

ꓕꓱ ꓡꓱ ꓒꓬꓱꓽ ꓮ ꓘꓶꓸ ꓐꓲꓻ ꓢꓲ ꓠꓬꓲ ꓢꓷꓸ ꓠꓲꓹ ꓙꓳˍ ꓟ ꓮ-ꓐꓲ-ꓗꓷ ꓔꓯ ꓟꓶ ꓔ ꓢꓴ ꓠꓬ ꓠ-ꓑ-ꓡꓷ ꓥ ꓡꓳ= ꓬꓲ ꓔꓯ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ “ꓮ ꓫꓵꓽ ꓗꓪˍ ꓟꓲ ꓠꓲꓹ ꓟ ꓟꓽ ꓫꓵ ꓟ꓾ ꓠꓲꓹ ꓟ ꓓꓴꓸˍ ꓟ ꓞꓳ ꓥꓶ ꓕꓲ ꓣꓳ ꓥ ꓡꓳ” ꓐꓰ ꓐꓯ ꓔ ꓡꓳ=

ꓠ-ꓑ-ꓡꓷ ꓬꓲ ꓫꓱꓹ ꓠꓬ ꓐꓳ ꓶ ꓮ ꓟꓬꓹ ꓙꓳˍ ꓟ꓾ ꓠꓲꓹ ꓟ  ꓮ ꓘꓶꓸ ꓓꓴꓸˍ ꓟ꓾ ꓜꓽ ꓬꓲꓼ ꓓꓳ ꓬꓲꓼ ꓔꓬ ꓢꓴ ꓡ ꓞꓳ ꓕꓲ ꓣꓳ ꓥ ꓠꓬꓲ ꓮ-ꓐꓲ-ꓗꓷ ꓬꓲ ꓫꓱꓹ ꓐꓰ ꓠꓬ ꓟꓴꓽ ꓗꓪ ꓐꓰ ꓟꓲ ꓠꓯ ꓡꓰ ꓐꓰ ꓗꓹ ꓕꓯ ꓮ-ꓐꓲ-ꓗꓷ ꓡꓰ ꓐꓰ ꓢꓷꓸ ꓠꓲꓹ ꓙꓳ꓾ ꓒꓬꓱꓽ ꓐꓲˍ ꓟ ꓤ ꓟꓶ ꓤ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓠ-ꓑ-ꓡꓷ ꓬꓲ ꓤ ꓟꓶ ꓒꓬꓱꓼ ꓡꓰ ꓡ? ꓐꓰ ꓠ ꓠꓬꓲ ꓓꓴ ꓙꓳˍ ꓡꓳ=

ꓮ ꓠꓱ ꓟ ꓦꓬꓼ ꓠꓬꓲ ꓕꓯ ꓦꓲ-ꓐꓱ-ꓣꓴ ꓤ ꓟꓶ ꓤ ꓐꓴ ꓠꓬ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ꓾ ꓞꓳ ꓪꓴꓽ ꓐꓴ ꓡꓰ ꓣꓴ ꓝꓲˍ ꓟ ꓞꓳ ꓑ ꓤ ꓔꓯ ꓠꓵꓻ ꓠꓵꓻ ꓟꓽ ꓠꓵꓻ ꓠꓵꓻ ꓘꓳꓹ ꓣꓴ ꓪˍ ꓟ ꓑꓶꓸ ꓓꓴ ꓮ-ꓐꓲ-ꓗꓷ ꓠꓬ ꓠ-ꓑ-ꓡꓷ ꓬꓲ ꓤ ꓟꓶ ꓒꓬꓱꓼ ꓡꓰ ꓟ ꓥ ꓡꓳ=

ꓮ-ꓐꓲ-ꓗꓷ ꓬꓲ ꓤ ꓖꓴ ꓠ-ꓑ-ꓡꓷ ꓠꓬ ꓮ ꓣꓳ ꓟꓵ ꓞꓶꓽˍ ꓟ ꓶꓻ ꓡꓯꓼ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓥ ꓡꓳ= ꓮ ꓣꓳ ꓢ ꓔꓴ꓾ ꓮ ꓛꓵꓼ ꓕꓲ ꓔꓴ ꓟ ꓙꓳ ꓢꓴ ꓞꓳ ꓐꓳ ꓒ ꓕꓲ ꓣꓳ ꓥ ꓜꓳꓽ=

ꓦꓬꓼ ꓠꓬꓲ ꓖꓳ ꓟ ꓗꓪ ꓟꓷꓽ ꓠꓷꓹ ꓝ ꓒ ꓢ-ꓟꓴ-ꓬꓰ ꓫꓵꓻ ꓗꓷ ꓗ ꓠꓯꓸ꓾ ꓪ ꓔꓳ ꓢꓳ-ꓡꓳ ꓠꓬ ꓓ-ꓪꓵ ꓔꓯ ꓮ ꓘꓶꓸ ꓠꓲꓹ ꓙꓳꓺ ꓢꓲ꓾ ꓮ ꓡꓲ ꓗꓪ ꓟꓳꓻˍ ꓠꓬ ꓖꓳ ꓗꓪ ꓢꓰꓼ ꓗꓷ ꓠꓹ ꓟ ꓐꓱ ꓶ ꓓ-ꓪꓵ ꓔꓯ ꓧꓪ ꓔꓬ ꓠꓬꓲ꓾ ꓓ-ꓪꓵ ꓠꓬ ꓪ ꓔꓲ ꓢꓳ-ꓡꓳ ꓶꓽ ꓤ ꓗꓪ ꓛꓰꓹ ꓑꓬ ꓔꓬ ꓪˍ ꓟ ꓙꓵꓹ ꓥ ꓡꓳ= ꓖꓳ ꓡꓱ ꓥ ꓟꓲ ꓧꓶꓸ ꓕꓯ ꓟꓷꓽ ꓠꓷꓹ ꓝ ꓒ ꓢ-ꓟꓴ-ꓬꓰ ꓟꓽ ꓫꓵꓻ ꓕꓯ ꓡꓰ ꓓ-ꓪꓵ ꓔꓯ ꓬꓲ-ꓢꓷ-ꓡꓰ ꓔꓯ ꓙꓵꓽ ꓠꓹ ꓟ ꓪ ꓔꓲ ꓕꓲ ꓣꓳˍ ꓡꓰ ꓐꓰ ꓢ-ꓟꓴ-ꓬꓰ ꓡꓰ ꓠꓬꓲꓽ ꓧꓪꓹ ꓟꓰ ꓞꓶꓻ ꓟꓰ ꓖꓶ ꓗꓷ ꓟ ꓥ ꓡꓳ=

ꓦꓬꓼ ꓠꓬꓲ ꓖꓳ ꓟ ꓗꓪ ꓩꓱ-ꓡꓲ-ꓫꓵ ꓡ ꓞꓳ ꓐꓴ ꓠꓬ ꓬꓲ-ꓢꓷ-ꓡꓲ ꓐꓴ ꓮ ꓣꓳ ꓮ ꓛꓵꓼ ꓐꓴ ꓔꓯ ꓦꓴꓻ ꓔꓯꓹ ꓙꓰˍ ꓟ ꓡꓳ ꓒꓱ ꓐꓴ ꓗꓪ ꓓ-ꓪꓵ ꓐꓰ ꓬꓲ ꓟꓯꓼ ꓜꓴ ꓐꓴ ꓠꓬ ꓮ ꓡꓲ ꓐ ꓡˍ ꓮ ꓡꓲ ꓡꓳꓸ ꓙ ꓖꓶ ꓔꓬ ꓠꓬꓲ꓾ ꓖꓳ ꓟ ꓘꓴꓽ ꓗꓪ ꓮ-ꓐꓲ-ꓗꓷ ꓐꓴ ꓔꓬ ꓟ ꓘꓹ-ꓟꓱ-ꓡꓱˍ ꓟꓲ ꓐꓹ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓓ-ꓪꓵ ꓠꓬ ꓬꓲ ꓡ ꓞꓳ ꓔꓯ ꓝꓲ ꓩꓴ ꓗꓷ ꓢꓲ ꓠ-ꓑ-ꓡꓷ ꓔꓯ ꓕꓱ ꓡꓱ ꓐꓯ ꓝꓲˍ ꓜꓳꓽ= ꓬꓲ ꓐꓰ ꓬꓲ ꓡ ꓞꓳ ꓐꓴ ꓠꓬ ꓕꓱ ꓕꓲ ꓟꓵꓽ ꓗꓪ ꓔꓬ ꓢꓴ ꓐꓴ ꓔꓯ ꓩꓱ-ꓡꓲ-ꓫꓵ ꓐꓴ ꓡꓰ ꓗꓸ ꓧꓪ ꓡˍ ꓟ ꓗꓪ ꓐꓰ ꓗꓽ ꓙ ꓖꓶˍ ꓔꓬ ꓟ ꓥ ꓡꓳ=ꓖꓳ ꓟ ꓪꓴꓸ ꓠꓬꓲ ꓠ-ꓑ-ꓡꓷ ꓔꓬ ꓗꓪ ꓟꓬꓱꓽ ꓬꓰ ꓔꓬ ꓟ ꓮ ꓣꓳ ꓟꓵ ꓞꓶꓽ ꓢꓴ꓾ ꓮ ꓛꓵꓼ ꓟꓵ ꓞꓶꓽ ꓢꓴ ꓐꓴ ꓠꓬ ꓮ ꓫꓵꓽ ꓙꓳꓺ ꓟꓽ ꓛꓵ ꓢꓲ ꓡꓲ ꓡꓲ ꓐꓰ ꓟꓬꓱꓽ ꓬꓰ ꓔꓬꓹꓳ= ꓖꓳ ꓡꓱ ꓠꓬꓲ ꓮ ꓟꓶ ꓬꓲ ꓐꓰ ꓬꓲ ꓟꓯꓼ (500) ꓣꓳ ꓐꓱ ꓶ ꓜꓽ ꓓꓴ ꓮ ꓔꓲꓸ ꓤ ꓬꓰ ꓙ ꓝꓲ ꓠꓲꓹ ꓫꓵˍ “ ꓐꓰ ꓐꓯ ꓖꓶ ꓝꓲˍ ꓜꓳꓽ=

ꓓ-ꓪꓵ ꓬꓲ ꓡ ꓞꓳ ꓐꓴ ꓥˍ ꓟꓲ ꓓ-ꓪꓵ ꓐꓯ ꓝꓲˍ ꓟ ꓕꓲ ꓡꓰꓹ ꓐꓯ ꓖꓶˍ ꓕꓯ ꓠ-ꓑ-ꓡꓷ ꓡꓰ ꓕꓱ ꓡꓱ ꓐꓯ ꓖꓶˍ ꓡꓳ=

“ꓓ-ꓪꓵ ꓠꓬ ꓮꓽ ꓟ ꓥˍ? ꓬꓰ-ꓫꓲ ꓬꓲ ꓤ ꓐꓯ ꓟ ꓠꓬ ꓮ ꓡꓲ ꓟ ꓥ= ꓮꓹꓽ ꓬꓲ ꓢꓲ ꓒ ꓢꓳ-ꓡꓳ ꓔꓯˍ ꓐꓰ ꓛꓰꓹ ꓙꓰ ꓢꓴ ꓚꓳ ꓑ ꓐꓴ ꓡꓰꓽ ꓥ ꓐꓭ= ꓥꓪ ꓡꓰ ꓥꓪ ꓚꓳ ꓑꓸ ꓐꓴ ꓔꓯ ꓖꓶ ꓜꓽˍ ꓟ ꓜꓽ ꓓꓴ꓾ ꓧꓪꓽ ꓐꓴ ꓔꓯ ꓥꓪ ꓟꓽ ꓢꓷꓸ ꓢꓴ ꓔꓯ ꓖꓶꓽ ꓜꓽ ꓠꓯꓹ ꓡ? ꓐꓰ ꓒꓳꓹ ꓖꓶˍ ꓜꓳꓽ=

ꓖꓳ ꓡꓱ ꓠꓬꓲ ꓓ-ꓪꓵ ꓬꓲ ꓡ ꓞꓳ ꓐꓴ ꓥ ꓟꓲ ꓠ-ꓑ-ꓡꓷ ꓐꓯ ꓖꓶ ꓡˍ ꓟ ꓕꓲ ꓡꓰꓹ ꓕꓲ ꓢꓶꓽ ꓟꓽ ꓚꓰꓺ ꓮ ꓙꓵꓽ ꓐꓯ ꓖꓶ ꓗꓷꓳ= ꓖꓳ ꓟ ꓔꓯ ꓑ ꓙꓽ ꓡꓰ ꓕꓯ ꓓ-ꓪꓵ ꓠꓬ ꓬꓲ ꓟꓯꓼ ꓜꓴ ꓐꓴ ꓔꓯ “ꓮ ꓕꓽ ꓓꓱꓼ “ ꓐꓯ ꓖꓶ ꓢꓲ ꓓ-ꓪꓵ ꓬꓲ ꓚꓲ ꓛꓬ ꓥ ꓟꓲ ꓮ ꓕꓽ ꓓꓱꓼ ꓗꓷꓳ=

ꓕꓱ ꓗꓪ ꓠ-ꓑ-ꓡꓷ ꓡꓰ ꓡ ꓞꓳ 500 ꓣꓳ ꓐꓱ ꓶ ꓖꓶꓽ ꓜꓽ ꓟꓽ ꓐ ꓡ ꓠꓬꓲ꓾ ꓟꓽ ꓖꓶꓽ ꓐꓰ ꓐꓯ ꓗꓷ ꓟ ꓮ ꓫꓵꓽ ꓥꓳꓽ ꓡꓰ ꓓꓴ ꓙꓳˍ ꓡ? ꓐꓰ ꓓꓵꓽ ꓙ ꓓꓴ ꓙꓳˍ ꓡꓳ= ꓖꓳ ꓡꓱ ꓥˍ ꓟꓲ ꓣꓳ ꓢꓷꓸ ꓔ ꓓꓴ ꓕꓲ ꓫꓵꓽ ꓠꓬ ꓬꓲ ꓪ ꓡꓲꓽ ꓒꓰꓼ ꓠꓬ ꓓꓴ ꓓꓳ ꓙꓰ ꓢꓴ ꓪꓰꓻ ꓤ ꓠꓬ ꓮ ꓟꓬꓹ ꓣꓳ ꓥ ꓟꓲ ꓪꓰꓻ ꓤ ꓮ ꓟꓬꓹ ꓦꓬ ꓣꓳ ꓙꓳˍ ꓥ ꓟꓲ ꓖꓶꓽ ꓜꓽ ꓠꓯꓹ ꓟ ꓥ ꓐꓭ= ꓝꓮꓲ ꓕꓲ ꓙꓰꓽ ꓠꓬ ꓠ-ꓑ-ꓡ ꓠꓬ ꓮ ꓘꓶꓸ ꓐꓳˍ ꓟ ꓑꓶꓸ ꓓꓴ ꓓ-ꓪꓴ ꓓꓰꓽˍ ꓟ ꓠꓬ ꓬꓲ ꓐꓱ ꓶ ꓢ ꓢˍ ꓥ ꓡꓳ= ꓝꓮꓲ ꓓ-ꓪꓵ ꓐꓰ ꓬꓲ ꓟꓯꓼ ꓕꓲ ꓜꓴ ꓠꓬ ꓠ-ꓑ-ꓡꓷ ꓐꓴ ꓔꓬ ꓟ ꓟꓵꓽ ꓔꓯ ꓗꓽ ꓙ ꓔꓬ ꓢꓴ ꓐꓴ ꓔꓯ ꓮ ꓡꓲ ꓐ ꓡˍ ꓮ ꓡꓲ ꓬꓰ ꓙ ꓖꓶ ꓠꓹ ꓟ ꓬꓲ ꓔꓯ ꓶꓻ ꓙꓳˍ ꓟ ꓥ ꓡꓳ=

ꓠꓲꓹ ꓟ ꓮ ꓘꓶꓸ ꓦꓶ ꓡꓰ ꓟ ꓓ-ꓪꓵ ꓠꓬ ꓠ-ꓑ-ꓡꓷ ꓔꓯ ꓟꓸ ꓙꓽ ꓠꓹ ꓟ ꓐꓱ ꓶ ꓬꓲ ꓡ ꓞꓳ 400 ꓐꓰ ꓕꓲ ꓪ ꓬꓲ ꓪ ꓔꓬ ꓗꓪ ꓡ ꓔꓬ ꓕꓯ꓾ ꓠ-ꓑ-ꓡꓷ ꓬꓲ ꓚꓳ ꓑꓸ ꓕꓲ ꓣꓳ ꓠꓬ ꓠ-ꓑ-ꓡꓷ ꓤ ꓟꓶ ꓮ-ꓐꓲ-ꓗꓷ ꓔꓬ ꓗꓪ ꓙꓰ ꓢꓲ ꓬꓲ ꓤ ꓖꓴ ꓬꓰ ꓗꓷ ꓟ ꓮ ꓙꓵꓽ ꓐꓰ ꓓ-ꓪꓵ ꓡꓰ ꓬꓲ ꓪ ꓮ ꓣꓳ ꓮ ꓛꓵꓼ ꓔꓯ ꓮ ꓡꓰ ꓡꓳꓸ ꓙ ꓖꓶ ꓡˍ ꓟ ꓔꓯ ꓐꓯ ꓟꓸ ꓖꓶ ꓗꓷꓳ=

ꓖꓳ ꓕꓯ ꓮ-ꓐꓲ-ꓗꓷ ꓠꓬ ꓞꓼ ꓐꓰ ꓓ-ꓪꓵ ꓐꓰ ꓬꓲ ꓡ ꓞꓳ ꓐꓴ ꓐꓱ ꓶ ꓜꓽ ꓓꓴ꓾ ꓓꓳ ꓓꓴ꓾ ꓡꓯꓼ ꓫꓴ ꓙꓽ ꓢꓲ ꓖꓶ ꓕꓳꓽ ꓡ ꓟꓴꓽ ꓕꓯꓽ ꓢꓲ ꓚꓰꓹ ꓗꓷ ꓢꓲ ꓠꓬꓲ꓾ ꓬꓲ ꓚꓳ ꓑꓸ ꓐꓴ ꓔꓯ “ꓠꓴ ꓪ ꓟꓲ ꓙꓬꓽ ꓙꓰ= ꓥꓪ ꓠꓽ ꓗ ꓠꓯꓸ ꓢꓲ ꓗꓪ ꓐꓰ ꓡˍ ꓥꓳ” ꓐꓰ ꓐꓯ ꓖꓶˍ ꓡꓳ= ꓠ-ꓑ-ꓡꓷ ꓔꓯ ꓠꓬ ꓮ ꓫꓵꓽˍ ꓟꓲ ꓟꓽ ꓐꓯ ꓖꓶ꓾ ꓬꓰ ꓙꓲꓽ ꓙꓳˍ ꓟ ꓮ ꓙꓵꓽ ꓬꓰ ꓢꓲ ꓓꓳꓻ ꓙꓰ ꓗꓷꓳ=

ꓖꓳ ꓕꓲ ꓙꓵꓹ ꓕꓯ ꓠ-ꓑ-ꓡꓷ ꓐꓰ ꓬꓲ ꓦꓲ ꓗꓪ ꓙꓳˍ ꓟ ꓞꓳ ꓒꓸ ꓤ ꓐꓴ ꓕꓲ ꓣꓳˍ ꓟꓲ ꓟꓽ ꓜꓰꓺ ꓡꓰ ꓝꓲ꓾ ꓮ ꓙꓵꓽ ꓢꓰꓼ ꓗꓷˍ ꓥꓳ꓾ ꓐꓯ ꓢꓲ ꓠꓲꓹ ꓟ ꓦꓶꓻ ꓠꓬꓲ ꓡ ꓔꓬ ꓟ ꓓ-ꓪꓵ ꓐꓰ꓾ ꓓ-ꓪꓵ ꓐꓴ ꓔꓯ ꓫꓱꓸ ꓤ ꓠꓹ ꓟ ꓓꓰꓽ ꓠꓹ ꓟ ꓡꓯꓼ ꓫꓴ ꓔꓯꓹ ꓢꓲ ꓡ ꓔꓬ ꓟ ꓮ-ꓐꓲ-ꓗꓷ ꓠꓬ ꓪ ꓚꓲ ꓕꓲ ꓖꓻ ꓗꓪ ꓟꓳꓻ ꓡꓯ ꓘꓳ ꓡꓰꓳ=

ꓖꓳ ꓡꓱ ꓠꓬꓲ ꓓ-ꓪꓵ ꓔꓯ ꓟꓳꓻ ꓡꓰ ꓕꓯ ꓮ-ꓐꓲ-ꓗꓷ ꓠꓬ ꓞꓼ ꓐꓰ ꓕꓳꓽ ꓡ ꓟꓴꓽ ꓗꓪ ꓐꓰ ꓬꓯꓼ ꓡ ꓢꓲ ꓠꓬꓲ ꓓ-ꓪꓵ ꓟꓲ ꓙꓬꓽ ꓗꓪ ꓟꓳꓼ ꓡꓰꓳ= ꓕꓱ ꓗꓪ ꓮ-ꓐꓲ-ꓗꓷ ꓠꓬ ꓖꓳ ꓘꓶꓸ ꓛꓲ ꓟꓽ ꓐꓲꓻ ꓕꓯ ꓠꓽ꓾ ꓠꓲꓹ ꓟ ꓮ ꓘꓶꓸ ꓦꓶ ꓔꓬ ꓟ ꓓ-ꓪꓵ ꓠꓬ ꓬꓲ ꓙꓰ ꓔꓬ ꓟ ꓙꓻ ꓖꓴ ꓗꓪ ꓗꓽ ꓔꓬ ꓟ ꓤ ꓟꓶ ꓤ ꓔꓯ ꓢꓰꓼ ꓗꓷ ꓢꓲ ꓙ ꓙꓰˍ ꓥ ꓟꓽ ꓢꓷꓸ ꓐꓰ ꓓꓵꓽ ꓙ ꓟꓶ ꓓꓴ ꓥꓳ= ꓖꓳ ꓡꓱ ꓥ ꓟꓲ ꓬꓲ ꓪꓴꓸ ꓕꓯ ꓐꓯ ꓔ ꓟ ꓡꓰ ꓐꓰ ꓮ-ꓐꓲ-ꓗꓷ ꓠꓬ ꓒꓬꓱꓽ ꓮ ꓘꓶꓸ ꓐꓲˍ ꓟ ꓑꓶꓸ ꓓꓴ ꓮ-ꓐꓲ-ꓗꓷ ꓔꓯ ꓠ ꓠꓹ ꓡꓳ꓾ ꓐꓰ ꓐꓯ ꓓꓹ ꓡꓳ=

ꓮ-ꓐꓲ-ꓗꓷ ꓠꓬ ꓟꓳꓼ ꓔ ꓢꓲ ꓠꓬꓲ ꓓ-ꓪꓵ ꓔꓯ “ꓥꓪ ꓢꓲꓺ ꓒꓽꓳ꓾ ꓠꓴ ꓔꓯ ꓛꓬ ꓗꓷ ꓟ ꓛꓬ ꓒꓵꓽ ꓠꓬ ꓥꓪ ꓟꓯꓻ ꓛꓵˍ ꓡꓳ= ꓠꓴ ꓚꓳ ꓟ ꓥꓪ ꓫ ꓕꓱ ꓘꓶꓽ ꓔꓯ ꓠ ꓠꓹ ꓖꓶ ꓡꓯ= ꓞꓳ ꓥꓶ ꓠ-ꓑ-ꓡꓷ ꓐꓯ ꓘꓶꓽ ꓔꓯ ꓠꓴ ꓠꓲꓹ ꓟ ꓗꓪ ꓕꓽ ꓗꓷ ꓔ= ꓬꓲ ꓟꓬꓱ ꓠꓬ ꓠ-ꓑ-ꓡꓷ ꓥ ꓟˍ ꓡꓰ ꓐꓰ ꓬꓲ ꓠꓽ ꓚꓵ ꓚꓵ ꓞꓳ ꓙꓲꓽ ꓞꓳ ꓥꓶ ꓕꓲ ꓣꓳ ꓥ ꓡꓳ=

ꓚꓵ ꓚꓵ ꓠꓴ ꓡꓰ ꓝꓲ ꓩꓴ ꓗꓷ ꓢꓴ ꓐꓴ ꓠꓬ ꓥꓪ ꓐꓰ ꓟꓽ ꓟꓳꓻ ꓡꓯ ꓘꓳ ꓡꓰ ꓠꓬꓲ ꓕꓱ ꓡꓱ ꓫꓵꓽ ꓒꓬꓱꓼ ꓡ ꓗꓷ ꓟ ꓥꓳ= ꓮ ꓟꓶ ꓪꓴ-ꓢ ꓠꓬ ꓥꓪ ꓢꓲ ꓒꓽ ꓠꓴ ꓡꓯꓹ ꓒꓯꓹ ꓗꓪ ꓐꓰ ꓫꓵꓽ ꓧꓳꓸ ꓡꓰˍ ꓟ ꓝꓴꓲꓸ ꓟꓽ ꓬꓰ ꓪ ꓡꓰ ꓠꓹ ꓟ ꓪꓴ-ꓢ ꓡꓰ ꓗꓽ ꓠꓲꓹ ꓫꓵˍ ꓡꓳ= ꓥꓪ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓗꓪ ꓐꓰ ꓪꓵꓼ ꓙꓱꓽˍ ꓠꓬꓲ꓾ ꓠꓴ ꓔꓯ ꓛꓴꓽ ꓙꓳ ꓢꓴ ꓮ ꓙꓵꓽ ꓠꓬ ꓠ-ꓑ-ꓡꓷ ꓡꓰ ꓐꓰ ꓗꓷ ꓡꓰ ꓝꓲ= ꓠꓴ ꓚꓳ ꓟ ꓥꓪ ꓡꓰ ꓔꓯꓹ ꓖꓶ ꓡˍ ꓟ ꓡꓯꓼ ꓫꓴ ꓔꓯ ꓘꓳ ꓣꓴ ꓖꓶ ꓢꓲ ꓠꓴ ꓔꓯ ꓛꓳ ꓞꓹ ꓢꓴ ꓐꓴ ꓔꓯ ꓖꓶ=

ꓥꓪ ꓢꓲ ꓒꓽꓳ꓾ ꓠꓴ ꓚꓳ ꓟ ꓥꓪ ꓛꓬ ꓖꓴ ꓥꓳꓽ ꓖꓴ ꓖꓽ ꓖꓶ ꓡꓯ= ꓠꓴ ꓠꓬ ꓪꓴ-ꓢ ꓟꓯꓼ ꓘꓶ ꓗꓪ ꓬꓲ ꓐꓱ ꓶ ꓓꓶꓽ ꓗꓷ ꓠꓬꓲ꓾ ꓠꓴ ꓗꓴꓷꓼ ꓠꓽ ꓬꓲ ꓑꓶꓸ ꓟꓽ ꓞꓷꓹ ꓗꓷ= ꓠꓴ ꓕꓲ ꓤꓶꓻ ꓡꓱꓸꓼ ꓗꓪ ꓛꓬ ꓖꓴ ꓥꓳꓽ ꓖꓴ ꓕꓽ ꓙꓳ ꓝꓲ= ꓛꓴꓽ ꓙꓳ ꓢꓴ ꓡꓰ ꓠꓴ ꓢꓯꓼ ꓟꓬ ꓔꓯ ꓧꓪ ꓡˍ ꓟꓲ꓾ ꓡ ꓞꓳ ꓕꓲ ꓣꓳ ꓡꓰ ꓮ ꓓꓲꓽ ꓒꓵꓽˍ ꓟ ꓖꓴꓽ ꓙꓴꓽ ꓔꓯ ꓫ ꓔ ꓟˍ ꓡꓰ ꓐꓰ꓾ ꓪꓴ-ꓢ ꓡꓰ ꓠꓴ ꓔꓯ ꓫꓺ ꓚꓵ ꓔ ꓥꓳ=   

ꓪꓴ-ꓢ ꓡꓰ ꓙ ꓟꓳ ꓗꓷ ꓟˍ ꓡꓰ ꓐꓰ꓾ ꓥꓪ ꓢꓲ ꓒ ꓠꓴ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓙꓵꓽ ꓢꓴ ꓒꓬꓱꓼ ꓡ ꓕꓲꓽ ꓠꓬꓲ ꓗꓪ꓾ ꓠꓴ ꓠꓬ ꓢꓴ ꓔꓯ ꓪꓽ ꓛꓴꓽ ꓚꓱꓹ ꓢꓲ ꓢꓰꓼ ꓗꓷꓳ꓾ ꓐꓰ ꓠꓴ ꓦꓰꓼ ꓠꓲꓹ ꓡꓰ ꓠꓴ ꓔꓯ ꓕꓼ ꓓꓴ ꓕꓽ ꓙꓳ ꓝꓲ= ꓖꓳ ꓡꓱ ꓢꓲ ꓥꓪ ꓢꓲ ꓒ ꓠꓴ ꓔꓯ ꓪꓴ-ꓢ ꓡꓰ ꓶꓼ ꓛꓳ ꓝꓲˍ ꓕꓯ꓾ ꓠꓴ ꓚꓳ ꓟ ꓥꓪ ꓔꓯ ꓕꓽ ꓟꓲ ꓡꓰ ꓝꓲ꓾ ꓐꓯˍ ꓡꓳ= ꓮ-ꓐꓲ-ꓗꓷ ꓡꓰ ꓢꓷꓸ ꓠꓲꓹ ꓙꓳ ꓙꓳ ꓡꓰ ꓐꓯ ꓖꓶ ꓡ ꓟ ꓔꓯ ꓓ-ꓪꓵ ꓑ ꓙꓽ ꓡꓰ ꓕꓯ ꓓ-ꓪꓵ ꓡꓰ ꓬꓲ ꓔꓯ ꓫꓸ ꓟꓳ ꓖꓶˍ ꓜꓳꓽ=

“ꓠꓬꓲꓸ ꓠꓬꓲ ꓥꓪ ꓐꓰ ꓜꓲꓻ ꓡꓯ ꓘꓳ ꓠꓹ ꓟ ꓠꓴꓻ ꓔꓯ ꓝꓲ ꓩꓴ ꓡ ꓢꓴ ꓪꓴ-ꓢ ꓔꓯ ꓫꓱꓸ ꓖꓶ= ꓥꓪ ꓔꓯ ꓚꓲꓸ ꓛꓬ ꓡꓰ ꓝꓴꓲꓸ ꓟꓽ ꓬꓰ ꓪ ꓠꓹ ꓟ ꓠꓴ ꓕꓱ ꓡꓱ ꓓꓵꓽ ꓙ ꓗꓴꓸ ꓢꓲ ꓘꓶꓸ ꓖꓶ ꓡ ꓠꓬꓲ꓾ ꓠꓴ ꓠꓬ ꓶꓼ ꓙꓳ ꓫꓱꓹ ꓙꓳ ꓝꓲ= ꓟꓽ ꓥ ꓠꓬ ꓢ ꓠꓯ ꓠꓯꓼ ꓕꓯ ꓠꓽ ꓠ-ꓑ-ꓡꓷ ꓦꓲ ꓗꓪ ꓟ ꓞꓳ ꓑꓸ ꓤ ꓕꓲ ꓣꓳˍ ꓟꓲ ꓟꓽ ꓜꓰꓻ ꓡꓰꓳ꓾ ꓐꓰ ꓒꓳꓹ ꓖꓶˍ ꓡꓳ= ꓮ-ꓐꓲ-ꓗꓷ ꓡꓰ ꓔꓯꓹ ꓡ ꓟ ꓡꓯꓼ ꓫꓴ ꓘꓳ ꓣꓴ ꓗꓷ ꓢꓲ꓾ꓧꓪꓸ ꓧꓪꓸˍ ꓬꓲꓼ ꓙꓰ= ꓥꓪ ꓠꓬ ꓠꓴ ꓐꓯ ꓘꓶ ꓔꓯ ꓠ ꓠꓹ ꓢꓲ꓾ ꓠꓴ ꓓꓰꓽˍ ꓟ ꓔꓯ ꓓꓽ ꓔꓳꓹ ꓗꓷꓳ꓾ ꓐꓰ ꓐꓯ ꓖꓶˍ ꓡꓳ= ꓓ-ꓪꓵ ꓐꓰ ꓟꓳꓻ ꓡꓰ ꓗ ꓠꓯꓸ ꓮ-ꓐꓲ-ꓗꓷ ꓦꓲ ꓗꓪ ꓛꓲ ꓬꓰˍ ꓕꓯ ꓬꓲ ꓤ ꓖꓴ ꓠ-ꓑ-ꓡꓷ ꓠꓬ ꓪ ꓔꓲ ꓕꓲ ꓣꓳˍ ꓡꓰ ꓐꓰ ꓜꓽ ꓫꓳ ꓢꓲ꓾ ꓜꓽ ꓬꓲꓼ ꓓꓳ ꓬꓲꓼ ꓡꓰ ꓢꓲ ꓗꓹ ꓛꓲ ꓔꓬ ꓠꓬꓲ ꓗ ꓠꓯꓸ ꓠꓯꓼ ꓗꓪ ꓛꓲ ꓬꓲ ꓔꓯ ꓮ ꓫꓵꓽˍ ꓟꓲ ꓟꓽ ꓐꓯ ꓖꓶ ꓗꓷ=

ꓟꓲ ꓕꓯ ꓙꓲ ꓡˍ ꓕꓯ ꓮ-ꓐꓲ-ꓗꓷ ꓠꓬ ꓮ ꓟꓰ ꓕꓯ ꓒꓬꓱꓼ ꓗꓷ ꓟ ꓫꓵꓽ ꓪꓴ ꓮ ꓙꓵꓽ ꓐꓯ ꓟꓳꓸ ꓖꓶ ꓗꓷ ꓕꓯ ꓠ-ꓑ-ꓡꓷ ꓠꓬ ꓧꓪꓸ ꓛꓲꓽ ꓧꓪꓸ ꓟꓽ ꓛꓲ ꓗꓷ ꓢꓲ ꓛꓲ ꓫꓵꓻ ꓡꓯꓼ ꓫꓵꓻ ꓠꓬꓲ ꓓꓳꓽ ꓡꓰꓳ= ꓮꓽ ꓡ ꓞꓲ ꓠꓬꓲ ꓛꓲ ꓗꓳꓸ ꓗꓷ ꓠꓬ ꓠ-ꓑ-ꓡꓷ ꓫꓵꓳ=

ꓠ-ꓑ-ꓡꓷ ꓫꓵꓻ ꓟ ꓓꓳꓽ ꓑ ꓙꓽ ꓡꓰ ꓕꓯ ꓓ-ꓪꓵ ꓠꓬ ꓮ-ꓐꓲ-ꓗꓷ ꓔꓯ ꓬꓲ ꓔꓬ ꓗꓪ ꓘꓴꓻ ꓔꓯꓹ ꓡ ꓢꓲ ꓮ-ꓐꓲ-ꓗꓷ ꓠꓬ ꓬꓲ ꓤ ꓟꓶ ꓒꓬꓱꓼ ꓡꓺ ꓗꓷꓳ=