ꓮ-ꓓꓯ ꓐꓰ ꓰ-ꓪ ꓟꓸ ꓟꓲꓽ

ꓪꓴ-ꓢ ꓡꓰ ꓟꓲ ꓠꓯ ꓔꓯ ꓚꓰꓼˍ ꓕꓯ ꓟꓲꓽ ꓟꓲ꓾ ꓦ ꓐ ꓐꓰ ꓗꓴ ꓤ ꓐꓴ ꓔꓯ ꓚꓰꓼˍ ꓡꓳ= ꓬꓲꓻ ꓙꓬ ꓔꓯ ꓠꓬ ꓟꓵꓽ ꓐꓰ ꓗꓷꓹ ꓞꓹ ꓝꓲˍ ꓡꓳ= ꓪ ꓚꓲ ꓔꓯ ꓒꓬꓱꓼ ꓡꓻ ꓝꓲꓳ= ꓬꓲ ꓠꓬ ꓟꓳꓼ ꓤ ꓫꓵꓸ ꓤ꓾ ꓬꓲ ꓜꓲ ꓬꓲ ꓫꓵꓽ ꓬꓲ ꓙꓰꓽ ꓐꓰ ꓢꓲꓹ ꓪꓰ ꓐꓴ ꓔꓯ ꓚꓰꓼ ꓗꓷꓳ=

ꓙꓱꓽ ꓤ ꓪꓴꓽ ꓪꓴꓽ ꓣꓳ ꓣꓳ ꓔꓯˍ ꓟꓲ ꓚꓰꓼ ꓗꓷꓳ= ꓬꓲꓻ ꓙꓬ ꓘꓴꓽ ꓗꓪ ꓢꓯꓸ ꓔꓬ ꓐ ꓡˍ ꓟ ꓥꓪꓸ ꓐꓴ꓾ ꓟꓵꓽ ꓪꓴ ꓗꓪ ꓐꓬꓱꓻ ꓐ ꓡˍ ꓟ ꓠꓬ ꓐꓴ ꓔꓯ ꓚꓰꓼ ꓗꓷꓳ= ꓬꓲ ꓠꓬ ꓐꓶꓻ ꓓꓲ ꓡꓯꓹ ꓓꓲ ꓐꓴ ꓔꓯˍ ꓟꓲ ꓚꓰꓼ ꓗꓷꓳ= ꓬꓲ ꓚꓰꓼ ꓔ ꓟ ꓠꓬ ꓙꓲˍ ꓟ ꓔꓯ ꓟꓳ ꓡꓰ ꓠꓬꓲ ꓪꓴ-ꓢ ꓠꓬ ꓮ ꓘꓶꓸ ꓠꓲꓹ ꓒꓴˍ ꓡꓳ= ꓕꓱ ꓟꓬ ꓫꓵꓽ ꓚꓰꓼ ꓗꓷ ꓗ ꓠꓯꓸꓼ ꓠꓬ ꓬꓲ ꓡꓰ ꓬꓲ ꓚꓰꓼ ꓔ ꓟ ꓮ ꓙꓵꓽ ꓔꓯ ꓙꓵꓽ ꓢꓴ ꓕꓲ ꓣꓳ ꓣꓱꓽ ꓞꓹ ꓟ ꓔꓯ ꓓꓵꓽ ꓙ ꓛꓲꓺ ꓡˍ ꓡꓳ= ꓗ ꓠꓯꓸ ꓬꓲ ꓠꓬ ꓠꓱꓸ ꓦꓱꓽ ꓗꓪ ꓐꓰ ꓬꓲ ꓪꓴꓸ ꓓꓽ ꓪꓴꓸ ꓟ ꓡ ꓞꓳ ꓕꓲ ꓣꓳ ꓔꓯ ꓚꓰꓼ ꓗꓷꓳ= ꓚꓰꓼ ꓗꓷ ꓠꓬ ꓬꓲ ꓖꓳ ꓓꓱꓽ ꓗꓪ ꓢꓯꓼ ꓦ ꓧꓳꓽ ꓖꓶ ꓗꓷ ꓠꓬ ꓞꓳ ꓢꓯꓸ ꓒꓬꓱꓼ ꓡ ꓢꓲ ꓬꓲ ꓔꓯ ꓠꓬ ꓮ-ꓓꓯ ꓐꓰ ꓟꓬꓱ ꓖꓶˍ ꓡꓳ=

ꓝꓮꓲ ꓠꓬ ꓪꓴ-ꓢ ꓡꓰ ꓬꓲ-ꓓꓰ ꓐꓱ ꓕꓲ ꓐꓱ ꓫꓬꓹ ꓢꓲ꓾ ꓬꓲ ꓡꓰ ꓚꓰꓼ ꓔ ꓟ ꓡ ꓞꓳ ꓔꓯ ꓖꓳ ꓗꓪ ꓔꓬ ꓝꓲˍ ꓡꓳ= ꓠꓴ ꓠꓬ ꓥꓪ ꓐꓱ ꓥ ꓟ ꓬꓲ-ꓓꓰ ꓐꓱ ꓗꓪ ꓔꓬ ꓡꓳ= ꓥꓪ ꓠꓽ ꓠꓴ ꓔꓯ ꓚꓰꓼ ꓢꓴ ꓢꓲꓺ ꓒ ꓥꓳ= ꓠꓴ ꓕꓲ ꓤꓶꓻ ꓡꓱꓸꓼ ꓥꓪ ꓐꓱ ꓗꓪ ꓔꓬ ꓛꓵˍ ꓡꓳ= ꓠꓴ ꓐꓱ ꓶ ꓥꓪ ꓚꓰꓼ ꓔ ꓖꓶˍ ꓟ ꓮ ꓙꓵꓽ ꓔꓯ ꓠꓴ ꓠꓲꓹ ꓒꓴˍ ꓥꓳ= ꓠꓴ ꓔꓯ ꓠꓽ ꓥꓪ ꓒꓬꓱˍ ꓡꓰ ꓐꓰ ꓚꓰꓼ ꓔ ꓟ ꓥ ꓡꓳ= ꓟꓲ ꓠꓯ ꓗꓪ ꓥꓪ ꓚꓰꓼ ꓔ ꓟ ꓮ ꓙꓵꓽ ꓔꓯ ꓙꓵꓽ ꓠꓹ ꓟ ꓠꓴ ꓔꓯ ꓙꓵꓽ ꓪ ꓙꓳˍ ꓡꓳ= ꓠꓴ ꓠꓬ ꓮ ꓙꓵꓽ ꓟ ꓬꓲ ꓢꓲꓺ ꓒ ꓥ ꓢꓲ ꓠꓴ ꓡꓰ ꓕꓱ ꓟ ꓮ ꓙꓵꓽ ꓔꓯ ꓙꓵꓽ ꓠꓹ ꓟ ꓥ ꓡꓳ= ꓕꓱ ꓟ ꓠꓽ ꓥꓪ ꓠꓲꓹ ꓡꓶꓽ ꓥꓳ=

ꓥꓪ ꓐꓱ ꓗꓪ ꓠꓬ ꓡꓳꓸ ꓐꓲꓻˍ ꓟ ꓐꓰ ꓜꓽ ꓙꓲˍ ꓟ ꓢꓶꓹ ꓢꓶꓽ ꓬꓲꓸ ꓫꓵꓽ ꓬꓲ ꓙꓰꓽ ꓐꓲ ꓓꓹ ꓡꓳ= ꓕꓱ ꓟ ꓮ ꓙꓵꓽ ꓔꓯ ꓠꓴ ꓜꓽ ꓓꓹ ꓟ ꓥꓳ= ꓖꓳ ꓡꓱ ꓥˍ ꓟꓲ ꓐꓱ ꓔꓱ ꓦꓲ ꓗꓪ ꓙꓲˍ ꓟ ꓐꓰ ꓥꓶˍ ꓟ ꓔꓯ ꓦꓰꓽ ꓗꓴˍ ꓟ ꓢꓷꓸ ꓠꓲꓹ ꓢꓲꓹ ꓜꓲ ꓗꓪ ꓟ ꓢꓲꓹ ꓢꓶꓽ ꓔꓯ ꓠꓬ ꓜꓽ ꓟꓽ ꓓ= ꓕꓱ ꓟ ꓔꓯ ꓜꓽ ꓗꓷ ꓠꓬ ꓫꓵꓻˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓪꓴ-ꓢ ꓡꓰ ꓢꓲꓹ ꓜꓲ꓾ ꓬꓲ ꓜꓲ꓾ ꓙꓱꓽ ꓤ ꓐꓰ ꓠꓬꓹ ꓤ ꓮ ꓙꓵꓽ ꓔꓯ ꓚꓰꓼ ꓗꓷˍ ꓥ ꓟꓲ ꓬꓲ ꓪ ꓐꓴ ꓔꓯ ꓟꓬꓱ ꓟꓽ ꓖꓶꓽ ꓔ= ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓮ-ꓓꓯ ꓔꓯ ꓟꓬꓱ ꓟꓬꓱ ꓖꓶ ꓝꓲˍ ꓡꓳ= ꓮ-ꓓꓯ ꓥˍ ꓟꓲ ꓕꓱ ꓟ ꓮ ꓙꓵꓽ ꓔꓯ ꓟꓬꓱꓺ ꓟꓬꓱ ꓖꓶˍ ꓡꓳ= ꓮ ꓙꓵꓽ ꓠꓬ ꓬꓲ ꓙꓱꓻ ꓬꓲ ꓙꓱꓻ ꓙꓳˍ ꓥ ꓟꓲ ꓮ-ꓓꓯ ꓐꓱ ꓶ ꓠꓬ ꓛꓳ ꓒꓯꓹ ꓟꓽ ꓙꓳ ꓟ ꓪꓴꓸ ꓠꓬꓲ ꓪꓴ-ꓢ ꓠꓬ ꓮ-ꓓꓯ ꓐꓱ ꓶ ꓤ ꓟꓶ ꓤ ꓕꓲ ꓣꓳ ꓚꓰꓼˍ ꓡꓳ= ꓕꓲ ꓠꓬꓲ ꓗꓪ ꓮ-ꓓꓯ ꓬꓲꓼ ꓟꓶ ꓔꓬ ꓕꓯ ꓪꓴ-ꓢ ꓠꓬ ꓮ-ꓓꓯ ꓠꓱ ꓖꓴ ꓕꓲ ꓛꓲ ꓣꓴ ꓢꓲ ꓰ-ꓪ ꓔꓯ ꓚꓰꓼˍ ꓡꓳ=

ꓪꓴ-ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓟ ꓕꓯ ꓢꓲ ꓗꓪ ꓩꓴꓻ ꓠꓬ ꓠꓲꓹ ꓖꓳꓼ ꓓꓰ ꓡꓰ ꓢꓴ ꓥ ꓡꓳ= ꓖꓳ ꓡꓱ ꓠꓬꓲ ꓩꓴꓻ ꓡꓰ ꓤ ꓟꓶ ꓤ ꓔꓯ ꓪꓴ-ꓢ ꓡꓰ ꓜꓽ ꓟꓽ ꓓ ꓐꓯ ꓔ ꓟ ꓢꓲꓹ ꓢꓶꓽ ꓜꓽ ꓠꓹ ꓟ ꓐꓯ ꓖꓶˍ ꓡꓳ= ꓢꓲꓹ ꓢꓶꓽ ꓕꓱ ꓟ ꓜꓽ ꓗꓷ ꓠꓬ ꓠꓴ ꓪ ꓟꓽ ꓫꓵꓻ ꓡ= ꓕꓱ ꓟ ꓔꓯ ꓜꓽ ꓗꓷ ꓕꓯ ꓠꓽ ꓠꓴ ꓪ ꓠꓬ ꓪꓴ-ꓢˍ ꓡꓰ ꓐꓰ ꓒꓬꓱꓼ ꓡ ꓥꓳ꓾ ꓙꓲˍ ꓟ ꓐꓰ ꓟꓽ ꓙꓲꓻ ꓟ ꓔꓯˍ ꓟꓲ ꓦꓰꓽ ꓗꓴˍ ꓟ ꓢꓷꓸ ꓠꓲꓹ ꓙꓳ ꓡ ꓥꓳ= ꓕꓱ ꓟ ꓔꓯ ꓪꓴ-ꓢ ꓢꓷˍ ꓠꓬꓲ ꓠꓴ ꓪ ꓔꓯ ꓟꓽ ꓙ ꓝꓲ ꓟ ꓥꓳ꓾ ꓐꓰ ꓐꓯ ꓖꓶˍ ꓡꓳ= ꓩꓴꓻ ꓐꓯˍ ꓟ ꓔꓯ ꓑ ꓙ ꓡꓰ ꓕꓯ ꓤ ꓟꓶ ꓤ ꓠꓽ ꓪꓴ-ꓢ ꓡꓰ ꓜꓽ ꓟꓽ ꓓ ꓐꓯ ꓔ ꓟ ꓢꓲꓹ ꓢꓶꓽ ꓔꓯ ꓧꓼ ꓜꓽ ꓗꓷ ꓢꓲ ꓬꓲ ꓤ ꓖꓴ ꓔꓯˍ ꓟꓲ ꓖꓶꓽ ꓜꓽˍ ꓡꓳ= ꓬꓲ ꓪ ꓠꓬꓲꓽ ꓣꓳ ꓢꓲꓹ ꓢꓶꓽ ꓜꓽ ꓓꓳ ꓡꓰ ꓕꓯ ꓬꓲ ꓪ ꓖꓳ ꓓꓱꓽ ꓗꓪ ꓙꓬꓽ ꓡꓯꓽ ꓡꓯꓽ ꓗꓹ ꓟ ꓚꓬꓹ ꓪ ꓡꓰ ꓠꓬꓲ ꓫꓸ ꓔꓳ ꓡꓰꓳ= ꓖꓳ ꓡꓱ ꓠꓬꓲ ꓬꓲ ꓪ ꓖꓳ ꓓꓱꓽ ꓔꓯ ꓑꓲꓸ ꓠꓹ ꓟ ꓬꓰˍ ꓡꓳ=

ꓖꓳ ꓕꓲ ꓠꓬꓲ ꓟꓶꓽ ꓘꓶꓽ ꓝꓲ ꓗꓪ ꓪꓴ-ꓢ ꓡꓰ ꓐꓱ ꓗꓪ ꓡˍ ꓟ ꓢꓯꓼ ꓑ ꓙꓽˍ ꓕꓯ ꓮ-ꓓꓯ ꓐꓰ ꓰ-ꓪ ꓠꓽ ꓢꓲꓹ ꓑꓳ ꓗꓳ ꓡꓳ ꓗꓪ ꓑꓬ ꓙꓰˍ ꓡꓳ= ꓖꓳ ꓕꓯ ꓪꓴ-ꓢ ꓡꓰ ꓮ-ꓓꓯꓳ ꓠꓴ ꓮ ꓡꓰ ꓗꓪ ꓔꓬ ꓡ? ꓰ-ꓪ ꓳ ꓠꓴ ꓮ ꓫꓵꓽ ꓪꓴꓸ ꓠꓬꓲ ꓥꓪ ꓔꓯ ꓑꓬ ꓔꓬ ꓡ? ꓠ ꓠꓬꓲˍ ꓕꓯ ꓬꓲ ꓪ ꓡꓰ ꓪꓴ-ꓢꓺꓳ ꓥꓪ ꓠꓴꓽ ꓠꓽ ꓙꓬꓽ ꓡꓯꓽ ꓡꓯꓽ ꓓꓹ ꓠꓬꓲ ꓑꓲꓸ ꓔꓬ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ= ꓠꓴ ꓪ ꓙꓬꓽ ꓡꓯꓽ ꓡꓯꓽ ꓓꓹ ꓟ ꓠꓴ ꓪ ꓔꓯ ꓮ ꓡꓲ ꓟ ꓡꓰ ꓐꓯ ꓖꓶ ꓡˍ ꓡ? ꓠꓴ ꓪ ꓠꓽ ꓧꓶꓸ ꓕꓯꓽ ꓡꓰ ꓙꓬꓽ ꓡꓯꓽ ꓡꓯꓽ ꓔꓬ ꓟ ꓥꓳ= ꓥꓪ ꓡꓰ ꓜꓽ ꓟꓽ ꓓ꓾ ꓕꓽ ꓜꓽ ꓐꓯ ꓟ ꓢꓲꓹ ꓢꓶꓽ ꓜꓲ ꓗꓪ ꓟ ꓢꓲꓹ ꓢꓶꓽ ꓔꓯ ꓠꓴ ꓪ ꓜꓽ ꓗꓷ ꓡ? ꓐꓰ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓮ-ꓓꓯ ꓡꓰ ꓪꓴ-ꓢꓺꓳ ꓥꓪ ꓔꓯ ꓰ-ꓪ ꓡꓰ ꓖꓶ ꓡ ꓠꓬꓲ ꓥꓪ ꓜꓽ ꓪ ꓡꓰꓳ꓾ ꓐꓯ ꓖꓶˍ ꓡꓳ= ꓰ-ꓪ ꓥˍ ꓟꓲ ꓥꓪ ꓔꓯ ꓩꓴꓻ ꓡꓰ ꓟꓸ ꓒꓬꓹ ꓡˍ ꓠꓬꓲ ꓥꓪˍ ꓟꓲ ꓜꓽ ꓪ ꓡꓰꓳ꓾ ꓐꓰ ꓪꓴ-ꓢ ꓔꓯ ꓐꓯ ꓖꓶˍ ꓡꓳ= 

ꓥꓪ ꓠꓽ ꓠꓴ ꓪ ꓣꓱꓽ ꓬꓯꓼˍ ꓟ ꓮ ꓙꓵꓽ ꓖꓶ ꓔꓸꓳ= ꓠꓴ ꓪ ꓠꓲꓹ ꓫꓵˍ ꓟ ꓮ ꓙꓵꓽ ꓐꓱ ꓗꓪ ꓐꓰ ꓠꓴ ꓪ ꓟꓶ ꓓꓹ ꓟ ꓥꓳ= ꓖꓳ ꓡꓱ ꓥˍ ꓟꓲ ꓠꓴ ꓪ ꓖꓼ ꓛꓳ ꓠꓹ ꓟ ꓒꓵꓽ ꓛꓳ ꓠꓹ ꓟ ꓙꓵꓽ ꓗ ꓕꓲ ꓟˍ ꓡꓰꓽ ꓠꓴ ꓪ ꓔꓯ ꓖꓶ ꓔ ꓟ ꓥꓳ= ꓖꓳ ꓡꓱ ꓥˍ ꓟꓲ ꓠꓴ ꓪ ꓟꓽ ꓠ ꓠꓹ= ꓩꓴꓻ ꓔꓯˍ ꓟꓲ ꓛꓬꓻ ꓒꓵꓽ ꓖꓶˍ ꓥꓳ= ꓕꓱ ꓡꓱ ꓐꓯ ꓟ ꓠꓬ ꓠꓴ ꓪ ꓛꓬꓻ ꓗꓷ ꓟ ꓗꓪ ꓐꓰ ꓡꓲꓹ ꓙꓰˍ ꓟ ꓟꓽ ꓥ= ꓢꓲꓹ ꓢꓶꓽ ꓔꓯ ꓕꓲ ꓧꓪꓹ ꓜꓽ ꓗꓷ ꓠꓬ ꓠꓴ ꓪ ꓕꓱ ꓗꓪ ꓔꓬꓹ ꓟꓽ ꓓꓻꓳ= ꓙꓲˍ ꓟ ꓐꓰ ꓟꓽ ꓙꓲꓻ ꓟ ꓔꓯ ꓠꓴ ꓪ ꓢꓷꓸ ꓡꓰꓳ= ꓥꓪ ꓐꓱ ꓗꓪ ꓐꓰ ꓠꓴ ꓪ ꓠꓲꓹ ꓞꓽ ꓙꓰ ꓨꓽ= ꓤꓰ ꓞꓹ ꓟ ꓠꓴ ꓪ ꓤꓶꓻ ꓔꓯ ꓟꓲ ꓠꓯ ꓗꓪ ꓡꓰꓽ ꓔꓬ ꓬꓰ= ꓠꓴ ꓤꓶꓻ ꓡꓱꓸꓼ ꓢꓯꓼ ꓕꓵꓼ ꓪꓴꓽ ꓧꓶꓽ ꓕꓯ ꓢꓲ ꓡꓰꓽ ꓟꓲ ꓠꓯ ꓗꓪ ꓐꓰ ꓟꓶ ꓜˍ ꓥꓳ= ꓠꓴ ꓔꓯ ꓠꓬ ꓠꓱꓸ ꓦꓱꓽ ꓣꓱ ꓢꓲ ꓑꓵꓹ ꓔ ꓟ ꓥ ꓠꓬꓲ꓾ ꓠꓴ ꓫꓵꓻ ꓕꓯ ꓠꓱꓸ ꓦꓱꓽ ꓗꓪ ꓚꓱꓹ ꓬꓲꓼ ꓙꓰ ꓠ ꓗꓷ ꓡꓰˍ ꓥꓳ꓾ ꓐꓰ ꓐꓯ ꓢꓲ ꓬꓲ-ꓓꓰ ꓐꓱ ꓗꓪ ꓐꓰ ꓖꓼ ꓓꓳ ꓗꓷˍ ꓡꓳ=

ꓮ-ꓓꓯ ꓐꓰ ꓰ-ꓪ ꓐꓴ ꓠꓬ ꓪꓴ-ꓢ ꓔꓯ ꓟꓽ ꓠ ꓡꓳꓹ ꓟ ꓪꓴꓸ ꓠꓬꓲ ꓬꓲ-ꓓꓰ ꓐꓱ ꓗꓪ ꓐꓰ ꓖꓼ ꓓꓳ ꓗꓷˍ ꓟ ꓟꓶ ꓗꓷꓳ= ꓮ ꓟꓶ ꓬꓲ ꓪ ꓠꓬ ꓜꓽ ꓓꓴ ꓐꓱ ꓶ ꓚꓵꓸ ꓓꓳ ꓢꓲ ꓟꓬꓱꓽ ꓬꓰ ꓠ ꓗꓷ ꓡꓰꓳ= ꓬꓲ ꓪ ꓜꓽ ꓓꓴ ꓐꓱ ꓶ ꓮ ꓘꓶꓸ ꓢꓯꓼ ꓕꓵꓼ ꓔꓬ ꓪˍ ꓡꓳ= ꓡꓳꓹ ꓬꓰˍ ꓗꓪ ꓬꓲ ꓪ ꓐꓴ ꓠꓬ ꓫꓵꓻꓳ= ꓬꓲ ꓪ ꓡꓰ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓗꓷ ꓕꓯ ꓠꓽ ꓗꓹ ꓛꓲˍ ꓟ ꓐꓱ ꓗꓪ ꓔꓬ ꓪˍ ꓟ ꓥ ꓡꓳ=