ꓱ-ꓢꓶ-ꓕꓱ ꓟꓸ ꓟꓲꓽ

ꓱ-ꓢꓶ-ꓕꓱ ꓟꓸ ꓟꓲꓽ ꓠꓬ ꓤ ꓟꓶ ꓤ ꓕꓲ ꓣꓳ ꓟꓬꓱꓺ ꓖꓶ ꓔ ꓟ ꓢꓲꓽ ꓫꓬ ꓕꓳꓽ ꓶ ꓠꓬꓲꓽ ꓑꓷꓠꓽ ꓟ ꓘꓴꓽ ꓗꓪ ꓕꓲ ꓑꓷꓠꓽ ꓥ ꓡꓳ= ꓝꓮꓲ ꓕꓲ ꓑꓷꓠꓽ ꓟ ꓠꓬ ꓣꓴ-ꓕꓱ ꓕꓳꓽ ꓶ ꓥ ꓡꓳ=

ꓱ-ꓢꓶ-ꓕꓱ ꓠꓬ ꓮ ꓠꓱ ꓕꓯ ꓬꓴ-ꓔ ꓡ ꓞꓳ ꓐꓴ ꓐ-ꓐꓲ-ꓡꓶ ꓗꓪ ꓚꓳ ꓑꓸ ꓬꓰ ꓗꓷ ꓗ ꓠꓯꓸ 100 ꓘꓳꓼ ꓟ ꓛꓲ ꓕꓯ ꓒ-ꓫ ꓟꓵꓽ ꓗꓪ ꓔꓬ ꓗꓷꓳ= ꓱ-ꓢꓶ-ꓕꓱ ꓬꓲ ꓦꓲ-ꓐꓱ ꓣꓴ ꓟꓬꓱꓺ ꓠꓬ ꓧ-ꓓꓯ-ꓢ ꓥ ꓢꓲ꓾ ꓱ-ꓢꓶ-ꓕꓱ ꓬꓲ ꓐꓹ ꓐ ꓟꓹ ꓟ ꓫꓵꓻ ꓗꓷ ꓗ ꓠꓯꓸ ꓬꓲ ꓔꓯ ꓬꓲ ꓮ ꓪꓳ ꓬꓲ ꓤ ꓟ-ꓓꓲ-ꓘꓷ ꓡꓰ ꓦꓵꓻ ꓔ ꓟ ꓥ ꓡꓳ=

ꓕꓲ ꓠꓬꓲ ꓙꓳˍ ꓕꓯ ꓒ-ꓫ ꓰꓟꓑꓲꓣꓰ ꓪ ꓔꓲ ꓱ-ꓧ-ꓫꓴ ꓡꓰ ꓑꓮꓲꓽ ꓓ ꓟ ꓕꓲ ꓑꓮꓲꓽ ꓬꓰˍ ꓡꓳ= ꓑꓮꓲ ꓓꓽ ꓟ ꓖꓳ ꓟ ꓔꓯ ꓫꓵꓽ ꓠꓬꓲ ꓬꓰˍ ꓡꓳ= ꓡꓳꓹ ꓬꓰˍ ꓕꓲ ꓠꓬꓲ꓾ ꓬꓲ ꓟꓶꓽ ꓕꓲ ꓠꓬꓲ ꓕꓯ ꓪ ꓔꓲ ꓠꓬ ꓬꓲ ꓔꓯ ꓣꓱꓽ ꓙ ꓢꓴ ꓐꓴ ꓔꓯ ꓪ ꓔꓲ ꓟ ꓮ ꓡꓰ ꓘꓶ ꓛꓲ ꓐꓲꓻˍ ꓟ ꓔꓯ ꓟꓳꓸ ꓖꓶ ꓠꓹ ꓟ ꓪ ꓔꓲ ꓟ ꓪ-ꓫꓵ-ꓕꓲ ꓔꓯ ꓔꓯ ꓘꓴˍ ꓡꓳ= ꓖꓳ ꓡꓱ ꓥˍ ꓟꓲ ꓪ ꓔꓲ ꓟ ꓪ-ꓫꓵ-ꓕꓲ ꓠꓬ ꓪ ꓔꓲ ꓔꓯ ꓟꓽ ꓡ= ꓖꓳ ꓕꓯ ꓪ ꓔꓲ ꓠꓬ ꓠꓲꓹ ꓟ ꓦꓶ ꓡꓰ ꓢꓲ ꓪ ꓔꓲ ꓟ ꓪ-ꓫꓵ-ꓕꓲ ꓔꓯ ꓬꓲ ꓟꓲ ꓙꓬ ꓗꓪ ꓕꓲ ꓞꓲꓼ ꓟꓽ ꓓꓳ ꓡ ꓠꓹ ꓟ ꓕꓵꓼ ꓪ ꓖꓶˍ ꓡꓳ=

ꓪ ꓔꓲ ꓟ ꓬꓲ ꓫꓵꓼ ꓧꓪ ꓠꓹ ꓟ ꓐꓱ ꓶ ꓪ ꓔꓲ ꓠꓬ ꓐꓲꓻ ꓔꓯꓺ ꓡꓯ ꓘꓳ ꓑꓮꓲꓽ ꓬꓰ ꓖꓶ ꓗꓷ ꓢꓲ ꓠꓬꓲ ꓱ-ꓢꓶ-ꓕꓱ ꓥˍ ꓟꓲ ꓪ ꓔꓲ ꓦꓲꓻ ꓐꓱ ꓶ ꓢꓲꓺ ꓔ ꓟ ꓟꓶ ꓗꓷꓳ= ꓬꓲ ꓮ ꓬꓲꓼ ꓥ ꓟ ꓟ-ꓓꓲ-ꓘꓷ ꓥˍ ꓟꓲ ꓪ ꓔꓲ ꓦꓲꓻ ꓗꓪ ꓟꓬꓱꓽ ꓕꓲ ꓟ ꓟꓶ ꓡꓰ ꓗꓷꓳ=

ꓱ-ꓢꓶ-ꓕꓱ ꓪ ꓔꓲ ꓟ ꓒꓬꓱꓼ ꓡ ꓗ ꓠꓯꓸ ꓟ-ꓓꓲ-ꓘꓷ ꓠꓬ ꓪ ꓔꓲ ꓔꓯ ꓢꓰꓼ ꓡ ꓢꓴ ꓔꓯ ꓐꓯ ꓟꓳꓸ ꓖꓶˍ ꓡꓳ= ꓬꓲ ꓠꓬ ꓪ ꓔꓲ ꓔꓯ ꓢꓰꓼ ꓡ ꓢꓴ ꓚꓱꓹ ꓔꓯ ꓱ-ꓢꓶ-ꓕꓱ ꓔꓯ ꓐꓯ ꓟꓳꓸ ꓖꓶ ꓗꓷ ꓢꓲ꓾ ꓪ ꓔꓲ ꓟ ꓠꓬ ꓬꓲ ꓮ ꓬꓲꓼ ꓟ-ꓓꓲ-ꓘꓷ ꓟꓬꓱꓺ ꓗꓪ ꓐꓰ ꓪ ꓔꓲ ꓔꓯ ꓐꓯ ꓖꓶ ꓙꓰˍ ꓡꓳ= ꓖꓳ ꓡꓱ ꓠꓬꓲ ꓪ ꓔꓲ ꓔꓯ ꓢꓰꓼˍ ꓐꓰ ꓬꓰˍ ꓟ ꓠꓬ ꓐꓬ ꓡꓰ ꓢꓲ꓾ ꓟ-ꓓꓲ-ꓘꓷ ꓬꓰ ꓗꓷ ꓟ ꓔꓯ ꓪ ꓔꓲ ꓐꓴ ꓚꓺ ꓟꓲꓽ ꓗꓪ ꓐꓳ ꓧꓳꓽ ꓗꓷꓳ=

ꓦꓬꓼ ꓠꓬꓲ ꓖꓳ ꓟ ꓗꓪ ꓪ ꓔꓲ ꓔꓯ ꓣꓱꓽ ꓙ ꓢꓴ ꓐꓴ ꓘꓴꓽ ꓗꓪ ꓟꓽ ꓓ ꓪꓴꓽˍ ꓟ ꓧ-ꓟꓷ-ꓠꓷ ꓟꓬꓱꓺ ꓔ ꓟ ꓕꓲ ꓣꓳ ꓠꓬ ꓠꓲꓹ ꓖꓳꓼ ꓢꓴ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓬꓴ-ꓔ ꓡ ꓞꓳ ꓔꓯ ꓟꓽ ꓠꓲꓹ ꓒꓴ꓾ ꓠꓬꓲꓺ ꓟꓽ ꓟꓵ꓾ ꓟꓬꓽ ꓠꓬꓲ ꓠꓬ ꓬꓲ ꓔꓯ ꓛꓲ ꓝꓲꓸ ꓟꓽ ꓖꓶꓽ ꓟ ꓟ-ꓓꓲ-ꓘꓷ ꓔꓯ ꓟꓬꓽ ꓠꓬꓲ ꓟꓽ ꓠꓲꓹ ꓒꓴ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓧ-ꓟꓷ-ꓠꓷ ꓠꓬ ꓒ-ꓫ ꓗꓪ ꓔꓬ ꓟ ꓬꓴ-ꓔ ꓡ ꓞꓳ ꓮ ꓙꓵꓽ ꓔꓯ ꓢꓰꓼ ꓗꓷ ꓠꓹ ꓟ ꓬꓰˍ ꓡꓳ= ꓪ ꓔꓲ ꓠꓬ ꓬꓴ-ꓔ ꓡ ꓞꓳ ꓐꓴ ꓔꓯ ꓚꓲꓸ ꓔ ꓟ ꓢꓷꓸ ꓙ ꓔ ꓟ ꓕꓲ ꓠꓬꓲ ꓗꓪ ꓢꓰꓼ ꓗꓷ ꓠꓹ ꓟ ꓕꓳꓽ ꓶ ꓗꓪ ꓬꓲ ꓡꓯꓼ ꓠꓬꓲ ꓗꓶꓹ ꓡꓰ ꓔꓳꓹ ꓠꓷꓼ ꓖꓶˍ ꓡꓳ= ꓖꓳ ꓕꓲ ꓙꓵꓹ ꓗꓪ ꓟ-ꓓꓲ-ꓘꓷ ꓠꓬ ꓫꓵꓽ ꓪꓴ ꓖꓳ ꓟ ꓔꓯ ꓪ ꓔꓲ ꓟ ꓱ-ꓢꓶ-ꓕꓱ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓾

            “ ꓠꓴ ꓠꓬ ꓪ ꓔꓲ ꓟ ꓥ ꓠꓬꓲ꓾ ꓬꓴ-ꓔ ꓡ ꓞꓳ ꓐꓴ ꓛꓴ ꓛꓰꓹ ꓡꓰ ꓕꓯ ꓠꓴ ꓠꓽ ꓜꓰ ꓡꓰˍ ꓥꓳ꓾ ꓕꓽ ꓓꓵꓽ ꓙ=          ꓕꓱ ꓕꓲ ꓝꓲꓸ ꓗꓪ ꓬꓴ-ꓔ ꓡ ꓞꓳ ꓐꓴ ꓔꓯ ꓚꓬꓴ ꓠꓹꓟ ꓠꓴ ꓟꓽ ꓢꓯꓼ ꓕꓵꓼˍ ꓟꓲ꓾ ꓚꓬꓴˍ ꓟ ꓠꓬ ꓟꓴ ꓗꓪ        ꓗꓪ ꓐꓰ ꓡˍ ꓥꓳ= ꓖꓳ ꓡꓱ ꓥˍ ꓟꓲ ꓠꓴˍ ꓐꓰ ꓠꓴ ꓕꓲ ꓗꓪ ꓢꓴ ꓠꓬ ꓟꓶꓽ ꓬꓰˍ ꓥꓳ= ꓠꓴ ꓪ ꓔꓲ ꓟ ꓣꓱꓽ ꓪˍ ꓟ ꓠꓬ ꓕꓱ ꓡꓱ ꓗꓹ ꓟ ꓦꓬꓼ ꓠꓬꓲ ꓐꓱ ꓶ ꓥˍ ꓟꓽ ꓢꓷꓸ꓾ ꓐꓯ ꓡꓳ=” (ꓱ-ꓢꓶ-ꓕꓱ 4ꓽ13-14)

ꓖꓳ ꓡꓱ ꓠꓬꓲ ꓱ-ꓢꓶ-ꓕꓱ ꓠꓬ ꓫꓵꓽ ꓪꓴ ꓕꓱ ꓟ ꓗꓪ ꓐꓰ ꓡꓲꓹ ꓗꓷ ꓟꓶ ꓠꓹ ꓟ ꓐꓱ ꓶ ꓫꓴ-ꓫ ꓡꓳ ꓒꓱ ꓗꓪ ꓟ ꓬꓴ-ꓔ ꓡ ꓞꓳ ꓮ ꓙꓵꓽ ꓔꓯ ꓜꓽ ꓓꓴ ꓚꓲꓸ ꓢꓲ ꓪꓽ ꓘꓴ ꓠꓹ ꓟ ꓕꓵꓼ ꓪ ꓖꓶˍ ꓡꓳ= ꓖꓳ ꓗ ꓠꓯꓸ ꓬꓲ ꓫꓵˍ ꓟꓲ ꓫꓵꓻ ꓝꓲ ꓐꓯ ꓢꓲ ꓱ-ꓢꓶ-ꓕꓱ ꓠꓬ ꓪ ꓔꓲ ꓔꓯ ꓐꓯ ꓖꓶ ꓬꓰˍ ꓡꓳ=

ꓬꓲ ꓠꓬ ꓪ ꓔꓲ ꓱ-ꓧ-ꓫꓴ ꓐꓰ ꓪ ꓔꓲ ꓔꓯ ꓣꓱꓽ ꓙ ꓢꓴ ꓧ-ꓟꓷ-ꓠꓷ ꓔꓯ ꓜ ꓘꓴ ꓖꓶ ꓜꓽ ꓢꓲ ꓡꓳꓹ ꓬꓰˍ ꓗꓪ ꓪ ꓔꓲ ꓟ ꓠꓬ ꓬꓲ ꓐꓰ ꓬꓲ ꓡ ꓞꓳ ꓐꓴ ꓔꓯ ꓢꓰꓼ ꓗꓷ ꓠꓹ ꓟ ꓧ-ꓟꓷ-ꓠꓷ ꓬꓲ ꓟꓽ ꓙꓲꓻ ꓟ ꓚꓴꓽ ꓬꓲꓹ ꓔꓯ ꓐꓯ ꓖꓶˍ ꓡꓳ= ꓖꓳ ꓕꓯ ꓪ ꓔꓲ ꓠꓬ ꓠꓲꓹ ꓟ ꓦꓶ ꓠꓬꓲ ꓐꓰ ꓧ-ꓟꓷ-ꓠꓷ ꓔꓯ ꓜꓲ ꓘꓴ ꓗꓪ ꓧꓶꓽ ꓛꓵꓽ ꓢꓰꓼ ꓗꓷˍ ꓡꓳ= ꓧ-ꓟꓷ-ꓠꓷ ꓧꓶꓽ ꓛꓵꓽ ꓢꓰꓼ ꓗꓷ ꓟꓶˍ ꓟ ꓜꓲ ꓘꓴ ꓠꓬ ꓧ-ꓟꓷ-ꓠꓷ ꓡꓰ ꓪ ꓔꓲ ꓟ ꓬꓲ ꓮ ꓬꓲꓼ ꓟ-ꓓꓲ-ꓘꓷ ꓔꓯ ꓧꓶꓽ ꓛꓵꓽ ꓢꓰꓼ ꓓꓴ ꓐꓱ ꓶ ꓙ ꓖꓶꓽ ꓔ ꓟ ꓜꓲ ꓘꓴ ꓥ ꓡꓳ=

ꓟ-ꓓꓲ-ꓘꓷ ꓠꓬ ꓬꓴ-ꓔ ꓡ ꓞꓳ ꓐꓴ ꓔꓯ ꓛꓴꓽ ꓙꓳ ꓢꓴ ꓥ ꓟ ꓧ-ꓟꓷ-ꓠꓷ ꓬꓲ ꓡꓯꓼ ꓪ ꓮ ꓙꓵꓽ ꓟꓶ ꓡꓰ ꓢꓲ꓾ ꓬꓴ-ꓔ ꓡ ꓞꓳ ꓐꓴ ꓠꓬ ꓕꓲ ꓗꓴꓷꓼ ꓡꓱꓸꓼ ꓗꓪ ꓬꓲ ꓪ ꓔꓯ ꓢꓰꓼ ꓡ ꓟ ꓔꓯ ꓙꓳꓺ ꓟꓽ ꓛꓵ ꓗꓷ ꓡꓰꓳ= ꓝꓮꓲ ꓬꓲ ꓪ ꓐꓴ ꓠꓬ ꓪꓴ-ꓢ ꓬꓲ ꓚꓬꓴꓸ ꓙˍ ꓟ ꓣꓱꓽ ꓛꓰꓽ ꓔꓯ ꓟꓬꓱꓺ ꓓꓳꓽ ꓖꓶ ꓗꓷ ꓢꓲ ꓗꓹ ꓛꓲꓽ ꓑꓮꓲꓽ ꓓꓽ ꓟ ꓬꓰˍ ꓡꓳ= 

ꓱ-ꓢꓶ-ꓕꓱ ꓟꓸ ꓟꓲꓽ ꓕꓱ ꓟ ꓠꓬ ꓒ-ꓫ ꓪ ꓔꓲ ꓱ-ꓧ-ꓫꓴ ꓬꓲ ꓙꓵꓽˍ ꓟ ꓦꓬꓼ ꓠꓬꓲ ꓕꓯ ꓒ-ꓫ ꓰꓟꓑꓲꓣꓰ ꓡꓳ ꓒꓱ ꓥ ꓟ ꓫꓴ-ꓫ ꓗꓪ ꓙꓳˍ ꓟ ꓪ ꓔꓲ ꓦꓲꓻ ꓗꓪ ꓒꓬꓱꓼ ꓗꓷ ꓟ ꓥ ꓡꓳ=

ꓦꓬꓼ ꓠꓬꓲ ꓖꓳ ꓟ (ꓐꓚ 486-465) ꓾ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓬꓲ ꓙꓵꓽˍ ꓟ ꓠꓯꓸꓼ ꓗꓪ ꓬꓲ-ꓢꓷ-ꓡꓰ ꓐꓴ ꓐ-ꓐꓲ-ꓡꓶꓽ ꓗꓪ ꓚꓳ ꓑ ꓣꓱꓽ ꓗꓷ ꓟ ꓬꓲ ꓘꓳꓼ 100 ꓘꓳꓼ ꓟꓽ ꓞꓲꓺ꓾ ꓢꓳ-ꓡꓳ-ꓑ-ꓑꓷ ꓠꓬ ꓬꓲ ꓪꓴꓸ ꓟ ꓟꓵꓽ ꓗꓪ ꓐꓰ ꓖꓼ ꓓꓳ ꓗꓷ ꓟꓶ ꓢꓴ ꓕꓲ ꓧꓳꓽ ꓔꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓧꓳꓽ ꓦ ꓖꓶ ꓗꓷ ꓟ ꓬꓲ ꓘꓳꓼ 50 ꓘꓳꓼ ꓟꓽ ꓞꓲꓺ ꓕꓯ ꓬꓴ-ꓔ ꓡ ꓞꓳ ꓮ ꓟꓬꓹ ꓠꓬ ꓒ-ꓫ ꓗꓴꓷꓼ ꓗꓪ ꓜꓰ ꓞꓹ ꓢꓰꓽ ꓡꓳ= ꓬꓲ ꓪ ꓐꓴ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓟ ꓗꓪ ꓕꓲ ꓐꓱ꓾ ꓥ ꓠꓬ꓾ ꓟꓵꓽ ꓗꓪ ꓐꓰ ꓖꓼ ꓓꓳ ꓗꓷ ꓟꓶ ꓢꓴ ꓕꓲ ꓐꓱ ꓥ ꓡꓳ= ꓬꓴ-ꓔ ꓪ ꓔꓲ ꓘꓴ-ꓣ-ꓫꓵ ꓬꓲ ꓕꓵꓼ ꓘꓶꓽ ꓗꓪ ꓐꓰ ꓬꓲ ꓪ ꓐꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰ ꓐ ꓡˍ ꓥˍ ꓟꓲ꓾ ꓟꓬꓽ ꓠꓬꓲ ꓠꓬ ꓒ-ꓫ ꓗꓪ ꓔꓬꓹ ꓬꓽ ꓡꓰ ꓠꓬꓲ ꓬꓲ ꓪ ꓟꓵꓽ ꓥ ꓟ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰ ꓟꓽ ꓫꓳ= ꓱ-ꓢꓶ-ꓕꓱ ꓐꓰ ꓬꓲ ꓕꓲ ꓦꓲ ꓢꓴ ꓐꓴ ꓥˍ ꓟꓲ ꓒ-ꓫ ꓗꓴꓷꓼ ꓗꓪ ꓔꓲꓹ ꓬꓰ ꓟ ꓬꓴ-ꓔ ꓡ ꓞꓳ ꓐꓴ ꓘꓴꓽ ꓗꓪ ꓟ ꓥ ꓡꓳ=