AD 300 ꓘꓳꓼ ꓗꓪ ꓣꓳ‐ꓟ ꓞꓳ ꓫꓵꓽ ꓐꓴ ꓙꓲ‐ꓢꓴ ꓢꓲꓻ ꓤ ꓐꓴ ꓔꓯ ꓟꓬ, ꓡ ꓟ ꓔꓯ ꓙꓳꓺ ꓟ ꓚꓱ,

AD 300 ꓘꓳꓼ ꓗꓪ ꓣꓳ‐ꓟ ꓞꓳ ꓫꓵꓽ ꓐꓴ ꓙꓲ‐ꓢꓴ ꓢꓲꓻ ꓤ ꓐꓴ ꓔꓯ ꓟꓬ, ꓡ ꓟ ꓔꓯ ꓙꓳꓺ ꓟ ꓚꓱ,

ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓢꓴ ꓪ ꓔꓲ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓠꓬ (300) ꓘꓳꓼ ꓗꓪ ꓛꓲ ꓟꓽ ꓠꓽ ꓠꓽ ꓢꓰꓼ ꓟ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓬꓲ. ꓔꓶ. ꓮ ꓟꓬ, ꓗꓪ ꓙꓲ‐ꓢꓴ ꓢꓲꓻ ꓤ ꓐꓴ ꓔꓯ ꓢꓰꓼ ꓗꓷ ꓥ ꓡꓳ꓿ ꓙꓲ‐ꓢꓴ ꓢꓲꓻ ꓤ ꓐꓴ ꓔꓯ ꓣꓳ‐ꓟ ꓞꓳ ꓫꓵꓽ ꓐꓴ ꓠꓬ ꓮ ꓕꓯ ꓥ ꓟꓲ ꓟꓽ ꓔꓱ, ꓟꓽ ꓜꓳ ꓟ ꓚꓱ, ꓗꓪ ꓐꓰ ꓡꓳ. ꓔ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓙꓳꓺ ꓔꓬ ꓡ ꓐꓯ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓔꓯ ꓒꓳ, ꓔꓴ ꓡ ꓓꓴ ꓙꓳꓺ ꓔꓬ ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ  ꓔ ꓟ   “ꓥꓪ ꓗꓴꓷꓼ ꓗꓪ ꓟꓲ ꓠꓯ ꓗꓪ ꓟꓽ ꓥ ꓐꓰ ꓐꓯ ꓔ ꓟ ꓙꓳˍ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓡ ꓞꓳ ꓐꓴ ꓥ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓙꓰ ꓠ, ꓟ ꓞꓳ ꓫꓱ, ꓔꓬ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ‐ꓟ ꓡ ꓞꓳ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓙꓵꓻ ꓢꓴ ꓐꓴ ꓥ ꓡꓳ꓿ ꓬꓲ. ꓪ ꓠꓬ ꓡ ꓞꓳ ꓧꓪꓽ ꓖꓳ ꓓꓱ ꓠꓬ ꓫꓵꓻ ꓔꓯ ꓦꓻ ꓝꓮꓲ. ꓢꓯ. ꓬꓲꓼ ꓡ ꓟ ꓔꓯ ꓟꓽ ꓙꓵꓻ ꓢꓴ ꓐꓴ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ. ꓪ ꓠꓬ ꓬꓲ. ꓪ ꓢꓯ. ꓔꓬ ꓟ ꓟꓲ ꓠꓯ ꓠꓬ ꓐꓲ ꓜꓲꓼ ꓡꓰ ꓟ ꓥ ꓡꓳ ꓐꓰ ꓙꓵꓻ ꓔꓬ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ‐ꓟ ꓡ ꓞꓳ ꓐꓴ ꓠꓬ ꓙꓵꓽ ꓪ ꓙꓳˍ ꓠ, ꓟ ꓐꓰ ꓟꓲ ꓠꓯ ꓗꓪ ꓒꓴ ꓫꓵꓺ ꓙꓳˍ ꓠ, ꓟ ꓚꓱ, ꓔꓯ ꓡꓰ ꓧꓪ, ꓢꓴ ꓐꓴ ꓥ ꓡꓳ꓿ ꓣꓳ‐ꓟ ꓞꓳ ꓫꓵꓽ ꓐꓴ ꓠꓬ ꓬꓲ. ꓪ ꓗꓴꓷꓼ ꓐꓰ ꓣꓳ‐ꓟ ꓪ ꓔꓲ ꓔꓯ ꓮ ꓘꓶ. ꓛꓲ ꓦꓻ ꓡꓱ ꓢꓴ ꓐꓴ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ‐ꓟ ꓗꓴꓷꓼ ꓕꓯ ꓢꓲ ꓪꓴꓽ ꓟ ꓟꓽ ꓙꓳ ꓝꓮꓲ ꓪ ꓔꓲ ꓕꓯ ꓢꓲ ꓪꓽ ꓠꓬꓲˍ ꓟ ꓪ ꓔꓲ ꓟꓽ ꓔꓬ ꓐꓰ ꓬꓲ. ꓪ ꓠꓬ ꓙꓵꓻ ꓟ ꓥ ꓡꓳ꓿ ꓣꓳ‐ꓟ ꓞꓳ ꓫꓵꓽ ꓐꓴ ꓠꓬ ꓣꓳ‐ꓟ ꓗꓴꓷꓼ ꓐꓰ ꓣꓳ‐ꓟ ꓪ ꓔꓲ ꓠꓬ ꓬꓲ. ꓪ ꓪꓴ‐ꓢ ꓐꓰ ꓙꓵꓻ ꓢꓴ ꓐꓴ ꓥ ꓡꓳ꓿

ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓞꓳ ꓫꓱ, ꓠ, ꓟ ꓚꓱ, ꓔꓯ ꓪꓴ‐ꓢ ꓐꓯ ꓘꓶꓽ ꓐꓰ ꓟꓽ ꓪꓽ ꓡꓰ ꓓꓴ ꓟꓽ ꓙꓳˍ ꓠꓬ ꓞꓳ ꓫꓱ, ꓠ, ꓟ ꓟ. ꓖꓶ ꓔ ꓢꓴ ꓐꓴ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓡꓰ ꓐꓰ ꓟꓲ ꓠꓯ ꓚꓱ, ꓡꓰ ꓞꓳ ꓫꓱ, ꓢꓴ ꓐꓴ ꓟꓽ ꓥ꓿ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓑ ꓫꓬ ꓕꓲ ꓣꓳ ꓠꓬ ꓬꓲ. ꓪꓴ‐ꓢ ꓐꓰ ꓝꓮꓲ ꓬꓲ. ꓦꓻ ꓐꓱ ꓶ ꓢꓯꓼ ꓕꓵꓼ ꓠ, ꓟ ꓙꓵꓽ ꓗ ꓙꓳ ꓢꓴ ꓐꓴ ꓥ ꓡꓳ꓿

ꓣꓳ‐ꓟ ꓡ ꓞꓳ ꓐꓴ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓙꓲꓻ ꓟ ꓗꓴꓷꓼ ꓑ ꓫꓬ ꓐꓴ ꓐꓰ ꓟꓽ ꓡꓳ. ꓟꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓗꓴꓷꓼ ꓔꓯ ꓒꓳ, ꓔꓴ ꓢꓴ ꓐꓴ ꓥ ꓡꓳ ꓐꓰ ꓡꓳ. ꓟꓳ ꓡꓳ꓿ ꓝꓮꓲ ꓪꓴ‐ꓢ ꓔꓯ ꓦꓻ ꓡꓱ ꓟ ꓠꓬ ꓙꓲꓻ ꓟ ꓥ ꓡꓳ ꓐꓰ ꓐꓯ ꓟ ꓔꓯ ꓣꓳ‐ꓟ ꓡ ꓞꓳ ꓐꓴ ꓠꓬ ꓟꓽ ꓠꓲ, ꓫꓵꓺ ꓢꓴ ꓐꓴ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓠꓲ, ꓜꓳꓺ ꓟ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓽ ꓙꓲꓻ ꓟ ꓟꓬꓱꓽ ꓬꓰ ꓜ ꓢꓴ ꓐꓴ ꓥ ꓡꓳ꓿

ꓣꓳ‐ꓟ ꓗꓴꓷꓼ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓟꓬ, ꓡ ꓕꓯ ꓠꓱ. ꓐꓯꓼ ꓢꓴ ꓐꓴ ꓐꓱ ꓶ ꓟꓬꓱꓽ ꓟꓽ ꓙꓳ ꓡ ꓓꓴ ꓥꓳ ꓐꓰ ꓙꓳꓺ ꓔꓬ ꓡꓳ꓿ ꓝꓮꓲ ꓙꓲ‐ꓢꓴ ꓢꓲꓺ ꓤ  ꓔꓯ ꓫꓵꓽ ꓪꓴ ꓖꓶ ꓢꓴ ꓐꓴ ꓔꓯ ꓣꓳ‐ꓟ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓬꓰ ꓙ ꓔꓳ, ꓙ ꓟ ꓥ ꓡꓳ꓿

ꓣꓳ‐ꓟ ꓡ ꓞꓳ ꓐꓴ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓟꓽ ꓙꓲꓻ ꓟ ꓚꓱ, ꓔꓯ ꓫ. ꓕꓱ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲ ꓡꓲ ꓔ ꓟ ꓔꓶ. ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴ ꓟ ꓚꓱ, ꓔꓯ ꓟꓽ ꓢꓷ. ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓽ ꓔꓱ ꓟꓽ ꓜꓳꓽ ꓢꓴ ꓐꓴ ꓥ ꓡꓳ ꓐꓰ ꓐꓯ ꓔꓬ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓤ ꓠꓱ ꓤ ꓐꓴ ꓔꓯ ꓢꓰꓼ ꓢꓲ ꓠꓬꓲ ꓜ ꓢꓴ ꓐꓴ ꓥ ꓡꓳ ꓐꓰ ꓐꓯ ꓡꓳ꓿

ꓗꓴꓷꓼ ꓔꓯ ꓒꓳ, ꓔꓴ ꓢꓴ ꓐꓴ ꓥ ꓡꓳ ꓐꓰ ꓐꓯ ꓡꓳ꓿ ꓣꓳ‐ꓟ ꓗꓴꓷꓼ ꓗꓪ ꓠꓻ ꓓꓴ ꓔꓳ, ꓜꓳ ꓡ ꓟ ꓐꓰ ꓫ. ꓓꓴ ꓟꓷꓼ ꓢꓴ ꓙꓳˍ ꓡ ꓟ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓬꓰ ꓔ ꓟ ꓥ ꓡꓳ ꓐꓰ ꓐꓯ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓣꓳ‐ꓟ ꓡ ꓞꓳ ꓐꓴ ꓦꓻ ꓡꓱ ꓟ ꓠꓲꓽ ꓔꓯ ꓪꓴ. ꓓꓵ, ꓟꓽ ꓓꓵ ꓟ ꓪꓴ. ꓠꓬꓲ ꓠꓲ, ꓠꓬ ꓠꓲ, ꓩꓴ ꓔꓬ ꓡꓳ ꓐꓰ ꓣꓳ‐ꓟ ꓡ ꓞꓳ ꓐꓴ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓐꓯ ꓡꓳ꓿

 

Add new comment

3 + 7 =