A.D (357) ꓘꓳꓼ ꓕꓯ ꓙꓵꓻ ꓠꓲ, ꓚꓱ, ꓕꓯ ꓗꓽ ꓕꓻ ꓢꓴ ꓙꓲꓻ ꓫꓬ ꓢꓴ ꓢꓽ ꓣꓳ ꓚꓱ,

A.D (357) ꓘꓳꓼ ꓕꓯ ꓙꓵꓻ ꓠꓲ, ꓚꓱ, ꓕꓯ ꓗꓽ ꓕꓻ ꓢꓴ ꓙꓲꓻ ꓫꓬ ꓢꓴ ꓢꓽ ꓣꓳ ꓚꓱ,

ꓙꓲꓻ ꓫꓬ ꓢꓴ St. Athanasius ꓙꓵꓻ ꓠꓲ, ꓚꓱ, ꓔꓯ ꓗꓽ ꓕꓻ ꓓꓳꓻ ꓡꓰ ꓗ. ꓠꓯ, ꓙꓵꓻ ꓠꓲ, ꓔꓯ ꓗꓽ ꓕꓻ ꓢꓴ ꓐꓴ ꓠꓬ ꓙꓲꓻ ꓫꓬ ꓢꓴ St.Basil ꓐꓰ ꓬꓲ ꓠꓬꓲ ꓤ Nyssa ꓟꓵꓽ ꓗꓪ ꓐꓰ ST. Gregory ꓐꓰ Nazianzus ꓟꓵꓽ ꓗꓪ ꓐꓰ ꓙꓲꓻ ꓫꓬ ꓢꓴ St. Gregory ꓐꓴ ꓢꓽ ꓣꓳ ꓥ ꓡꓳ꓿ ꓙꓲꓻ ꓫꓬ ꓢꓴ Basil ꓔꓯ ꓮꓓ (330) ꓘꓳꓼ ꓕꓯ Caesarea ꓟꓵꓽ Cappadocia ꓡꓳ ꓒꓱ ꓗꓪ ꓬꓲ. ꓔꓯ ꓦꓵꓻ ꓗꓷ ꓟ ꓥ ꓡꓳ꓿

ꓙꓲꓻ ꓫꓬ ꓢꓴ St.Basil ꓠꓬ ꓪꓴ‐ꓢ ꓔꓯ ꓦꓻ ꓡꓰ ꓟ ꓙꓵꓻ ꓠꓲ, ꓔꓯ ꓬꓲ. ꓮ‐ꓬ ꓗꓪ ꓐꓰ ꓘꓳ, ꓣꓴ ꓟꓶ ꓡꓰ  ꓟ ꓥ ꓡꓳ꓿ ꓬꓲ ꓔꓬ ꓟ ꓡꓳ ꓒꓱ ꓗꓪ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓟꓶ ꓡꓰ ꓗ. ꓠꓯ ꓝꓮꓲ ꓝ. ꓢꓲ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓠ, ꓟ Constantinople ꓡꓳ ꓒꓱ ꓗꓪ ꓙꓰ ꓗꓷ ꓟ ꓥ ꓡꓳ꓿ ꓖꓳ ꓗ. ꓠꓯ Athems ꓟꓵꓽ ꓗꓪ ꓐꓰ ꓙꓲꓻ ꓫꓬ ꓢꓴ Gregory ꓔꓯ ꓜꓲꓼ ꓡꓯꓽ ꓘꓳ, ꓗꓷ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓘꓴ ꓜꓲꓼ ꓞꓳ ꓔꓯ ꓫꓵꓽ ꓪꓴꓽ ꓖꓶ ꓢꓴ ꓪ ꓔꓲ Julian ꓐꓰ ꓕꓲ ꓪ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓟꓶ ꓡꓰ ꓢꓴ ꓥ ꓡꓳ꓿   

A.D (357) ꓘꓳꓼ ꓕꓯ ꓢ‐ꓜ‐ꓣꓲ‐ꓬ ꓡꓳ ꓒꓱ ꓗꓪ ꓬꓯꓼ ꓡ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓐꓰ ꓪꓴ‐ꓢ ꓐꓯ ꓘꓶꓽ ꓟ. ꓖꓶ ꓟ ꓢꓳꓻ ꓦꓲꓻ ꓒꓴ ꓗꓷ ꓟ ꓥ ꓡꓳ꓿ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓟꓬꓱꓺ ꓓꓳꓽ ꓮ ꓟꓬ, ꓙꓳ ꓡꓰ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓬꓲ ꓠꓬ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓡꓰ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬꓲ‐ꓟ ꓡꓰ ꓢꓯꓼ ꓖꓶ ꓟ ꓪꓴ. ꓠꓬꓲ ꓢꓲꓽ ꓫꓬ ꓟ ꓤꓶꓻ ꓗꓪ ꓢꓯ. ꓔꓬ ꓠ, ꓟ ꓢꓯꓼ ꓕꓵꓼ ꓗꓷꓳ꓿

ꓖꓳ ꓗ. ꓠꓯ ꓬꓲ ꓠꓬ Syrian ꓟꓵꓽ ꓐꓰ ꓰꓖꓬꓑꓔ ꓗꓴꓷꓼ ꓗꓪ ꓙꓳˍ ꓔꓲꓺ ꓒ ꓢꓳꓻ ꓦꓲꓻ ꓐꓰ ꓦꓲꓻ ꓕꓲ ꓒꓳ, ꓗꓪ ꓢꓯꓼ ꓕꓵꓼ ꓟ ꓜꓴꓻ ꓗꓪ ꓔꓬ ꓗꓷ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓝꓮꓲ ꓢꓳ ꓣꓴ ꓟꓶ ꓡꓰꓳ꓿ ꓖꓳ ꓗ. ꓠꓯ ꓬꓲ ꓔꓬ ꓟ ꓟꓵꓽ ꓗꓪ ꓡꓽ ꓡ ꓢꓲ ꓠꓬꓲ ꓬꓲ ꓠꓯ ꓗꓪ ꓙꓳˍ ꓟ ꓦꓻ ꓟꓲ ꓗꓪ ꓔꓬ ꓗꓷꓳ꓿

ꓬꓲ ꓗ. ꓠꓯ ꓢꓲ ꓙꓳˍ ꓢꓴ ꓐꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓟꓬ, ꓙꓳˍ ꓡ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓔꓯ ꓬꓰ ꓙ ꓠ, ꓟ ꓜꓴꓻ ꓕꓲ ꓟ  ꓒꓴ ꓗꓷꓳ꓿ ꓕꓱ ꓜꓴꓻ ꓗꓪ ꓔꓬ ꓢꓴ ꓐꓴ ꓐꓱ ꓶ ꓛꓳꓽ ꓚꓱ, ꓙꓵꓽ ꓗ ꓕꓳ ꓶ ꓠꓬꓲꓽ ꓑꓷꓠ ꓔꓯ ꓥ ꓟꓲ ꓐꓳ ꓖꓶ ꓗꓷꓳ꓿ ꓕꓱ ꓕꓳ ꓶ ꓔꓯ ꓖꓣꓰꓰꓗ ꓟꓵꓽ ꓗꓪ ꓠꓬꓲ. ꓠꓬꓲ ꓗꓪ ꓛꓲ ꓣꓱ ꓔꓬ ꓟ ꓥ ꓡꓳ꓿

ꓮ.ꓓ (364) ꓘꓳꓼ ꓕꓯ ꓢꓯ‐ꓢ‐ꓣꓲ‐ꓬ ꓟꓵꓽ ꓗꓪ ꓡꓽ ꓡ ꓢꓲ ꓠꓬꓲ ꓔꓲꓺ ꓒ ꓓ ꓔꓯ ꓬꓰ ꓙ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Basil ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓟ ꓥ ꓡꓳ꓿ ꓬꓲ ꓡꓰ ꓚꓺ ꓟ ꓟ. ꓟꓲꓽ ꓔꓯ ꓠ ꓠ, ꓡ ꓢꓴ ꓮ ꓟꓬ, ꓠꓬ ꓫ. ꓢꓴ ꓟꓶ ꓢꓴ ꓐꓴ ꓥ ꓡꓳ꓿ ꓮ.ꓓ (370) ꓘꓳꓼ ꓕꓯ ꓢꓯ‐ꓢ‐ꓣꓲ‐ꓬ ꓟꓵꓽ ꓗꓪ ꓔꓲꓺ ꓒ ꓓ ꓒꓬꓱꓼ ꓡ ꓟ ꓥ ꓡꓳ꓿

ꓬꓲ ꓔꓲꓺ ꓒ ꓓꓽ ꓒꓬꓱꓼ ꓬꓰ ꓟ ꓟꓽ ꓟꓶ ꓫꓵˍ ꓟ ꓙꓵ, ꓕꓯ Arian ꓥꓳꓽ ꓡꓰ ꓟ ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓴ ꓪ ꓔꓲ Valens  ꓠꓬ Arian ꓜꓴꓻ ꓔꓯ ꓘꓴ ꓜꓲꓼ ꓞꓳ ꓗꓪ ꓘꓳ, ꓣꓴ ꓠ, ꓟ ꓐꓯ ꓑꓶ ꓗꓷ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓙꓲꓻ ꓫꓬ ꓢꓴ Basil ꓠꓬ ꓥꓳꓽ ꓡꓰ ꓟ ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓴ ꓜꓴꓻ ꓔꓯ ꓘꓴ ꓜꓲꓼ ꓞꓳ ꓔꓯ ꓬꓯꓼ ꓡ ꓟ ꓔꓯ ꓟꓽ ꓘꓳ, ꓣꓴ ꓟ ꓥ ꓡꓳ꓿

ꓪ ꓔꓲ ꓠꓬ ꓙꓲꓻ ꓫꓬ ꓢꓴ Basil ꓔꓯ ꓡꓯꓽ ꓫꓴꓻ ꓖꓶ ꓢꓲ ꓠꓬꓲ ꓥꓳꓽ ꓡꓰ ꓢꓴ ꓐꓴ ꓔꓯ ꓘꓳ, ꓣꓴ ꓠ, ꓟ ꓓꓰꓽ ꓥ ꓟꓲ ꓟꓽ ꓘꓳ, ꓣꓴ ꓟ ꓪꓴ. ꓠꓬꓲ ꓬꓲ ꓠꓯ ꓗꓪ ꓙꓳ ꓟ ꓮ ꓙꓵꓽ ꓔꓯ ꓪ ꓔꓲ ꓡꓰ ꓣꓴ ꓔꓯꓺ ꓙꓰ ꓟ ꓥ ꓡꓳ꓿ ꓬꓲ ꓔꓯ ꓢꓰꓼ ꓓꓴ ꓥꓳ ꓐꓰ ꓐꓯ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓙꓲꓻ ꓫꓬ ꓢꓴ Basil ꓠꓬ ꓪꓽ ꓫꓱ, ꓢꓲ ꓠꓬꓲ ꓬꓲ. ꓠꓯ ꓗꓪ ꓕꓳ ꓶ ꓕꓲ ꓐꓱ ꓐꓰ ꓐꓵ ꓞꓶ ꓕꓲ ꓐꓱ ꓡꓰ ꓙꓳˍ ꓟ ꓪꓴ. ꓠꓬꓲ ꓢꓰꓼ ꓡ ꓥ ꓟꓲ ꓟꓽ ꓙꓳꓺ ꓐꓰ ꓐꓯ ꓔ ꓡꓳ ꓥ ꓡꓳ꓿ ꓪ ꓔꓲ ꓐꓱ ꓶ ꓟꓬꓱꓽ ꓬꓰ ꓖꓶ ꓢꓴ ꓠꓬ ꓢꓯꓼ ꓕꓵꓼ ꓥ ꓟꓲ ꓧꓪ ꓟꓽ ꓔ ꓟ ꓔꓯ ꓐꓯ ꓟ. ꓖꓶ ꓗꓷꓳ꓿