AD (386) ꓘꓳꓼ ꓕꓯ ꓙꓵꓻ ꓠꓲ, ꓚꓱ, ꓔꓯ ꓗꓽ ꓕꓽ ꓢꓴ ꓙꓲꓻ ꓫꓬ ꓢꓴ St. John Chrysostom ꓚꓺ ꓟꓲꓽ

AD (386) ꓘꓳꓼ ꓕꓯ ꓙꓵꓻ ꓠꓲ, ꓚꓱ, ꓔꓯ ꓗꓽ ꓕꓽ ꓢꓴ ꓙꓲꓻ ꓫꓬ ꓢꓴ St. John Chrysostom ꓚꓺ ꓟꓲꓽ

ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢꓴ ꓟꓽ ꓥ ꓐꓰ ꓟ. ꓟꓲ ꓚꓺ ꓟ Arianism ꓜꓴꓻ ꓠꓬ ꓣꓳ‐ꓟ ꓗꓴꓷꓼ ꓗꓪ ꓮ ꓘꓶ. ꓛꓲ ꓟꓽ ꓔꓬ ꓟ ꓙꓵ, ꓗꓪ ꓛꓲ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓟꓽ ꓥ ꓐꓰ ꓟ. ꓟꓲ ꓚꓺ ꓟ ꓔꓯ ꓙꓵꓻ ꓟ (Barbarian) ꓞꓳ ꓫꓵꓽ ꓠꓬ ꓔꓬ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓣꓳ‐ꓟ ꓐꓶ ꓓꓳ ꓕꓲ ꓒꓳ, ꓗꓪ ꓙꓳ ꓟ ꓘꓴ ꓜꓲꓼ ꓞꓳ ꓗꓪ ꓠꓬ(40) ꓘꓳꓼ ꓛꓲ  ꓢꓲ ꓡꓲ ꓐꓰ ꓔꓬ ꓟ ꓥ ꓡꓳ꓿

ꓖꓳ ꓕꓲ ꓙꓵ, ꓗꓪ ꓙꓲꓻ ꓫꓬ ꓢꓴ St. John Chrysostom ꓠꓬ ꓬꓲ ꓢꓲꓽ ꓢꓲ ꓫꓬ ꓫꓬ ꓐꓰ ꓢꓯ. ꓔꓬ ꓗꓷ ꓟ ꓡꓰ ꓟꓽ ꓛꓲ ꓟ. ꓟꓲ ꓚꓺ ꓟ ꓠꓯ, ꓗꓪ ꓮ ꓘꓶ. ꓓꓽ ꓢꓴ ꓕꓲ ꓣꓳ ꓥ ꓟ ꓪꓴ. ꓠꓬꓲ  ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓦꓻ ꓢꓯꓼ ꓪ ꓮ ꓘꓶ. ꓪ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ St. John Chrysostom ꓠꓬ ꓟꓬꓱꓺ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓡ ꓟ   ꓥ ꓡꓳ꓿  

ꓙꓲꓻ ꓫꓬ ꓢꓴ St. John Chrysostom ꓬꓲ ꓐ, ꓐ ꓐꓰ ꓟ, ꓟ ꓠꓬ ꓮꓓ (344) ꓘꓳꓼ ꓕꓯ Antioch ꓡꓳ ꓒꓱ ꓗꓪ ꓮ ꓘꓶ. ꓛꓲ ꓒꓴ ꓫꓲ ꓙꓳˍ ꓟ ꓕꓲ ꓦꓲꓻ ꓗꓪ ꓐꓰ ꓬꓲ ꓔꓯ ꓦꓵꓻ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ St. John Chrysostom ꓠꓬ ꓬꓲ ꓞꓲꓼ ꓪꓴꓽ ꓡ ꓟ ꓙꓵ, ꓔꓯ ꓟꓽ ꓦꓻ ꓡꓱ ꓢꓴ ꓐꓴ ꓟ. ꓒ ꓐꓴ ꓠꓯ, ꓗꓪ ꓐꓰ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓪ ꓡꓰꓳ꓿ ꓬꓲ ꓠꓬ ꓬꓲ ꓟ, ꓟ ꓮ ꓘꓶ. ꓠꓲꓻ ꓠꓵ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓟ, ꓟ ꓡꓰ ꓬꓲ ꓔꓯ ꓦꓻ ꓡꓱ ꓢꓴ ꓕꓲ ꓣꓳ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓚꓱ, ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿

ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓟꓶ ꓡꓰ ꓗꓷ ꓠꓬ Antioch ꓡꓳ ꓒꓱ ꓗꓪ ꓙꓰ ꓢꓲ ꓠꓬꓲ ꓔꓲꓺ ꓒ ꓓꓽ ꓠꓯ, ꓗꓪ ꓐꓰ ꓪꓴ‐ꓢ ꓐꓯ ꓘꓶꓽ ꓔꓯ ꓢꓳꓻ ꓣꓴ ꓪ ꓡꓰꓳ꓿ ꓝꓮꓲ ꓬꓲ ꓠꓬ ꓔꓲꓺ ꓒ ꓓꓽ ꓡꓯꓽ ꓒꓯ ꓗꓪ ꓖꓳ ꓓꓱ ꓔꓲ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓟ, ꓟ ꓟꓲ ꓠꓯ ꓗꓪ ꓐꓰ ꓧꓪ ꓖꓳ ꓓꓱ ꓡꓳ ꓬꓰ ꓗ. ꓠꓯ ꓬꓲ ꓠꓬ   ꓟꓵꓽ ꓗꓪ ꓔꓬ ꓟ ꓔꓲꓺ ꓒ ꓜꓴꓻ ꓗꓪ ꓔꓬ ꓢꓲ ꓠꓬ ꓦꓻ ꓕꓲ ꓒꓳ ꓗꓪ ꓢꓯꓼ ꓕꓵꓼ ꓗꓷꓳ꓿

ꓝꓮꓲ ꓙꓲꓻ ꓫꓬ ꓢꓴ St. John Chrysostom ꓠꓬ ꓕꓲ ꓣꓳ ꓔꓵꓼ ꓟꓵꓽ ꓗꓪ (2) ꓘꓳꓼ ꓔꓬ ꓗꓷ ꓢꓲ ꓠꓬꓲ ꓦꓻ ꓕꓲ ꓒꓳ, ꓗꓪ ꓢꓯꓼ ꓕꓵ ꓢꓲ ꓠꓬꓲ ꓪꓴ‐ꓢ ꓔꓯ ꓪꓽ ꓘꓴ ꓟ ꓗꓪ ꓬꓲ ꓙꓵ, ꓖꓶ ꓗꓷꓳ꓿ ꓝꓮꓲ ꓬꓲ ꓠꓬ ꓪꓴ‐ꓢ ꓐꓯ ꓘꓶ ꓔꓯ ꓮ ꓘꓶ ꓛꓲ ꓚꓺ ꓢꓴ ꓐꓰ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓢꓯꓼ ꓕꓵꓼ ꓗꓷꓳ꓿ ꓮꓓ (486) ꓘꓳꓼ ꓗꓪ Antioch ꓡꓳ ꓒꓱ ꓗꓪ    ꓟꓗ ʼ[ꓬꓯꓼ ꓡ ꓢꓲ ꓠꓬꓲ ꓔꓲꓺ ꓒ ꓙꓵꓽ ꓪ ꓘꓳ, ꓣꓴ ꓪ ꓡꓰꓳ꓿ ꓬꓲ ꓠꓬ ꓙꓻ ꓣꓳ ꓟ ꓠꓲ, ꓟ ꓔꓯ ꓮ ꓕꓯ ꓥ ꓟꓲ ꓣꓱ ꓢꓲ ꓠꓬꓲ ꓙꓲ‐ꓢꓴ ꓢꓲꓺꓤ ꓐꓴ ꓔꓯ ꓮ ꓘꓶ. ꓛꓲ ꓠꓵꓻ ꓠꓲ, ꓢꓴ ꓕꓲ ꓣꓳ ꓥ ꓡꓳ꓿

ꓝꓮꓲ ꓔꓲꓺ ꓒ ꓒꓬꓱꓼ ꓡ ꓗ. ꓠꓯ ꓬꓲ ꓚꓲ ꓛꓬ ꓮ ꓡꓰ ꓐꓰ ꓢꓯꓼ ꓕꓵꓼ ꓠ, ꓟ ꓐꓰ ꓪꓴ‐ꓢ ꓟꓬꓱꓽ ꓬꓰ ꓗꓪ ꓮ ꓡꓰ ꓐꓰ ꓢꓯꓼ ꓕꓵꓼ ꓠ, ꓟ ꓮ ꓘꓶ. ꓛꓲ ꓓꓵ ꓙ ꓢꓲ ꓠꓬꓲ ꓔꓲꓺ ꓒ ꓐꓴ ꓤꓶꓻꓗꓪ ꓮ ꓡꓰ ꓢꓯ. ꓔꓬ ꓠ, ꓟ ꓕꓳꓽ ꓶ ꓔꓯ ꓐꓳ ꓗꓷ ꓟ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓬ ꓟ ꓔꓲ ꓗꓪ ꓙꓰ ꓢꓲ ꓠꓬꓲ ꓟ. ꓟꓲ ꓮ ꓘꓶ. ꓚꓺ ꓟ. ꓖꓶ ꓗꓷꓳ꓿ ꓖꓳ ꓗ. ꓠꓯ ꓬꓲ ꓠꓬ ꓟꓬꓱꓽ ꓓꓳꓽ ꓮ ꓘꓶ ꓙꓳˍ ꓡ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ Chrosostorm ꓐꓯ ꓟ ꓬꓲ ꓟ. ꓟꓲꓽ ꓠꓬ ꓫꓲ. ꓟꓷꓼ ꓠꓷꓼ ꓐꓯ ꓟ ꓥ ꓡꓳ꓿

ꓮꓓ (397) ꓘꓳꓼ ꓕꓯ ꓬꓲ ꓠꓬ Constantinople ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓔꓲ ꓪ ꓒꓬꓱꓼ ꓡ ꓪ꓿ ꓖꓳ ꓗ. ꓠꓯ ꓔꓲꓺ ꓒ ꓓꓽ ꓠꓬ Antioch ꓡꓳ ꓒꓱ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓮ ꓫꓵꓽ ꓥ ꓟꓲ ꓖꓶ ꓟꓽ ꓪ ꓟ. ꓪꓴ. ꓠꓬꓲ ꓠꓲ, ꓟ ꓟꓽ ꓢꓽ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓔꓯ Antioch ꓡꓳ ꓒꓱ ꓗꓪ ꓟꓽ ꓙꓰ ꓝꓲ ꓟ ꓪꓴ. ꓠꓬꓲ ꓬꓲ ꓠꓬ ꓡ ꓞꓳ ꓟꓽ ꓢꓷ. ꓠ, ꓟ ꓙꓰ ꓗꓷ ꓟ ꓥ ꓡꓳ꓿ Constantinople ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓟ. ꓟꓲꓽ ꓚꓺ ꓟ ꓔꓯ ꓠ ꓠ, ꓠ, ꓟ ꓐꓰ ꓶ ꓡ ꓞꓳ ꓮ ꓟꓬ, ꓡ ꓗꓷ ꓟ ꓥ ꓡꓳ꓿

ꓔꓲꓺ ꓒ ꓓꓽ ꓠꓬ ꓟꓽ ꓙꓳꓺ ꓙꓳꓺ ꓝꓴꓲ ꓬꓰ ꓔꓬ ꓢꓴ ꓠꓯ, ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓟ ꓥ ꓡꓳ꓿ ꓬꓲ ꓮ ꓟ ꓒꓵꓼ ꓟꓬ ꓔꓯ ꓥ ꓟꓲ ꓟꓽ ꓛꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓡ ꓞꓳ ꓕꓲ ꓐꓱ ꓬꓲ ꓔꓯ ꓠꓲ, ꓜꓳ ꓟ ꓥ ꓡꓳ꓿ ꓔꓲꓺ ꓒ ꓓꓽ ꓔꓯ ꓠꓲ, ꓜꓳ ꓟ ꓗꓪ ꓔꓲꓺꓒ ꓓꓽ ꓔꓯ ꓛꓳꓽ ꓢꓴ ꓔꓲꓺ ꓒ ꓐꓴ ꓐꓰ ꓗꓴꓷꓼ ꓔꓯ ꓙꓵꓽ ꓟ ꓪ ꓔꓲ ꓟ ꓥ ꓟꓲ ꓐ ꓟ ꓥ ꓡꓳ꓿