Crusade ꓢꓰꓼ ꓡꓯ ꓘꓳˍ ꓟ ꓚꓺ ꓟꓲꓽ

Crusade ꓢꓰꓼ ꓡꓯ ꓘꓳˍ ꓟ ꓚꓺ ꓟꓲꓽ

ꓟꓲ ꓠꓯ ꓚꓺ ꓟꓲꓽ ꓗꓪ ꓥ ꓟꓲ꓾ ꓘꓴ ꓜꓲꓼ ꓞꓳ ꓚꓺ ꓟꓲꓽ ꓗꓪ ꓥ ꓟꓲ ꓮ ꓟꓬ, ꓣꓱ ꓛꓵ ꓟ ꓚꓺ ꓟꓲꓽ ꓠꓬ  Crusade ꓢꓰꓼ ꓡꓯ ꓘꓳˍ ꓟ ꓟꓶꓽ ꓙꓽ ꓥ ꓡꓳ꓿ ꓕꓱ ꓟ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ Muslim ꓐꓴ ꓢꓰꓼ ꓡꓯ ꓘꓳˍ ꓗꓷ ꓟ ꓥ ꓡꓳ꓿ ꓕꓱ ꓢꓰꓼ ꓡꓯ ꓘꓳˍ ꓟ ꓠꓬ (200) ꓘꓳꓼ ꓟꓶ ꓫꓵˍ ꓗꓷ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ Muslim ꓐꓴ ꓠꓬ ꓚꓰꓼ ꓢꓴ ꓪꓴ‐ꓢ ꓐ, ꓐ ꓪꓴ‐ꓢ ꓔꓯ ꓦꓻ ꓡꓱ ꓢꓴ ꓐꓴ ꓥ ꓟꓲ ꓢꓰꓼ ꓡꓯ ꓘꓳˍ ꓗꓷ ꓟ ꓥ ꓡꓳ꓿

ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓬ ꓗꓷ ꓟ ꓐꓰ ꓟꓵꓽ (Holy Land) ꓢꓲꓻ ꓫꓬꓻ ꓟ ꓟꓵꓽ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓡꓯ ꓒꓯ ꓗꓪ ꓙꓳˍ ꓟ ꓠꓬ ꓮ ꓟꓬ, ꓙꓲꓻ ꓟ ꓥ ꓡꓳ ꓐꓰ ꓓꓴ ꓙ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓑꓶ. ꓓꓴ  Muslim ꓐꓴ ꓠꓬ ꓬꓲ ꓪ ꓙꓵꓻ ꓠꓲ, ꓚꓱ, ꓪꓴꓽ ꓟꓴ ꓡ, ꓟ ꓢꓰꓼ ꓡꓯ ꓘꓳˍ ꓟ ꓔꓯ ꓬꓰˍ ꓟ ꓥ ꓡꓳ꓿

ꓬꓲ. ꓪꓴ. ꓕꓲ ꓧꓪꓽ ꓟ Crusade ꓢꓰꓼ ꓡꓯ ꓘꓳˍ ꓟ (1095‐1099) ꓘꓳꓼ

Muslim ꓐꓴ ꓠꓬ ꓬꓲ ꓪꓴ. ꓙꓵꓻ ꓠꓲ, ꓚꓱ, ꓔꓯ ꓪꓴꓽ ꓟꓴ ꓡ ꓠ, ꓟ ꓙꓲ‐ꓢꓴ ꓢꓲꓺ ꓤ ꓟꓯꓼ ꓜꓴꓻ ꓥ ꓟ Byzantine ꓟꓯꓼ ꓜꓴꓻ ꓔꓯ ꓢꓰꓼ ꓡ ꓡꓳ꓿ 1095 ꓘꓳꓼ ꓕꓯ ꓦꓻ ꓡꓱ ꓢꓴ ꓪ ꓔꓲ ꓥ ꓟꓲ (Alexius 1) ꓠꓬ  ꓔꓲꓺ ꓒ ꓪ ꓔꓲ (Urban 2) ꓔꓯ Muslim ꓢꓰꓼ ꓡ ꓟ ꓔꓯ ꓗꓽ ꓠ, ꓟ ꓬꓰ ꓙ ꓠ, ꓟ ꓓꓰꓽ ꓗꓷꓳ꓿ ꓕꓱ ꓡꓱ ꓐꓰ Muslim ꓐꓴ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓢꓰꓼ ꓡꓯ ꓘꓳˍ ꓟ ꓒꓬꓱꓼ ꓡ ꓟ ꓥ ꓡꓳ꓿ ꓬꓲ. ꓪꓴ. ꓕꓲ ꓧꓪꓽ ꓟ ꓟ ꓢꓰꓼ ꓡꓯ ꓘꓳˍ ꓗꓷ ꓕꓯ (3) ꓘꓳꓼ  ꓟꓶ ꓫꓵˍ ꓡꓰꓳ꓿

ꓟꓯꓼ ꓢꓰꓼ ꓡꓯ ꓘꓳˍ ꓕꓯ ꓙꓲ‐ꓢꓴ ꓢꓲꓺ ꓤ ꓟꓯꓼ ꓜꓴꓻ ꓠꓬ (Knights) ꓟꓯꓼ ꓐꓰ ꓔ ꓢꓲ ꓠꓬꓲ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓗꓪ ꓛꓲ ꓟꓯꓼ ꓢꓰꓼ ꓗꓷꓳ꓿ ꓖꓳ ꓡꓱ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓐꓴ ꓟꓯꓼ ꓜꓴꓻ ꓗꓪ ꓟꓯꓼ ꓢꓰꓼ ꓢꓷ. ꓠꓲ, ꓟꓽ ꓢꓷ. ꓢꓴ ꓮ ꓟꓬ, ꓙꓳˍ ꓟ ꓑꓶ. ꓓꓴ ꓟꓯꓼ ꓢꓷ. ꓠꓲ, ꓟ. ꓖꓶ ꓗꓷꓳ꓿ 1099 ꓘꓳꓼ ꓕꓯ ꓙꓲ‐ꓢꓴ ꓢꓲꓺ ꓤ ꓟꓯꓼ ꓜꓴꓻ ꓠꓬ ꓙꓱ‐ꓣꓴ‐ꓢ‐ꓡꓱ ꓔꓯ ꓧꓪ. ꓡꓰꓳ꓿