Nicacea ꓡꓳ ꓒꓱ ꓗꓪ ꓖꓪꓽ ꓙꓱ ꓜꓲꓼ ꓓꓴ ꓓꓽ ꓚꓱ, (Council of Niceae )

#rvalisu #Council of Ninaea #creditphoto

Monday, October 02, 2023

Nicacea ꓡꓳ ꓒꓱ ꓗꓪ ꓖꓪꓽ ꓙꓱ ꓜꓲꓼ ꓓꓴ ꓓꓽ ꓚꓱ, Council of Nicea

ꓮ ꓠꓱ ꓘꓴ ꓜꓲꓼ ꓞꓳ ꓠꓯ ꓗꓪ ꓬꓰ ꓟ ꓖꓪꓽ ꓙꓱ ꓜꓲꓼ ꓓꓴ ꓠꓬ ꓘꓴ ꓜꓲꓼ ꓞꓳ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟ. ꓖꓶ ꓔ ꓟ ꓚꓱ, ꓔꓯ ꓗꓽ ꓕꓽ ꓠ, ꓟ ꓥ ꓡꓳ꓿ ꓖꓳ ꓡꓱ ꓟ ꓟꓽ ꓞꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓚꓱ, ꓗꓪ ꓪꓴꓽ ꓟꓴ ꓡ ꓠ, ꓟ ꓚꓱ, ꓟꓲ ꓥ ꓡꓳ꓿ ꓕꓱ ꓖꓪꓽ ꓙꓱ ꓜꓲꓼ ꓓꓴ ꓬꓰ ꓗꓷ ꓟ ꓗꓪ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓓꓽ ꓐꓴ ꓮ ꓙꓵꓽ ꓐꓽ ꓟ ꓟꓵ ꓗꓳ ꓓꓵ ꓓꓵ ꓔꓲꓺ ꓒ ꓓꓽ ꓐꓴ ꓖꓪꓽ ꓙꓱ ꓜꓲꓼ ꓓꓴ ꓐꓰ ꓚꓲ ꓛꓬ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓔꓲꓺ ꓒ ꓓꓽ ꓐꓴ ꓖꓪ ꓙꓱ ꓜꓲꓼ ꓓꓴ ꓥ ꓟꓲ ꓬꓰ ꓗꓷ ꓟ ꓥ ꓡꓳ꓿

Nicaea ꓡꓳ ꓒꓱ ꓗꓪ ꓬꓰ ꓗꓷ ꓟ ꓖꓪꓽ ꓙꓱ ꓜꓲꓼ ꓓꓴ ꓥ ꓟ ꓪꓴ. ꓠꓬꓲ Nicene Creed ꓝꓲ ꓓꓴ ꓐꓴ ꓙꓵꓻ ꓠꓲ, ꓪꓽ ꓘꓴ ꓘꓶꓽ ꓔꓯ ꓪꓽ ꓘꓴ ꓓꓴ ꓔꓯ ꓕꓱ ꓖꓪꓽ ꓙꓱ ꓜꓲꓼ ꓓꓴ ꓗꓪ ꓔꓲꓺ ꓒ ꓓꓽ ꓐꓴ ꓖꓪꓽ ꓙꓱ ꓗꓷ ꓟ ꓚꓱ, ꓮ ꓙꓵꓽ ꓐ ꓟ ꓥ ꓡꓳ꓿ Nicacea ꓡꓳ ꓒꓱ ꓗꓪ ꓬꓰ ꓗꓷ ꓟ ꓖꓪꓽ ꓙꓱ ꓜꓲꓼ ꓓꓴ ꓠꓬ General Council ꓟꓲ ꓥ ꓡꓳ꓿ ꓕꓱ ꓖꓪꓽ ꓙꓱ ꓜꓲꓼ ꓓꓴ ꓗꓪ ꓢꓲꓺ ꓒ ꓬꓰ‐ꓢꓴ ꓐꓰ ꓐ, ꓐꓽ ꓪꓴ‐ꓢ ꓠꓬ ꓪꓽꓦ ꓡꓯꓽ ꓘꓳ, ꓟ ꓙꓵꓽ ꓪ ꓙꓳˍ ꓟ ꓚꓱ, ꓔꓯ ꓖꓪꓽ ꓙꓱ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ‐ꓢ ꓪꓽ ꓘꓴ ꓙꓵ, ꓗꓪ ꓖꓪ ꓟ ꓝꓲ ꓓꓴ ꓐꓴ ꓙꓵꓻ ꓠꓲ, ꓪꓽ ꓘꓴꓽ ꓘꓶꓽ ꓔꓯ ꓟꓴ ꓖꓪ ꓗꓪ ꓐꓰ ꓖꓪ ꓔꓬ ꓟ ꓥ ꓡꓳ꓿ ꓕꓱ ꓖꓪ ꓙꓱ ꓜꓲꓼ ꓓꓴ ꓗꓪ ꓤ ꓔꓲ ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓚꓵ. ꓚꓵ. ꓥ ꓟ ꓚꓱ, ꓔꓯ ꓐꓯ ꓑꓶ ꓗꓷ ꓟ ꓥ ꓡꓳ꓿

ꓪꓴ‐ꓢ ꓐꓰ ꓪꓴ‐ꓢ ꓠꓬꓲ ꓟꓳ ꓓꓴ ꓐꓰ ꓠꓬꓲ ꓟꓳ ꓓꓴ꓾ ꓪꓴ‐ꓢ ꓚꓵ ꓚꓵ ꓐꓰ ꓪꓴ‐ꓢ ꓚꓵ ꓚꓵ ꓚꓰꓼ ꓔ ꓢꓴ ꓟꓲ ꓟꓽ ꓙꓳ꓿ ꓙꓳˍ ꓟ ꓮ ꓙꓵꓽ ꓚꓰꓼ ꓔ ꓟ ꓕꓲ ꓣꓳ ꓖꓳ ꓓꓱ ꓗꓪ ꓬꓲ ꓔꓬ ꓡꓳ꓿ ꓐ, ꓐ ꓤ ꓔꓲ ꓢꓲꓽ ꓫꓬ ꓟ‐ꓦ ꓢꓽ ꓣꓳ ꓕꓲ ꓖꓳꓽ ꓓꓱ ꓪꓴ‐ꓢ ꓠꓬ ꓕꓲ ꓟ ꓥ ꓟ ꓚꓱ, ꓔꓯ ꓟ. ꓖꓶ ꓔ ꓡꓳ꓿

ꓕꓱ ꓖꓪ ꓙꓱ ꓜꓲꓼ ꓓꓴ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓟꓽ ꓥ ꓐꓰ ꓙꓵꓻ ꓢꓲ ꓠꓬꓲ ꓟ. ꓟꓲ ꓚꓺ ꓟ Arius ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓖꓼ ꓓꓳˍ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ Arius ꓔꓯ ꓘꓴ ꓜꓲꓼ ꓞꓳ ꓠꓬ ꓗ. ꓠꓯ ꓕꓯ ꓘꓴ ꓜꓲꓼ ꓞꓳ ꓗꓪ ꓬꓯꓼ ꓡ ꓠ, ꓟ ꓙꓵꓻ ꓪ ꓖꓶ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓡꓰ ꓥꓳꓽ ꓡꓰ ꓟ ꓟ. ꓟꓲꓽ ꓚꓺ ꓗꓷ ꓟ ꓪꓴ. ꓠꓬꓲ ꓬꓲ ꓢꓯꓼ ꓔꓬ ꓢꓲ ꓟ ꓙꓵ, ꓗꓪ ꓐꓰ ꓬꓲ. ꓫꓵꓻ ꓡꓰ ꓗ. ꓠꓯ ꓗꓪ ꓛꓲ ꓘꓴ ꓜꓲꓼ ꓞꓳ ꓔꓯ ꓮ ꓟꓬ, ꓫꓵꓽ ꓪꓴꓽ ꓖꓶ ꓟ ꓥ ꓡꓳ꓿

ꓗꓴꓷꓼ ꓙꓵꓽ ꓚꓱ, ꓗꓪ ꓙꓵꓻ ꓪ ꓙꓳ ꓢꓴ ꓕꓲ ꓐꓱ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ Arians ꓗ. ꓠꓯ ꓛꓳꓽ ꓢꓴ ꓐꓴ ꓔꓯ ꓙꓵꓻ ꓪ ꓖꓶ ꓟ ꓟꓲ ꓙꓳˍ ꓟ ꓥ ꓡꓳ꓿ ꓕꓲ ꓐꓱ ꓠꓬ ꓘꓴ ꓜꓲꓼ ꓞꓳ ꓔꓯ ꓮ ꓕꓯ ꓥ ꓟꓲ ꓗꓽ ꓕꓽ ꓢꓴ ꓥ ꓢꓲ ꓠꓬꓲ ꓮ ꓡꓱ ꓫꓵꓽ ꓫꓵꓽ ꓪꓴꓽ ꓖꓶ ꓡ ꓥ ꓟꓲ ꓢꓽ ꓣꓳ ꓕꓲ ꓖꓳꓽ ꓓꓱ ꓪꓴ‐ꓢ ꓔꓯ ꓦꓻ ꓡꓱ ꓟ ꓠꓬ ꓟꓽ ꓠꓽ ꓡꓰ ꓟ ꓥ ꓡꓳ꓿

ꓪꓴ‐ꓢ ꓔꓯ ꓟꓽ ꓦꓻ ꓡꓱ ꓢꓴ ꓐꓴ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓗꓼ ꓓꓳˍ ꓗꓷ ꓥ ꓟꓲ ꓬꓲ ꓪ ꓘꓳ, ꓣꓴ ꓟ ꓚꓱ, ꓔꓯ ꓟ. ꓟꓲ ꓚꓺ ꓟ ꓪꓴ. ꓠꓬꓲ Babarians ꓐꓰ ꓟꓬꓱꓺ ꓔ ꓟ ꓞꓳ ꓫꓵꓽ ꓗꓪ Arian ꓙꓵꓻ ꓠꓲ, ꓥ ꓟꓲ ꓐ, ꓐ ꓪꓴ‐ꓢ ꓠꓬ ꓪꓴ‐ꓢ ꓟꓽ ꓥ ꓡ ꓞꓳ ꓕꓲ ꓣꓳ ꓡꓰ ꓥ ꓡꓳ ꓐꓯ ꓟ ꓥꓳꓽ ꓡꓰ ꓟ ꓟ. ꓟꓲ ꓛꓲ ꓡ ꓟ ꓥ ꓡꓳ꓿ NIciea creed ꓐꓯ ꓟ ꓝꓲ ꓓꓴ ꓙꓵꓻꓠꓲ, ꓪꓽ ꓘꓴ ꓘꓶꓽ ꓔꓯ ꓮ.ꓓ 325 ꓘꓳꓼ ꓕꓯ ꓖꓪꓽ ꓗꓷ ꓟ ꓥ ꓡꓳ꓿,