ꓔꓱꓹ ꓚꓵˍ ꓟ ꓐꓰ ꓢꓲꓺ ꓡꓲꓻ ꓟ (Justice and Peace)

ꓟꓲ ꓠꓯ ꓞꓳ ꓤꓽ ꓐꓱ ꓶ ꓟꓽ ꓓ ꓬꓳꓸ ꓚꓵꓹ ꓟ ꓠꓬ ꓢꓲꓺ ꓡꓲꓹ ꓗꓹ ꓛꓲˍ ꓟ ꓥ ꓪ= ꓢꓲꓺ ꓡꓲꓹ ꓗꓹ ꓛꓲˍ ꓟ ꓙꓳ ꓕꓯ ꓢꓲ ꓫꓵꓽ ꓪꓴ ꓟꓽ ꓙꓳ꓾ ꓠꓲꓹ ꓟ ꓓꓵꓽ ꓙꓽ ꓫꓸ ꓓꓴ ꓟꓽ ꓙꓳ꓾ ꓙꓳ ꓢ ꓔꓬꓹ ꓢ ꓡ ꓓꓴ ꓥꓳ= ꓖꓳ ꓡꓲ ꓥˍ ꓟꓲ ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓢꓲꓺ ꓡꓲꓹ ꓗꓹ ꓛꓲˍ ꓟ ꓟꓽ ꓙꓳ꓾ ꓙꓳ ꓢ ꓔꓬꓹ ꓢˍ ꓟ ꓟꓽ ꓙꓳˍ ꓟ ꓬꓲ ꓔꓶꓸ ꓮꓽ ꓟꓬꓹ ꓙꓳˍ ꓡꓳ= ꓕꓱ ꓡꓰ ꓗ ꓡꓹ ꓟ ꓠꓬ ꓟꓽ ꓓ ꓠꓬ ꓕꓱꓹ ꓚꓵꓹ ꓟ ꓐꓯˍ ꓟ ꓕꓱ ꓜꓳꓹ ꓟ ꓟꓽ ꓙꓳˍ ꓟ ꓪꓴꓸ ꓠꓬꓲ ꓥˍ ꓡꓳ= ꓙꓴꓢꓔꓲꓚꓰ ꓮꓠꓓ ꓑꓰꓮꓚꓰ ꓐꓯˍ ꓟ ꓥ ꓪ= ꓖꓳ ꓡꓲ ꓠꓬꓲ ꓔꓱꓹ ꓚꓵˍ ꓟ ꓔꓱꓹ ꓜꓳꓹ ꓟ ꓙꓳ ꓔꓯ ꓢꓲ ꓗꓹ ꓛꓲ ꓢꓲꓺ ꓡꓲꓹ ꓟ ꓐꓯˍ ꓟ ꓠꓬ ꓙꓳ ꓡ ꓓꓴ ꓥꓳ= ꓕꓱ ꓚꓵꓹ ꓟ ꓟꓽ ꓙꓳˍ ꓟ ꓬꓲ ꓢꓷꓸ ꓡꓰ ꓓꓴ ꓠꓬ ꓮꓸ ꓫꓵ ꓥˍ ꓡ? ꓐꓯ ꓠꓬ ꓞꓳ ꓤꓽ ꓔꓯ ꓥꓲꓸ ꓔ ꓟ꓾ ꓛꓳꓽ ꓟꓽ ꓟꓵ ꓠꓬꓲ ꓟꓽ ꓟꓵꓹ ꓟ꓾ ꓞꓳ ꓫꓵꓽ ꓘꓶꓹ ꓟ꓾ ꓙꓵ ꓠꓲꓹ ꓘꓶˍ ꓟ꓾ ꓞꓳ ꓤꓽ ꓪ ꓙꓵꓽ ꓪꓽ ꓟꓽ ꓪꓸ ꓟ꓾ ꓞꓳ ꓤꓽ ꓟꓬꓱ ꓓꓳꓽ ꓔꓯ ꓒꓵꓽ ꓗꓹ ꓟꓽ ꓬꓰˍ ꓟ꓾ ꓔꓱ ꓔꓱꓺ ꓟꓽ ꓬꓰˍ ꓟ꓾ ꓪꓽ ꓙꓵꓽ ꓪꓽ ꓙꓳˍ ꓟ ꓔꓯ ꓟꓽ ꓐꓹ ꓖꓶˍ ꓟ꓾ ꓞꓳ ꓫꓵꓽ ꓕꓲꓽ ꓫꓵꓽ ꓡꓰ ꓢꓲ ꓟꓬꓽ ꓠꓬꓲ ꓐꓶꓹ ꓠꓬꓲ ꓪ ꓠ ꓬꓰˍ ꓟ꓾ ꓙꓵ ꓠꓲꓹ ꓕꓲꓽ ꓟꓼ ꓡꓰ ꓢꓲ ꓪ ꓠ ꓬꓰˍ ꓟ꓾ ꓞꓳ ꓜꓴ ꓞꓳ ꓟꓯꓼ ꓠꓬ ꓟꓽ ꓪ ꓞꓳ ꓤꓽ ꓕꓲꓽ ꓢꓯꓼ ꓟ ꓢꓲ ꓗꓴꓷꓼ ꓔꓯ ꓙꓵꓽ ꓔꓬꓹ ꓟ ꓕꓱ ꓡꓰꓳ ꓫꓵꓽ ꓕꓲꓽ ꓫꓵ ꓡꓰ ꓕꓲꓽ ꓫꓵꓽ ꓑꓶꓸ ꓓꓴ ꓠꓲ ꓣꓳꓽ ꓠꓯꓸꓼ ꓗꓪ ꓢꓲꓺ ꓡꓲꓹ ꓗꓹ ꓛꓲˍ ꓟ ꓟꓽ ꓙꓳˍ ꓟ ꓥ ꓪ= 

ꓟꓬꓽ ꓠꓬꓲ ꓐꓶꓹ ꓠꓬꓲ ꓕꓱ ꓡꓰ ꓗ ꓡꓹ ꓟ ꓠꓬ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓯꓸ ꓦꓬꓸ ꓙꓵˍ ꓟ꓾ ꓚꓵꓸ ꓛꓬꓽ ꓐꓱ ꓶ ꓡꓰ ꓢꓲ ꓓꓵꓽ ꓙˍ ꓟ꓾ ꓗꓴꓷ ꓙꓵꓽ ꓪ ꓔꓯ ꓣꓱꓽ ꓢꓲ ꓞꓳ ꓤꓽ ꓔꓯ ꓥꓲꓸ ꓔ ꓟ ꓕꓱ ꓡꓰꓳ ꓫꓵꓽ ꓪꓴꓸ ꓠꓬꓲ ꓗꓸ ꓛꓲꓽ ꓢꓲꓺ ꓡꓲꓹ ꓟ ꓟꓽ ꓙꓳˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓕꓱ ꓡꓰ ꓟꓽ ꓔꓰˍ ꓟ ꓔꓱ ꓜꓳꓹ ꓟ ꓟꓽ ꓙꓳˍ ꓟ ꓕꓱ ꓡꓰ ꓫꓵꓽ ꓕꓯ ꓫꓬ ꓑꓱ ꓠ ꓗꓹ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓲ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓕꓱ ꓡꓰ ꓬꓰ ꓠꓹ ꓟ ꓐꓱ ꓶ 1965 ꓘꓳꓼ ꓦꓮꓔꓲꓚꓮꓠ ꓲꓲ ꓗꓪ ꓚꓳꓸ ꓓꓽ ꓪꓴꓸ ꓔꓴ ꓢꓲ ꓑꓳꓠꓔꓲꓝꓲꓚꓮꓡ ꓚꓳꓴꓠꓚꓲꓡ ꓝꓳꓣ ꓙꓴꓢꓔꓲꓚꓰ ꓮꓠꓓ ꓑꓰꓮꓚꓰ ꓐꓯꓹ ꓟ ꓜꓴ ꓔꓯ ꓒꓴ ꓔ ꓟ ꓥˍ ꓡꓳ= ꓕꓱ ꓟ ꓜꓴ ꓠꓬ ꓟꓲ ꓠꓯ ꓗꓪ ꓔꓱꓹ ꓚꓵˍ ꓟ ꓙꓳ ꓠꓹ ꓟ ꓢꓲꓺ ꓡꓲꓹ ꓗꓹ ꓛꓲˍ ꓟ ꓙꓳ ꓠꓹ ꓟ ꓐꓱ ꓶ ꓕꓱ ꓡꓰ ꓢꓯꓼ ꓕꓵꓼ ꓔꓬ ꓟ ꓥ ꓪ= ꓕꓱ ꓡꓰ ꓢꓯꓼ ꓕꓵꓼ ꓕꓯ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓠꓬꓲ ꓟꓳ ꓓꓴ ꓠꓯꓸꓼ ꓗꓪ ꓟꓬꓱꓽ ꓬꓰ ꓠꓹ ꓟ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓔꓯ ꓟꓸ ꓖꓶˍ ꓟ ꓠꓯꓸꓼ ꓗꓪ ꓔꓱꓹ ꓚꓵˍ ꓟ ꓐꓰ ꓢꓲꓺ ꓡꓲꓹ ꓗꓹ ꓛꓲ ꓟ ꓙꓳ ꓠꓹ ꓟ ꓟꓸ ꓖꓶ ꓐ ꓡ ꓠꓹ ꓟ꓾ ꓖꓳ ꓟ ꓔꓯ ꓟꓬꓽ ꓠꓬꓲ ꓟꓳ ꓡ ꓠ ꓟꓸ ꓖꓶꓽ ꓠꓹ ꓟ ꓔꓱꓹ ꓚꓵˍ ꓟ ꓐꓰ ꓢꓲꓺ ꓡꓲꓹ ꓗꓹ ꓛꓲˍ ꓟ ꓔꓯ ꓟꓬꓽ ꓠꓬꓲ ꓙꓳ ꓡ ꓠꓹ ꓟ ꓐꓱ ꓶ ꓓꓵꓽ ꓙ ꓢꓲ ꓟꓬꓱꓽ ꓬꓰ ꓠꓹ ꓟ ꓜꓴ ꓒꓴ ꓔ ꓟ ꓥˍ ꓡꓳ= ꓕꓱ ꓟ ꓠꓬ ꓘꓴ ꓜꓲꓼ ꓞꓳ ꓜꓴ ꓚꓰ ꓥˍ ꓟ ꓔꓲꓺ ꓒꓽ ꓪꓸ ꓔꓲ ꓣꓳꓸ ꓙꓳ ꓟ ꓠꓯꓸꓼ ꓗꓪ ꓟ ꓜꓴ ꓚꓰ ꓠꓯꓸꓼ ꓗꓪ ꓟ ꓜꓴ ꓕꓲꓽ ꓟ ꓥˍ ꓡꓳ= ꓕꓱ ꓡꓰ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓔꓯ ꓟꓳꓸ ꓟꓸ ꓖꓶ ꓕꓯꓽ ꓕꓱ ꓟ ꓔꓱꓹ ꓜꓳˍ ꓟ ꓔꓱ ꓚꓵꓹ ꓟ ꓚꓱꓹ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓪꓴ ꓡꓰ ꓠ ꓟꓸ ꓖꓶ ꓠꓹ ꓟ꓾ ꓟꓬꓱꓽ ꓬꓰ ꓜꓽ ꓔꓬ ꓢꓴ ꓪꓽ ꓜꓽ ꓬꓰ ꓔꓬ ꓢꓴ ꓖꓳ ꓟ ꓡꓰ ꓟꓽ ꓞꓲ ꓡꓳ ꓑ ꓢꓲꓽ ꓔꓯꓸ ꓐꓴ ꓠꓬꓲ ꓗꓴꓸ ꓚꓸ ꓗꓪ ꓝꓸ ꓡꓯꓽ ꓘꓳꓹ ꓟ ꓠꓯꓸꓼ ꓗꓪ ꓟꓬꓽ ꓠꓬꓲ ꓐꓶꓹ ꓠꓬꓲ ꓪꓴꓽ ꓡ ꓟꓴ ꓡ ꓠ ꓔꓱꓹ ꓚꓵꓹ ꓟ ꓚꓱꓹ ꓔꓯ ꓔꓱꓹ ꓜꓳˍ ꓟ ꓚꓱꓹ ꓔꓯ ꓟꓬ ꓠꓬꓲ ꓟꓳ ꓡ ꓠ ꓟꓸ ꓖꓶ ꓠꓹ ꓟ ꓐꓱ ꓶ ꓥˍ ꓡꓳ=

ꓞꓳ ꓤꓽ ꓪ ꓙꓵꓽ ꓪꓽ꓾ ꓞꓳ ꓤꓽ ꓕꓲꓽ ꓣꓳ ꓟꓬꓱ ꓓꓳꓽ ꓔꓯ ꓒꓵꓽ ꓗꓹ ꓬꓰ ꓠꓹ ꓟ꓾ ꓤꓽ ꓟꓶꓼ ꓤꓼ ꓐꓴ ꓪ ꓙꓵꓽ ꓪꓽ ꓕꓱ ꓡꓲꓳꓹ ꓫꓵꓽ ꓔꓯ ꓟꓬꓽ ꓠꓬꓲ ꓢꓷꓸ ꓠꓹ ꓟ ꓐꓱ ꓶ ꓥˍ ꓡꓳ= ꓕꓱ ꓡꓰ ꓬꓰꓹ ꓕꓯ ꓔꓱꓹ ꓚꓵˍ ꓟ ꓔꓱꓹ ꓜꓳˍ ꓟ ꓐꓰ ꓢꓲꓺ ꓡꓲꓹ ꓗꓹ ꓛꓲˍꓟ ꓬꓰˍ ꓕꓯ ꓞꓳ ꓤꓽ ꓪꓴꓽ ꓡ ꓟꓴ ꓡ ꓠ ꓚꓱꓹ ꓬꓰ ꓠꓹ ꓟ ꓐꓰ ꓞꓳ ꓤꓽ ꓪ ꓙꓵꓽ ꓪꓽ ꓕꓯ ꓐꓬ ꓡꓰ ꓝꓲꓹ ꓟ ꓥ ꓕꓯ ꓑꓳ ꓔꓯ ꓫꓹ ꓑꓱ ꓐ ꓡ ꓠꓹ ꓟ ꓐꓱ ꓶ ꓮ ꓕꓯ ꓥˍ ꓟꓲ ꓡꓳꓸ ꓙ ꓔ ꓙ ꓠꓹ ꓟ ꓚꓬꓴꓹ ꓙ ꓠꓹ ꓟ ꓢꓯꓼ ꓕꓵꓼ ꓠˍ ꓟ ꓐꓱ ꓶ ꓥˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓠꓬꓲꓸ ꓠꓬꓲ ꓟꓬꓮꓠ-ꓟ ꓗꓴꓷꓼ ꓗꓪ ꓥˍ ꓟꓲ ꓙꓴꓢꓔꓲꓚꓰ ꓮꓠꓓ ꓑꓰꓮꓚꓰ ꓚꓳꓟꓟꓲꓢꓢꓲꓳꓠ ꓐꓯ ꓢꓲ ꓜꓴ ꓕꓲꓽ ꓟ ꓕꓱ ꓡꓰ ꓟꓬꓱꓽ ꓬꓰ ꓔꓬꓹ ꓟ ꓥ ꓪ= ꓕꓱ ꓟ ꓠꓬ ꓗꓴꓷꓼ ꓘꓴ ꓗꓪ ꓢꓲꓺ ꓡꓲꓹ ꓟ ꓙꓳ ꓠꓹ ꓟ ꓞꓳ ꓫꓵꓽ ꓐꓰ ꓕꓲꓽ ꓫꓵꓽ ꓠꓬꓲꓽ ꓗꓴꓸ ꓚꓸ ꓗꓪ ꓛꓴꓽ ꓙꓳˍ ꓟ ꓠꓲꓹ ꓟ ꓟꓽ ꓢ ꓡꓯꓽ ꓘꓳˍ ꓟ ꓕꓱ ꓡꓲꓳꓹ ꓫꓵꓽ ꓔꓯ ꓟꓶꓽ ꓡꓰ ꓠ ꓢꓯꓼ ꓕꓵꓼˍ ꓟ꓾ ꓙꓵ ꓠꓲꓹ ꓕꓲꓽ ꓟ ꓐꓰ ꓕꓲꓽ ꓟ ꓟꓬꓽ ꓠꓬꓲ ꓐꓶꓹ ꓠꓬꓲ ꓢꓷꓸ ꓡꓰꓽ ꓘꓳ ꓠ꓾ ꓪꓽ ꓡꓯꓽ ꓘꓳ ꓕꓽ ꓡꓯꓽ ꓘꓳ ꓠ ꓕꓱ ꓡꓰ ꓢꓯꓼ ꓕꓵˍ ꓟ ꓬꓰ ꓔꓬꓹ ꓟ ꓥ ꓪ= ꓖꓳ ꓟ ꓡꓰ ꓟꓽ ꓞꓲ ꓠꓬꓲꓸ ꓠꓬꓲ ꓢꓰꓼ ꓡꓯꓽ ꓘꓳ ꓓꓶꓽ ꓡꓯꓽ ꓘꓳˍ ꓟ ꓐꓶ ꓓꓴ ꓠꓲ ꓫꓵꓽ ꓪꓴ ꓓꓳ ꓡꓹ ꓟ ꓔꓯ ꓥˍ ꓟꓲ ꓕꓱ ꓟ ꓔꓯ ꓥˍ ꓟꓲ ꓟꓶꓽ ꓡꓰ ꓠ ꓫꓵꓽ ꓪꓴ ꓠꓬ ꓟꓽ ꓟꓬꓽ ꓡ ꓠ ꓣꓳ ꓡꓰ ꓠ ꓕꓱ ꓡꓰ ꓢꓯꓼ ꓕꓵꓼ ꓔꓬꓹ ꓟ ꓥ ꓪ= ꓕꓱ ꓟ ꓠꓬ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓗꓪ ꓟ ꓙꓴꓢꓔꓲꓚꓰ ꓮꓠꓓ ꓑꓰꓮꓚꓰ ꓚꓳꓟꓟꓲꓢꓢꓲꓳꓠ ꓡꓰ ꓬꓰ ꓔꓬꓹ ꓟ ꓟꓬꓱꓽ ꓐꓴ ꓥˍ ꓡꓳ=