ꓔꓶꓻ ꓙꓱꓼ ꓔꓯ ꓮ ꓟꓴꓸ ꓟꓴ ꓗꓪ ꓛꓬ꓾

ꓔꓶꓻ ꓙꓱꓼ ꓔꓯ ꓮ ꓟꓴꓸ ꓟꓴ ꓗꓪ ꓛꓬ꓾

ꓕꓲ ꓠꓬꓲ ꓙꓳ ꓕꓯ ꓮ ꓟꓬꓹ ꓛꓲ ꓪꓴ ꓟ ꓢꓯ. ꓐꓬꓱꓽ ꓔꓯꓺ ꓔꓶꓸ ꓗꓪ ꓦꓲꓸꓹ ꓢꓲꓹ ꓒ ꓕꓲ ꓣꓳ ꓔꓬ ꓡꓳ= ꓬꓲ ꓠꓬꓲ ꓬꓲ ꓟꓬꓱꓽ ꓬꓰ ꓠꓹ ꓟ ꓮ ꓙꓵ ꓔꓯ ꓠꓲꓹ ꓟ ꓗꓪ ꓗꓷ ꓔ ꓢꓲ ꓢꓯꓼ ꓕꓵꓼ_ ꓡꓳ= ꓦꓲꓸꓹ ꓢꓲꓹ ꓒ ꓖꓳ ꓕꓲ ꓣꓳ ꓔꓯ ꓡ ꓞꓳ ꓕꓲ ꓐꓱ ꓠꓬ ꓤ ꓑ ꓤ ꓥ ꓢꓲ꓾ ꓦꓲꓸꓹ ꓢꓲꓹ ꓔꓬ ꓡꓳ ꓐꓰ ꓐꓯ ꓢꓲ꓾ ꓠꓬꓲꓻ ꓟꓽ ꓒꓵꓽ ꓕꓱ ꓡꓱ ꓬꓰ ꓡꓳ= ꓖꓳ ꓕꓲ ꓣꓳ ꓠꓬ ꓢꓴ ꓡꓰ ꓮ ꓡꓰ ꓐꓯ ꓥ ꓟꓲ ꓬꓲ ꓟꓬꓱꓽ ꓬꓰ ꓠ ꓔ ꓟ ꓮ ꓙꓵ ꓔꓯ ꓬꓰ ꓔꓬ ꓡꓳ= ꓦꓲꓸꓹ ꓢꓲꓹ ꓓꓳꓺ ꓡꓰ ꓠꓬ ꓢꓯꓸ ꓐꓬꓱꓽ ꓔꓯꓺ ꓔꓶꓸ ꓗꓪ ꓥ ꓟꓲ ꓟꓬꓱꓽ ꓬꓰ ꓡꓳ= ꓕꓲ ꓠꓬꓲ ꓛꓲ ꓡ ꓕꓯ ꓢꓯꓸ ꓐꓬꓱꓽ ꓡꓳꓸ ꓔꓶꓸ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓔꓯ ꓕꓱ ꓡꓱ ꓐꓯ ꓡꓳ꓾ꓟꓽ ꓟꓶ ꓫꓵ ꓕꓯ ꓥꓪ ꓠꓬ ꓢꓯꓸ ꓐꓬꓱꓽ ꓔꓯꓺ ꓔꓶꓸ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓕꓲ ꓣꓳ ꓬꓰ ꓐ ꓡ ꓡꓳ ꓐꓰ ꓐꓯ ꓖꓶ ꓡꓳ=

ꓖꓳ ꓕꓯ ꓢꓯꓸ ꓐꓬꓱꓽ ꓡꓳꓸ ꓔꓶꓸ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓕꓲ ꓣꓳ ꓡꓰ ꓠꓴ ꓦꓲꓸꓹ ꓢꓲꓹ ꓒꓽ ꓠꓬ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓮ ꓕꓯ ꓥ ꓟꓲ ꓟꓽ ꓒꓬꓱꓼ ꓡ ꓐꓰ ꓐꓯ ꓢꓲ꓾ ꓠꓬꓲꓺ ꓟꓽ ꓒꓵꓽ ꓕꓱ ꓡꓱ ꓬꓰ ꓡꓳ= ꓖꓳ ꓡꓰ ꓥ ꓟꓲ ꓦꓲꓸꓹ ꓢꓲꓹ ꓒ ꓖꓳ ꓕꓲ ꓪ ꓠꓬ ꓢꓯꓸ ꓐꓬꓱꓽ ꓔꓯꓺ ꓔꓶꓸ ꓗꓪ ꓬꓲ ꓟꓬꓱꓽ ꓬꓰ ꓠꓹ ꓟ ꓮ ꓟꓬꓹ ꓔꓯ ꓢꓯꓸ ꓕꓵꓼ ꓬꓰ ꓠꓲꓹ ꓫꓵ ꓟ ꓮ ꓙꓵ ꓔꓯ ꓬꓲ ꓙꓵꓹ ꓣꓴ ꓢꓲ꓾ ꓢꓯꓼ ꓕꓵꓼ ꓡꓳ= ꓟꓽ ꓟꓶ ꓫꓵ ꓕꓯ ꓢꓯꓸ ꓐꓬꓱꓽ ꓡꓳꓸ ꓔꓶꓸ ꓗꓪ ꓟꓬꓱꓽ ꓬꓰ ꓢꓴ ꓮ ꓟꓬꓹ ꓠꓬ ꓠꓱꓸ ꓐꓯꓼ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓒꓴ ꓮ ꓟꓬꓹ ꓪ ꓟ ꓟꓬꓱꓽ ꓗꓪ ꓟꓬꓱꓽ ꓬꓰ ꓙꓰꓳ= ꓖꓳ ꓕꓯ ꓬꓲ ꓠꓬꓲ ꓟꓬꓱꓽ ꓬꓰ ꓠ ꓗꓹ ꓟ ꓮ ꓙꓵꓽ ꓔꓯ ꓟꓬꓱꓽ ꓬꓰ ꓢꓲ꓾ ꓢꓯꓸ ꓐꓬꓱꓽ ꓡꓳꓸ ꓔꓶꓸ ꓗꓪ ꓥ ꓟꓲ ꓙꓵꓽ ꓢꓴ ꓕꓲ ꓣꓳ ꓒꓬꓱꓼ ꓡꓳ=

ꓟꓽ ꓟꓶ ꓫꓵ ꓕꓯ ꓢꓯꓸ ꓐꓬꓱꓽ ꓔꓯꓺ ꓔꓶꓸ ꓗꓪ ꓡꓳ ꓑ ꓕꓲ ꓣꓳ ꓡ ꓢꓲ꓾ ꓢꓲ ꓫꓬ ꓟꓽ ꓢꓲ ꓫꓬ ꓡꓳꓸ ꓠꓬꓲ ꓡ ꓡꓳ= ꓖꓳ ꓕꓯ ꓮ ꓘꓶꓸ ꓢꓲ ꓫꓬ ꓟ ꓔꓯ ꓡꓳꓸ ꓟꓳ ꓕꓯ ꓡꓳ ꓑ ꓠꓬ ꓮꓽ ꓟꓽ ꓡꓰ ꓬꓰ_ ꓟ ꓥˍ ꓡ ꓐꓰ ꓠ ꓠꓬꓲ ꓕꓯ ꓥꓪ ꓡꓰ ꓬꓰ ꓦ ꓟ ꓥ ꓡꓳ ꓐꓰ ꓒꓳꓹ ꓖꓶ ꓡꓳ= ꓖꓳ ꓕꓯ ꓡꓳ ꓑ ꓠꓬ ꓮ ꓘꓶꓸ ꓗꓹ ꓛꓲ ꓡꓰ ꓢꓲ ꓦꓲꓸꓹ ꓢꓲꓹ ꓒ ꓔꓯ ꓬꓲ ꓢꓯꓸ ꓐꓬꓱꓽ ꓡꓳꓸ ꓔꓶꓸ ꓗꓪ ꓟꓬꓱꓽ ꓬꓰ ꓢꓴ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓙꓵꓽ ꓪ ꓔꓯ ꓖꓶ ꓗꓷ ꓪ= ꓥ ꓪ꓾ ꓬꓲ ꓤ ꓠꓬꓲ ꓤ ꓐꓴ ꓕꓱ ꓔꓯꓺ ꓥꓳꓽ ꓔꓯ ꓣꓳ ꓡꓳꓸ ꓟꓳ ꓕꓯ ꓓ ꓪꓴ ꓕꓯ ꓠꓬ ꓠꓬꓲ ꓟꓽ ꓒꓵꓽ ꓕꓱ ꓡꓱ ꓬꓰ ꓟ ꓔꓯ ꓣꓳ ꓡꓳꓸ ꓟꓳ ꓪ ꓡꓳ=

 ꓖꓳ ꓡꓰ ꓐꓯ ꓥ ꓟꓲ ꓬꓲ ꓠꓬ ꓠꓲꓹ ꓟ ꓟꓽ ꓑꓬ ꓑꓬ ꓡꓰ ꓢꓯꓼ ꓕꓵꓼ ꓔꓶꓻ ꓙꓱꓼ ꓔꓯ ꓮ ꓟꓴꓸ ꓟꓴ ꓗꓪ ꓚꓬ ꓢꓲ꓾ ꓢꓯꓼ ꓕꓵꓼ ꓡꓳꓹ ꓬꓰ ꓟ ꓪꓴꓸ ꓠꓬꓲ ꓟꓽ ꓟꓶ ꓫꓵ ꓕꓯ ꓢꓯꓸ ꓐꓬꓱꓽ ꓡꓳꓸ ꓔꓶꓸ ꓗꓪ ꓟꓬꓱꓽ ꓬꓰ ꓢꓴ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ= ꓟꓲ ꓠꓯ ꓗꓪ ꓟꓬꓱꓽ ꓬꓰ ꓢꓴ ꓮ ꓟꓬꓹ ꓔꓬ ꓡꓳ꓾ ꓕꓲ ꓐꓱ ꓠꓬ ꓒꓴ ꓪ ꓠꓹ ꓟ ꓡꓰ ꓓꓵꓽ ꓙ ꓢꓲ꓾ ꓬꓰ ꓡꓳ= ꓕꓲ ꓐꓱ ꓠꓬ ꓟꓬꓱꓽ ꓔꓯ ꓠꓲꓹ ꓠꓵ ꓢꓲ꓾ ꓟꓬꓱꓽ ꓬꓰ ꓢꓴ ꓟꓲ ꓙꓳ ꓡꓳ= ꓣꓳ ꓟꓬꓱꓽ ꓬꓰ ꓟ ꓮ ꓙꓵꓽ ꓔꓯ ꓔꓶꓸꓹ ꓙꓱꓽ ꓚꓬ ꓢꓲ꓾ ꓢꓯꓼ ꓕꓵꓼ ꓐꓭ ꓠꓬ ꓕꓲ ꓠꓬꓲ ꓠꓬ ꓧꓪꓸ ꓡꓰ ꓓꓴ ꓔꓯ ꓘꓴꓹ ꓣꓴ ꓟꓶ ꓡꓳ ꓥꓳ=