ꓕꓲ ꓦꓲꓸꓹ ꓘꓴꓽ ꓗꓪ ꓫꓵꓽ ꓪꓴ ꓟꓽ ꓒꓬꓱꓼ ꓡ ꓠꓹ ꓟ

ꓕꓲ ꓦꓲꓸꓹ ꓘꓴꓽ ꓗꓪ ꓫꓵꓽ ꓪꓴ ꓟꓽ ꓒꓬꓱꓼ ꓡ ꓠꓹ ꓟ

ꓕꓲ ꓠꓬꓲ ꓙꓳ ꓕꓯ ꓕꓲ ꓦꓲꓸꓹ ꓫꓵꓽ ꓪꓴ ꓔꓯ ꓠꓹ ꓡꓳꓸꓹ ꓖꓶ ꓢꓴ ꓢꓷꓸ ꓙꓳ ꓒ ꓕꓲ ꓣꓳ ꓔꓬ ꓡꓳ= ꓖꓳ ꓢꓷꓸ ꓠꓲꓹ ꓙꓳ ꓒ ꓠꓬ ꓕꓲ ꓦꓲꓸꓹ ꓡ ꓙꓳ ꓗꓪ ꓦꓲꓸꓹ ꓢꓲꓽ ꓒ ꓐꓰ ꓦꓲꓸꓹ ꓢꓲ ꓟ ꓫꓵꓽ ꓪꓴ ꓔꓯ ꓠꓹ ꓡꓳ ꓖꓶ ꓢꓲ꓾ ꓡ ꓠꓹ ꓟ ꓗꓪ ꓫꓵꓽ ꓪꓴ ꓟꓽ ꓐꓬꓱꓼ ꓡ ꓠꓹ ꓟ ꓐꓱ ꓶ ꓐꓯ ꓟꓸ ꓖꓶ ꓓꓴ ꓬꓰ ꓡꓳ= ꓕꓲ ꓦꓲꓸꓹ ꓡ ꓞꓳ ꓠꓬꓲ: ꓫꓵ, ꓠꓬ ꓔꓳꓽ ꓜꓳꓽ ꓗꓷ ꓟ ꓫꓵꓽ ꓪꓴ ꓮ ꓙꓵ ꓔꓯ ꓐꓯ ꓟꓸ ꓖꓶ ꓡꓳ= ꓖꓳ ꓕꓯ ꓢꓷꓸ ꓠꓲꓹ ꓙꓳ ꓒ ꓠꓬ ꓤ ꓑ ꓤ ꓔꓯ ꓘꓴꓽ ꓢꓲ ꓕꓱ ꓡꓱ ꓐꓯ ꓡꓳ꓾ꓠꓴ ꓠꓬ ꓠꓴ ꓦꓲꓸꓹ ꓢꓲ ꓟ ꓟꓽ ꓙꓲˍ ꓟ ꓚꓱꓹꓔꓯ ꓡꓰ ꓐꓯ ꓢꓲ꓾ ꓝꓴꓲ ꓓꓰ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓴ ꓦꓲꓸꓹ ꓢꓲ ꓟ ꓠꓯꓸꓹ ꓗꓪ ꓙꓳˍ ꓟ ꓙꓲ ꓚꓱꓹ ꓟꓬꓱꓽ ꓬꓰ ꓟ ꓮ ꓙꓵꓹ ꓕꓳꓽ ꓶ ꓕꓱ ꓗꓪ ꓐꓳ ꓡꓯ ꓐꓰ ꓐꓯ ꓩꓴ ꓡꓳ=

ꓝꓮꓲ ꓕꓲ ꓧꓪꓽ ꓤ ꓟꓶ ꓤ ꓔꓯ ꓘꓴꓽ ꓢꓲ꓾ ꓠꓴ ꓥˍ ꓟꓲ ꓠꓴ ꓦꓲꓸꓹ ꓢꓲꓽ ꓒ ꓟꓽ ꓙꓲ ꓟ ꓔꓯ ꓡꓰ ꓐꓯ ꓔꓬ ꓢꓲ ꓝꓴꓲ ꓓꓰ ꓔꓬ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓴ ꓦꓲꓸꓹ ꓢꓲꓽ ꓒ ꓠꓯꓸꓹ ꓗꓪ ꓙꓳ ꓟ ꓙꓲ ꓚꓱꓹ ꓟꓬꓱꓽ ꓬꓰ ꓟ ꓮ ꓙꓵ ꓕꓳꓽ ꓶ ꓕꓱ ꓗꓪ ꓐꓳ ꓡꓯ ꓐꓰ ꓐꓯ ꓩꓴ ꓡꓳ= ꓟꓶꓼ ꓘꓶꓼ ꓛꓲ ꓡ ꓔꓯ ꓦꓲꓸꓹ ꓢꓲꓽ ꓒ ꓠꓬ ꓕꓳꓽ ꓶ ꓕꓲ ꓑꓬ ꓗꓪ ꓬꓲ ꓦꓲꓸꓹ ꓟ ꓦꓲꓸꓹ ꓘꓴ ꓔꓯ ꓮ ꓡꓰ ꓢꓲ ꓫꓬ ꓟ ꓤ ꓠꓱ ꓮ ꓡꓰ ꓡꓳꓸꓸ ꓔ ꓟ ꓜ ꓮ ꓡꓰ ꓚꓸ ꓔ ꓟ ꓙꓲ ꓚꓱꓹ ꓮ ꓙꓵ ꓔꓯ ꓐꓳ ꓡꓳ= ꓕꓱ ꓟ ꓡꓰ ꓐꓰ ꓦꓲꓸꓹ ꓢꓲ ꓟ ꓥ ꓟꓲ ꓦꓲꓸꓹ ꓢꓲꓽ ꓒ ꓙꓲˍ ꓟ ꓟꓬꓱꓽ ꓬꓰ ꓟ ꓮ ꓙꓵꓹ ꓔꓯ ꓕꓳꓽ ꓶ ꓗꓪ ꓐꓳ ꓢꓲ꓾ ꓫꓵꓽ ꓪꓴ ꓚꓱꓹ ꓔꓯ ꓠꓹ ꓡꓳ ꓖꓶ ꓢꓴ ꓢꓷꓸ ꓠꓲꓹ ꓙꓳ ꓑ ꓔꓬ ꓗꓪ ꓙꓰ ꓡꓳ= ꓖꓳ ꓕꓲ ꓠꓬꓲ ꓗꓪ ꓐꓰ ꓦꓲꓸꓹ ꓢꓲꓽ ꓒ ꓦꓲꓸꓹ ꓢꓲ ꓟ ꓠꓬ ꓗꓹ ꓛꓲ ꓛꓲ ꓔꓬ ꓟꓶ ꓡꓰꓳ=

ꓕꓱ ꓚ ꓟꓲꓽ ꓔꓯ ꓣꓳ ꓡꓳꓸꓹ ꓠꓬꓲ ꓕꓯ ꓕꓲ ꓦꓲꓸꓹ ꓡ ꓞꓳ ꓘꓴꓽ ꓗꓪ ꓕꓲ ꓣꓳ ꓚꓳ ꓕꓲ ꓣꓳ ꓠꓲꓹ ꓟ ꓗꓪ ꓙꓳ ꓟ ꓐꓯ ꓠꓲꓹ ꓫꓵꓸꓸ ꓟ ꓕꓱ ꓡꓱ ꓫꓵ ꓔꓯ ꓟ ꓐꓯ ꓡꓯ ꓘꓳꓹ ꓟ ꓪꓴ ꓠꓬꓲ ꓘꓳꓼ ꓮ ꓟꓬꓹ ꓟꓶ ꓫꓵ ꓡ ꓔꓯ ꓠꓲꓹ ꓟ ꓟꓽ ꓢ ꓓꓴ ꓐꓯ ꓡꓯ ꓘꓳꓹ ꓓꓴ ꓫꓵꓽ ꓪꓴ ꓐꓬꓱꓼ ꓡ ꓟ ꓥ ꓡꓳ= ꓖꓳ ꓡꓰ ꓟ ꓪꓴꓸ ꓠꓬꓲ ꓕꓲ ꓦꓲꓸꓹ ꓘꓴꓽ ꓗꓪ ꓕꓲ ꓣꓳ ꓐꓰ ꓕꓲ ꓣꓳ ꓖ ꓖꓶ ꓡꓯ ꓘꓳꓹ꓾ ꓟꓽ ꓞꓲ ꓬꓰ ꓠꓲꓹ ꓫꓵꓸꓹ ꓟ ꓟꓬꓱꓽ ꓐꓰ ꓐꓯ ꓠꓲꓹ ꓫꓵ ꓟ ꓔꓯ ꓖꓪ ꓙꓱ ꓡꓯ ꓘꓳꓹ ꓕꓲ ꓡꓱ ꓬꓰ ꓠꓬ ꓕꓲ ꓦꓲꓸꓹ ꓘꓴ ꓗꓪ ꓫꓵꓽ ꓪꓴ ꓟꓽ  ꓐꓬꓱꓼ ꓡ ꓠꓹ ꓟ ꓔꓯ ꓧꓪꓸ ꓡꓰ ꓓꓴ ꓬꓲ ꓚꓱꓹ ꓥ ꓡꓳ= 

 

  

Add new comment

7 + 3 =