ꓙꓵ ꓠꓲꓹ ꓐꓰ ꓚꓬꓴꓹ ꓙˍ ꓟ ꓣꓱꓽ ꓛꓲꓽ (2) (Q & A)

ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶ ꓠꓹ ꓟ ꓚꓱꓹ ꓠꓱꓸ ꓐꓯꓼ ꓐꓯ ꓔ ꓟ ꓚꓱꓹ ꓔꓯ ꓝꓸ ꓢꓲ ꓐꓯ ꓟꓸ ꓖꓶ ꓓꓴ ꓥꓳ= ꓢꓲꓺ ꓒꓽ ꓬꓰ-ꓢꓴ ꓡꓰ ꓕꓱ ꓟ ꓟꓽ ꓬꓰ ꓠꓬ ꓚꓬꓴꓹ ꓙˍ ꓟ ꓣꓱꓽ ꓛꓲꓽ ꓟꓽ ꓐꓯꓹ ꓟꓶꓻ ꓐꓯˍ ꓟ ꓠꓱꓸ ꓐꓯꓼ ꓙꓳꓹ ꓢꓰꓼˍ ꓡꓳ= ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓗꓪ ꓠꓬ ꓢꓮꓚꓣꓮꓟꓰꓠꓔꓢ ꓐꓯꓹ ꓟ ꓫꓵꓽ ꓟ ꓙꓳˍ ꓡꓳ= ꓸꓼꓮꓚꓣꓮꓟꓰꓠꓔꓢ ꓐꓯꓹ ꓟ ꓠꓬ ꓪꓴ-ꓢ ꓣꓱꓽ ꓛꓲꓽ ꓔꓯ ꓑꓯꓹ ꓟꓶˍ ꓟ ꓪꓴ-ꓢ ꓣꓱꓽ ꓛꓲꓽ ꓐꓯˍ ꓟ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓔꓯ ꓐꓯꓹ ꓟꓶ ꓠꓹ ꓟ ꓚꓱꓹ ꓕꓯ ꓐꓯˍ ꓟ ꓥ ꓪ= ꓖꓳ ꓟ ꓠꓬ ꓮ ꓡꓰꓳ ꓫꓵꓽ ꓥꓹ ꓡ? ꓐꓯ ꓠꓬ ꓗꓳ ꓓꓱꓽ ꓔꓲꓹ ꓔ ꓟ꓾ ꓦ ꓢꓯꓼ ꓧꓳꓽ ꓖꓶˍ ꓟ꓾ ꓢꓲꓽ ꓫꓬ ꓑꓸ ꓑꓸ ꓘꓳꓹ ꓣꓴˍ ꓟ꓾ ꓝꓴꓲꓸ ꓣꓶꓸ ꓔ ꓟ꓾ ꓠ ꓢꓴ ꓒꓬꓽ ꓢꓴ ꓔꓯ ꓟꓲ ꓞꓶ ꓟꓲ ꓖꓶˍ ꓟ꓾ ꓔꓲ ꓒꓽ ꓟꓬꓱꓽ ꓐꓱꓽ ꓘꓶꓽ ꓔꓯ ꓘꓳꓹ ꓣꓴˍ ꓟ ꓐꓰ ꓡꓯꓽ ꓒꓯꓹ ꓝꓸ ꓔ ꓟ ꓕꓱ ꓡꓰꓳ ꓫꓵ ꓔꓯ ꓣꓱꓽ ꓛꓲꓽ ꓫꓵꓽ ꓟ ꓐꓰ ꓕꓱ ꓡꓰ ꓐꓯˍ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓖꓳ ꓫꓵꓽ ꓟ ꓠꓯꓸꓼ ꓗꓪ ꓠꓬ ꓟꓽ ꓓ ꓬꓳꓸ ꓚꓵꓹ ꓟ ꓠꓬ ꓗꓳ ꓓꓱꓽ ꓔꓲꓹ ꓔ ꓟ ꓐꓰ ꓢꓲꓽ ꓫꓬ ꓑꓸ ꓑꓸ ꓥˍ ꓟ ꓢꓲꓺ ꓒꓽ ꓬꓰ-ꓢꓴ ꓬꓲꓸ ꓫꓵꓽ ꓐꓰ ꓬꓲ ꓧꓪꓽ ꓔꓯ ꓘꓳꓹ ꓣꓴˍ ꓟ ꓥˍ ꓪ= ꓮ ꓡꓰꓳꓼ ꓐꓯ ꓠꓬ ꓬꓳ-ꓦ 3ꓽ 5 ꓗꓪ ꓬꓲꓺ ꓙꓬ ꓐꓰ ꓦ ꓡꓰ ꓦꓱ ꓔ ꓟ ꓟꓽ ꓙꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓪ ꓟꓽ ꓓ ꓐꓰ ꓐꓯ ꓔ ꓡꓳ= ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓬꓳ-ꓦ 6ꓽ 54 ꓥꓹ ꓠꓬ 6ꓽ ꓕꓲꓽ ꓕꓱ ꓡꓱꓸꓼ ꓠꓬ ꓢꓲꓺ ꓒꓽ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓓꓳ ꓢꓲ ꓜꓽ ꓢꓴ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶꓹ ꓥꓳ ꓐꓰ ꓐꓯ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓥꓹ ꓟ ꓔꓯ ꓘꓳꓹ ꓣꓴ ꓟꓽ ꓐ ꓡꓹ ꓢꓴ ꓥˍ ꓟꓲ ꓮꓽ ꓟꓬꓹ ꓔꓬꓹ ꓟ ꓕꓯ ꓕꓱ ꓕꓲꓽ ꓘꓴꓸ ꓗꓪ ꓡꓳꓸ ꓟꓳ ꓪ ꓓꓹ ꓡꓳ= 

ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓕꓱ ꓟ ꓬꓰ ꓠꓹ ꓟ ꓝꓲ ꓓꓴ ꓐꓴ ꓔꓯ ꓙꓵꓽ ꓪꓽ ꓖꓶ ꓔ ꓟ ꓔꓯ ꓟ-ꓕꓲ ꓕꓳꓽ ꓶ 26ꓽ 26- 27 ꓗꓪ "ꓠꓴ ꓪꓽ ꓕꓱ ꓟ ꓔꓯ ꓣꓴ ꓢꓲ ꓜꓽ꓾ ꓕꓱ ꓟ ꓠꓬ ꓥꓪ ꓗꓳ ꓓꓱꓽ ꓥˍ ꓡꓳ"= ꓟ-ꓕꓲ 26ꓽ 27-28 ꓗꓪ ꓡꓴ ꓗꓷ ꓔꓯ ꓣꓴ ꓢꓲ "ꓕꓱ ꓟ ꓠꓴ ꓪꓽ ꓮꓽ ꓙꓵꓽ ꓢꓴ ꓓꓳ꓾  ꓮ ꓡꓰꓳꓼ ꓐꓯ ꓠꓬ ꓕꓱ ꓟ ꓠꓽ ꓥꓪ ꓘꓶꓽ ꓫꓵꓼ ꓫꓵꓼ ꓥˍ ꓡꓳ= ꓕꓱ ꓟ ꓠꓬ ꓝꓴꓲꓸ ꓥꓸ ꓦ ꓟꓶ ꓠꓹ ꓟ ꓮ ꓟꓬꓹ ꓣꓳ ꓐꓱ ꓶ ꓧꓳꓸ ꓗꓶꓹ ꓟ ꓥˍ ꓡꓳ= ꓥꓪ ꓔꓯ ꓓꓵꓽ ꓙꓽ ꓛꓲ ꓡ ꓠꓹ ꓟ ꓕꓱ ꓡꓰ ꓬꓰ" ꓐꓰ ꓕꓱ ꓡꓰ ꓐꓯ ꓔ ꓐꓶ= ꓖꓳ ꓟ ꓑꓶꓸ ꓓꓴ ꓢꓲꓺ ꓒꓽ ꓬꓰ-ꓢꓴ ꓡꓰ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓜꓽ ꓢꓴ ꓓꓳ ꓢꓴ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶ ꓡ ꓓꓴ ꓥꓳꓻ ꓐꓯꓹ ꓟ ꓡꓰ ꓐꓰ ꓕꓲꓽ ꓡꓰꓻ ꓝꓲ ꓓꓴ ꓐꓴ ꓔꓯ ꓕꓱ ꓡꓰ ꓙꓵꓽ ꓪꓽ ꓖꓶꓽ ꓔ ꓢꓲ ꓝꓲ ꓓꓴ ꓐꓴ ꓙꓵꓽ ꓪꓽ ꓔꓯ ꓐꓯꓹ ꓟꓶ ꓢꓴ ꓡꓰ ꓢꓲꓺ ꓒꓽ ꓬꓰ-ꓢꓴ ꓐꓯꓹ ꓟ ꓡꓰ ꓐꓰ ꓐꓯꓹ ꓠꓬ ꓑꓸ ꓑꓸ ꓐꓰ ꓛꓱꓼ ꓡꓱꓼ ꓠꓬ ꓢꓲꓺ ꓒꓽ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓚꓵ ꓚꓵ ꓑꓬꓱꓼ ꓡ ꓥꓳ ꓐꓰ ꓕꓱ ꓡꓰ ꓙꓵ ꓔꓬꓹ ꓟ ꓥ ꓪ= ꓖꓳ ꓟ ꓔꓯ ꓜꓽ ꓢꓴ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓢꓯꓸꓼ ꓟꓬ ꓟꓶˍ ꓥꓳ ꓐꓰ ꓙꓵ ꓔꓬꓹ ꓟ ꓥ ꓪ= ꓖꓳ ꓡꓰ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓔ ꓟ ꓠꓯꓸꓼ ꓗꓪ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶ ꓡ ꓓꓴ ꓥꓳ ꓐꓯꓹ ꓟ ꓠꓯꓸꓼ ꓗꓪ ꓕꓱꓹ ꓔꓶ ꓠꓬ ꓟꓽ ꓓ ꓬꓳꓸ ꓚꓵꓹ ꓟ ꓥˍ ꓡꓳ=    

ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵꓹ ꓟ ꓠꓯꓸꓼ ꓗꓪ ꓠꓱꓸ ꓐꓯꓼ ꓕꓲꓽ ꓟ ꓠꓬ ꓟ-ꓕꓲ ꓕꓳꓽ ꓶ 16ꓽ 18-19 ꓗꓪ ꓟ ꓥˍ ꓡꓳ= ꓕꓱ ꓟ ꓥˍ ꓟꓲ ꓙꓵ ꓠꓲꓹ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵꓹ ꓟ ꓕꓲꓽ ꓟ ꓥ ꓪ= ꓬꓰ-ꓢꓴ ꓡꓰ ꓝꓲ ꓓꓴ ꓒꓲ-ꓕꓱ ꓔꓯ ꓐꓯꓹ ꓟ ꓠꓬ "ꓠꓴ ꓠꓽ ꓒꓲ-ꓕꓱ ꓥˍ ꓡꓳ= ꓡꓳ ꓓꓲ ꓕꓱ ꓟ ꓕꓯꓽ ꓢꓲ ꓗꓪ ꓥꓪ ꓘꓴ ꓜꓲꓼ ꓞꓳ ꓥꓪ ꓫꓬ ꓔ ꓬꓰ ꓥꓳ= ꓟꓸ ꓟꓲ ꓟꓵꓽ ꓪꓽ ꓠꓬꓲꓹ ꓟ ꓡꓰ ꓘꓴ ꓜꓲꓼ ꓞꓳ ꓔꓯ ꓧꓪꓸ ꓡꓰ ꓟꓽ ꓓ= ꓥꓪ ꓠꓬ ꓟꓴ ꓗꓪ ꓗꓴꓷꓼ ꓜꓳ ꓜꓴ ꓠꓴ ꓔꓯ ꓖꓶꓹ ꓥꓳ= ꓟꓲꓸ ꓠꓯ ꓗꓪ ꓠꓴ ꓡꓰ ꓞꓳꓹ ꓔ ꓟ ꓮꓸ ꓫꓵꓽ ꓥˍ ꓟꓲ ꓟꓴ ꓗꓪ ꓗꓪˍ ꓟꓲ ꓞꓳꓹ ꓔ ꓥꓳ= ꓟꓲ ꓠꓯ ꓗꓪ ꓠꓴ ꓡꓰ ꓩꓴ ꓗꓷꓹ ꓟ ꓮꓸ ꓫꓵꓽ ꓥˍ ꓟꓲ ꓟꓴ ꓗꓪ ꓗꓪˍ ꓟꓲ ꓩꓴ ꓗꓷˍ ꓥꓳ" ꓐꓰ ꓕꓱ ꓡꓰ ꓐꓯ ꓔ ꓡꓳ= ꓕꓱ ꓟ ꓠꓬ ꓝꓲ ꓓꓴ ꓒꓲ-ꓕꓱ ꓕꓯ ꓢꓲ ꓗꓪ ꓘꓴ ꓜꓲꓼ ꓞꓳ ꓔꓶ ꓔ ꓟ ꓥ ꓪ= ꓘꓴ ꓜꓲꓼ ꓞꓳ ꓠꓬ ꓮ ꓕꓯ ꓥˍ ꓟꓲ ꓟꓽ ꓐꓬ ꓡꓰ= ꓠꓲꓽ ꓪꓸ ꓔꓲꓸ ꓢ ꓓꓯꓼ ꓡꓰ ꓧꓪꓸ ꓡꓰ ꓟꓽ ꓓ ꓐꓰ ꓕꓱ ꓡꓰ ꓐꓯˍ ꓟ ꓥ ꓪ= ꓖꓳ ꓡꓰ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓘꓴ ꓜꓲꓼ ꓞꓳ ꓕꓲꓽ ꓟ ꓡꓰ ꓔꓶ ꓔ ꓡꓳ= ꓖꓳ ꓟ ꓘꓴ ꓜꓲꓼ ꓞꓳ ꓠꓬ ꓮ ꓡꓰ ꓕꓲꓽ ꓟ ꓟ ꓥ ꓡ? ꓮ ꓡꓰꓳꓼ ꓐꓯ ꓠꓬ ꓘꓴ ꓜꓲꓼ ꓞꓳ ꓖꓳ ꓕꓲꓽ ꓟ ꓡꓰ ꓢꓲ ꓞꓳ ꓠꓹ ꓟ ꓐꓰ ꓩꓴ ꓗꓷ ꓠꓹ ꓟ ꓙꓵꓽ ꓪꓽ ꓙꓳ ꓡꓳ= ꓠꓬꓲꓸ ꓠꓬꓲ ꓗꓕꓳ-ꓡꓲꓼ ꓘꓴ ꓜꓲꓼ ꓞꓳ ꓕꓱ ꓟ ꓥ ꓪ= ꓝꓲ ꓓꓴ ꓒꓲ-ꓕꓱ ꓬꓲ ꓪꓴꓸ ꓛꓲ ꓕꓲꓽ ꓣꓳ ꓫꓵ ꓠꓬ ꓕꓲꓽ ꓣꓳ ꓝꓸ ꓡꓹ ꓟ ꓠꓬꓲꓸ ꓠꓬꓲ 266 ꓣꓳ ꓗꓪ ꓛꓲꓹ ꓪ= ꓕꓱ ꓟ ꓠꓬ ꓗ_ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓠꓬ ꓕꓱꓹ ꓚꓵˍ ꓟ ꓘꓴ ꓜꓲꓼ ꓞꓳ ꓥˍ ꓡꓳ ꓐꓯꓹ ꓟ ꓬꓲ ꓢꓷꓸ ꓡꓰ ꓓꓴ ꓥˍ ꓡꓳ=

ꓖꓳ ꓡꓰ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓮ ꓡꓰ ꓐꓯꓹ ꓡ? ꓐꓯ ꓠꓬ ꓳꓠꓰ꓾ ꓧꓳꓡꓬ꓾ ꓚꓮꓔꓧꓳꓡꓲꓚ ꓐꓰ ꓮꓑꓳꓢꓔꓳꓡꓲꓚ ꓐꓯꓹ ꓟ ꓥ ꓪ= ꓳꓠꓰ ꓐꓯꓹ ꓟ ꓠꓬ ꓘꓴ ꓜꓲꓼ ꓞꓳ ꓕꓲꓽ ꓟ꓾ ꓮꓸ ꓣꓳ ꓐꓱ ꓕꓲꓽ ꓟꓼ꓾ ꓮꓸ ꓣꓳ ꓡꓳ ꓒꓽ ꓕꓲ ꓣꓳ ꓐꓯꓹ ꓟ ꓥ ꓪ= ꓢꓲꓽ ꓫꓬ ꓕꓳ ꓶ ꓗꓪ ꓐꓯ ꓔ ꓟ ꓥ ꓪ= ꓧꓳꓡꓬ ꓐꓯꓹ ꓟ ꓠꓬ ꓪꓴ-ꓢ ꓚꓵ ꓚꓵ ꓥˍ ꓟ ꓢꓲꓺ ꓒꓽ ꓬꓰ-ꓢꓴ ꓡꓰ ꓔꓶ ꓔ ꓟ ꓘꓴ ꓜꓲꓼ ꓞꓳ ꓕꓲꓽ ꓟꓼ ꓙꓳˍ ꓡꓳ= ꓖꓳ ꓟ ꓠꓬ ꓪꓴ-ꓢ ꓚꓵꓸ ꓛꓬ ꓡꓰ ꓔꓶ ꓔ ꓠꓬꓲ ꓢꓲꓽ ꓫꓬꓹ ꓡꓳ= ꓝꓲ ꓓꓴ ꓒꓲ-ꓕꓱ ꓕꓯ ꓗꓪ ꓔꓶ ꓔ ꓟ ꓥ ꓪ= ꓗ-ꓕꓳ-ꓡꓲꓼ ꓐꓯꓹ ꓟ ꓬꓲ ꓟꓸ ꓟꓲ ꓠꓬ ꓟꓴ ꓗꓳꓹ ꓓꓵ ꓓꓵꓺ ꓮꓽ ꓙꓵꓽ ꓐ ꓔꓬꓹ ꓟ ꓐꓯꓹ ꓟ ꓬꓲ ꓟꓸ ꓟꓲꓽ ꓥˍ ꓡꓳ= ꓐꓯ ꓟꓵ ꓫꓱꓹ ꓟ ꓠꓬ ꓞꓳ ꓫꓵꓽ ꓞꓳ ꓙꓵ ꓮꓽ ꓙꓵꓼ ꓐꓹ ꓟ ꓐꓯꓹ ꓟ ꓬꓲ ꓟꓸ ꓟꓲ ꓥˍ ꓡꓳ= ꓗ ꓕꓳ-ꓡꓲꓼ ꓐꓯꓹ ꓟ ꓠꓬ ꓟꓲ ꓠꓯ ꓗꓪ ꓙꓰ-ꓢꓴ ꓢꓲ ꓤꓼ ꓐꓴ ꓔꓯꓹ ꓡꓰ ꓐꓯꓹ ꓟ ꓟꓽ ꓥ ꓟꓴ ꓗꓪ ꓗꓴꓷꓼ  ꓗꓪ ꓛꓲ ꓔꓬꓹ ꓟ ꓮꓽ ꓙꓵꓽ ꓔꓯ ꓐꓯꓹ ꓟ ꓥ ꓪ= ꓞꓳ ꓫꓵꓽ ꓞꓳ ꓙꓵꓽ ꓟꓽ ꓒꓯꓹ ꓮꓽ ꓙꓵꓽ ꓔꓯ ꓐꓯˍ ꓟ ꓥ ꓪ= ꓮꓑꓳꓢꓔꓳꓡꓲꓚ ꓐꓯꓹ ꓟ ꓠꓬ ꓝꓲ ꓓꓴ ꓠꓯꓸꓼ ꓗꓪ ꓐꓰ ꓫꓶꓸ ꓡꓹ ꓟ ꓘꓴ ꓜꓲꓼ ꓞꓳ ꓐꓯꓹ ꓟ ꓥ ꓪ= ꓢꓲꓺ ꓒꓽ ꓬꓰ-ꓢꓴ ꓙꓵꓽ ꓪꓽ ꓖꓶ ꓔ ꓟ ꓔꓯ ꓑꓯꓹ ꓟꓶꓹ ꓟ ꓘꓴ ꓜꓲꓼ ꓞꓳ ꓔꓯ ꓐꓯꓹ ꓟ ꓥ ꓪ= ꓝꓲ ꓓꓴ ꓒꓲ-ꓕꓱ ꓙꓵꓽ ꓪꓽ ꓗꓪ ꓐꓰ ꓡˍ ꓟ꓾ ꓝꓲ ꓓꓴ ꓐꓴ ꓗꓪ ꓐꓰ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓫꓶꓸ ꓡꓹ ꓟ ꓘꓴ ꓜꓲꓼ ꓞꓳ ꓕꓯ ꓐꓯˍ ꓟ ꓥ ꓪ=                                                       

                        

Add new comment

2 + 1 =