ꓙꓵ ꓠꓲꓹ ꓐꓰ ꓚꓬꓴꓹ ꓙˍ ꓟ ꓣꓱꓽ ꓛꓲꓽ (3)(Q & A)

ꓙꓵ ꓠꓲꓹ ꓐꓰ ꓚꓬꓴꓹ ꓙˍ ꓟ ꓣꓱꓽ ꓛꓲꓽ (3)

ꓶꓽ ꓓꓳꓽ ꓫꓱꓸ ꓓꓳꓽ ꓠꓬ ꓪꓴ-ꓢ ꓥˍ ꓟ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓔ ꓟ ꓐꓯ ꓘꓶꓽ ꓥˍ ꓠꓬꓲ ꓠꓱꓸ ꓐꓯꓼ ꓢꓲꓺ ꓫꓬ ꓕꓳꓽ ꓶ ꓝꓲꓸ ꓕꓯ ꓢꓲ ꓟꓬ ꓠꓬꓲ ꓬꓳꓸ ꓚꓵꓹ ꓟ ꓥˍ ꓡꓳ= ꓘꓶꓽ ꓫꓵꓼ ꓫꓵꓼ ꓔꓯ ꓟꓽ ꓢꓲ ꓚꓵ ꓔ ꓕꓯ ꓢꓲꓺ ꓫꓬ ꓕꓳꓽ ꓶ ꓑꓷꓠ 100 ꓑꓷꓠ ꓗ ꓔꓯꓺ ꓙꓳ ꓟ ꓔꓯ ꓡꓳꓸ ꓟꓳˍ ꓡꓳ= ꓖꓳ ꓟ 100 ꓑꓷꓠ ꓗ ꓕꓯ ꓗꓪ ꓚꓳꓸ 27 ꓑꓷꓠ ꓡꓰ ꓢꓲ ꓚꓵ ꓔ ꓟ ꓥˍ ꓡꓳ= ꓢꓲꓽ ꓫꓬ ꓕꓳꓽ ꓶ ꓔꓯ ꓧꓲ-ꓑꓳ ꓡꓳ ꓒꓱ ꓗꓪ 27 ꓑꓷꓠ ꓡꓰ ꓗꓶ ꓡꓰ ꓠꓹ ꓟ ꓖꓪ ꓙꓱ ꓗ-ꓔꓲ-ꓙꓲ ꓡꓳ ꓒꓱ ꓗꓪ ꓖꓪ ꓙꓱ ꓞꓲꓹ ꓔ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓡꓰ ꓥˍ ꓟꓲ ꓮꓓ-405 ꓘꓳꓼ ꓔꓲ ꓒꓽ ꓪꓸ ꓔꓲ ꓲꓠ-ꓠꓳ-ꓢꓰꓠ ꓡꓰ ꓚꓽ ꓥ 27 ꓑꓷꓠ ꓡꓰ ꓣꓱꓽ ꓡꓯ ꓐꓰ ꓐꓯ ꓑꓶ ꓩꓴ ꓡꓹ ꓟ ꓥˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓢꓲꓽ ꓫꓬ ꓕꓳ  ꓽ ꓶ ꓔꓯ ꓐꓳ ꓠꓹ ꓟ ꓐꓯ ꓔ ꓟ ꓟꓽ ꓙꓳ= ꓢꓲꓽ ꓫꓬ ꓕꓳ ꓶ ꓔꓯ ꓛꓳ ꓢꓲ ꓘꓴ ꓜꓲꓼ ꓞꓳ ꓔꓶ ꓕꓱ ꓡꓰ ꓥˍ ꓟꓲ ꓐꓯ ꓔ ꓟ ꓟꓽ ꓙꓳ ꓐꓶ= ꓢꓲꓺ ꓒꓽ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ꓾ ꓬꓲ ꓗꓸ ꓠꓯꓸ ꓢꓲ ꓛꓳ ꓢꓴ ꓐꓴ ꓐꓰ ꓝꓲ ꓓꓴ ꓐꓴ ꓗꓸ ꓠꓯꓸ ꓢꓲ ꓛꓳ ꓢꓴ ꓐꓴ ꓟꓸ ꓟꓲ ꓚ ꓔ ꓟ ꓔꓯ ꓐꓳ ꓔ ꓟ ꓥ ꓪ= ꓕꓱ ꓡꓰ ꓐꓳꓹ ꓕꓯ ꓢꓲꓺ ꓒꓽ ꓬꓰ-ꓢꓴ ꓟꓸ ꓟꓲ ꓚꓹ ꓟ ꓖꓳ ꓕꓲꓽ ꓙꓵꓹ ꓗꓪꓹ ꓡꓰ ꓐꓳ ꓔ ꓟ ꓟꓽ ꓥ= ꓗꓸ ꓠꓯꓸ ꓟꓶ ꓤ ꓡꓳꓼ ꓡꓰ ꓕꓯ ꓢꓲ ꓐꓳ  ꓔ ꓟ ꓡꓳꓸ ꓟꓳˍ ꓡꓳ= ꓬ0-ꓦ ꓕꓳꓽ ꓶ ꓕꓯ ꓐꓳꓹ ꓟ ꓕꓯ ꓛꓳ ꓠꓬꓲ ꓠꓬ ꓮꓓ-100 ꓘꓳꓼ ꓗꓹ ꓡꓯꓼ ꓗꓹ ꓙꓵ ꓗꓪ ꓢꓲ ꓐꓳ ꓓꓳ ꓡꓰꓹ ꓟ ꓕꓯ ꓢꓲ ꓡꓳꓸ ꓟꓳˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓞꓽ ꓞꓽ ꓓꓳ ꓡꓰꓹ ꓟ ꓢꓲꓽ ꓫꓬ ꓕꓳꓽ ꓶ ꓐꓰ ꓗꓸ ꓠꓯꓸ ꓢꓲ ꓗꓪ ꓓꓳ ꓡꓰꓹ ꓟ ꓢꓲꓽ ꓫꓬ ꓕꓳꓽ ꓶ ꓥˍ ꓟꓲ ꓟꓽ ꓪꓽ ꓡꓯꓽ ꓘꓳꓹ ꓟ ꓔꓯ ꓡꓳꓸ ꓟꓳˍ ꓡꓳ= ꓔꓯ ꓥꓳ ꓐꓯ ꓠꓬ ꓟ-ꓕꓲ꓾ ꓟ-ꓘꓳ꓾ ꓡꓴ-ꓘ ꓕꓱ 3 ꓣꓳ ꓐꓳ ꓔ ꓟ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓠꓬ ꓮꓽ ꓟꓬ ꓹ ꓪꓽ ꓡꓯꓽ ꓘꓳꓹ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓪꓽ 3 ꓟ ꓔꓯ ꓢꓬꓠꓳꓑꓔꓲꓚ ꓖꓳꓢꓑꓡꓰꓢ ꓐꓰ ꓐꓯꓹ ꓟ ꓥ ꓪ=  ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳꓹ ꓟ ꓬꓲꓸ ꓟꓸ ꓟꓲ ꓥ ꓪ= ꓬꓳ-ꓦ ꓡꓰ ꓐꓳ ꓔ ꓟ ꓠꓬ ꓟꓽ ꓪꓽ ꓶꓯꓽ ꓘꓳꓹ ꓟ ꓮ ꓟꓬꓹ ꓐˍ ꓡꓳ= ꓮ ꓡꓰ ꓔ ꓠꓲ ꓬꓳ-ꓦ ꓡꓰ ꓐꓳ ꓔ ꓟꓹ ꓐꓰ ꓠꓱꓸ ꓐꓯꓼ ꓶꓽ ꓓꓳꓽ ꓫꓱꓸ ꓓꓳꓽ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳꓹ ꓡ? ꓐꓯꓹ ꓠꓬ ꓬꓲ ꓠꓬ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓣꓱꓽ ꓢꓲ ꓐꓳ ꓔ ꓟ ꓥꓹ ꓟ ꓡꓰ ꓟꓽ ꓞꓲ ꓝꓲ ꓓꓴ ꓐꓴ ꓔꓳꓹ ꓜꓳꓹ ꓟ ꓔꓯ ꓪꓴꓸ ꓓꓵ ꓛꓹ ꓢꓲ ꓐꓳ ꓔ ꓟ ꓢꓲꓽ ꓫꓬ ꓕꓳꓽ ꓶ ꓥˍ ꓡꓳ=

 ꓘꓶꓽ ꓫꓵꓼ ꓫꓵꓼ ꓬꓲ 100 ꓑꓷꓠ ꓗꓪ ꓚꓳ 27 ꓑꓷꓠꓼ ꓢꓲ ꓔ ꓟ ꓔꓯ ꓣꓱꓽꓹ ꓟ ꓬꓲ ꓟꓸ ꓟꓲ ꓠꓬ ꓘꓴ ꓜꓲꓼ ꓞꓳ ꓙꓵꓽ ꓪꓽ ꓢꓲꓺ ꓒꓽ ꓬꓰ-ꓢꓴ ꓡꓰ ꓝꓲ ꓓꓴ ꓒꓲ_ꓕꓱ ꓕꓯꓽ ꓢꓲ ꓗꓪ ꓡꓯꓸ ꓙꓱ ꓔ ꓟ ꓙꓵꓽ ꓪꓽ ꓗꓪ ꓐꓰ ꓢꓲ ꓚꓵ ꓔ ꓟ ꓥ ꓪ= ꓗ-ꓔꓲ-ꓙꓲ ꓡꓳ ꓒꓱ ꓗꓪ ꓔꓲꓺ ꓒꓽ ꓓꓽ ꓐꓴ 300 ꓛꓲ ꓜꓲꓼ ꓢꓲ ꓢꓲ-ꓫꓬ-ꓟ-ꓦ ꓔꓯ ꓘꓴ ꓢꓲ ꓢꓲ ꓚꓵ ꓔ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓔꓯ ꓣꓱꓽꓹ ꓟ ꓠꓬ ꓘꓴ ꓜꓲꓼ ꓞꓳ ꓡꓰ ꓢꓲ ꓔ ꓟ ꓔꓯ ꓣꓱꓹ ꓟ ꓪꓴꓸ ꓠꓬꓲ ꓘꓴ ꓜꓲꓼ ꓞꓳ ꓐꓯ ꓘꓶꓽ ꓔꓯ ꓠ ꓠꓹ ꓔ ꓟ꓾ ꓘꓴ ꓜꓲꓼ ꓙꓵꓽ ꓪꓽ ꓔꓯ ꓘꓳꓹ ꓣꓴˍ ꓟ ꓥ ꓪ= ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓡꓰ ꓢꓲꓽ ꓫꓬ ꓕꓳꓽ ꓶ ꓔꓯ 3 ꓝ ꓕꓱ ꓡꓰ ꓢꓪꓹ ꓟ ꓥ ꓪ= 1ꓸ ꓶꓽ ꓓꓳꓽ ꓫꓱꓸ ꓓꓳꓽ 2ꓸ ꓘꓶꓽ ꓫꓵꓼ ꓫꓵꓼ ꓢꓲꓽ ꓫꓬ ꓕꓳꓽ ꓶ 3ꓸ ꓘꓶꓽ ꓫꓵꓼ ꓡꓵ ꓐꓰ ꓕꓱ ꓡꓰ ꓘꓳꓹ ꓣꓴˍ ꓟ ꓥ ꓪ= ꓬꓳꓸ ꓚꓵꓹ ꓟ ꓠꓬ ꓶꓽ ꓓꓳꓽ ꓫꓱꓸ ꓓꓳꓽ ꓥ ꓢꓲ ꓠꓱꓸ ꓐꓯꓼ ꓘꓶꓽ ꓫꓵꓼ ꓫꓵꓼ ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓥˍ ꓡꓳ= ꓘꓶꓽ ꓫꓵꓼ ꓡꓵ ꓠꓬ ꓬꓲꓸ ꓟꓶꓽ ꓗꓪ ꓕꓱ ꓡꓰ ꓢꓪꓹ ꓠ ꓗˍ ꓡꓳ= ꓮ ꓡꓲꓳꓹ ꓐꓯ ꓠꓬ ꓣꓳꓽ ꓠꓬ ꓘꓶꓽ ꓫꓵꓼ ꓫꓵꓼ ꓗꓪ ꓟ ꓙꓲ-ꓢꓴ ꓢꓲꓺ ꓤ ꓥˍ ꓟ ꓪꓴꓸ ꓠꓬꓲ ꓥˍ ꓡꓳ= 

 ꓠꓴ ꓢꓲꓺ ꓒꓽ ꓬꓰ-ꓢꓴ ꓔꓯ ꓙꓵ ꓢꓲ ꓗꓳ ꓓꓱꓽ ꓔꓶꓹ ꓟꓶ ꓢꓴ ꓮꓽ ꓙꓵꓽ ꓠꓬ ꓚꓬꓴꓹ ꓙˍ ꓟ ꓣꓱꓽ ꓛꓲ ꓔꓯ ꓐꓯꓹ ꓟꓶ ꓡꓰꓳ= ꓚꓽ ꓥ꓾ ꓚꓵ ꓚꓵ ꓚꓬꓴꓹ ꓙˍ ꓟ ꓣꓱꓽ ꓛꓲꓽ ꓔꓯ ꓐꓯꓹ ꓟꓶˍ ꓟ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓙꓵ ꓠꓲꓹ ꓠꓬ ꓜꓳ ꓜꓴ ꓡꓰ ꓐꓰ ꓥˍ ꓡꓳ= ꓠꓴ ꓜꓳ ꓜꓴ ꓔꓯꓹ ꓔ ꓥˍ ꓟꓲ ꓗꓸ ꓘꓶꓽ ꓟꓽ ꓒꓴ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓟꓽ ꓐꓯꓹ ꓟꓶ= ꓐꓵ ꓞꓲꓽ ꓒꓴ ꓒꓴ ꓕꓲꓽ ꓘꓳꓹ ꓡꓰ ꓐꓰ ꓥˍ ꓡꓳ= ꓙꓵ ꓠꓲꓹ ꓙꓳ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓒꓵꓹ ꓟ ꓗꓶ ꓡꓰꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓗꓳ ꓓꓱꓽ ꓔꓶꓹ ꓟꓶ ꓡꓰ ꓠꓬ ꓕꓱꓹ ꓚꓵꓹ ꓟ ꓐꓰ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓒꓵꓹ ꓟ ꓣꓱꓽ ꓛꓲ ꓕꓯ ꓐꓯꓹ ꓟꓶˍ ꓟ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓛꓳꓹ ꓠꓬ ꓐꓯ ꓟꓵ ꓫꓱˍ ꓟ ꓠꓬ ꓝꓴꓲꓸ ꓔꓯ ꓬꓲ ꓗꓶ ꓠꓬ ꓢꓲꓽ ꓫꓬꓹ ꓟ ꓖꓳ ꓟ ꓠꓬ ꓠꓯ ꓡꓰꓳ= ꓓꓵꓽ ꓟꓽ ꓒꓵꓹ ꓟ ꓗꓶ ꓡꓰꓳ= ꓖꓳ ꓡꓰ ꓥˍ ꓟꓲ ꓝꓴꓲꓸ ꓞꓲꓽ ꓫꓬ ꓡꓰ ꓠꓹ ꓟ ꓬꓰꓹ ꓠꓬ ꓝꓮꓲ ꓕꓲꓽ ꓧꓪꓹ ꓓꓵꓽ ꓒꓵꓹ ꓟ ꓒꓬꓱꓼ ꓡ ꓡꓳ= ꓝꓴꓲꓸ ꓣꓷꓠ ꓔ ꓟ ꓠꓬ ꓒꓳꓹ ꓡꓰꓼ ꓡ ꓟ ꓥˍ ꓡꓳ= ꓣꓳ ꓠꓬ ꓝꓴꓲꓸ ꓙꓳ ꓢꓴ ꓝꓴꓲ ꓬꓰ ꓛꓬ ꓢꓴ ꓥ ꓠꓬꓲ ꓮ ꓕꓯ ꓥˍ ꓟꓲ ꓠꓲꓹ ꓟ ꓒꓳꓹ ꓡꓰꓼ ꓠ ꓗˍ ꓡꓳ=                                            

Add new comment

7 + 13 =