ꓢꓯꓼ ꓖꓶꓽ ꓪ ꓖꓶꓽˍ ꓟ

ꓣꓳ ꓤꓶ ꓗꓪ ꓮ ꓘꓶꓸ ꓫꓸ ꓟ ꓔꓳ ꓙꓳ ꓠꓬꓲ ꓟ ꓥ ꓡ? ꓠꓲꓹ ꓟ ꓐꓶꓽ ꓡ ꓠ ꓛꓲ ꓠꓲꓹ ꓟ ꓫꓸ ꓫꓵꓽ ꓮ ꓟ ꓔꓯˍ ꓟꓲ ꓔꓳꓹ ꓙꓳ ꓠꓬꓲ
ꓡꓳ= ꓖꓳ ꓕꓯ ꓠ ꓣꓳ ꓠꓬ ꓣꓳ ꓤꓶ ꓠꓬ ꓮ ꓡꓰ ꓥ ꓡ? ꓥꓪ ꓡꓰ ꓛꓲ ꓫꓸ ꓙꓵ ꓫꓵꓽ ꓟꓲꓺ ꓠꓯ ꓗꓪ ꓟꓽ ꓙꓳ ꓒꓰꓳ ꓐꓰ ꓓꓵꓽ ꓙ
ꓪ ꓡꓰ ꓗꓴꓸ ꓡꓳ=
ꓚꓵ ꓚꓵ ꓐꓯˍ ꓠꓬ ꓠꓲꓹ ꓫ ꓟꓬ ꓓꓴ ꓕꓱ ꓟ ꓠꓬ ꓣꓳꓽ ꓐꓱ ꓶ ꓙꓲꓻ ꓖꓴ ꓙꓳ ꓓꓴ ꓥˍ= ꓗꓸ ꓡ ꓐꓴ ꓡꓴ (ꓐꓳꓼ ꓡꓳ)
ꓟꓽ ꓒꓬꓱꓼ ꓡˍ ꓕꓯ ꓐꓲꓽ ꓓꓲ ꓗꓪ ꓐꓰ ꓓꓳꓺ ꓡ ꓪꓸ ꓡꓳ= ꓬꓲꓸ ꓔꓯꓸ ꓑꓲꓸ ꓞ ꓓˍ ꓟ ꓬꓲꓸ ꓗꓴꓺ ꓙꓲ ꓔꓯ ꓬꓲꓸ ꓚꓲꓸ ꓛꓬ ꓡꓰ ꓢꓯꓼ ꓗꓪ
ꓐꓰ ꓝꓲꓸ ꓓꓳꓺ ꓠ ꓗˍ ꓡꓳ= ꓮ ꓘꓶꓸ ꓫꓸ ꓟ ꓡꓳ ꓬꓰˍ ꓕꓯ ꓗꓸ ꓡꓸ ꓐꓴ ꓡꓴ ꓕꓲꓽ ꓟ ꓒꓬꓱꓼ ꓙꓰ ꓡꓳ=
ꓖꓳ ꓡꓱ ꓠꓬꓲ ꓠꓴ ꓫꓸ ꓙꓵ ꓟꓷꓼ ꓙꓵ ꓔꓳꓹ ꓙꓳˍ ꓕꓯ ꓕ ꓙꓳ= ꓠꓲꓹ ꓫ ꓟꓬ ꓫ ꓓꓴ ꓖꓳ ꓟ ꓔꓯ ꓟꓬꓺ ꓔꓳ ꓡꓳꓸ ꓠꓬꓲ
ꓢꓲ ꓑꓶꓸ ꓑꓶꓸ ꓡꓰ ꓬꓰ=ꓓꓳꓽ ꓡꓰ ꓥˍ ꓟꓲ ꓝꓮꓲꓸ ꓕꓲꓽ ꓧꓪ ꓔꓴ ꓡ ꓢꓲ ꓢꓯꓼ ꓕꓵꓼ= ꓠꓲꓹ ꓫꓸ ꓓꓴ ꓡꓰ ꓠꓴ ꓔꓯ ꓕꓽ ꓧꓪꓸ ꓡꓰ ꓝꓲ=
ꓠꓴ ꓡꓰ ꓠꓲꓹ ꓫꓸ ꓓꓴ ꓔꓯ ꓧꓪꓸ ꓡꓰ ꓝꓲ= ꓢꓯꓼ ꓪ ꓙꓳ ꓙꓳ ꓡꓰ ꓢꓯꓼ ꓕꓵꓼ=
ꓟꓲ ꓠꓯ ꓕꓱ ꓟ ꓠꓬ ꓬꓲꓼ ꓔ ꓔꓬ ꓢꓴ ꓐꓱ ꓶ ꓔꓬ ꓖꓴ ꓟꓽ ꓙꓳ= ꓬꓰ ꓟ ꓑꓶꓸ ꓢꓴ ꓐꓱ ꓶ ꓔꓬꓹ ꓖꓴ ꓟꓽ ꓙꓳ= ꓖꓳ ꓡꓳ
ꓠꓬꓲ ꓬꓰ ꓜꓲꓼ ꓙꓳ ꓟ ꓔꓯ ꓑꓶꓸ ꓑꓶꓸ ꓡꓰ ꓬꓰ= ꓢꓯꓼ ꓕꓵꓼ=
ꓙꓳꓺ ꓛꓱꓽ ꓗꓴꓸ ꓟ ꓠꓴ ꓠꓲꓹ ꓟ ꓔꓯ ꓡꓶꓸ= ꓐꓴˍ ꓟ ꓠꓴ ꓠꓲꓹ ꓟ ꓔꓯ ꓡꓶꓸ= ꓐꓰ ꓛꓵꓽ ꓟꓲ ꓞꓲ ꓠꓬ ꓠꓱꓸ ꓢꓳꓸ ꓟꓸ
ꓗꓪ ꓡꓰ ꓥꓳ= ꓕꓯꓽ ꓢꓲ ꓗꓪ ꓡꓰ ꓥꓳ= ꓬꓲꓸ ꓕꓯ ꓢꓲ ꓗꓪ ꓟ ꓠꓬ ꓬꓲꓸ ꓘꓴꓽ ꓗꓪ ꓮ ꓫꓵꓽ ꓬꓰ ꓽ ꓐ ꓡ=
ꓣꓳꓽ ꓠꓲꓹ ꓟ ꓔꓯ ꓡꓶꓸ ꓢꓲꓸ ꓡꓰ꓾ ꓣꓳꓽ ꓓꓵꓽ ꓙ ꓚꓱ ꓔꓯ ꓡꓶꓸ ꓢꓲ ꓡꓰ ꓣꓳꓽ ꓤꓶ ꓠꓬ ꓡꓶꓸ ꓬꓰ ꓥꓳ= ꓐꓶ ꓞꓶ ꓟꓲ ꓞꓲ ꓬꓲꓸ
ꓫꓵꓼ ꓖꓪꓽ ꓕꓲꓽ ꓖꓼ ꓡꓰ ꓣꓳꓽ ꓤꓶ ꓟꓽ ꓡꓶꓸ ꓙꓰ= ꓖꓳ ꓡꓱ ꓠꓬꓲ ꓠꓲꓹ ꓟ ꓡꓶꓸ ꓡꓯ= ꓢꓯꓼ ꓕꓵꓼ ꓡꓯ=
ꓥꓪ ꓬꓰ ꓟꓽ ꓘꓴ꓾ ꓬꓰ ꓟꓽ ꓗꓴꓸ ꓔ ꓐꓯ ꓟ ꓠꓲꓹ ꓟ ꓔꓯ ꓥꓪ ꓬꓰ ꓗꓴꓸ ꓡꓳ= ꓥꓪ ꓬꓰ ꓐꓹ ꓡˍ ꓡꓳ= ꓥꓪ ꓬꓰ ꓑꓶꓸ
ꓡꓳ ꓐꓰ ꓐꓯ ꓘꓴ ꓠꓹ ꓛꓲ ꓬꓰ ꓙꓰ ꓡꓯ=
ꓢꓷꓸ ꓠꓲꓹ ꓙꓳ ꓒ ꓕꓲꓽ ꓣꓳ ꓐꓯ ꓔ ꓡꓳ “ꓠꓴ ꓚꓲꓸ ꓛꓬ ꓠꓴ ꓓꓵꓽ ꓙ ꓕꓯ ꓥꓪ ꓬꓰ ꓗꓴꓸ ꓡꓳ ꓐꓰ ꓓꓵꓽ ꓙ ꓥˍ ꓟꓲ ꓬꓯꓼ
ꓡꓳ= ꓥꓪ ꓬꓰ ꓟꓽ ꓗꓴꓸ ꓐꓰ ꓐꓯ ꓥˍ ꓟꓲ ꓙꓳꓽ ꓡꓳ= ꓮ ꓡꓰꓳ ꓐꓯ ꓠꓬ ꓣꓳꓽ ꓠꓬ ꓣꓳꓽ ꓓꓵꓽ ꓙˍ ꓟ ꓡꓰ ꓣꓳꓽ ꓬꓰ ꓐ ꓡ ꓡꓳ=
ꓠꓴꓸ ꓚꓲꓸ ꓛꓬ ꓠꓴ ꓥꓪ ꓬꓰ ꓟ ꓘꓴ ꓬꓰ ꓟꓽ ꓗꓴꓸ ꓓꓵꓽ ꓙ ꓠꓬ ꓠꓴ ꓮ ꓡꓰ ꓓꓵꓽ ꓙ ꓮ ꓡꓰ ꓙꓳꓽ ꓡꓳ= ꓣꓳꓽ ꓠꓬ ꓣꓳꓽ ꓓꓵꓽ ꓙ
ꓟ ꓕꓯꓽ ꓢꓲ ꓬꓰ ꓟꓽ ꓐ ꓡ= ꓣꓳꓽ ꓮ ꓡꓰ ꓓꓵꓽ ꓙ ꓮ ꓡꓰ ꓣꓳꓽ ꓬꓰ ꓐ ꓡ ꓥꓳ= ꓖꓳ ꓡꓱ ꓠꓬꓲ ꓣꓳꓽ ꓓꓵꓽ ꓙ ꓚꓱ ꓔꓯ ꓮ ꓟꓴ ꓟꓴ
ꓖꓶ ꓔ=
ꓫꓸ ꓙꓵ ꓓꓴ ꓠꓬ ꓣꓳꓽ ꓐꓱ ꓶ ꓙꓲꓻ ꓖꓴ ꓥꓳ= ꓟꓲꓺ ꓠꓯ ꓕꓱ ꓟ ꓗꓪ ꓫꓸ ꓙꓵ ꓓꓴ ꓟꓽ ꓙꓳ ꓕꓯ ꓠꓽ ꓮ ꓡꓰ ꓐꓰ ꓗꓗ ꓛꓲ
ꓢꓰ= ꓖꓳ ꓡꓱ ꓠꓬꓲ ꓧꓪꓸ ꓘꓴ ꓟ ꓡ ꓞꓳ ꓕꓲꓽ ꓣꓳ ꓒꓬꓱꓼ ꓡ ꓠꓹ ꓟ ꓠꓬ ꓣꓳꓽ ꓔꓯ ꓡꓰ ꓓˍ ꓡꓳ= ꓢꓯꓼ ꓕꓵꓼ ꓠꓬꓲ ꓡꓯ=