ꓮ ꓠꓯꓻ ꓕꓲ ꓟ ꓟꓳꓻˍ ꓟ ꓢꓷ. ꓠꓲ,

ꓠꓲ, ꓠꓵˍ ꓟ ꓮꓽ ꓐ ꓮ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓮ ꓠꓯꓻ ꓕꓲ ꓟ ꓟꓳꓻˍ ꓟ ꓢꓷ. ꓠꓲ, ꓐꓯˍ ꓟ ꓕꓲ ꓒꓳ, ꓗꓪ ꓐꓰ ꓢꓷ. ꓙ ꓟꓳ ꓙ ꓩꓴ ꓡˍ ꓥꓳ꓿

ꓮ ꓠꓱ ꓕꓯ ꓮ ꓠꓯꓻ ꓕꓲ ꓟ ꓔꓬ ꓡꓳ꓿ ꓮ ꓠꓯꓻ ꓠꓬ ꓬꓲ ꓚꓲ. ꓛꓬ ꓬꓲ “ꓥꓪ ꓠꓬ ꓟꓲ ꓠꓯ ꓕꓱ ꓟ ꓗꓪ ꓐꓲꓻ ꓡꓳ, ꓬꓰ ꓢꓴ ꓐꓰ꓾ ꓗ, ꓛꓲꓽ ꓓꓰ ꓡꓰ ꓢꓴ ꓥ ꓡꓳ꓾” ꓐꓯ ꓢꓲ ꓬꓲ ꓤꓶꓻ ꓔꓯ ꓗ, ꓛꓲꓽ ꓛꓲꓽ ꓡꓰꓽ ꓔꓬ ꓡꓳ꓿ ꓕꓲ ꓠꓬꓲ ꓙꓳˍ ꓕꓯ ꓡꓳ ꓗ. ꓕꓲ ꓟ ꓗꓪ ꓬꓲꓻ ꓙꓬ ꓠꓬ, ꓕꓲ ꓟ ꓔꓯ ꓬꓲ ꓟꓳꓻ ꓡꓰꓳ꓿ ꓕꓲ ꓖꓳ ꓓꓱꓽ ꓡꓱꓸꓼ ꓪꓽ ꓡꓰ ꓐꓰ ꓒꓴˍ ꓟ ꓔꓯ ꓟꓳꓻˍ ꓕꓯ “ꓥꓪ ꓠꓬ ꓮ ꓫꓵꓽ ꓑꓶ. ꓓꓴ ꓕꓲ ꓖꓳ ꓓꓱꓽ ꓡꓱꓸꓼ ꓠꓯ ꓔꓬ ꓥ ꓟꓽ ꓢꓷ.” ꓐꓰ ꓓꓵꓽ ꓙ ꓟꓶˍ ꓡꓳ꓿ ꓖꓳ ꓕꓯ ꓮ ꓠꓯꓻ ꓠꓬ “ꓟꓲ ꓠꓯ ꓗꓪ ꓗ, ꓛꓲꓽ ꓓꓰ ꓡꓰ ꓢꓴ ꓠꓬ ꓬꓲꓻ ꓙꓬ ꓥ ꓟꓽ ꓢꓷ.” ꓐꓰ ꓓꓵꓽ ꓙ ꓟꓶˍ ꓡꓳ꓿

ꓟꓽ ꓟꓶ ꓫꓵ ꓕꓯ ꓬꓲ ꓪ ꓠꓬꓲꓽ ꓟ ꓜꓲ ꓡꓯ ꓘꓳˍ ꓡꓳ꓿ ꓮ ꓠꓯꓻ ꓡꓰ ꓠꓬ, ꓔꓯ ꓕꓱ ꓡꓱ ꓐꓯ ꓡꓳ꓿ “ꓟꓲ ꓠꓯ ꓗꓪ ꓮ ꓘꓶ. ꓗ, ꓛꓲꓽ ꓢꓴ ꓠꓬ ꓠꓴ ꓥ ꓡꓳ” ꓐꓯ ꓡꓳ꓿ ꓬꓲꓻ ꓙꓬ ꓠꓬ, ꓡꓰ ꓕꓱ ꓡꓱ ꓒꓳ, ꓖꓶˍ ꓡꓳ꓿ “ꓥꓪ ꓥˍ ꓟꓲ ꓧꓶ. ꓕꓯ ꓕꓲ ꓙꓵ, ꓗꓪ ꓕꓱ ꓡꓱ ꓓꓵꓽ ꓙ ꓟꓶˍ ꓡꓳ꓿ ꓟꓲ ꓠꓯ ꓗꓪ ꓔꓬ ꓟ ꓢꓯ. ꓫꓵꓽ ꓢꓯ. ꓙꓰꓽ ꓮ ꓙꓵꓽ ꓠꓬ ꓚꓲ. ꓛꓬ ꓖꓳ ꓓꓱꓽ ꓠꓯꓸꓼ ꓗꓪ ꓐꓲꓻˍ ꓟ ꓙꓳˍ ꓡꓳ꓿ ꓖꓳ ꓟ ꓔꓯ ꓠꓲ, ꓘꓪꓽ ꓫꓵ ꓢꓲ ꓔꓬ ꓐꓷˍ ꓠꓬ ꓟꓲ ꓠꓯ ꓗꓪ ꓗ, ꓛꓲꓽ ꓓꓰ ꓡꓰ ꓢꓴ ꓥ ꓡꓳ” ꓐꓰ ꓒꓳ, ꓖꓶˍ ꓡꓳ꓿

ꓟ. ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓮ ꓡꓲ ꓟꓳꓻ ꓪ ꓓꓻˍ ꓡ ꓐꓯ ꓠꓬ꓾ ꓕꓲ ꓖ ꓕꓲ ꓧꓪ, ꓣꓳ ꓠꓯꓸꓼ ꓗꓪ ꓙꓳˍ ꓟ ꓔꓯ ꓠꓲ, ꓘꓪꓽ ꓟꓽ ꓫꓵˍ ꓟ꓾ ꓢꓴ ꓠꓯꓸꓼ ꓗꓪ ꓙꓳˍ ꓟ ꓔꓯ ꓟꓶ ꓠꓲ, ꓫꓵˍ ꓟ ꓮ ꓠꓯꓻ ꓡꓰ ꓐꓰ ꓗꓷ ꓡꓰˍ ꓟ ꓕꓲ ꓙꓵ, ꓥˍ ꓟꓲ ꓙꓳˍ ꓡꓳ꓿

ꓠꓲ, ꓠꓵˍ ꓟ ꓮꓽ ꓐ ꓮ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓬꓽ ꓠꓬꓲ ꓐꓷ, ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓢꓯ. ꓔꓬ ꓟ ꓕꓲ ꓙꓵ, ꓕꓯ ꓠꓬ꓾ ꓕꓱ ꓡꓱ ꓫꓵꓽ ꓮ ꓟꓬ, ꓙꓳˍ ꓡꓳ꓿ ꓥꓪ ꓡꓰ ꓢꓯꓼ ꓖꓶ ꓠꓲ, ꓫꓵˍ ꓟ ꓠꓬ꓾ ꓣꓳ ꓠꓯꓸꓼ ꓗꓪ ꓙꓳˍ ꓟ ꓔꓯ ꓠꓲ, ꓘꓪꓽ ꓫꓵ꓿ ꓣꓳ ꓠꓯꓸꓼ ꓗꓪ ꓙꓳˍ ꓟ ꓠꓬ ꓠꓯˍ ꓥˍ ꓟꓲ꓾ ꓒꓴˍ ꓥ ꓟꓲ꓾ ꓐꓲꓻˍ ꓥ ꓟꓲ꓾ ꓟꓽ ꓐꓲꓻ ꓥ ꓟꓲ꓾ ꓣꓳ ꓖꓳ ꓓꓱꓽ ꓔꓯ ꓠꓲ, ꓘꓪꓽ ꓫꓵ ꓢꓲ ꓢꓯ. ꓔꓬ ꓠꓬ ꓟꓲ ꓠꓯ ꓗꓪ ꓗ, ꓛꓲꓽˍ ꓥꓳ꓿ ꓣꓳ ꓖꓳ ꓓꓱꓽ ꓗꓪ ꓙꓳˍ ꓟ ꓔꓯ ꓣꓳ ꓚꓲ. ꓛꓬ ꓠꓲ, ꓠꓵˍ ꓕꓯ ꓡꓰꓽ ꓢꓴ ꓡꓰ ꓠꓲ, ꓠꓵ ꓡˍ ꓥꓳ꓿ ꓒꓵꓽ ꓗ ꓬꓰ ꓡˍ ꓥꓳ꓿