ꓐꓬꓽ ꓬꓲꓻ ꓙꓲꓻ ꓖꓴ ꓙꓳˍ ꓟ

ꓐꓬꓽ ꓬꓲꓻ ꓙꓲꓻ ꓖꓴ ꓙꓳˍ ꓟ

ꓐꓬꓽ ꓬꓲꓻ ꓗꓪ ꓙꓳˍ ꓟ ꓛꓵ ꓢꓯꓼ ꓠꓬ ꓜꓽ ꓓꓴ ꓜꓽ ꓠꓲꓹ ꓫꓵˍ ꓟ ꓠꓲꓹ ꓟ ꓔꓯ ꓒꓬꓱꓼ ꓡ ꓝꓲ ꓢꓲ ꓠꓯꓻ ꓞꓲꓼ ꓕꓲ ꓫꓵꓽˍ ꓡꓰ ꓐꓰ ꓮ ꓠꓱ ꓮ ꓒꓵꓽ ꓮ ꓑ ꓐꓴ ꓤꓶꓻ ꓕꓯ ꓡꓰ ꓣꓱꓽ ꓗꓳꓸ ꓡ ꓟ ꓥ ꓡꓳ= ꓐꓬꓽ ꓬꓲꓻ ꓗꓪ ꓐꓬꓽ ꓬꓲꓻ ꓫꓵꓼ ꓐꓰ ꓬꓲ ꓐꓰꓽ ꓠꓬꓲꓽ ꓫꓵꓽ ꓙꓳˍ ꓟ ꓥ ꓢꓲ ꓠꓬꓲ ꓐꓬꓽ ꓬꓲꓻ ꓬꓲ ꓐꓰꓽ (ꓬꓲ ꓡꓵꓺ) ꓠꓬ ꓡ ꓞꓳ ꓔꓯ ꓦꓯꓸ ꓡꓰ ꓝꓲ (ꓝꓱ ꓡꓰ ꓝꓲ) ꓢꓲ ꓠꓬꓲ꓾ ꓐꓬꓽ ꓬꓲꓻ ꓫꓵꓼ ꓠꓬ ꓡ ꓞꓳ ꓖꓳ ꓓꓱꓽ ꓔꓯ ꓘꓪꓽ ꓡꓰ ꓝꓲ (ꓒꓸ ꓡꓰ ꓝꓲˍ ꓡꓳ=

ꓐꓬꓽ ꓬꓲꓻ ꓕꓲ ꓬꓲ ꓖꓴ ꓗꓪ ꓚꓮꓡꓳꓣꓲꓰ 60g ꓟꓽ ꓞꓲꓺ ꓐꓰ ꓚꓮꓣꓐꓳꓠꓧꓬꓓꓣꓮꓔꓰ 17g ꓙꓳˍ ꓟ ꓥ ꓢꓲ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶˍ ꓡꓰꓽ ꓟꓽ ꓞꓲꓺ ꓧꓪꓽ ꓗꓴꓹ ꓙꓲ ꓐꓲꓻ ꓓꓴ ꓐꓱ ꓶˍ ꓟꓲ ꓣꓱꓽ ꓬꓯꓼˍ ꓟ ꓥ ꓡꓳ=

ꓐꓬꓽ ꓬꓲꓻ ꓠꓬ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓟꓬꓽ ꓠꓬꓲ ꓣꓱꓽ ꓬꓯꓼˍ ꓟ ꓠꓯꓻ ꓞꓲꓼ ꓕꓲ ꓙꓰꓽ ꓥ ꓢꓲ ꓐꓬꓽ ꓬꓲꓻ ꓗꓪ ꓐꓰ ꓙꓲꓻ ꓖꓴ ꓮ ꓟꓬꓹ ꓟꓶ ꓪ ꓓꓹ ꓟ ꓥ ꓡꓳ=

(1) ꓠꓲꓹ ꓟ ꓠꓻ ꓔꓯ ꓗꓽ ꓕꓸ ꓖꓶˍ ꓟ

ꓐꓬꓽ ꓬꓲꓻ ꓗꓪ ꓙꓳˍ ꓟ ꓖꓬꓡꓬꓑꓧꓰꓠꓳꓡ ꓡꓰ ꓐꓰ ꓮꓠꓔꓲꓳꓫꓲꓓꓮꓠꓔ ꓐꓴ ꓪꓴꓸ ꓠꓬꓲ ꓠꓲꓹ ꓟ ꓠꓻ ꓟꓽ ꓒꓬꓱꓼ ꓡ ꓠꓹ ꓟ ꓗꓽ ꓕꓸ ꓖꓶˍ ꓡꓳ=

(2) ꓧꓪꓽ ꓖꓳ ꓓꓱꓽ ꓢꓯꓼ ꓐꓲ ꓡꓰ ꓝꓲˍ ꓟ

ꓠꓯꓼ ꓠꓯꓼ ꓙꓵꓹ ꓕꓯ ꓐꓬꓽ ꓬꓲꓻ ꓐꓰ ꓬꓲꓻ ꓞꓻ ꓔꓯ ꓓꓳꓻ ꓖꓶˍ ꓠꓬ ꓕꓲ ꓠꓬꓲ ꓡꓱꓸꓼ ꓢꓯꓼ ꓙꓳ ꓝꓲ ꓢꓲ ꓢꓰ ꓡꓰ ꓝꓲˍ ꓡꓳ= ꓐꓬꓽ ꓬꓲꓻ ꓠꓬ ꓪꓴꓽ ꓧꓶˍ ꓟ꓾ ꓘꓳꓼ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓠꓯꓻ ꓞꓲꓼ ꓕꓲ ꓙꓰꓽˍ ꓟꓲ ꓥ ꓡꓳ=

(3) ꓞꓶꓽ ꓝꓲꓸˍ ꓟ (ꓞꓶꓽ ꓦꓶꓽ ꓝꓲꓸˍ ꓟ) ꓐꓰ ꓟꓷꓽ ꓠꓷꓹ ꓒꓴꓽˍ ꓟ ꓔꓯ ꓓꓻ ꓡꓰ ꓝꓲˍ ꓟ

ꓧꓪꓽ ꓖꓳ ꓓꓱꓽ ꓗꓪ ꓛꓴ ꓢꓯꓼ ꓟꓬꓽ ꓡ ꓕꓯ ꓟꓷꓽ ꓠꓷꓹ ꓒꓴꓽˍ ꓟ꓾ ꓞꓶꓽ ꓦꓶꓽ ꓝꓲꓸˍ ꓟ ꓔꓯ ꓒꓬꓱꓼ ꓡ ꓝꓲˍ ꓡꓳ= ꓖꓳ ꓟ ꓔꓯ ꓐꓬꓽ ꓬꓲꓻ꓾ ꓡꓰꓟꓳꓠ ꓢꓶꓽ ꓐꓰ ꓞꓼ ꓐꓳ ꓮ ꓔꓲꓸ ꓤ ꓐꓴ ꓔꓯ ꓑꓯꓸ ꓗꓷ(ꓫꓳꓽ ꓗꓷ) ꓢꓲ ꓓꓳꓻ ꓖꓶˍ ꓠꓬ ꓟꓷꓽ ꓠꓷꓹ ꓒꓴꓽˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=

(4) ꓙꓬꓻ ꓓꓵꓽ ꓡꓰ ꓢꓲ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓟ

ꓐꓬꓽ ꓬꓲꓻ ꓜꓽ ꓖꓶ ꓓꓳꓻ ꓖꓶˍ ꓟ ꓠꓬ ꓟꓵꓽ ꓘꓳꓼ ꓒꓳꓹ ꓡꓶꓸˍ ꓟ ꓗꓪ ꓒꓬꓱꓼ ꓡˍ ꓟ ꓙꓬꓻ ꓓꓵꓽ ꓡꓰ ꓟ ꓔꓯ ꓓꓻ ꓡꓰ ꓝꓲ ꓢꓲ ꓧꓪꓽ ꓖꓳ ꓓꓱꓽ ꓘꓴꓽ ꓗꓪ ꓢꓯꓼ ꓡꓴꓽ ꓖꓶˍ ꓟ ꓪꓴꓸ ꓠꓬꓲ ꓠꓱ ꓫꓳ ꓟꓸ ꓗꓪ ꓐꓰ ꓠꓻ ꓠꓷꓼ ꓡˍ ꓟ ꓔꓯ ꓗꓽ ꓔ ꓖꓶˍ ꓡꓳ=

ꓕꓯꓽ ꓢꓲ ꓗꓪ ꓐꓯ ꓗꓷ ꓟ ꓙꓲꓻ ꓖꓴ ꓡꓰꓽ ꓟꓽ ꓞꓲꓺ ꓐꓬꓽ ꓬꓲꓻ ꓜꓽ ꓓꓳꓻˍ ꓟ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓗꓪ ꓟ ꓬꓲ ꓞꓶꓻ ꓐꓴ ꓔꓯ ꓠꓲꓸ ꓡꓰ ꓝꓲˍ ꓟ꓾ ꓬꓲꓼ ꓟꓶ ꓟꓽ ꓓꓻ ꓟ ꓔꓯ ꓬꓲꓼ ꓟꓶ ꓢ ꓡꓰ ꓝꓲˍ ꓟ꓾ ꓬꓲ ꓑ ꓠꓻ ꓓꓴ ꓔꓯ ꓞꓼ ꓞꓼ ꓓꓻ ꓡꓰ ꓝꓲˍ ꓟ꓾ ꓧꓪꓽ ꓗꓴꓹ ꓙꓲ ꓔꓯ ꓐꓲ ꓡ ꓝꓲˍ ꓟ꓾ ꓙꓵꓻ ꓒꓶꓽ ꓓꓳꓻ ꓟꓬꓽ ꓡꓰ ꓠꓬꓲ ꓪꓴꓸ ꓓꓵ ꓠꓻ ꓡ ꓔꓬ ꓫꓸ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓟ꓾ ꓦꓰꓼ ꓟ ꓬꓲ ꓪꓴ ꓐꓴ ꓔꓯ ꓙꓲꓻ ꓡꓰ ꓠ ꓬꓰ ꓖꓶˍ ꓟ ꓡꓰꓽ ꓟꓽ ꓞꓲꓺ꓾ ꓠꓻ ꓐꓶꓽ ꓓꓲꓻ ꓐꓴ ꓔꓯ ꓫꓵꓻ ꓡꓰ ꓝꓲˍ ꓟ ꓢꓯꓼ ꓥˍ ꓟꓲ ꓙꓳˍ ꓟ ꓥ ꓡꓳ=

ꓐꓬꓽ ꓬꓲꓻ ꓠꓬ ꓞꓳ ꓤ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓙꓳˍ ꓟ ꓡꓰꓽ ꓟꓽ ꓞꓲꓺ ꓐꓬꓽ ꓬꓲꓻ ꓜꓽ ꓟꓬꓽ ꓡꓰ ꓓꓳꓻ ꓟꓬꓽ ꓡꓰ ꓕꓯ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓥ ꓡꓳ= ꓮ ꓡꓰ ꓫꓵꓽ ꓟꓽ ꓙꓲꓻ ꓟ ꓒꓬꓱꓼ ꓡ ꓓꓹ ꓡ ꓐꓯ ꓟ ꓔꓯ ꓝ ꓢꓲ ꓐꓯ ꓟꓸ ꓖꓶˍ ꓥꓳ=

ꓐꓬꓽ ꓬꓲꓻ ꓜꓽ ꓟꓬꓽ ꓡꓰ ꓕꓯ ꓠꓬ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓟꓬꓽ ꓡ ꓝꓲˍ ꓡꓳ= ꓐꓬꓽ ꓬꓲꓻ ꓗꓪ ꓞꓼ ꓛꓵꓻ ꓐꓰ ꓚꓮꓣꓐꓳꓠꓧꓬꓓꓣꓮꓔꓰꓢ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓐꓬꓽ ꓬꓲꓻ ꓜꓽ ꓟꓬꓽ ꓡꓰ ꓕꓯ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓟꓴ ꓓꓯ ꓡꓰ ꓝꓲˍ ꓡꓳ= ꓟꓬꓽ ꓠꓬꓲ ꓓꓲꓮꓐꓰꓔꓰꓢ ꓠꓻ ꓙꓳ ꓢꓴ ꓐꓬꓽ ꓬꓲꓻ ꓮ ꓟꓬꓹ ꓜꓽ ꓗꓷˍ ꓠꓬ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓟꓴ ꓓꓯꓻ ꓡˍ ꓟ ꓪꓴꓸ ꓠꓬꓲ ꓐꓬꓽ ꓬꓲꓻ ꓮ ꓟꓬꓹ ꓜꓽ ꓟꓽ ꓓ ꓟ ꓥ ꓡꓳ=

ꓝꓮꓲ ꓠꓬ ꓦꓰꓼ ꓟ ꓠꓻˍ ꓟ ꓒꓬꓱꓼ ꓡ ꓝꓲ ꓐ ꓡˍ ꓡꓳ= ꓐꓬꓽ ꓬꓲꓻ ꓘꓴꓽ ꓗꓪ ꓝꓣꓴꓚꓔꓳꓢꓰ ꓮ ꓟꓬꓹ ꓙꓳˍ ꓟ ꓥ ꓢꓲ ꓦꓰꓼ ꓟ ꓠꓬ ꓕꓲ ꓧꓪꓹ ꓡꓰ ꓞꓼ ꓛꓵꓻ ꓢꓯꓼ ꓮ ꓟꓬꓹ ꓔꓯ ꓜꓶ ꓟꓽ ꓐ ꓡ ꓟ ꓑꓶꓸ ꓓꓴ ꓦꓰꓼ ꓟ (ꓦꓰꓽ ꓜꓲ) ꓳˍ ꓟ ꓠꓻ ꓒꓬꓱꓼ ꓡ ꓝꓲ ꓐ ꓡˍ ꓡꓳ=

ꓫꓵꓽ ꓢꓯꓼ ꓔꓯˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓡꓳ= ꓞꓼ ꓛꓵꓻ ꓠꓬ ꓫꓵꓽ ꓢꓯꓼ ꓟꓬꓽ ꓢꓴ ꓐꓴ ꓐꓱ ꓶ ꓮ ꓘꓶꓸ ꓙꓲˍ ꓐꓯ ꓥˍ ꓟꓲ ꓫꓵꓽ ꓢꓯꓼ ꓠꓲꓸ ꓢꓴ ꓐꓴ ꓐꓬꓽ ꓬꓲꓻ ꓮ ꓟꓬꓹ ꓜꓽˍ ꓕꓯ ꓠꓽ ꓫꓵꓽ ꓢꓯꓼ ꓔꓯ ꓟꓬꓽ ꓠꓬꓲ ꓠꓲꓸ ꓡꓰ ꓝꓲˍ ꓡꓳ= ꓫꓵꓽ ꓢꓯꓼ ꓮ ꓟꓬꓹ ꓠꓲꓸ ꓡꓰˍ ꓟ ꓠꓬ ꓠꓲꓹ ꓟ ꓟꓬꓱꓽ ꓬꓰˍ ꓟ ꓔꓯ ꓐꓬ ꓡꓰ ꓝꓲ ꓐ ꓡˍ ꓡꓳ=

ꓝꓮꓲ ꓕꓲ ꓫꓵꓽ ꓠꓬ ꓐꓬꓽ ꓬꓲꓻ ꓗꓪ ꓚꓮꓡꓳꓣꓲꓰ ꓓꓯꓻ ꓡ ꓝꓲˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓐꓬꓽ ꓬꓲꓻ ꓮ ꓟꓬꓹ ꓜꓽ ꓖꓶˍ ꓠꓬ ꓖꓳ ꓓꓱꓽ ꓘꓪꓽ ꓡ꓾ ꓒꓸ ꓡˍ ꓥꓳ= ꓖꓳ ꓡꓰ ꓥˍ ꓟꓲ ꓘꓪꓽ ꓠꓲꓹ ꓫꓵ ꓢꓴ꓾ ꓒꓸ ꓡ ꓠꓲꓹ ꓫꓵ ꓢꓴ ꓐꓱ ꓶ ꓠꓬ ꓮ ꓟꓬꓹ ꓣꓱꓽ ꓬꓯꓼ ꓖꓴ ꓙꓳˍ ꓟ ꓥ ꓡꓳ=

ꓖꓳ ꓟ ꓪꓴꓸ ꓠꓬꓲ ꓐꓬꓽ ꓬꓲꓻ ꓮ ꓟꓬꓹ ꓟꓽ ꓜꓽ ꓪ ꓡꓰ ꓠꓹ ꓟ ꓤ ꓟꓴ ꓠ ꓔ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

Add new comment

1 + 0 =