ꓒꓴꓽ-ꓡꓴꓹ ꓔꓶ ꓚꓱꓹ

ꓒꓴꓽ ꓡꓴ ꓮ ꓟꓬꓹ ꓙꓰꓽ ꓙꓳˍ ꓟ ꓗꓪ Bottle gourd ꓐꓯ ꓟ ꓒꓴꓽ ꓡꓴꓹ ꓔꓶ ꓚꓱꓹ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ=

ꓒꓴꓽ ꓡꓴꓹ ꓠꓬ ꓡꓱꓻ ꓢꓲ ꓟꓵꓽ ꓟꓽ ꓙꓴꓺ ꓟ ꓟꓵꓽ ꓗꓪ ꓔꓶˍ ꓠꓬ ꓔꓶ ꓒꓬꓱꓼ ꓡˍ ꓟ ꓥ ꓢꓲ ꓙꓬꓻ ꓟꓵꓽ ꓗꓪˍ ꓟꓲ ꓔꓶ ꓒꓬꓱꓼ ꓡ ꓓꓹ ꓡꓳ= ꓒꓴꓽ ꓡꓴꓹ ꓜꓲ ꓔꓯ ꓟꓵꓽ ꓟꓽ ꓢꓲꓺ ꓢꓲꓺ ꓔꓶ ꓐ ꓡˍ ꓥ ꓟꓲ ꓩꓲꓸ ꓛꓲ ꓟꓵꓽ ꓛꓵꓽ ꓮ ꓟꓬꓹ ꓙꓳˍ ꓟ ꓗꓪ ꓔꓶ ꓠꓬ ꓪ ꓙꓲ ꓔꓶ ꓒꓬꓱꓼ ꓡ ꓓꓹ ꓡꓳ= ꓟꓬ ꓠꓬꓲ ꓠꓬ 5 ꓦ ꓗꓪ ꓐꓰ 8 ꓦ ꓗꓪ ꓛꓲ꓾ 9 ꓦ ꓗꓪ ꓐꓰ 12 ꓦ ꓗꓪ ꓛꓲ ꓔꓶˍ ꓡꓳ= ꓒꓴꓽ ꓡꓴꓹ ꓔꓯ ꓟꓽ ꓔꓶ ꓧꓶꓸ ꓕꓯ ꓬꓲ ꓜꓲ ꓡꓲꓸ ꓤ ꓫꓬꓹ ꓠ ꓔ ꓡꓳ= ꓟꓽ ꓔꓶ ꓕꓯ ꓬꓲꓸ ꓫꓵꓸ ꓔꓯ ꓕꓲꓽ ꓦꓬꓼ ꓬꓲꓻ ꓙꓬ ꓔꓲꓹ ꓗꓷ ꓢꓲ ꓒꓼ ꓡꓼ ꓡꓼ ꓟ ꓟꓶ ꓛ ꓐꓰ ꓕꓱꓹ ꓗꓷ ꓢꓲ ꓬꓲ ꓫꓵꓸ ꓫꓵꓸ ꓖꓴ ꓗꓪ ꓧꓳꓽ ꓖꓶ ꓠꓯꓹ ꓡꓳ=

ꓬꓲ ꓫꓵꓸ ꓫꓵꓸ ꓖꓴ ꓗꓪ ꓧꓶꓽ ꓚꓲ ꓮ ꓔꓲꓸ ꓤ ꓐꓰ ꓩꓲꓸ ꓛꓲ ꓟꓵꓽ ꓛꓵꓽ ꓐꓴ ꓧꓳꓽ ꓢꓲ ꓔꓶ ꓠꓯꓹ ꓥ= ꓬꓲ ꓫꓵꓸ ꓗꓪ ꓐꓰ ꓬꓲ ꓡꓲꓸ ꓤ ꓣꓱ ꓓꓳ ꓡ ꓢꓲ꓾ ꓬꓲ ꓒꓬꓽ 3 ꓒꓬꓽ 4 ꓒꓬꓽ ꓛꓲ ꓓꓳ ꓡˍ ꓕꓯ ꓔꓶ ꓓꓴ ꓙ ꓖꓶ ꓔ ꓟ ꓗꓪ ꓚꓽ ꓔꓶ ꓓ ꓡꓺꓳ= ꓒꓴꓽ ꓡꓴꓹ ꓜꓲ ꓔꓶ ꓓꓴ ꓐꓱ ꓶ ꓬꓲ ꓟꓲ ꓕꓲ ꓟ ꓐꓰ ꓕꓲ ꓟ 10’-15’ ꓛꓲ ꓗꓶꓹ ꓶꓽ ꓢꓲ ꓫꓬꓹ ꓠ ꓔ ꓥ= ꓬꓲ ꓟꓲ ꓔꓯ 6”-8” ꓠꓯꓸ ꓛꓲ ꓘꓪꓺ ꓠ ꓔ ꓡꓳ= ꓠꓱꓸ ꓦꓱꓽ꓾ ꓮꓸ ꓠꓬꓲꓽ ꓛꓰꓽ꓾ ꓧꓶꓽ ꓚꓲꓺ꓾ ꓘꓴꓽ ꓦ (ꓗꓪꓺ ꓒꓴ) ꓮ ꓙꓵꓽ ꓑꓯꓸ ꓗꓷ ꓫꓳꓽ ꓗꓷ ꓢꓲ ꓧꓳꓽ ꓖꓶ ꓠꓯꓹ ꓡꓳ= ꓬꓲ ꓟꓲꓺ ꓕꓯ ꓢꓲ ꓗꓪ ꓐꓰ ꓟꓺ ꓘꓪ ꓜꓲ ꓔꓶ ꓢꓲ ꓬꓲ ꓜꓲ ꓓꓯ ꓓꓴ꓾ ꓬꓲ ꓜꓲ ꓔꓶꓸ ꓓꓴ ꓬꓲ ꓗꓹ ꓫꓬꓹ ꓖꓶ ꓠꓯꓹ ꓥ=

ꓔꓶ ꓚꓱꓹ ꓧˍ ꓠꓬ꓾ ꓙꓲˍ ꓠꓬ ꓙꓲˍ ꓡꓰ꓾ ꓩꓲꓸ ꓛꓲ ꓟꓵꓽ ꓛꓵꓽ ꓟꓬꓽˍ ꓡꓰ ꓒꓴꓽ ꓡꓴꓹ ꓜꓲ ꓕꓲ ꓜꓲ ꓗꓪ ꓬꓲ ꓢꓶꓽ 30 ꓢꓶꓽ ꓗꓪ ꓐꓰ 50 ꓢꓶꓽ ꓗꓪ ꓛꓲ ꓓꓱꓼˍ ꓡꓳ= ꓬꓲꓸ ꓫꓵꓸ ꓚꓰ ꓠꓲꓹ ꓫꓵˍ ꓟ ꓬꓲ ꓢꓶꓽ ꓔꓯ ꓗꓷ ꓔ ꓢꓲ ꓠꓱꓸ ꓐꓯꓼ ꓒꓴꓽ ꓡꓴꓹ ꓢꓶꓽ ꓔꓯ ꓠꓬ ꓮ ꓘꓶꓸ ꓟꓽ ꓪꓴꓽ ꓓꓰꓺ ꓡꓰ ꓕꓯ ꓧꓼ ꓐ ꓡˍ ꓡꓳ=

ꓒꓴꓽ ꓡꓴꓹ ꓜꓲ ꓔꓶ ꓕꓯ ꓢꓷꓸ ꓔ ꓓꓴ ꓕꓲ ꓫꓵꓽ ꓠꓬ ꓬꓲ ꓜꓲ ꓔꓲꓺ ꓗꓪ ꓬꓲꓻ ꓙꓬ ꓟꓽ ꓩꓵꓸ ꓓ ꓠꓹ ꓟ ꓥ ꓡꓳ= ꓟꓳꓼ ꓙꓴꓺ ꓛꓵꓽ ꓐꓴ ꓔꓯ ꓬꓲꓻ ꓙꓬ ꓔꓲꓹ ꓖꓶ ꓢꓲ ꓬꓲ ꓜꓲ ꓔꓲ ꓗꓪ ꓧꓳꓽ ꓖꓶ ꓠꓯꓹ ꓡꓳ=