ꓓꓯꓸ-ꓔ-ꓡꓴꓠ ꓜꓲ ꓔꓶꓺ ꓚꓱꓹ

 ꓓꓯꓸ-ꓔ-ꓡꓴꓠ ꓠꓬ ꓛ ꓟꓵꓽ ꓪꓳꓽ ꓒꓬꓽ ꓐꓯ ꓥˍ ꓟꓲ ꓪ ꓚꓲ ꓟꓵꓽ ꓪ ꓓꓰꓺ ꓟꓵꓽ ꓮ ꓙꓵꓽ ꓗꓪ ꓔꓶꓺ ꓒꓬꓱꓼ ꓡ ꓓꓹ ꓟ ꓥ ꓡꓳ= ꓟꓵꓽ ꓟꓽ ꓢꓲꓺ ꓢꓲꓺ ꓔꓶ ꓒꓬꓱꓼ ꓡ ꓢˍ ꓟ ꓪꓴꓸ ꓠꓬꓲ ꓟꓬ-ꓟ ꓗꓴꓷꓼ ꓗꓪ ꓠꓬ ꓮ ꓘꓶꓸ ꓔꓶ ꓟꓬꓽˍ ꓟ ꓥꓳ= ꓓꓯꓸ-ꓔ-ꓡꓴꓠ ꓔꓶ ꓓꓴ ꓐꓱ ꓶ ꓩꓲꓸ ꓛꓲꓻ ꓮ ꓘꓶꓸ ꓙꓳ ꓢꓲ ꓠꓬꓲ ꓬꓲꓻ ꓙꓬ ꓟꓽ ꓐꓱ ꓟ ꓗꓪ ꓪ ꓜꓲ ꓔꓶ ꓢˍ ꓟ ꓥꓳ=

ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓓꓯꓸ-ꓔ-ꓡꓴꓠ ꓬꓲ ꓒꓬꓽ ꓐꓰ ꓬꓲ ꓢꓶꓽ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓟꓬꓹ ꓙꓲꓻ ꓖꓴ ꓙꓳˍ ꓟ ꓔꓯ ꓞꓳ ꓤ ꓐꓴ ꓢꓷꓸ ꓡ ꓠꓬꓲ ꓮ ꓟꓬꓹ ꓜꓽ ꓩꓴ ꓡ ꓔꓬ ꓟ ꓥ ꓡꓳ= ꓬꓲ ꓒꓬꓽ ꓜˍ ꓟ ꓗꓪ ꓐꓰ ꓫꓵꓽ ꓓꓯˍ ꓟ ꓔꓯˍ ꓟꓲ ꓓꓻ ꓡꓰ ꓝꓲˍ ꓡꓳ꓾ ꓐꓰ ꓐꓯ ꓔ ꓟ ꓥ ꓡꓳ=

ꓓꓯꓸ-ꓔ-ꓡꓴꓠ ꓜꓲ ꓔꓯ ꓚꓲ ꓛꓬ ꓦꓲꓻ ꓐꓱ ꓘꓴꓽ ꓗꓪ ꓜꓽ ꓓꓴ ꓐꓱ ꓶ ꓕꓲ ꓜꓲ ꓠꓬꓲꓽ ꓜꓲ ꓛꓲꓺ ꓔꓶ ꓔꓬ ꓥˍ ꓟꓲ ꓶꓻ ꓡꓯ ꓬꓰ ꓓꓴ ꓐꓱ ꓶ ꓔꓶꓺ ꓔꓬ ꓟ ꓠꓬ ꓖꓳ ꓟꓬ ꓟꓽ ꓙꓳ ꓡꓰ ꓢꓰꓽ= ꓬꓲ ꓜꓲ ꓔꓯ ꓬꓲ ꓡꓯ ꓗꓸ ꓗꓪ ꓐꓰ ꓥˍ ꓟꓲ꓾ ꓬꓲ ꓫꓵꓸ ꓫꓵꓸ ꓢꓲ ꓥˍ ꓟꓲ ꓔꓶꓺ ꓐ ꓡˍ ꓟ ꓥꓳ=

ꓬꓲ ꓡꓯꓼ ꓗꓸ ꓓꓶ ꓢꓲ ꓔꓶˍ ꓟ ꓔꓯ ꓟꓶꓽ ꓦ ꓬꓲ ꓪꓴꓸ ꓦ ꓡˍ ꓟ 6 ꓦ ꓕꓯ ꓡꓰ ꓔꓶꓺ ꓠꓯꓹ ꓟ ꓥꓳ= ꓬꓲ ꓜꓲ ꓔꓯ ꓕꓲ ꓜꓲ ꓐꓰ ꓕꓲ ꓜꓲ 20' ꓗꓶꓹ ꓶꓽ ꓢꓲ ꓔꓶ ꓠ ꓔ ꓥ= ꓬꓲ ꓡꓯꓼ ꓗꓸ ꓔꓶ ꓓꓴ ꓐꓱ ꓶ ꓬꓲ ꓠꓯꓸ ꓙ 3' ꓫꓵ ꓙ 3' ꓛꓲꓺ ꓙꓳˍ ꓟ ꓪꓹ ꓘꓴ ꓬꓲ ꓘꓴ ꓓꓵꓽ ꓢꓲ ꓟꓲ ꓠꓯ ꓧꓪꓽ ꓐꓰ ꓮ ꓠꓬꓲꓽ ꓛꓲꓽ (ꓥ ꓠꓬ) ꓢꓲꓹ ꓒꓬꓽ ꓛꓵꓽ ꓩꓲꓸ ꓛꓲꓻ ꓔꓲ ꓟꓬꓸ ꓑꓯꓸ ꓗꓷ ꓢꓲ ꓧꓳꓽ ꓗꓷ= ꓖꓳ ꓗ ꓠꓯꓸ ꓕꓲ ꓘꓳꓼ ꓛꓲ ꓙꓳˍ ꓟ ꓬꓲ ꓡꓯꓼ ꓗꓸ ꓔꓯ ꓓꓶ ꓗꓷ ꓢꓲ ꓮ ꓢꓳ ꓕꓯ ꓓꓵꓽ ꓔ ꓟ ꓪꓹ ꓘꓴ ꓬꓲ ꓘꓴꓽ ꓗꓪ ꓬꓲ ꓓꓳ 6” ꓛꓲꓺ ꓬꓲ ꓡꓯ ꓗꓸ ꓔꓯ ꓟꓲ ꓠꓯ ꓧꓪꓽ ꓐꓰ ꓔꓵꓸ ꓗꓷ ꓢꓲ ꓔꓶ ꓠꓯꓹ ꓟ ꓥ ꓡꓳ= ꓬꓲ ꓡꓯꓼ ꓗꓸ ꓔꓶ ꓗꓷ ꓗ ꓠꓯꓸ ꓟꓶꓽ ꓦ ꓟꓽ ꓦ ꓠꓬ ꓕꓲ ꓠꓬꓲ ꓗꓪ ꓠꓬꓲꓽ ꓧꓪꓹ ꓬꓲꓻ ꓙꓬ ꓧꓳꓽ ꓖꓶ ꓠꓯꓹ ꓟ ꓥꓳ= ꓓꓯꓸ-ꓔ-ꓡꓴꓠ ꓠꓬ ꓬꓲ ꓚꓰꓺ ꓣꓱꓻ ꓢˍ ꓟ ꓬꓲ ꓜꓲ ꓥ ꓠꓬꓲ ꓔꓶ ꓔ ꓟ ꓬꓲ ꓡꓯꓼ ꓗꓸ ꓠꓬ ꓔꓶꓺ ꓗꓷ ꓗ ꓠꓯꓸ ꓕꓲ ꓠꓽ ꓘꓴꓽ ꓗꓪ ꓬꓲ ꓚꓰꓺ ꓣꓱꓻ ꓓꓳ ꓡ ꓢꓲ ꓬꓲ ꓜꓲ ꓪꓴꓽ ꓡˍ ꓥꓳ= ꓬꓲ ꓡꓯꓼ ꓗꓸ ꓔꓶ ꓔ ꓟ ꓬꓲ ꓜꓲ 2 ꓘꓳꓼ ꓙꓳ ꓡꓰ ꓠꓬ ꓬꓲ ꓪꓰ ꓪꓰ ꓡ ꓢꓲ ꓬꓲ ꓢꓶꓽ ꓓꓱꓼ ꓡꓺꓳ= ꓖꓳ ꓡꓱ ꓥˍ ꓟꓲ ꓔꓶꓺ ꓔ ꓟ 4 ꓘꓳꓼ 5 ꓘꓳꓼ ꓙꓳ ꓡˍ ꓕꓯ ꓡꓰꓽ ꓬꓲ ꓢꓶꓽ ꓮ ꓟꓬꓹ ꓓꓱꓼ ꓡˍ ꓡꓳ=

ꓬꓲ ꓫꓵꓸ ꓔꓶˍ ꓟ ꓗꓪˍ ꓟꓲ ꓟꓶꓽ ꓦ ꓦˍ ꓟ 6 ꓦ ꓕꓯ ꓬꓲ ꓫꓵꓸ ꓫꓵꓸ ꓠꓯꓹ ꓡꓳ= ꓔꓶꓺ ꓓꓴ ꓐꓱ ꓶ 1' ꓠꓯꓸ ꓢꓲ 1' ꓫꓵˍ ꓟ ꓪꓹ ꓘꓴ ꓓꓵꓽ ꓢꓲ ꓟꓲ ꓠꓯ ꓧꓪꓽ ꓐꓰ ꓮ ꓠꓬꓲꓽ ꓛꓲꓽ ꓥ ꓠꓬ ꓢꓲꓹ ꓒꓬꓽ ꓛꓵꓽ ꓩꓲꓸ ꓛꓲꓻ ꓕꓲ ꓡꓰꓹ ꓑꓯꓸ ꓗꓷ ꓢꓲ ꓧꓳꓽ ꓗꓷ= ꓗ ꓠꓯꓸ ꓬꓲ ꓘꓴ ꓔꓱ ꓫꓵ ꓗꓪ ꓬꓲ ꓫꓵꓸ ꓢꓶꓽ ꓕꓲ ꓢꓶꓽ ꓔꓯ 1” ꓛꓲ ꓔꓵꓸ ꓗꓷ ꓢꓲ ꓔꓶ ꓖꓶ ꓠꓯꓹ ꓡꓳ= ꓔꓶꓺ ꓗꓷ ꓗ ꓠꓯꓸ ꓟꓶꓽ ꓦ ꓟꓽ ꓦ ꓡ ꓠꓬ ꓕꓲ ꓠꓬꓲ ꓗꓪ ꓕꓲ ꓧꓪꓹ ꓬꓲꓻ ꓙꓬ ꓧꓳꓽ ꓖꓶ ꓠꓯꓹ ꓡꓳ= ꓬꓲ ꓫꓵꓸ ꓔꓶꓺ ꓗꓷ ꓟ ꓕꓲ ꓠꓽ ꓙꓳ ꓡˍ ꓕꓯ ꓬꓲ ꓜꓲ ꓤ ꓣꓱꓻ ꓓꓳ ꓡꓺꓳ= ꓬꓲ ꓫꓵꓸ ꓔꓶˍ ꓟ ꓗꓪ ꓐꓰ ꓥˍ ꓟꓲ ꓕꓲ ꓜꓲ ꓐꓰ ꓕꓲ ꓜꓲ 20' ꓗꓶꓹ ꓶꓽ ꓢꓲ ꓔꓶˍ ꓠꓬ ꓕꓲ ꓰ-ꓗ ꓗꓪ 108 ꓜꓲ ꓔꓶꓺ ꓐ ꓡˍ ꓟ ꓥꓳ= ꓓꓯꓸ-ꓔ-ꓡꓴꓠ ꓬꓲ ꓫꓵꓸ ꓜꓲ ꓠꓬ ꓬꓲ ꓡꓯꓼ ꓗꓸ ꓔꓶˍ ꓟ ꓡꓰ ꓐꓰ 2 ꓘꓳꓼ ꓛꓲꓺ ꓕꓯ ꓬꓲ ꓪꓰ ꓪꓰ ꓬꓲ ꓢꓶꓽ ꓓꓱꓼ ꓪꓴꓸ ꓔꓴ ꓢꓲ ꓠꓬꓲ 4 ꓘꓳꓼ 5 ꓘꓳꓼ ꓛꓲꓺ ꓙꓳ ꓡˍ ꓕꓯ ꓬꓲ ꓢꓶꓽ ꓮ ꓟꓬꓹ ꓓꓱꓼ ꓡˍ ꓟ ꓥꓳ= ꓬꓲ ꓡꓯꓼ ꓗꓸ ꓔꓶꓺ ꓔ ꓟ ꓢꓶꓸ ꓟꓽ ꓞꓲꓺ ꓬꓲ ꓫꓵꓸ ꓔꓶ ꓔ ꓟ ꓬꓲ ꓜꓲ ꓠꓬ ꓬꓲ ꓢꓶꓽ ꓟꓬꓽ ꓠꓬꓲ ꓓꓱꓼˍ ꓟ ꓥ ꓡꓳ=

ꓓꓯꓸ-ꓔ-ꓡꓴꓠ ꓜꓲ ꓠꓬ ꓬꓲꓻ ꓙꓬ ꓟꓽ ꓙꓳ ꓟ ꓗꓪ ꓔꓶ ꓒꓬꓱꓼ ꓡˍ ꓐꓯ ꓥ ꓟꓲ ꓛ ꓢꓯꓼ ꓮ ꓘꓶꓸ ꓪꓽ ꓠꓬꓲˍ ꓟ 3 ꓦ ꓐꓰ 4 ꓦ ꓕꓯ ꓠꓽ ꓕꓲ ꓠꓬꓲ ꓠꓬꓲꓽ ꓧꓪꓹ ꓬꓲꓻ ꓙꓬ ꓧꓳꓽ ꓖꓶ ꓠꓯꓹ ꓡꓳ= ꓩꓲꓸ ꓛꓲꓻ ꓧꓳꓽ ꓖꓶˍ ꓟ ꓗꓪ ꓠꓬ ꓟꓶꓽ ꓦ ꓦ ꓪꓴꓸ ꓔꓴˍ ꓕꓯ ꓕꓲ ꓧꓪꓹ ꓟꓶꓽ ꓦ ꓦ ꓝꓲ ꓖꓴ ꓡꓰ ꓔꓬꓹ ꓕꓯ ꓕꓲ ꓧꓪꓹ ꓧꓳꓽ ꓖꓶˍ ꓠꓬ ꓪ ꓜꓲ ꓙꓲˍ ꓟ ꓥꓳ= ꓟꓶꓽ ꓦ ꓬꓲ ꓪꓴꓸ ꓦ ꓡˍ ꓕꓯ ꓩꓲꓸ ꓛꓲꓻ ꓧꓳꓽ ꓖꓶˍ ꓟ ꓗꓪ ꓐꓰ ꓬꓲ ꓜꓲ ꓔꓯ ꓪꓴꓽ ꓡ ꓝꓲ ꓢꓲ ꓬꓲ ꓢꓶꓽ ꓬꓰ ꓪꓰ ꓮ ꓟꓬꓹ ꓪꓰ ꓡ ꓓꓱꓼ ꓡ ꓝꓲˍ ꓡꓳ ꓐꓰ ꓢꓷꓸ ꓪ ꓡꓳ=

ꓬꓲ ꓪꓳꓸ ꓠꓳ ꓔꓯ ꓠꓬ ꓪꓳꓽ ꓒꓬꓽ ꓬꓲꓻ ꓚꓬꓸ ꓓꓴ ꓐꓱ ꓶ ꓬꓲ ꓪꓳꓸ ꓠꓳ ꓞꓲꓼ ꓜꓽˍ ꓟ ꓟꓬꓽˍ ꓡꓳ= ꓖꓳ ꓡꓱ ꓥˍ ꓟꓲ ꓶꓻ ꓡꓯꓼ ꓬꓰ ꓓꓴ ꓐꓱ ꓶ ꓔꓶꓺ ꓔ ꓠꓬ ꓬꓲ ꓪꓳ ꓠꓳ ꓞꓲꓼ ꓖꓶ ꓟꓽ ꓓ= 2 ꓦ꓾ 3 ꓦ꓾ 4 ꓦ ꓗꓪ ꓓꓯꓸ ꓔ ꓡꓳꓠ ꓢꓶꓽ ꓮ ꓟꓬꓹ ꓓꓱꓼˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪꓰ ꓠꓬ ꓕꓲ ꓘꓳꓼ ꓡꓱꓸꓼ ꓪꓰˍ ꓟ ꓬꓲ ꓜꓲ ꓕꓲ ꓙꓰꓽ ꓥ ꓟ ꓪꓴꓸ ꓠꓬꓲ ꓟꓶ ꓦ ꓦ ꓝꓲ ꓕꓯ ꓥˍ ꓟꓲ ꓬꓲ ꓢꓶꓽ ꓧꓼ ꓓꓹ ꓡꓳ=