ꓔꓶꓺ ꓫꓵꓽ ꓔꓶꓺ ꓙꓰꓽ ꓔꓶˍ ꓟ

ꓬꓲ ꓚꓰꓺ ꓔꓶ ꓖꓴ ꓠꓬ ꓧꓶꓽ ꓗꓴꓷꓼ꓾ ꓲ-ꓓꓲ-ꓬ ꓗꓴꓷꓼ꓾ ꓟ-ꓡꓰ-ꓫꓬꓸ ꓐꓰ ꓮ-ꓩ-ꓣꓲ-ꓗ ꓛꓺ ꓟꓵꓽ ꓗꓪ ꓔꓶꓺ ꓪꓴꓸ ꓔꓴˍ ꓟ ꓥ ꓡꓳ=

ꓬꓲ ꓜꓲ ꓔꓯ ꓬꓲ ꓢꓶꓽ ꓬꓲ ꓕꓴꓽ ꓔꓯ ꓡꓳꓸ ꓢꓲ ꓬꓲ ꓢꓶꓽ ꓓꓴꓸˍ ꓟ ꓝꓳꓽ꓾ ꓬꓲ ꓢꓶꓽ ꓫꓵˍ ꓟ ꓝꓳꓽ ꓐꓰ ꓬꓲ ꓡꓴꓸ ꓡꓴꓸ ꓝꓳꓽ ꓐꓯ ꓢꓲ 3 ꓙꓰꓽ ꓙꓳˍ ꓟ ꓥꓳ=

ꓬꓲ ꓜꓲ ꓠꓬ ꓛˍ ꓟ ꓡꓱˍ ꓟ ꓟꓵꓽ ꓘꓳꓼ ꓗꓪ ꓔꓶꓺ ꓒꓬꓱꓼ ꓡ ꓢˍ ꓟ ꓥ ꓢꓲ ꓪ ꓚꓲꓺ ꓟꓵꓽ ꓟꓵꓽ ꓘꓳꓼ ꓙꓬˍ ꓟ ꓗꓪ ꓠꓬ ꓛ ꓝꓲꓸ ꓕꓯ ꓔꓶꓺ ꓒꓬꓱꓼ ꓡˍ ꓟ ꓥ ꓡꓳ=

ꓬꓲ ꓜꓲ ꓠꓬ ꓬꓲꓻ ꓙꓬ ꓙꓳ ꓢꓲ ꓩꓲꓸ ꓛꓲꓻ ꓙꓳˍ ꓟ ꓗꓪ ꓟꓵꓽ ꓟꓽ ꓢꓲꓺ ꓢꓲꓺ ꓔꓶꓺ ꓒꓬꓱꓼ ꓡˍ ꓟ ꓥ ꓡꓳ=

ꓠꓱꓸ ꓐꓯ ꓬꓲ ꓜꓲ ꓔꓶˍ ꓟ ꓡꓰ ꓟꓽ ꓔꓶꓺ ꓧꓶꓸ ꓕꓯ ꓕꓯꓺ ꓬꓲ ꓟꓲꓺ ꓔꓯ ꓘꓪꓺ ꓗꓷ ꓢꓲ ꓠꓬꓲ ꓕꓲ ꓚꓬꓸ ꓐꓰ ꓕꓲ ꓚꓬꓸ 5'꓾ ꓕꓲ ꓜꓲ ꓐꓰ ꓕꓲ ꓜꓲ 3' ꓔꓶꓺ ꓠ ꓬꓲ ꓟꓲꓺ ꓫꓬꓹ ꓖꓶ ꓠ ꓔ ꓥ= ꓬꓲ ꓟꓲ ꓫꓬꓹ ꓓꓳ ꓡꓰ ꓠꓬ ꓩꓲꓸ ꓛꓲꓻ ꓧꓳꓽ ꓖꓶ ꓠꓯꓹ ꓟ ꓥꓳ= ꓶꓻ ꓡꓯꓼ ꓬꓰ ꓓꓴ ꓐꓱ ꓶ ꓠꓬ ꓕꓲ ꓰ ꓗꓸ ꓗꓪ ꓮꓸ ꓠꓬꓲꓽ ꓛꓲꓽ 15 ꓡꓳꓼ ꓧꓳꓽ ꓖꓶ ꓠꓯꓹ ꓟ ꓥ ꓢꓲ꓾ ꓬꓴꓸ-ꓣꓲꓸ-ꓬꓸ ꓩꓲꓸ ꓛꓲꓻ 224lb ꓧꓳꓽ ꓖꓶ ꓠꓯꓹ ꓥ= ꓩꓲꓸ ꓛꓲꓻ ꓧꓳꓽ ꓖꓶˍ ꓕꓯ ꓠꓬ ꓬꓲ ꓟꓲꓺ ꓗꓪ ꓮ ꓘꓶꓸ ꓑꓯꓸ ꓡꓰ ꓠ ꓫꓳꓹ ꓖꓶ ꓠ ꓔ ꓡꓳ= ꓔꓲ-ꓢꓴ-ꓑ ꓩꓲꓸ ꓛꓲꓻ ꓔꓯ ꓠꓬ ꓕꓲ ꓰ ꓗꓸ ꓗꓪ 112lb ꓧꓳꓽ ꓖꓶ ꓠꓯꓹ ꓡꓳ=

ꓬꓲ ꓟꓲꓺ ꓙ ꓖꓶ ꓓꓳ ꓡꓰ ꓕꓯ ꓔꓶꓺ ꓓꓻ ꓡꓺꓳ= Bitter gourd ꓜꓲ ꓔꓯ ꓠꓬ ꓬꓲ ꓫꓵꓸ ꓫꓵꓸ ꓢꓲ ꓔꓶˍ ꓡꓳ= ꓟꓶꓽ ꓦ ꓦ ꓝꓲ ꓕꓯ ꓜꓽ ꓓꓴ ꓐꓱ ꓶ ꓠꓬ ꓥꓪꓽ ꓦ ꓐꓰ ꓛꓳꓼ ꓦ ꓗꓪ ꓔꓶˍ ꓟ ꓥ ꓢꓲ ꓠꓬꓲ꓾ ꓙꓬꓻ ꓝꓲ ꓕꓯ ꓜꓽ ꓓꓴ ꓐꓱ ꓶ ꓠꓬ ꓞꓲꓺ ꓦ ꓐꓰ ꓞꓲꓺ ꓕꓲꓽ ꓦ ꓕꓯ ꓔꓶˍ ꓟ ꓥ ꓡꓳ= ꓬꓲ ꓜꓳꓻ ꓫꓬꓹ ꓢꓲ ꓔꓶˍ ꓟ ꓗꓪ ꓕꓲ ꓜꓲ ꓐꓰ ꓕꓲ ꓜꓲ 2' ꓛꓲꓺ ꓗꓶꓹ ꓶꓽ ꓢꓲ ꓕꓲ ꓝꓳꓹ ꓗꓪ ꓬꓲ ꓫꓵꓸ 3 ꓢꓶꓽ ꓧꓳꓽ ꓢꓲ ꓔꓶ ꓖꓶ ꓠꓯꓹ ꓡꓳ= ꓬꓲ ꓫꓵꓸ ꓗꓪ ꓐꓰ ꓬꓲ ꓜꓲ ꓣꓱꓻ ꓓꓳ ꓡˍ ꓕꓯ ꓬꓲ ꓫꓵꓸ ꓝꓳꓹ ꓕꓲ ꓝꓳꓹ ꓗꓪ ꓟꓽ ꓓ ꓪꓴꓽˍ ꓟ ꓬꓲ ꓜꓲ ꓔꓯ ꓗꓷ ꓔ ꓢꓲ ꓠꓱꓸ ꓐꓯꓼ ꓔꓯ ꓚꓵꓹ ꓦ ꓗꓷ ꓢꓲ ꓠꓬ ꓬꓲ ꓜꓲ ꓠꓬ ꓬꓲ ꓜꓳꓻ ꓗꓪ ꓚꓺ ꓓꓯ ꓙꓰ ꓐ ꓡ ꓠꓹ ꓟ ꓐꓱ ꓶ ꓟꓺ ꓘꓪꓽ ꓓꓻ ꓥ ꓠꓬ ꓢꓲꓹ ꓓ ꓞꓳꓹ ꓖꓶ ꓠꓯꓹ ꓡꓳ= ꓬꓲ ꓜꓲ ꓬꓲ ꓜꓳꓻ ꓗꓪ ꓓꓯ ꓛꓲꓺ ꓬꓰˍ ꓕꓯ ꓠꓬ ꓬꓲ ꓪꓳꓸ ꓠꓳ ꓔꓯ ꓞꓲꓼ ꓦ ꓗꓷ= ꓖꓳ ꓡꓱ ꓬꓰˍ ꓟ ꓠꓬ ꓬꓲ ꓪꓳꓸ ꓠꓳ ꓮ ꓟꓬꓽ ꓠꓱꓽ ꓡ ꓓꓴ ꓥ ꓡꓳ= ꓶꓻ ꓡꓯꓼ ꓬꓰ ꓓꓴ ꓐꓱ ꓶ ꓔꓶˍ ꓠꓬ ꓕꓲ ꓚꓬꓸ ꓐꓰ ꓕꓲ ꓚꓬꓸ 5' ꓗꓶꓹ ꓶꓽ ꓢꓲ ꓕꓲ ꓜꓲ ꓐꓰ ꓕꓲ ꓜꓲ 3'ꓛꓲꓺ ꓗꓶꓹ ꓶꓽ ꓢꓲ ꓔꓶꓺ ꓖꓶ ꓠꓯꓹ ꓟ ꓥ ꓡꓳ= ꓔꓶꓺ ꓜꓽ ꓢꓴ ꓕꓲ ꓐꓱ ꓠꓬ ꓬꓲ ꓪ ꓐꓱ ꓚꓱꓺ(ꓐꓱ ꓕꓴꓽ ꓦ ꓔ ꓟ) ꓗꓪ ꓬꓲ ꓫꓵꓸ ꓫꓵꓸ ꓗꓷ ꓢꓲ ꓬꓲ ꓜꓲ ꓔꓯ ꓠꓬ ꓐꓱ ꓚꓱꓺ ꓕꓯꓽ ꓢꓲ ꓚꓺ ꓓꓯ ꓝꓲ ꓢꓲ ꓬꓲ ꓢꓶꓽ ꓓꓱꓼ ꓝꓲˍ ꓡꓳ=

ꓟꓶꓽ ꓦ ꓦ ꓝꓲ ꓕꓯ ꓔꓶ ꓔ ꓠꓬ ꓬꓲ ꓜꓲ ꓔꓯ ꓬꓲꓻ ꓙꓬ ꓧꓳꓽ ꓖꓶꓽ ꓟꓽ ꓛꓵ= ꓖꓳ ꓡꓱ ꓥˍ ꓟꓲ ꓙꓬꓻ ꓝꓲ ꓕꓯ ꓔꓶ ꓔ ꓠꓬ ꓬꓲ ꓟꓲꓺ ꓔꓯ ꓡꓳꓸ ꓢꓲ ꓠꓬꓲ 10-15 ꓠꓬꓲ ꓗꓪ ꓕꓲ ꓧꓪꓹ ꓬꓲ ꓙꓬꓻ ꓧꓳꓽ ꓖꓶ ꓠꓯꓹ ꓡꓳ= ꓬꓲ ꓜꓲ ꓣꓱꓻ ꓡ ꓗ ꓠꓯꓸ ꓬꓲ ꓟꓲꓺ ꓗꓪ ꓟꓳꓼ ꓜꓲ ꓣꓱꓻ ꓡ ꓠꓬ ꓚꓵꓹ ꓡꓲꓸ ꓖꓶ ꓠ ꓔ ꓥ= ꓬꓲ ꓜꓲ ꓗꓪ ꓬꓲ ꓪꓰꓻ ꓪꓰ ꓡˍ ꓕꓯ ꓬꓲ ꓪꓳꓸ ꓠꓳ ꓔꓯ ꓞꓲꓼ ꓦ ꓗꓷ ꓠꓯꓹ ꓡꓳ= ꓖꓳ ꓡꓱ ꓢꓲ ꓬꓲ ꓪꓳꓸ ꓠꓳ ꓮ ꓟꓬꓹ ꓟꓬꓽ ꓡ ꓢꓲ ꓠꓬꓲ ꓬꓲ ꓢꓶꓽ ꓮ ꓟꓬꓹ ꓓꓱꓼ ꓡˍ ꓥꓳ=

Bitter Gourd ꓬꓲ ꓜꓲ ꓠꓬ ꓣꓱꓻ ꓓꓳ ꓡ ꓗ ꓠꓯꓸ 75-90 ꓠꓬꓲ ꓙꓳ ꓡ ꓠꓬ ꓬꓲ ꓢꓶꓽ ꓧꓼ ꓓ ꓡꓺꓳ= ꓬꓲ ꓢꓶꓽ ꓔꓯ ꓠꓬ ꓖꓳ ꓘꓶꓸ ꓟꓽ ꓟꓲꓺ ꓡꓰ ꓕꓯ ꓡꓰ ꓧꓼ ꓠ ꓔ ꓥ= ꓮ ꓘꓶꓸ ꓟꓲꓺ ꓡꓰ ꓕꓯ ꓠꓬ ꓬꓲ ꓠꓲꓹ ꓟ ꓟꓳꓽ ꓡꓰ ꓗꓳꓹ ꓡꓰ ꓢꓲ ꓜꓽ ꓟꓽ ꓙꓲꓻ ꓜꓽ ꓟꓽ ꓟꓲ ꓗꓷ ꓡꓰˍ ꓡꓳ= ꓬꓲ ꓢꓶꓽ ꓔꓯ ꓟꓽ ꓟꓲꓺ ꓢꓰꓽ ꓕꓯ ꓕꓲ ꓠꓬꓲ ꓕꓲ ꓠꓬꓲ ꓗꓶꓹ ꓢꓲ ꓠꓬꓲꓽ ꓠꓬꓲ ꓕꓲ ꓧꓪꓹ ꓧꓼ ꓖꓶ ꓠꓯꓹ ꓡꓳ= ꓬꓲ ꓜꓲ ꓬꓲ ꓟꓲꓺ ꓔꓯ ꓫꓬꓹ ꓡꓲꓸ ꓖꓶ ꓐ ꓡ ꓢꓲ ꓠꓬꓲ ꓬꓲ ꓟꓲꓺ ꓙꓲˍ ꓟ ꓩꓲꓸ ꓛꓲꓻ ꓙꓲˍ ꓟ ꓗꓪ ꓔꓶ ꓔ ꓠꓬ ꓬꓲ ꓢꓶꓽ ꓪ ꓜꓲ ꓓꓱꓼ ꓡˍ ꓡꓳ= ꓕꓲ ꓰ ꓗꓸ ꓗꓪ ꓬꓲ ꓢꓶꓽ 27000-30000 ꓗꓪ ꓛꓲꓺ ꓟꓶ ꓪ ꓓꓹ ꓡꓳ=

ꓬꓲ ꓫꓵꓸ ꓐꓱ ꓶ ꓫ ꓠꓲꓹ ꓫꓵˍ ꓠꓬ ꓬꓲ ꓢꓶꓽ ꓮ ꓘꓶꓸ ꓟꓲꓺ ꓡꓰ ꓧꓪꓼ ꓡꓰ ꓟ ꓬꓲ ꓢꓶꓽ ꓐꓴ ꓔꓯ ꓧꓼ ꓗꓷ ꓢꓲ ꓬꓲ ꓠꓲꓹ ꓟ ꓣꓴ ꓗꓷ= ꓖꓳ ꓗ ꓠꓯꓸ ꓬꓲꓻ ꓙꓬ ꓐꓰ ꓞꓲꓽ ꓗꓷ ꓢꓲ ꓠꓬ ꓟꓶ ꓛ ꓢꓯꓼ ꓗꓪ 3 ꓠꓬꓲ ꓡꓱꓸ ꓗꓷ= ꓗ ꓠꓯꓸ ꓠꓬ ꓟꓲꓽ ꓦꓲ ꓟꓽ ꓓꓵꓽˍ ꓟ ꓬꓲ ꓕꓴꓽ ꓗꓪ ꓧꓳꓽ ꓫ ꓗꓷ=