ꓕꓮꓲ-ꓪꓮꓠ ꓪꓳꓽ ꓒꓲꓻ ꓙꓲꓻ ꓖꓴ ꓙꓳˍ ꓟ

ꓮ ꓙꓵꓽ ꓔꓯ ꓧꓪꓸ ꓧꓪꓸꓼ ꓾ ꓮ ꓟꓶ ꓟ ꓡꓰ ꓙꓬꓻ ꓝꓲꓸ ꓛꓲꓺ ꓡ ꓕꓯ ꓠꓬ ꓕꓲ ꓟꓵꓽ ꓡꓱꓸꓼ ꓗꓪ ꓜꓽ ꓪꓳꓽ ꓡꓳ ꓪꓳꓽ ꓥˍ ꓟꓲ ꓮ ꓟꓬꓹ ꓙꓳ ꓡˍ ꓟ ꓥ ꓡꓳ= ꓟꓬꓽ ꓠꓬꓲ ꓠꓬ ꓪꓳꓽ ꓐꓱ ꓗꓪ ꓐꓰ ꓪꓳꓽ ꓠꓲꓹ ꓛꓵꓼ ꓮ ꓟꓬꓹ ꓣꓱꓻ ꓡˍ ꓟ ꓦꓬꓼ ꓠꓬꓲˍ ꓟꓲ ꓥ ꓡꓳ= ꓕꓱ ꓡꓱ ꓜꓽ ꓪꓳꓽ ꓡꓳ ꓪꓳꓽ ꓮ ꓟꓬꓹ ꓙꓳˍ ꓟ ꓦꓬꓼ ꓠꓬꓲ ꓕꓯ ꓠꓬ ꓠꓲꓹ ꓛꓵꓼˍ ꓟ ꓜꓽ ꓪꓳꓽ ꓡꓳ ꓪꓳꓽ ꓔꓯ ꓟꓬꓽ ꓠꓬꓲ ꓜꓽ ꓖꓶˍ ꓕꓯ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶˍ ꓟꓲ ꓟꓬꓽ ꓠꓬꓲ ꓙꓲꓻ ꓖꓴ ꓙꓳˍ ꓟ ꓔꓯ ꓠꓬ ꓣꓳ ꓢꓷꓸ ꓗꓷ ꓟ ꓥꓳ= ꓪꓳꓽ ꓠꓲꓹ ꓛꓵꓼ ꓐꓴ ꓘꓴꓽ ꓗꓪ ꓐꓰ ꓕꓮꓲ-ꓪꓮꓠ ꓪꓳꓽ ꓒꓲꓻ ꓙꓲꓻ ꓖꓴ ꓙꓳˍ ꓟ ꓚꓱꓹ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ=

ꓕꓮꓲ-ꓪꓮꓠ ꓪꓳꓽ ꓒꓲꓻ ꓐꓰ ꓘꓴˍ ꓟ ꓪꓳꓽ ꓒꓲꓻ ꓘꓴꓽ ꓗꓪ ꓚꓮꓠꓚꓰꓣ ꓔꓯ ꓗꓽ ꓕꓸ ꓖꓶˍ ꓟ ꓢꓯꓼ ꓐꓰ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓡꓳ= ꓧꓪꓽ ꓖꓳ ꓓꓱꓽ ꓗꓪ ꓒꓬꓱꓼ ꓡ ꓟ ꓰꓢꓔꓣꓳꓖꓰꓠ ꓔꓯ ꓥˍ ꓟꓲ ꓞꓼ ꓞꓼ ꓒꓬꓱꓼ ꓡ ꓝꓲˍ ꓡꓳ= ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ ꓔꓯ ꓒꓬꓱꓼ ꓡ ꓝꓲˍ ꓟ ꓬꓲ ꓢꓶꓽ ꓬꓲ ꓑ ꓐꓴ ꓔꓯ ꓥˍ ꓟꓲ ꓟꓽ ꓪꓴꓽ ꓡ ꓠ ꓗꓽ ꓕꓸ ꓖꓶ ꓐ ꓡˍ ꓡꓳ=

ꓕꓲ ꓠꓽ ꓡꓱꓸꓼ ꓪꓳꓽ ꓒꓲꓻ ꓕꓱ ꓟ ꓔꓯ ꓜꓽˍ ꓟ ꓤ ꓑꓸ ꓤ ꓐꓴ ꓠꓬ ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ ꓒꓬꓱꓼ ꓡˍ ꓟ ꓔꓯ ꓮ ꓟꓬꓹ ꓠꓲꓸ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓜꓽ ꓓꓴ ꓫꓵꓽ ꓔꓯ ꓟꓳꓸ ꓙꓲꓻ ꓖꓴ ꓙꓳˍ ꓟ ꓔꓯ ꓧꓪꓺ ꓟꓰ ꓠꓬꓲˍ ꓟ ꓗꓪ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯ ꓔ ꓡꓳ=

ꓦꓰꓼ ꓟ ꓚꓮꓠꓚꓰꓣ ꓒꓬꓱꓼ ꓡˍ ꓟ ꓗꓪ ꓐꓰˍ ꓟꓲ ꓗꓽ ꓕꓸ ꓖꓶˍ ꓟ ꓡꓰꓽ ꓟꓽ ꓞꓲꓺ ꓦꓰꓼ ꓟ ꓠꓻˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ꓾ ꓐꓰ ꓐꓯ ꓔ ꓡꓳ= ꓟꓽ ꓙꓲꓻ ꓟ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓥˍ ꓟꓲ ꓫꓵꓻ ꓝꓲˍ ꓟ ꓢꓯꓼ ꓙꓳˍ ꓟ ꓥ ꓢꓲ꓾ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓟ ꓢꓯꓼ ꓐꓴ ꓔꓯ ꓥˍ ꓟꓲ ꓮ ꓟꓬꓹ ꓡꓴꓽ ꓖꓶˍ ꓡꓳ꓾ ꓐꓰ ꓢꓷꓸ ꓪ ꓡꓳ=