ꓖꓪ-ꓢꓶꓽ (ꓢꓲ-ꓐ-ꓢꓶꓽ) ꓙꓲꓻ ꓖꓴ ꓙꓳˍ ꓟ 11 ꓚꓱꓹ

ꓠꓬꓲꓸ ꓠꓬꓲ ꓗꓪ ꓐꓯ ꓖꓶ ꓠꓹ ꓟ ꓠꓬ ꓖꓪ-ꓢꓶꓽ (ꓢꓲ-ꓐ-ꓢꓶꓽ) ꓙꓲꓻ ꓖꓴ ꓙꓳˍ ꓟ ꓚꓱꓹ 11 ꓚꓱꓹ ꓔꓯ ꓐꓯ ꓖꓶ ꓩꓴ ꓡˍ ꓥꓳ=

ꓖꓪ-ꓢꓶꓽ ꓔꓯ ꓚꓬꓸ ꓜꓽˍ ꓟ꓾ ꓞꓴ ꓢꓲ ꓔꓲꓸ ꓜꓽˍ ꓟ꓾ ꓡꓱ ꓜꓽˍ ꓟ꓾ ꓬꓲ ꓚꓱ ꓬꓲꓻ ꓫꓬꓹ ꓢꓲ ꓓꓳꓻˍ ꓟ ꓡꓰ ꓐꓰ ꓣꓳ ꓐꓴ ꓠꓬ ꓖꓪ ꓢꓶꓽ ꓔꓯ ꓚꓲꓸ ꓛꓬ ꓜꓽ ꓠꓲꓹ ꓫꓵˍ ꓟ ꓡꓰ ꓫꓬꓹ ꓜꓽ ꓔꓬ ꓟ ꓥ ꓡꓳ=

ꓖꓪ-ꓜꓶꓽ ꓗꓪ ꓝꓲꓐꓰꓣ꓾ ꓦꓲꓔꓮꓟꓲꓠ ꓐ6꓾ ꓦꓲꓔꓮꓟꓲꓠ ꓚ꓾ ꓦꓲꓔꓮꓟꓲꓠ ꓗ꓾ ꓦꓲꓔꓮꓟꓲꓠ ꓰ꓾ ꓦꓲꓔꓮꓟꓲꓠ ꓐ꓾ ꓲꓣꓳꓠ ꓢꓯꓼ꓾ ꓑꓳꓔꓮꓢꓢꓲꓴꓟ꓾ ꓑꓳ-ꓡꓲ-ꓩꓲ-ꓠꓮꓪ ꓕꓱ ꓡꓱ ꓫꓵꓽ ꓙꓲꓻ ꓖꓴ ꓙꓳˍ ꓟ ꓢꓯꓼ ꓐꓰ ꓟꓲꓠꓰꓣꓮꓡ ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓖꓪ-ꓢꓶꓽ ꓔꓯ ꓜꓽ ꓖꓶˍ ꓟ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓔꓯ ꓮ ꓡꓲ ꓫꓵꓽ ꓙꓲꓻ ꓖꓴ ꓖꓶ ꓐ ꓡˍ ꓡ ꓐꓯ ꓟ ꓔꓯ ꓣꓳ ꓕꓲ ꓪ ꓢꓳ ꓓꓴ ꓬꓰ ꓡꓯ=

ꓕꓲꓽ꓾ ꓪꓳꓽ ꓔꓳ ꓐꓴ ꓔꓯ ꓢꓯꓼ ꓙꓳ ꓪꓽ ꓠꓬꓲ ꓡ ꓝꓲˍ ꓟ

ꓖꓪ-ꓢꓶꓽ ꓔꓯ ꓜꓽ ꓖꓶˍ ꓟ ꓠꓬ ꓪꓳꓽ ꓔꓳ ꓔꓬꓹ ꓢ ꓓꓴ ꓔꓯ ꓟꓬꓽ ꓠꓬꓲ ꓬꓰ ꓙ ꓖꓶˍ ꓟ ꓥ ꓡꓳ= ꓖꓪ-ꓢꓶꓽ ꓗꓪ ꓪꓳꓽ ꓔꓳ ꓔꓬꓹ ꓢ ꓓꓴ ꓐꓱ ꓶ ꓣꓱꓽ ꓞꓹ ꓟ ꓑꓮꓲ-ꓔꓳ-ꓠꓳ-ꓕ-ꓣꓲ-ꓬꓯ꓾ ꓲꓣꓳꓠ ꓢꓯꓼ꓾ ꓟꓯ-ꓖ-ꓠꓲ-ꓢꓲ-ꓬꓯ ꓐꓰ ꓦꓲꓔꓮꓟꓲꓠ ꓗ ꓐꓴ ꓙꓳˍ ꓟ ꓑꓶꓸ ꓓꓴ ꓪꓳꓽ ꓔꓳ ꓐꓴ ꓔꓯ ꓢꓯꓼ ꓙꓳ ꓪꓽ ꓠꓬꓲ ꓡ ꓝꓲ ꓢꓲ ꓪꓳꓽ ꓔꓳ ꓳ’ ꓡˍ ꓟ ꓠꓻ ꓐꓴ ꓔꓯ ꓥˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ ꓐꓰ ꓢꓷꓸ ꓪ ꓡꓳ=

ꓠꓬꓲꓽ꓾ ꓠꓲꓹ ꓟ ꓔꓯ ꓔꓬꓹ ꓢ ꓝꓲˍ ꓟ

ꓖꓪ-ꓢꓶꓽ ꓗꓪ ꓝꓲꓐꓰꓣ ꓢꓯꓼ꓾ ꓑꓳ-ꓔꓯ-ꓢꓲ-ꓬꓯ꓾ ꓦꓲꓔꓮꓟꓲꓠ ꓚ ꓐꓰ ꓦꓲꓔꓮꓟꓲꓠ ꓐ6 ꓐꓴ ꓐꓹ ꓟ꓾ ꓙꓳˍ ꓟ ꓑꓶꓸ ꓓꓴ ꓠꓲꓹ ꓟ ꓠꓻ ꓒꓬꓱꓼ ꓡ ꓝꓲˍ ꓟ ꓔꓯ ꓠꓲꓸ ꓡꓰ ꓠ ꓬꓰˍ ꓟ ꓗꓪ ꓬꓰ ꓙ ꓖꓶˍ ꓡꓳ= ꓖꓪ-ꓢꓶꓽ ꓗꓪ ꓙꓳˍ ꓟ ꓩꓮꓲ-ꓔꓳ-ꓠꓳ-ꓕ-ꓣꓲ-ꓬꓯ ꓐꓰ ꓘꓴˍ ꓟ ꓢꓯꓼ ꓠꓬ ꓠꓲꓹ ꓟ ꓔꓯ ꓗꓽ ꓕꓸ ꓙ ꓖꓶ ꓢꓲ ꓫꓵꓽ ꓙꓴꓽ ꓟꓬꓱꓼ ꓬꓰˍ ꓟ ꓔꓯ ꓢꓯꓼ ꓙꓳ ꓡ ꓝꓲˍ ꓟ ꓑꓶꓸ ꓓꓴ ꓠꓲꓹ ꓟ ꓳ’ˍ ꓟ ꓔꓯ ꓠꓲꓸ ꓡꓰ ꓝꓲˍ ꓡꓳ= ꓖꓪ-ꓢꓶꓽ ꓗꓪ ꓟꓽ ꓙꓲꓻ ꓟ ꓗꓳ-ꓡꓯ-ꓢ-ꓕ-ꓣꓮꓪ ꓮ ꓟꓬꓹ ꓟꓽ ꓐ ꓟ꓾ ꓟꓽ ꓚꓬꓼ ꓟ ꓑꓶꓸ ꓓꓴ ꓠꓲꓹ ꓟ ꓫꓵꓽ ꓙꓴꓽ ꓛꓵꓽ ꓡꓰ ꓝꓲˍ ꓟ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓙ ꓖꓶˍ ꓡꓳ= ꓖꓪ-ꓢꓶꓽ ꓔꓯ ꓟꓽ ꓟꓶ ꓫꓵ ꓕꓲ ꓧꓪꓹ ꓜꓽ ꓖꓶˍ ꓟ ꓗꓪ ꓐꓰ ꓠꓲꓹ ꓟ ꓫꓵꓽ ꓙꓵꓽ ꓣꓳˍ ꓟ ꓐꓰ ꓫꓵꓽ ꓙꓴꓽ ꓗꓳˍ ꓟ ꓔꓯ ꓠꓲꓸ ꓡꓰ ꓝꓲ ꓐ ꓡˍ ꓡꓳ= ꓝꓮꓲ ꓠꓬ ꓖꓪ-ꓢꓶꓽ ꓗꓪ ꓢ-ꓗꓳ-ꓑꓳ-ꓡꓲ-ꓓꓲ ꓐꓯ ꓟ ꓢꓯꓼ ꓕꓲ ꓙꓰꓽ ꓙꓳˍ ꓟ ꓑꓶꓸ ꓓꓴ ꓢꓯꓼ ꓖꓳ ꓟ ꓠꓬ ꓠꓲꓹ ꓟ ꓙꓬꓻ ꓠꓻ ꓔꓯ ꓓꓻ ꓡꓰ ꓝꓲˍ ꓡꓳ ꓐꓰ ꓢꓷꓸ ꓪ ꓡꓳ=

ꓢ꓾ ꓧꓪꓽ ꓗꓴꓹ ꓙꓲ ꓐꓱ ꓶ ꓙꓲꓻˍ ꓟ

ꓖꓪ-ꓢꓶꓽ ꓜꓽˍ ꓟ ꓗꓪ ꓐꓰ ꓧꓪꓽ ꓗꓴꓹ ꓙꓲ ꓐꓬ ꓡꓰˍ ꓟ ꓔꓯ ꓗꓽ ꓕꓸ ꓙ ꓖꓶˍ ꓡꓳ= ꓖꓪ-ꓢꓶꓽ ꓗꓪ ꓦꓲꓔꓮꓟꓲꓠ ꓚ ꓦꓲꓔꓮꓟꓲꓠ ꓰ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓟꓶꓽ ꓛ ꓢꓯꓼ ꓔꓯ ꓗꓽ ꓙ ꓖꓶˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓧꓪꓽ ꓗꓴꓹ ꓙꓲ ꓗꓪ ꓬꓲ ꓚꓱꓹ ꓒꓬꓱꓼ ꓡ ꓟ ꓐꓰ ꓗꓴꓹ ꓙꓲ ꓗꓪ ꓬꓲ ꓠꓯ ꓠꓯ ꓒꓬꓱꓼ ꓡˍ ꓟ ꓔꓯ ꓓꓻ ꓡꓰ ꓝꓲ ꓢꓲ ꓒꓬꓱꓽ ꓟꓳꓻ ꓡꓰ ꓢˍ ꓟ ꓔꓯˍ ꓟꓲ ꓗꓽ ꓕꓸ ꓙ ꓖꓶˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓡꓲꓺ꓾ ꓖꓳ ꓓꓱꓽ ꓒꓸ ꓟ꓾ ꓘꓪꓽˍ ꓟ ꓗꓪ ꓐꓰ ꓫꓱ ꓡꓰ ꓝꓲˍ ꓟ

ꓖꓪ-ꓢꓶꓽ 100g ꓗꓪ 25 ꓚꓮꓡꓳꓣꓲꓰ ꓡꓰꓽ ꓓꓵˍ ꓟ ꓥ ꓡꓳ= ꓝꓲꓐꓰꓣ ꓢꓯꓼ ꓥ ꓟꓲ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓬꓲ ꓙꓵꓹ ꓟꓶ ꓤ ꓗꓪ ꓛꓲ ꓦꓰꓼ ꓛꓲꓼ ꓐꓳ ꓔꓬ ꓝꓲ ꓢꓲ ꓜꓽ ꓓꓴ ꓜꓽ ꓠꓲꓹ ꓫꓵˍ ꓟ ꓔꓯ ꓠꓲꓸ ꓡꓰ ꓝꓲˍ ꓟ ꓪꓴꓸ ꓠꓬꓲ ꓖꓳ ꓓꓱꓽ ꓒꓸ ꓟ꓾ ꓘꓪꓽˍ ꓟ ꓗꓪ ꓐꓰ ꓫꓱ ꓡꓰ ꓝꓲˍ ꓡꓳ=

ꓥꓪꓽ꓾ ꓪꓴꓸ ꓠꓶꓸ ꓔꓯ ꓗꓽ ꓕꓸ ꓙ ꓖꓶˍ ꓟ

ꓪꓴꓸ ꓠꓶꓸ ꓚꓰꓡꓡ ꓗꓪ ꓟꓳ ꓪˍ ꓟ ꓬꓲ ꓞꓶꓻ ꓢꓯꓼ ꓐꓴ ꓠꓬ ꓜꓽ ꓓꓴ ꓜꓽ ꓙꓰꓽ ꓗꓪ ꓐꓰ ꓟꓶˍ ꓟ ꓢꓯꓼ ꓐꓴ ꓔꓯ ꓛꓵꓼ ꓣꓴ ꓚꓵꓹ ꓣꓴˍ ꓟ ꓟꓬꓱꓽ ꓔꓯ ꓬꓰ ꓖꓶˍ ꓡꓳ= ꓖꓪ-ꓢꓶꓽ ꓗꓴꓹ ꓙꓲ ꓗꓪ ꓙꓳˍ ꓟ Nasunin ꓐꓰ ꓘꓴˍ ꓟ ꓢꓯꓼ ꓠꓬ ꓪꓴꓸ ꓠꓶꓸ ꓗꓪ ꓟ ꓬꓲ ꓞꓶꓻ ꓢꓯꓼ ꓐꓴ ꓔꓯ ꓬꓲ ꓙꓲꓻ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ ꓐꓰ ꓠꓯꓻ ꓞꓲꓼ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯ ꓔ ꓡꓳ= ꓖꓳ ꓟ ꓪꓴꓸ ꓠꓬꓲ ꓖꓪ-ꓢꓶꓽ ꓔꓯ ꓜꓽˍ ꓕꓯ ꓬꓲ ꓗꓴꓹ ꓙꓲ ꓔꓯ ꓥˍ ꓟꓲ ꓜꓽ ꓖꓶ ꓠ ꓔ ꓡꓳ=

ꓛꓳꓼ꓾ ꓢꓰꓹ-ꓛꓬꓳ ꓠꓻ ꓔꓯ ꓔꓲ ꓟꓴˍ ꓗꓷ ꓡꓰ ꓠ ꓬꓰ ꓙ ꓖꓶˍ ꓟ

ꓢꓰꓹ-ꓛꓬꓳ ꓠꓻ ꓙꓳ ꓢꓴ ꓐꓴ ꓖꓪ-ꓢꓶꓽ ꓔꓯ ꓜꓽ ꓖꓶˍ ꓕꓯ ꓠꓬ ꓢꓰꓹ-ꓛꓬꓳ ꓓꓯ ꓡ꓾ ꓬꓯꓼ ꓞꓰ ꓡꓰ ꓒꓬꓱꓼ ꓡˍ ꓟ ꓔꓯ ꓗꓽ ꓕꓸˍ ꓟ ꓗꓪ ꓬꓰ ꓙ ꓖꓶ ꓐ ꓡˍ ꓡꓳ= ꓖꓪ-ꓢꓶꓽ ꓗꓪ ꓖ-ꓡꓴ-ꓗꓳ-ꓢꓶꓽ ꓛꓵꓼ ꓣꓴˍ ꓟ ꓔꓯ ꓬꓰ ꓙ ꓖꓶˍ ꓟ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓢꓰꓹ-ꓛꓬꓳ ꓠꓻ ꓔꓯ ꓔꓲ ꓟꓴˍ ꓗꓷ ꓡꓰ ꓠ ꓬꓰ ꓙ ꓖꓶ ꓐ ꓡˍ ꓡꓳ꓾ ꓐꓰ ꓜꓽ ꓓꓴ ꓜꓽ ꓫꓵꓽ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓐꓴ ꓔꓯ ꓚꓬꓹ ꓠꓬꓲ꓾ ꓧꓪ ꓟꓰꓹ ꓠꓬꓲ ꓔꓬ ꓢꓴ ꓐꓴ ꓡꓰ ꓐꓯ ꓔ ꓡꓳ= ꓖꓪ-ꓢꓶꓽ ꓔꓯ ꓟꓽ ꓠꓽ ꓟꓽ ꓠꓽ ꓜꓽ ꓖꓶˍ ꓟ ꓗꓪ ꓐꓰ ꓠ-ꓑ (2) ꓢꓰꓹ-ꓛꓬꓳ ꓠꓻ ꓒꓬꓱꓼ ꓡˍ ꓟ ꓔꓯˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓫꓵꓽ꓾ ꓲꓣꓳꓠ ꓢꓯꓼ ꓟꓬꓽ ꓙꓲ ꓡꓰ ꓟ ꓔꓯ ꓠꓲꓸ ꓡꓰ ꓝꓲˍ ꓟ

ꓲꓣꓳꓠ ꓢꓯꓼ ꓟꓬꓽ ꓙꓲ ꓡꓰ ꓟ ꓠꓬ ꓞꓼ ꓐꓰ ꓠꓲꓹ ꓟ ꓔꓯ ꓠꓽ ꓡꓰˍ ꓟ꓾ ꓚꓮꓠꓚꓰꓣ ꓐꓴ ꓐꓰ ꓗꓴꓸ ꓙꓲꓽ ꓙꓳ ꓢꓲ ꓝꓣꓰꓰ ꓣꓮꓓꓲꓚꓮꓡꓢ ꓓꓳ ꓡˍ ꓟ ꓔꓯ ꓮ ꓟꓬꓹ ꓒꓬꓱꓼ ꓡ ꓝꓲˍ ꓡꓳ= ꓟꓬꓽ ꓠꓬꓲ ꓞꓲꓼ ꓟꓳꓽ ꓡꓰ ꓢꓲ ꓤ ꓟꓶ ꓤ ꓐꓴ ꓫꓵꓽ ꓗ ꓡꓰ ꓔꓬ ꓟ ꓤ ꓟꓶ ꓐꓴ ꓗꓪ ꓲꓣꓳꓠ ꓢꓯꓼ ꓟꓬꓽ ꓙꓲ ꓡꓰ ꓟ ꓔꓯ ꓟꓬꓽ ꓠꓬꓲ ꓒꓬꓱꓼ ꓡ ꓝꓲ ꓐ ꓡˍ ꓡꓳ= ꓖꓪ-ꓢꓶꓽ ꓜꓽ ꓖꓶˍ ꓟ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓗꓪ ꓟꓬꓽ ꓙꓲ ꓡꓰ ꓟ ꓲꓣꓳꓠ ꓢꓯꓼ ꓐꓴ ꓔꓯ ꓠꓲꓸ ꓡꓰ ꓠ ꓬꓰ ꓙ ꓖꓶ ꓐ ꓡˍ ꓡꓳ=

ꓦꓰꓼ꓾ ꓦꓰꓼ ꓟ ꓙꓲꓺ ꓢ ꓡꓰ ꓝꓲˍ ꓟ

ꓖꓪ-ꓢꓶꓽ ꓗꓪ ꓬꓲꓻ ꓙꓬ ꓢꓯꓼ ꓐꓰ ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓦꓰꓼ ꓟ ꓙꓲ ꓢ ꓡꓰ ꓝꓲˍ ꓡꓳ=

ꓗꓴ꓾ ꓫꓵꓽ ꓓꓯˍ ꓟ ꓗꓪ ꓐꓰ ꓗꓽ ꓕꓸ ꓙ ꓖꓶˍ ꓟ

ꓖꓪ-ꓢꓶꓽ ꓗꓪ ꓓꓵˍ ꓟ ꓦꓲꓔꓮꓟꓲꓠ ꓐ ꓠꓬ ꓫꓵꓽ ꓞꓰꓻ ꓡꓰ ꓝꓲˍ ꓡꓳ ꓐꓰ ꓧꓪ ꓟꓰꓹ ꓔ ꓢꓴ ꓐꓴ ꓗꓪ ꓐꓰ ꓢꓷꓸ ꓪ ꓡꓳ= ꓫꓵꓽ ꓟꓽ ꓓꓯ ꓡ ꓠ ꓬꓰ ꓙ ꓖꓶ ꓐ ꓡˍ ꓟ ꓑꓶꓸ ꓓꓴ ꓡꓰ-ꓒꓬꓯꓼ ꓠꓻ꓾ ꓠꓲꓹ ꓟ ꓠꓻ ꓒꓬꓱꓼˍ ꓟ ꓐꓰ ꓫꓵꓽ ꓙꓴꓽ ꓛꓵꓽ ꓡꓰˍ ꓟ ꓔꓯ ꓠꓲꓸ ꓡꓰ ꓝꓲˍ ꓡꓳ=ꓖꓳ ꓟ ꓡꓰꓽ ꓟꓽ ꓞꓲꓺ ꓦꓰꓼ ꓛꓲꓽ ꓠꓻˍ ꓟ ꓔꓯˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

ꓞꓲꓺ ꓾ ꓚꓮꓠꓚꓰꓣ ꓠꓻ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲˍ ꓟ

ꓖꓪ-ꓢꓶꓽ ꓗꓪ ꓙꓳˍ ꓟ ꓑꓳ-ꓡꓲ-ꓩꓲ-ꓠꓮꓪ ꓢꓯꓼ ꓠꓬ ꓚꓮꓠꓚꓰꓣ ꓠꓻ ꓗꓽ ꓕꓸ ꓐ ꓡˍ ꓟ ꓢꓯꓼ ꓙꓳˍ ꓟ ꓥ ꓢꓲ anthocyanin ꓐꓰ Chlorogenic acid ꓐꓴ ꓐꓹ ꓟ antioxidant ꓢꓯꓼ ꓙꓳˍ ꓡꓳ= ꓢꓯꓼ ꓖꓳ ꓟ ꓠꓬ ꓖꓳ ꓓꓱꓽ ꓗꓪ ꓡꓳꓽ ꓡ ꓔꓬ ꓟ ꓚꓮꓠꓚꓰꓣ ꓒꓬꓱꓼ ꓡ ꓝꓲˍ ꓟ ꓝꓣꓰꓰ ꓣꓮꓓꓲꓚꓮꓡꓢ ꓐꓴ ꓔꓯ ꓠꓲꓸ ꓡꓰ ꓝꓲ ꓢꓲ ꓚꓮꓠꓚꓰꓣ ꓠꓻ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲˍ ꓡꓳ= ꓪꓴꓸ ꓠꓶꓸ ꓗꓪ ꓬꓲ ꓐꓴꓹ ꓒꓬꓱꓼ ꓡ ꓟ ꓔꓯ ꓗꓽ ꓕꓸ ꓙ ꓖꓶ ꓢꓲ ꓚꓮꓠꓚꓰꓣ ꓚꓰꓡꓡ ꓐꓴ ꓒꓬꓱ ꓙꓰˍ ꓟ ꓔꓯˍ ꓟꓲ ꓗꓽ ꓕꓸ ꓙ ꓖꓶˍ ꓡꓳ= ꓦꓲꓔꓮꓟꓲꓠ ꓮ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓮ ꓚꓵꓹ ꓚꓮꓠꓚꓰꓣ꓾ ꓢꓲꓹ ꓛꓲ ꓚꓰꓺ ꓠꓲꓽ ꓠꓲ ꓚꓮꓠꓚꓰꓣ꓾ꓤꓲꓽ ꓒꓴꓽ꓾ ꓐꓵꓼ ꓟꓵ ꓚꓮꓠꓚꓰꓣ꓾ ꓧꓪꓽ ꓗꓴꓹ ꓙꓲ ꓚꓮꓠꓚꓰꓣ ꓒꓬꓱꓼ ꓡˍ ꓟ ꓗꓪ ꓐꓰˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓞꓲꓺ ꓕꓲꓽ꓾ ꓫꓵꓽ ꓢꓯꓼ ꓙꓳ ꓡ ꓝꓲˍ ꓟ

ꓖꓪ-ꓢꓶꓽ ꓗꓪ ꓲꓣꓳꓠ ꓢꓯꓼ ꓐꓰ ꓟꓲꓠꓰꓣꓮꓡꓢ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓔꓯ ꓢꓯꓼ ꓐꓲ ꓡꓰ ꓝꓲ ꓢꓲ ꓲꓣꓳꓠ ꓢꓯꓼ ꓠꓲꓸˍ ꓟ ꓗꓪ ꓐꓰ ꓒꓬꓱꓼˍ ꓟ ꓫꓵꓽ ꓢꓯꓼ ꓠꓲꓸˍ ꓟ ꓠꓻ ꓒꓬꓱꓼ ꓡ ꓟ ꓔꓯ ꓗꓽ ꓕ ꓙ ꓖꓶ ꓐ ꓡ ꓢꓲ꓾ ꓫꓵꓽ ꓢꓯꓼ ꓠꓲꓸˍ ꓟ ꓠꓻ ꓒꓬꓱꓼ ꓡ ꓕꓯ ꓣꓳ ꓖꓳ ꓓꓱꓽ ꓗꓪ ꓗꓹ ꓡ ꓟ ꓪꓴꓸ ꓓꓵ ꓕꓲ ꓐꓶꓽ ꓠꓻˍ ꓟ꓾ ꓪꓴꓽ ꓧꓶ ꓢˍ ꓟ꓾ ꓢꓯꓼ ꓐꓽˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ= ꓖꓪ-ꓢꓶꓽ ꓔꓯ ꓜꓽ ꓖꓶˍ ꓟ ꓠꓬ ꓣꓰꓓ ꓐꓡꓳꓳꓓ ꓚꓰꓡꓡ ꓐꓴ ꓔꓯ ꓟꓬꓽ ꓡ ꓝꓲ ꓢꓲ ꓫꓵꓽ ꓢꓯꓼ ꓙꓳ ꓡ ꓝꓲˍ ꓟ ꓑꓶꓸ ꓓꓴ ꓪꓴꓽ ꓧꓶˍ ꓟ ꓔꓯ ꓜꓲꓽ ꓐ ꓡˍ ꓟ꓾ ꓢꓯꓼ ꓙꓳˍ ꓟ꓾ ꓢꓯꓼ ꓐꓲ ꓡ ꓢꓲ ꓠꓲꓹ ꓟ ꓓꓵꓽ ꓙ ꓪꓴꓽ ꓧꓶˍ ꓟ ꓔꓯˍ ꓟꓲ ꓣꓴ ꓦ ꓖꓶ ꓐ ꓡˍ ꓡꓳ ꓐꓰ ꓢꓷꓸ ꓪ ꓡꓳ=

ꓠꓬꓲꓸ ꓠꓬꓲ ꓐꓯ ꓟꓳꓸ ꓖꓶ ꓗꓷ ꓟ ꓠꓬ ꓖꓪ-ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ 11 ꓚꓱꓹ ꓥ ꓡꓳ=