ꓗꓽ ꓔꓲꓸ ꓢꓶꓽ (ꓟꓸ ꓒ ꓮ ꓒꓵꓽ) ꓙꓲꓻ ꓖꓴ ꓙꓳˍ ꓟ

ꓗꓽ ꓔꓲꓸ ꓢꓶꓽ ꓘꓴꓽ ꓗꓪ ꓙꓳˍ ꓟ ꓗ-ꓢꓲ ꓢꓯꓼ꓾ Vitamin ꓚ꓾ Vitamin ꓐ ꓐꓰ Amino Acid ꓢꓯꓼ ꓐꓴ ꓠꓬ ꓞꓳ ꓤ ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓐꓱ ꓶ ꓮ ꓟꓬꓹ ꓬꓰ ꓙ ꓔꓳꓹ ꓙ ꓖꓶˍ ꓟ ꓥ ꓢꓲ꓾ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓟ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ=

ꓗꓽ ꓔꓲꓸ ꓢꓶꓽ ꓗꓪ Fiber ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓬꓲ ꓪꓴꓻ ꓐꓰ ꓗꓴꓸ ꓙꓲꓽ ꓙꓳˍ ꓟ ꓬꓲ ꓪꓴꓻ ꓚꓱꓹ ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ=

ꓧꓪꓽ ꓖꓳ ꓓꓱꓽ ꓗꓪ ꓟ ꓬꓲ ꓞꓶꓻ ꓐꓴ ꓔꓯ ꓠꓲꓸ ꓡꓰ ꓝꓲˍ ꓟ꓾ ꓫꓵꓽ ꓓꓯꓻˍ ꓟ ꓔꓯ ꓞꓰ ꓡꓰ ꓝꓲˍ ꓟ꓾ ꓠꓲꓹ ꓟ ꓠꓻ ꓔꓯ ꓗꓽ ꓕꓸ ꓙ ꓖꓶ ꓐ ꓡˍ ꓟ꓾ ꓤꓲꓽ ꓚꓱꓹ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓐꓴ ꓔꓯ ꓓꓻ ꓡꓰ ꓝꓲˍ ꓟ꓾ ꓪꓳꓽ ꓔꓳ ꓐꓽ ꓠꓻ ꓐꓰ Alzheimer ꓠꓻ ꓠꓲꓹ ꓟ ꓙꓬ ꓡꓰ ꓢˍ ꓟ ꓠꓻ ꓐꓴ ꓔꓯ ꓗꓽ ꓕꓸ ꓖꓶ ꓐ ꓡˍ ꓡꓳ=

ꓝꓮꓲ ꓠꓬ ꓗꓽ ꓔꓲꓸ ꓢꓶꓽ ꓗꓪ Antioxidants ꓢꓯꓼ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓚꓮꓠꓚꓰꓣ ꓠꓻ ꓐꓰ ꓒꓬꓱꓽ ꓟꓳꓽ ꓡꓰ ꓝꓲˍ ꓟ ꓐꓴ ꓔꓯˍ ꓟ ꓗꓽ ꓕꓸ ꓙ ꓖꓶˍ ꓡꓳ=

Magnesium ꓢꓯꓼˍ ꓟꓲ ꓙꓳˍ ꓟ ꓑꓶꓸ ꓓꓴ ꓖꓳ ꓓꓱꓽ ꓗꓪ ꓟ ꓧꓪꓽ ꓐꓴꓻ (ꓧꓪꓽ ꓘꓴꓸ) ꓐꓴ ꓔꓯ ꓢꓯꓼ ꓙꓳ ꓪꓽ ꓠꓬꓲ ꓡ ꓝꓲ ꓢꓲ꓾ ꓪꓴꓽ ꓧꓶꓽˍ ꓟ ꓔꓯˍ ꓟꓲ ꓜꓲꓽ ꓘꓴˍ ꓡꓳ꓾ ꓐꓰ ꓢꓷꓸ ꓪ ꓡꓳ=

Folate ꓢꓯꓼ ꓥˍ ꓟꓲ ꓮ ꓟꓬꓹ ꓚꓬꓼˍ ꓟ (ꓐꓹ ꓟ) ꓑꓶꓸ ꓓꓴ ꓫꓵꓽ ꓔꓯ ꓫꓬ ꓡꓰ ꓝꓲ ꓢꓲ꓾ ꓤ ꓠꓱ ꓶꓻ ꓞꓹ ꓔꓬ ꓟ ꓟꓹ ꓟ ꓐꓴ ꓐꓱ ꓶˍ ꓟꓲ ꓮ ꓘꓶꓸ ꓙꓲꓻˍ ꓟ ꓥ ꓡꓳ= Manganese ꓢꓯꓼ ꓐꓰ Protein ꓢꓯꓼ ꓙꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓐꓴ ꓔꓯ ꓧꓳꓽ ꓡꓴꓽ ꓖꓶ ꓐ ꓡˍ ꓡꓳ=

ꓝꓮꓲ ꓗꓽ ꓔꓲꓸ ꓢꓶꓽ (ꓟꓸ ꓒ ꓮ ꓒꓵꓽ) ꓗꓪ ꓙꓳˍ ꓟ Zinc ꓢꓯꓼ ꓠꓬ ꓒꓬꓱꓽ ꓟꓬ ꓗꓪ ꓬꓲ ꓞꓶꓻ ꓓꓳꓻ ꓡˍ ꓟ꓾ ꓬꓲ ꓑ ꓓꓲˍ ꓟ (ꓬꓲ ꓢꓶꓽ ꓔꓴˍ ꓟ) ꓾ ꓧꓪꓽ ꓗꓴꓹ ꓙꓲ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓐꓴ ꓔꓯ ꓥˍ ꓟꓲ ꓗꓽ ꓕꓸ ꓖꓶˍ ꓡꓳ= ꓗꓽ ꓔꓲꓸ ꓢꓶꓽˍ ꓡꓰꓽ ꓟꓽ ꓞꓲꓺ ꓬꓲ ꓪꓳꓸ ꓠꓳ ꓐꓴ ꓔꓯ ꓟꓽ ꓠꓽ ꓠꓽ ꓚꓬꓸ ꓜꓽˍ ꓟ꓾ ꓬꓲꓸ ꓪꓳ ꓠꓳ ꓔꓯ ꓬꓲ ꓙꓴꓺ ꓡꓱꓸ ꓢꓲ ꓬꓲꓻ ꓛ ꓗꓪ ꓔꓲꓹ ꓢꓲ ꓓꓳꓺ ꓖꓶˍ ꓕꓯ ꓫꓵꓽ ꓓꓯꓻ ꓠꓻ ꓔꓯ ꓗꓽ ꓕꓸ ꓙ ꓖꓶˍ ꓟ꓾ ꓪꓴꓽ ꓓꓲꓻ ꓔꓯ ꓢꓯꓼ ꓙꓳ ꓡ ꓝꓲˍ ꓟ꓾ ꓤꓲꓽ ꓒꓴꓽ ꓗꓪ ꓡꓳ ꓓꓰ ꓒꓬꓱꓼ ꓡˍ ꓟ ꓔꓯ ꓗꓽ ꓕꓸ ꓙˍ ꓟ ꓕꓱ ꓟꓬ ꓫꓵꓽ ꓙꓲꓻ ꓖꓴ ꓙꓳˍ ꓟ ꓥ ꓡꓳ=