ꓘꓪꓽ ꓢꓯꓼ (ꓘꓽ ꓢꓯꓼ) ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓔꓯ ꓜꓽ ꓖꓶꓽ ꓠꓯꓹ ꓟ ꓚꓱꓹ

ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓔꓬ ꓟ ꓜꓽ ꓫꓵꓽ ꓜꓽ ꓙꓰꓽ ꓗꓪ ꓠꓬ ꓛꓵˍ ꓟ꓾ ꓐꓬꓸˍ ꓟ(ꓐˍ ꓟ)꓾ ꓝꓱꓸˍ ꓟ꓾ ꓘꓪꓽˍ ꓟ ꓕꓱ ꓟꓬ ꓫꓵꓽ ꓟ ꓜꓽ ꓓꓴ ꓔꓯ ꓜꓽ ꓔꓬ ꓟ ꓥ ꓢꓲ꓾ ꓮ ꓟꓶ ꓟ ꓡꓰ ꓟꓶꓽ ꓦ ꓦˍ ꓟ ꓦꓬꓼ ꓠꓬꓲ ꓟꓶꓽ ꓦ ꓦ ꓝꓲꓸ ꓕꓯ ꓠꓬ ꓘꓪꓽˍ ꓟ(ꓘꓽˍ ꓟ) ꓜꓽ ꓫꓵꓽ ꓜꓽ ꓙꓰꓽ ꓐꓴ ꓔꓯˍ ꓟꓲ ꓜꓽ ꓖꓶ ꓠꓯꓹ ꓡꓳ꓾ ꓐꓰ ꓠꓯ ꓞꓲꓼ ꓟꓸ ꓒ ꓟꓸ ꓟ ꓐꓴ ꓡꓰ ꓐꓯ ꓔ ꓟ ꓙꓳˍ ꓡꓳ=

ꓘꓪꓽˍ ꓟ ꓔꓯ ꓕꓲ ꓠꓬꓲꓹ ꓡꓰ ꓟꓽ ꓥ ꓡꓲꓸ ꓕꓲ ꓠꓽ ꓗꓪ 3 ꓠꓬꓲ ꓛꓲ ꓠꓬꓲ ꓜꓽ ꓖꓶꓽ ꓠꓯꓹ ꓡꓳ꓾ ꓐꓰ ꓢꓷꓸ ꓪ ꓡꓳ= ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓠꓬ ꓘꓪꓽˍ ꓟ (ꓘꓽˍ ꓟ) ꓢꓯꓼ ꓔꓯˍ ꓥ ꓟꓲ ꓣꓱꓽ ꓞꓹ ꓟ ꓑꓶꓸ ꓓꓴ ꓘꓪꓽˍ ꓟ ꓜꓽ ꓫꓵꓽ ꓐꓴ ꓠꓬ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓟ ꓔꓯ ꓐꓯ ꓖꓶ ꓩꓴ ꓡˍ ꓥꓳ=

ꓦꓰꓼ ꓟ ꓙꓲꓺ ꓢꓻˍ ꓡꓳ=

ꓘꓪꓽˍ ꓟ ꓢꓯꓼ ꓠꓬ ꓦꓰꓼ ꓟ ꓙꓲꓺˍ ꓟ ꓗꓪ ꓙꓳˍ ꓟ ꓓꓳꓼ ꓐꓴ ꓔꓯ ꓣꓴ ꓦ ꓖꓶˍ ꓡꓳ= ꓜꓽ ꓓꓴ ꓐꓴ ꓔꓯ ꓙꓲꓺ ꓖꓶˍ ꓟ ꓦꓰꓼ ꓟ ꓮꓚꓲꓓ ꓐꓴ ꓒꓬꓱꓼ ꓡ ꓠ ꓡꓵꓹ ꓫꓴ ꓖꓶˍ ꓡꓳ= ꓬꓲ ꓝꓲ ꓬꓲꓻ ꓒꓬꓱꓼ ꓡ ꓝꓲ ꓐ ꓡ ꓟ ꓥ ꓢꓲ ꓫꓵꓽ ꓒꓬꓸ ꓗꓪ ꓟ ꓬꓲ ꓞꓶꓻ ꓐꓴ ꓔꓯ ꓣꓴ ꓦˍ ꓟ ꓗꓪ ꓬꓰ ꓙ ꓖꓶ ꓐ ꓡˍ ꓡꓳ= ꓦꓰꓼ ꓟ ꓙꓲˍ ꓟ ꓔꓯ ꓢꓻ ꓡꓰ ꓝꓲ ꓢꓲ ꓧꓪꓽ ꓖꓳ ꓓꓱꓽ ꓗꓪ ꓣꓱꓽ ꓞꓹ ꓟ ꓢꓯꓼ ꓐꓴ ꓔꓯ ꓒ ꓐꓲ ꓛꓵꓼ ꓣꓴ ꓐ ꓡ ꓠꓹ ꓟ ꓬꓰ ꓙ ꓖꓶˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓜꓽ ꓓꓴ ꓗꓪ ꓐꓰ ꓟꓶˍ ꓟ ꓢꓯꓼ ꓐꓴ ꓔꓯ ꓛꓵꓼ ꓣꓴˍ ꓟ ꓗꓪ ꓪꓽ ꓠꓬꓲ ꓡꓰ ꓝꓲˍ ꓡꓳ=

ꓘꓪꓽˍ ꓟ ꓜꓽ ꓫꓵꓽ ꓠꓬ ꓜꓽ ꓓꓴ ꓙꓲꓺ ꓖꓶˍ ꓟ enzymes ꓔꓯ ꓪ ꓜꓲ ꓓꓳꓻ ꓡ ꓝꓲ ꓢꓲ꓾ ꓜꓽ ꓗꓷ ꓟ ꓜꓽ ꓫꓵꓽ ꓗꓪ ꓙꓳˍ ꓟ Vitamin ꓐꓰ Mineral ꓢꓯꓼ ꓐꓴ ꓔꓯ ꓮ ꓟꓬꓹ ꓛꓵꓼ ꓣꓴ ꓐ ꓡ ꓝꓲˍ ꓟ ꓑꓶꓸ ꓓꓴ꓾ ꓜꓽ ꓓꓴ ꓗꓪ ꓐꓰ ꓟꓶˍ ꓟ ꓢꓯꓼ ꓐꓴ ꓔꓯ ꓟꓽ ꓟꓶ ꓗꓷ ꓡꓰˍ ꓟ ꓗꓪ ꓐꓰ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ= ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓳ ꓟꓽ ꓓ ꓣꓱꓽ ꓞꓹ ꓟ ꓢꓯꓼ ꓐꓴ ꓥ ꓟ Calcium꓾ Iron꓾ Vitamin B12꓾ Magnesium꓾ Iodine ꓢꓯꓼ ꓐꓴ ꓔꓯ ꓒ ꓐꓳꓸ ꓟꓶ ꓠꓹ ꓟ ꓬꓰ ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓦꓰꓼ ꓟ ꓙꓲꓺ ꓖꓴ ꓗꓪ ꓢꓯꓼ ꓟꓽ ꓙꓳ ꓟ ꓑꓶꓸ ꓓꓴ ꓬꓲ ꓪꓴ ꓚꓱꓹ ꓗꓪ ꓒꓬꓱꓼ ꓡˍ ꓟ ꓠꓻ ꓐꓴ ꓔꓯ ꓟꓽ ꓒꓬꓱꓼ ꓡ ꓠ ꓬꓰ ꓙ ꓖꓶˍ ꓡꓳ=

ꓠꓻ ꓕꓱ ꓟ ꓒꓬꓱꓼ ꓡˍ ꓕꓯ ꓜꓽ ꓓꓴ ꓙꓲꓺ ꓖꓶˍ ꓟ ꓬꓲ ꓘꓴꓽ ꓗꓪ ꓟ ꓓꓳꓼ ꓐꓴ꓾ ꓐꓶꓽ ꓓꓲꓻ ꓐꓴ ꓐꓰ ꓜꓽ ꓓꓴ ꓐꓴ ꓠꓬ ꓜꓽ ꓓꓴ ꓙꓲꓺˍ ꓟ ꓚꓱꓹ ꓗꓪ ꓐꓰ ꓕꓲ ꓝꓸ ꓫꓵꓽ ꓙꓴꓽ ꓗꓪ ꓛꓲꓺ ꓙꓰ ꓗꓴꓸˍ ꓡꓳ= ꓠꓻ ꓕꓱ ꓟ ꓒꓬꓱꓼ ꓡˍ ꓕꓯ ꓢꓷꓸ ꓐ ꓡˍ ꓟ ꓠꓬ ꓢꓯꓼ ꓐꓽ ꓪꓴꓽ ꓧꓶˍ ꓟ꓾ ꓖꓳ ꓓꓱꓽ ꓞꓼ ꓐꓰ ꓒꓸ ꓡ(ꓘꓪꓽ ꓡˍ ꓟ) ꓟ꓾ ꓧꓪꓽ ꓗꓴꓹ ꓙꓲꓻ ꓔꓬꓹ ꓟꓽ ꓢ ꓟ꓾ ꓕꓱ ꓟꓬ ꓫꓵꓽ ꓒꓬꓱꓼ ꓡ ꓗꓴꓸˍ ꓡꓳ= ꓕꓱ ꓟ ꓟꓽ ꓒꓬꓱꓼ ꓡ ꓠꓹ ꓟ ꓐꓱ ꓶ ꓘꓪꓽˍ ꓟ ꓔꓯ ꓜꓽ ꓖꓶ ꓐ ꓡˍ ꓡꓳ=

ꓜꓽ ꓓꓴ ꓜꓽ ꓠꓲꓹ ꓫꓵ ꓡ ꓝꓲˍ ꓡꓳ=

ꓘꓪꓽˍ ꓟ ꓢꓯꓼ ꓠꓬ ꓜꓽ ꓓꓴ ꓙꓲꓺ ꓓꓴ ꓐꓱ ꓶ ꓟꓽ ꓙꓳ ꓟꓽ ꓓ ꓣꓱꓽ ꓞꓹ ꓟ ꓢꓯꓼ ꓕꓲ ꓙꓰꓽ ꓥ ꓡꓳ= ꓮ ꓫꓵꓽ ꓔꓯˍ ꓟꓲ ꓜꓽ ꓠꓲꓹ ꓟꓽ ꓫꓵ ꓢꓴ ꓐꓴ ꓐꓱ ꓶ ꓠꓯꓻ ꓞꓲꓼ ꓕꓲ ꓟˍ ꓟꓲ ꓥ ꓡꓳ= ꓘꓪꓽˍ ꓟ ꓢꓯꓼ ꓠꓬ ꓜꓽ ꓓꓴ ꓜꓽ ꓠꓲꓹ ꓫꓵˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ghrelin hormones ꓓꓳ ꓡ ꓠ ꓬꓰ ꓙ ꓖꓶ ꓐ ꓡˍ ꓡꓳ=

ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓐꓶꓽ ꓓꓲꓻ ꓐꓴ ꓔꓯ ꓟꓬꓽ ꓡ ꓝꓲˍ ꓡꓳ=

ꓜꓽ ꓓꓴ ꓙꓲꓺˍ ꓟ ꓗꓪ ꓧꓪꓽ ꓖꓳ ꓓꓱꓽ ꓔꓬ ꓢ ꓢꓲ ꓪꓴꓽ ꓡ ꓓꓴ ꓐꓱ ꓶ ꓟꓬꓱꓽ ꓬꓰ ꓖꓶ ꓔꓬ ꓟ ꓙꓲꓻ ꓖꓴ ꓙꓳˍ ꓟ ꓐꓶꓽ ꓓꓲꓻ ꓐꓴ ꓮ ꓟꓬꓹ ꓙꓳ ꓔꓬ ꓡꓳ= ꓐꓶꓽ ꓓꓲꓻ ꓕꓱ ꓟ ꓐꓴ ꓠꓬ ꓣꓱꓽ ꓞꓹ ꓟ ꓢꓯꓼ ꓐꓴ ꓔꓯ ꓡꓳꓼ ꓠ ꓛꓲꓺ ꓟꓶ ꓢꓲ ꓬꓲ ꓪ ꓟꓬꓱꓽ ꓬꓰˍ ꓕꓯ ꓢꓲ ꓡꓰꓽ꓾ ꓣꓳ ꓧꓪꓽ ꓖꓳ ꓓꓱꓽ ꓥˍ ꓟꓲ ꓠꓻ ꓒꓬꓽ ꓟꓽ ꓙꓳ ꓢꓲ ꓕꓲ ꓠꓬꓲ ꓐꓱ ꓶ ꓣꓱꓽ ꓞꓹ ꓟ ꓢꓯꓼ ꓐꓲ ꓡ ꓝꓲˍ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓰꓺ ꓢꓰꓺ ꓡꓰꓽ ꓞꓳ ꓙꓳ ꓐ ꓡ ꓠꓹ ꓟ ꓐꓱ ꓶ ꓘꓪꓽˍ ꓟ (ꓘꓽˍ ꓟ) ꓢꓯꓼ ꓔꓯ ꓠꓯꓻ ꓞꓲꓼ ꓡꓰ ꓐꓰ ꓜꓽ ꓖꓶ ꓠꓯꓹ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=