ꓘꓶꓽ ꓢ (ꓳꓽ ꓫꓻ) ꓙꓲꓻ ꓖꓴ ꓙꓳˍ ꓟ ꓚꓱꓹ

ꓘꓶꓽ ꓢ (ꓳꓽ ꓫꓻ) ꓙꓲꓻ ꓖꓴ ꓙꓳˍ ꓟ

ꓘꓶꓽ ꓢ ꓔꓯ ꓚꓬꓸ ꓜꓽ꓾ ꓛꓴ ꓜꓽ꓾ ꓡꓱ ꓜꓽ꓾ ꓕꓲ ꓫꓵꓽ ꓫꓵꓽ ꓐꓰ ꓑꓯꓸ ꓜꓽ (ꓫꓳꓹ ꓜꓽ) ꓕꓱ ꓟꓬ ꓚꓱꓹ ꓗꓪ ꓐꓰ ꓜꓽ ꓔꓬꓹ ꓟ ꓥ ꓡꓳ=

ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓧꓪꓺ ꓟꓰꓹ ꓠꓬꓲ ꓔ ꓟ ꓗꓪ ꓠꓬ ꓘꓶꓽ ꓢ ꓗꓪ ꓮꓠꓔꓲꓳꓫꓲꓓꓮꓔꓢ ꓮ ꓟꓬꓹ ꓓꓵˍ ꓟ ꓥ ꓢꓲ ꓠꓲꓹ ꓟ ꓔꓬꓹ ꓢ ꓓꓴ ꓐꓱ ꓶ ꓮ ꓟꓬꓹ ꓬꓰ ꓙ ꓖꓶˍ ꓡꓳ= ꓟꓬꓽ ꓠꓬꓲ ꓘꓶꓽ ꓢ ꓧꓪꓼ ꓧꓪꓼ ꓗꓪ ꓟꓳꓻ ꓪˍ ꓟ ꓢꓯꓼ ꓠꓬ ꓠꓲꓹ ꓟ ꓟꓬꓱꓽ ꓬꓰˍ ꓟ ꓔꓯ ꓟꓬꓽ ꓠꓬꓲ ꓬꓰ ꓙ ꓖꓶˍ ꓡꓳ= ꓘꓶꓽ ꓢ ꓔꓯ ꓮꓸ ꓔꓳꓸ ꓗꓪ ꓗꓳꓺ ꓜꓽ ꓛꓴ ꓜꓽˍ ꓟ ꓢꓶꓸ ꓟꓽ ꓞꓲꓺ ꓚꓬꓸ ꓜꓽˍ ꓟ ꓠꓬ ꓟꓬꓽ ꓠꓬꓲ ꓙꓲꓻ ꓖꓴ ꓙꓳˍ ꓡꓳ꓾ ꓐꓰ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓘꓶꓽ ꓢ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓡꓲ ꓕꓲ ꓒꓳꓹ ꓗꓪ ꓐꓰ ꓙꓲꓻ ꓖꓴ ꓙꓳˍ ꓡ ꓐꓯ ꓟ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

1.  ꓘꓶꓽ ꓢ ꓗꓪ ꓑꓣꓳꓔꓰꓲꓠ ꓢꓯꓼ(ꓧꓪꓽ ꓢꓯꓼ) ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓧꓪꓽ ꓐꓴ ꓐꓴ ꓔꓯ ꓢꓯꓼ ꓙꓳ ꓪꓽ ꓠꓬꓲ ꓡ ꓝꓲ ꓢꓲ ꓧꓪꓽ ꓖꓳ ꓓꓱꓽ ꓗꓪ ꓢꓯꓼ ꓐꓲ ꓡꓰ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=
2.  ꓘꓶꓽ ꓢ ꓗꓪ ꓝꓲꓐꓰꓣ ꓢꓯꓼ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓦꓰꓼ ꓟ ꓙꓲꓺ ꓢꓻ ꓡꓰ ꓝꓲˍ ꓡꓳ=
3.  ꓘꓶꓽ ꓢ ꓗꓪ ꓬꓲꓸ ꓪꓴꓻ ꓓ ꓟ ꓚꓮꓠꓚꓰꓣ ꓒꓬꓱꓼ ꓡˍ ꓟ ꓔꓯ ꓠꓲꓹ ꓡꓰ ꓝꓲˍ ꓟ ꓚꓰꓡꓡ ꓐꓴ ꓔꓯ ꓢꓯꓼ ꓡꓴꓽ ꓖꓶˍ ꓡꓳ=
4.  ꓘꓶꓽ ꓢ ꓜꓽˍ ꓟ ꓗꓪ ꓐꓰ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓐꓴ ꓔꓯ ꓔꓲ ꓟꓴꓺˍ ꓗꓷ ꓡꓰ ꓝꓲˍ ꓡꓳ= 
5.  ꓘꓶꓽ ꓢ ꓜꓽˍ ꓟ ꓗꓪ ꓐꓰ ꓫꓵꓽ ꓓꓯꓻ ꓡˍ ꓟ ꓔꓯ ꓞꓰꓻ ꓡꓰ ꓝꓲ ꓐ ꓡˍ ꓡꓳ=
6.  ꓚꓲꓸ ꓟꓶ ꓓꓴ ꓢꓯꓼ ꓙꓳ ꓡ ꓝꓲˍ ꓡꓳ= ꓘꓶꓽ ꓢ ꓗꓪ ꓦꓲꓔꓮꓟꓲꓠ ꓚ ꓓꓻˍ ꓟ ꓑꓶꓸ ꓓꓴ ꓚꓲꓸ ꓟꓶ ꓓꓴ ꓢꓯꓼ ꓙꓳ ꓡ ꓝꓲˍ ꓡꓳ= ꓦꓲꓔꓮꓟꓲꓠ ꓐ ꓠꓬ ꓪꓴꓸ ꓠꓷꓸ ꓚꓰꓡꓡ ꓐꓴ ꓔꓯ ꓢꓯꓼ ꓙꓳ ꓡ ꓝꓲ ꓢꓲ ꓓꓵꓽ ꓙꓽ ꓚꓱꓹ ꓔꓯ ꓮ ꓟꓬꓹ ꓢꓯꓼ ꓡꓴꓽ ꓖꓶˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓮꓡꓜꓧꓰꓲꓟꓰꓣ ꓠꓻ ꓒꓬꓱꓼ ꓡˍ ꓟ ꓔꓯˍ ꓟꓲ ꓠꓲꓸ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=
7.  ꓠꓬꓲ ꓟꓳꓻ ꓓꓴ ꓔꓯ ꓗꓽ ꓕꓸ ꓙ ꓖꓶˍ ꓡꓳ= ꓘꓶꓽ ꓢ ꓗꓪ ꓐꓰꓔꓮ ꓚꓮꓣꓳꓔꓰꓠꓰ꓾ ꓝꓳꓡꓮꓔꓰ꓾ ꓮꓠꓔꓲꓳꓫꓲꓓꓮꓠꓔ ꓐꓰ ꓜꓲ-ꓬ-ꓜꓯ-ꓔꓲ ꓢꓯꓼ ꓐꓴ ꓮ ꓟꓬꓹ ꓓꓹˍ ꓡꓳ= ꓢꓯꓼ ꓕꓱ ꓟ ꓐꓴ ꓠꓬ ꓟꓬꓺ ꓢꓶꓽ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓙ ꓖꓶˍ ꓡꓳ ꓐꓰ ꓢꓷꓸ ꓪ ꓡꓳ=
8.  ꓫꓵꓽ ꓢꓯꓼ ꓠꓲꓸˍ ꓟ ꓠꓻ ꓟꓽ ꓒꓬꓱꓼ ꓡ ꓠ ꓬꓰ ꓙ ꓖꓶˍ ꓡꓳ= ꓘꓶꓽ ꓢ ꓗꓪ ꓦꓲꓔꓮꓟꓲꓠ ꓐ12꓾ ꓲꓣꓳꓠ ꓢꓯꓼ꓾ ꓝꓳꓡꓮꓔꓰ ꓮꓚꓲꓓ ꓐꓴ ꓮ ꓟꓬꓹ ꓓꓵˍ ꓟ ꓑꓶꓸ ꓓꓴ ꓘꓶꓽ ꓢ ꓜꓽˍ ꓟ ꓗꓪ ꓐꓰ ꓫꓵꓽ ꓢꓯꓼꓠꓲꓸˍ ꓟ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓙ ꓖꓶˍ ꓡꓳ= ꓝꓮꓲ ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯ-ꓢ-ꓕ-ꓣꓮꓪ ꓔꓯ ꓥˍ ꓟꓲ ꓠꓲꓸ ꓡꓰ ꓝꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=
9.  ꓢꓰꓹ-ꓛꓬꓳ ꓠꓻ ꓔꓯ ꓥˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ= ꓘꓶꓽ ꓢ ꓗꓪ ꓦꓲꓔꓮꓟꓲꓠ ꓐ ꓮ ꓟꓬꓹ ꓓꓵˍ ꓟ ꓠꓬ ꓖꓳ ꓓꓱꓽ ꓘꓴꓽ ꓗꓪ ꓑꓣꓳꓔꓰꓲꓠ꓾ ꓬꓲ ꓞꓶꓻ ꓐꓰ ꓚꓮꓣꓐꓳ ꓧꓬꓓꓣꓮꓔꓰ ꓐꓴ ꓔꓯ ꓔꓲ ꓟꓴꓺˍ ꓗꓷ ꓡꓰ ꓝꓲ ꓢꓲ ꓲꓠꓢꓴꓡꓲꓠ ꓧꓳꓣꓟꓳꓠꓰꓢ ꓓꓳ ꓡˍ ꓟ ꓔꓯˍ ꓟꓲ ꓔꓲ ꓟꓴꓺˍ ꓗꓷ ꓡꓰ ꓝꓲˍ ꓡꓳ= ꓖꓳ ꓟ ꓑꓶꓸ ꓓꓴ ꓢꓰꓹ-ꓛꓬꓳ ꓠꓻ ꓙꓳ ꓢꓴ ꓐꓴ ꓘꓶꓽ ꓢ ꓜꓽ ꓖꓶˍ ꓕꓯ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵ ꓢꓯꓼ ꓔꓯ ꓔꓲ ꓟꓴꓺˍ ꓗꓷ ꓡꓰ ꓝꓲˍ ꓟ ꓡꓰ ꓐꓰ꓾ ꓢꓰꓹ-ꓛꓬꓳ ꓠꓻ ꓟꓽ ꓙꓳ ꓢꓴ ꓐꓴ ꓗꓪˍ ꓟꓲ ꓢꓰꓹ-ꓛꓬꓳ ꓠꓻ ꓔꓯ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓘꓶꓽ ꓢ ꓬꓲ ꓟꓵꓻ ꓚꓬꓸ ꓔ ꓟ ꓪꓴꓽ ꓬꓲꓻ ꓔꓯ ꓓꓳꓻ ꓖꓶˍ ꓕꓯˍ ꓟꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓙꓳˍ ꓡꓳ ꓐꓰ ꓢꓷꓸ ꓪ ꓡꓳ=