ꓙꓬ ꓝꓲꓸ ꓕꓯ ꓟꓬꓽ ꓠꓬꓲ ꓜꓽ ꓠ ꓔ ꓟ ꓜꓽ ꓫꓵꓽ ꓜꓽ ꓙꓰꓽ

ꓙꓬ ꓝꓲꓸ ꓕꓯ ꓟꓬꓽ ꓠꓬꓲ ꓜꓽ ꓠ ꓔ ꓟ ꓜꓽ ꓫꓵꓽ ꓜꓽ ꓙꓰꓽ

ꓮ ꓟꓶ ꓠꓬ ꓮ ꓤ ꓮ ꓤ ꓐꓰ ꓙꓬ ꓝꓲꓸ ꓗꓪ ꓓꓵꓽ ꓡ ꓔꓬꓳ= ꓛꓻ ꓟꓵꓽ ꓡꓱ ꓟꓵꓽ ꓗꓪ ꓖꓳ ꓘꓶꓸ ꓟꓽ ꓙꓬ ꓡ ꓥˍ ꓟꓲ ꓙꓬ ꓟꓵꓽ ꓗꓪ ꓠꓬ ꓟꓶꓽ ꓘꓶꓽ ꓠꓯꓼ ꓕꓯ ꓮ ꓘꓶꓸ ꓙꓬ ꓡꓺꓳ= ꓕꓱ ꓡꓱ ꓙꓬ ꓝꓲꓸ ꓓꓵꓽ ꓡ ꓔꓬ ꓟ ꓗꓪ ꓖꓳ ꓓꓱꓽ ꓛꓴꓽ ꓠꓬꓲ꓾ ꓛꓲ ꓫꓵꓽ ꓖꓶ ꓠꓬꓲ꓾ ꓛꓲ ꓚꓵꓸ ꓠꓬꓲ ꓐꓰ ꓗꓹ ꓗꓴꓸˍ ꓟ ꓑꓶꓸ ꓓꓴ ꓕꓱ ꓡꓱ ꓟꓽ ꓒꓬꓱꓼ ꓡ ꓕꓯ ꓡꓰ ꓗꓽ ꓔ ꓠꓹ ꓟ ꓬꓳꓸ ꓚꓵꓸˍ ꓟ ꓥ ꓡꓳ=

ꓙꓬ ꓝꓲꓸ ꓠꓬ ꓜꓽ ꓪꓳꓽ ꓡꓳ ꓪꓳꓽ ꓮ ꓘꓶꓸ ꓟꓬꓽˍ ꓟ ꓬꓲ ꓙꓵꓹˍ ꓟꓲ ꓥ ꓟ ꓑꓶꓸ ꓓꓴ ꓙꓬ ꓝꓲꓸ ꓕꓯ ꓠꓻ ꓒꓬꓽ ꓟꓽ ꓙꓳ ꓠꓹ ꓟ ꓮ ꓡꓰ ꓫꓵꓽ ꓜꓽ ꓓꓴ ꓔꓯ ꓜꓽ ꓖꓶ ꓠ ꓔ ꓡ?

ꓙꓬ ꓝꓲꓸ ꓕꓯ ꓧꓪꓽ ꓖꓳ ꓓꓱꓽ ꓢꓯꓼ ꓙꓳ ꓠꓹ ꓟ ꓐꓱ ꓶ ꓠꓽ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓟ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓟ ꓬꓲ ꓢꓯꓼ ꓐꓴ ꓔꓯ ꓧꓳꓽ ꓡꓴꓽ ꓖꓶ ꓠ ꓔ ꓟ ꓥ ꓡꓳ= ꓙꓬ ꓝꓲꓸ ꓕꓯ ꓠꓻ ꓒꓬꓽ ꓟꓽ ꓙꓳ꓾ ꓔꓬ ꓢ ꓠꓹ ꓟ ꓮ ꓡꓰ ꓫꓵꓽ ꓜꓽ ꓖꓶ ꓠ ꓔ ꓡ ꓐꓯ ꓠꓬ꓾

ꓢꓳꓴꓑ

ꓙꓬˍ ꓟ ꓟꓵꓽ ꓘꓳꓼ ꓐꓱ ꓶ ꓙꓲˍ ꓟ ꓜꓽ ꓓꓴ ꓕꓲ ꓫꓵꓽ ꓥ ꓢꓲ ꓠꓬꓲ ꓙꓬˍ ꓟ ꓗꓪ ꓐꓰ ꓒꓬꓱꓼ ꓡˍ ꓟ ꓙꓬ ꓓꓵꓽ ꓡꓰˍ ꓟ ꓐꓰ ꓛꓲꓽ ꓫꓵ ꓖꓶˍ ꓟ ꓔꓯ ꓥˍ ꓟꓲ ꓗꓽ ꓕꓸ ꓖꓶ ꓐ ꓡˍ ꓡꓳ= ꓙꓬ ꓓꓵꓽ ꓡꓰ ꓥˍ ꓟꓲ ꓓꓻ ꓡꓰ ꓢ ꓝꓲˍ ꓡꓳ= ꓪꓳꓽ ꓫꓵꓽ ꓪꓳꓽ ꓙꓰ꓾ ꓧꓪꓽ꓾ ꓥꓪꓸ ꓐꓰ ꓬꓲ ꓪꓳꓽ ꓬꓲꓻ ꓚꓬꓸ ꓢꓲ ꓓꓳꓻ ꓐ ꓡˍ ꓟ ꓡꓰꓽ ꓟꓽ ꓞꓲꓺ ꓚꓬ (ꓛꓳꓽ ꓒꓲꓽ) ꓪꓳꓽ ꓬꓲꓻ ꓥˍ ꓟꓲ ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓔꓯ ꓔꓳꓹ ꓙ ꓐ ꓡˍ ꓡꓳ= ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓟ ꓞꓴ ꓢꓯꓼ ꓔꓯ ꓡꓬꓽ ꓡꓰ ꓝꓲ ꓢꓲ ꓠꓱ ꓫꓳꓸ ꓟꓸ ꓗꓪ ꓟ ꓙꓬꓻ ꓢꓯꓼ ꓔꓯ ꓥˍ ꓟꓲ ꓜꓶꓽ ꓐ ꓡ ꓝꓲˍ ꓟ ꓪꓴꓸ ꓠꓬꓲ ꓢꓳꓴꓑ ꓪꓳꓽ ꓬꓲꓻ ꓔꓯ ꓙꓬ ꓝꓲꓸ ꓗꓪ ꓟꓬꓽ ꓠꓬꓲ ꓓꓳꓻ ꓖꓶ ꓠ ꓔ ꓟ ꓥ ꓡꓳ=

ꓬꓲ ꓝꓱ ꓢꓯꓼ ꓙꓳˍ ꓟ ꓢꓲꓹ ꓢꓶꓽ

ꓝꓱꓸˍ ꓟ ꓢꓲꓹ ꓢꓶꓽ ꓐꓴ ꓠꓬ ꓖꓳ ꓓꓱꓽ ꓘꓴꓽ ꓗꓪ ꓢꓯꓼ ꓧꓳꓽ ꓖꓶ ꓢꓲ ꓦꓲꓔꓮꓟꓲꓠ ꓐꓴˍ ꓟꓲ ꓮ ꓟꓬꓹ ꓙꓳˍ ꓡꓳ= ꓙꓬ ꓝꓲꓸˍ ꓡꓰ ꓐꓰ ꓙꓬˍ ꓟ ꓟꓵꓽ ꓘꓳꓼ ꓗꓪ ꓝꓱꓸˍ ꓟ ꓢꓲꓹ ꓢꓶꓽ ꓐꓴ ꓔꓯ ꓟꓬꓽ ꓠꓬꓲ ꓜꓽ ꓖꓶ ꓠꓯꓹ ꓡꓳ=

ꓠꓲꓹ ꓛꓵꓼˍ ꓟ ꓜꓽ ꓪꓳꓽ ꓡꓳ ꓪꓳꓽ

ꓠꓲꓹ ꓛꓵꓼˍ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓙꓬ ꓝꓲꓸ ꓗꓪ ꓡꓰꓽ ꓟꓽ ꓞꓲꓺ ꓮ ꓕꓯ ꓟꓲ ꓜꓽ ꓖꓶ ꓠ ꓔ ꓟ ꓜꓽ ꓓꓴ ꓥ ꓢꓲ ꓠꓬꓲ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓞꓹ ꓟ ꓦꓲꓔꓮꓟꓲꓠ ꓐꓰ ꓟꓲꓠꓰꓣꓮꓡꓢ ꓢꓯꓼ ꓐꓴ ꓔꓯ ꓥˍ ꓟꓲ ꓖꓶ ꓐ ꓡˍ ꓡꓳ= ꓙꓬ ꓝꓲꓸ ꓗꓪ ꓒꓬꓱꓼˍ ꓟ ꓠꓻ ꓤ ꓒꓬꓽ ꓤ ꓐꓴ ꓔꓯ ꓗꓽ ꓕꓸ ꓖꓶˍ ꓟ ꓥ ꓢꓲ ꓢꓯꓼ ꓐꓴ ꓔꓯ ꓥˍ ꓟꓲ ꓡꓴꓽ ꓖꓶˍ ꓟ ꓥ ꓡꓳ= ꓪꓳꓽ ꓒꓲ꓾ ꓟꓶꓽ ꓛꓲ ꓔꓶꓸ꓾ ꓪꓳꓽ ꓒꓬ ꓪꓰˍ ꓡꓰ ꓐꓰ ꓠꓲꓹ ꓛꓵꓼˍ ꓟ ꓪꓳꓽ ꓒꓬꓽ ꓐꓴ ꓔꓯ ꓜꓽ ꓖꓶ ꓠ ꓔ ꓡꓳ=

ꓥꓪꓸ ꓐꓰ ꓬꓲꓻ ꓙꓬ ꓗꓪ ꓙꓳˍ ꓟ ꓜꓽ ꓫꓵꓽ

ꓔꓴ-ꓠ ꓥꓪꓸ꓾ ꓢꓳ-ꓡ-ꓟꓳ ꓥꓪꓸ ꓡꓰ ꓐꓰ ꓥꓪꓸ ꓡꓰꓽ ꓟꓽ ꓞꓲꓺ ꓬꓲꓻ ꓙꓬ ꓓꓽ ꓟ ꓗꓪ ꓙꓳˍ ꓟ ꓞꓳ ꓤ ꓜꓽ ꓓꓹ ꓟ ꓜꓽ ꓫꓵꓽ ꓐꓴ ꓠꓬ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓳꓟꓰꓖꓮ 3 ꓝꓮꓔꓔꓬ ꓮꓚꓲꓓ ꓡꓰꓽ ꓟꓽ ꓞꓲꓺ ꓢꓯꓼ ꓟꓲ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓙꓬ ꓝꓲ. ꓗꓪ ꓜꓽ ꓖꓶ ꓠꓯꓹ ꓟ ꓜꓽ ꓓꓴ ꓕꓲ ꓫꓵꓽ ꓥ ꓡꓳ= ꓟꓶꓽ ꓛ ꓢꓯꓼ ꓗꓪ ꓐꓰ ꓟꓶˍ ꓟ ꓦꓲꓔꓮꓟꓲꓠ ꓓ ꓡꓰꓽ ꓟꓽ ꓞꓲꓺ ꓪꓳꓽ ꓔꓳ ꓐꓰ ꓢꓲꓽ ꓛꓲ ꓔꓯ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓟ ꓚꓮꓡꓚꓲꓴꓟ ꓢꓯꓼ ꓐꓰ ꓧꓪꓽ ꓖꓳ ꓓꓱꓽ ꓗꓪ ꓣꓱꓽ ꓞꓹ ꓟ ꓑꓣꓳꓔꓰꓲꓠ ꓢꓯꓼ ꓔꓯ ꓥˍ ꓟꓲ ꓟꓶ ꓡꓰˍ ꓟ ꓪꓴꓸ ꓠꓬꓲ ꓙꓬ ꓝꓲꓸ ꓗꓪ ꓥꓪꓸ ꓐꓴ ꓔꓯ ꓜꓽ ꓖꓶ ꓠꓯꓹ ꓟ ꓥ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓬꓲꓻ ꓙꓬ ꓔꓯ ꓥˍ ꓟꓲ ꓮ ꓟꓬꓹ ꓓꓳꓻ ꓠ ꓔ ꓥ= ꓙꓬ ꓝꓲꓸ ꓗꓪ ꓮ ꓘꓶꓸ ꓙꓬˍ ꓟ ꓑꓶꓸ ꓓꓴ ꓬꓲꓻ ꓙꓬ ꓓꓳꓻ ꓠꓹ ꓟ ꓟꓽ ꓓꓵꓽ ꓙ ꓟꓶ ꓗꓷ ꓡꓰ ꓗꓴꓸˍ ꓡꓳ= ꓙꓬ ꓝꓲꓸ ꓕꓯ ꓠꓬ ꓙꓬˍ ꓟ ꓑꓶꓸ ꓓꓴ ꓕꓲ ꓑꓹ ꓕꓲ ꓑꓹ ꓬꓲ ꓐꓽ ꓗꓪ ꓙꓰ ꓗꓴꓸˍ ꓟ ꓑꓶꓸ ꓓꓴ ꓬꓲꓻ ꓙꓬ ꓢꓯꓼ ꓠꓲꓸ ꓡꓰ ꓗꓴꓸˍ ꓡꓳ= ꓖꓳ ꓟ ꓑꓶꓸ ꓓꓴ ꓕꓲ ꓠꓬꓲ ꓐꓱ ꓶ ꓣꓱꓽ ꓞꓹ ꓟ ꓬꓲꓻ ꓙꓬ ꓔꓯ ꓓꓳꓻ ꓖꓶ ꓠ ꓔ ꓟ ꓥ ꓡꓳ= ꓬꓲꓻ ꓛꓵꓼ ꓓꓳꓻ ꓠꓲꓹ ꓟꓽ ꓫꓵ ꓠꓬ ꓬꓲꓻ ꓡꓱ ꓔꓯ ꓥˍ ꓟꓲ ꓓꓳꓻ ꓐ ꓡˍ ꓟ ꓥ ꓡꓳ=

ꓝꓮꓲ ꓠꓬ ꓦꓲꓔꓮꓟꓲꓠ ꓚ꓾ ꓦꓲꓔꓮꓟꓲꓠ ꓓ꓾ ꓦꓲꓔꓮꓟꓲꓠ ꓰ꓾ ꓜꓲꓠꓚ ꓐꓰ ꓑꓣꓳꓐꓲꓳꓔꓲꓚꓢ ꓢꓯꓼ ꓐꓴ ꓥˍ ꓟꓲ ꓣꓱꓽ ꓞꓹ ꓟ ꓥ ꓡꓳ= ꓜꓲꓠꓚ ꓢꓯꓼ ꓠꓬ ꓠꓻ ꓤ ꓒꓬꓽ ꓤ ꓔꓯ ꓗꓽ ꓕꓸ ꓖꓶ ꓐ ꓡ ꓢꓲ꓾ ꓡꓰ ꓐꓰ ꓠꓻˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ= ꓑꓣꓳꓐꓲꓳꓔꓲꓚꓢ ꓢꓯꓼ ꓠꓬ ꓢꓯꓼ ꓦ ꓚꓻ ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓐꓴ ꓔꓯ ꓗꓽ ꓕ ꓖꓶˍ ꓟ ꓗꓪ ꓣꓱꓽ ꓬꓯꓼˍ ꓟ ꓥ ꓡꓳ=