ꓛꓬꓲ-ꓑꓮꓳ ꓔꓶꓺ ꓚꓱꓹ

ꓛꓬꓲ-ꓑꓮꓳ ꓠ ꓬꓲ ꓪꓴꓻ ꓐꓴ ꓐꓱ ꓶ ꓙꓲꓻ ꓖꓴ ꓙꓳˍ ꓡꓳ= ꓛꓬꓲ-ꓑꓮꓳ ꓘꓴꓽ ꓗꓪ ꓧꓬꓓꓣꓳꓫꓬ ꓐꓰ ꓮꓟꓲꓠꓳ ꓮꓚꓲꓓ꓾ ꓦꓲꓔꓮꓟꓲꓠ ꓚ꓾ ꓚꓮꓡꓚꓲꓴꓟ꓾ꓲꓳꓣꓠ ꓢꓯꓼ꓾ ꓟꓮꓖꓠꓰꓢꓲꓴꓟ꓾ ꓚꓮꓣꓐꓳꓧꓬꓓꓣꓮꓔꓰꓢ꓾ ꓑꓧꓳꓢꓑꓧꓳꓣꓴꓢ꓾ ꓑꓳꓔꓮꓢꓢꓲꓴꓟ꓾ ꓦꓲꓔꓮꓟꓲꓠ ꓐ2 ꓐꓰ ꓦꓲꓔꓮꓟꓲꓠ ꓮ ꓐꓴ ꓮ ꓟꓬꓹ ꓙꓳˍ ꓟ ꓥ ꓡꓳ= ꓬꓲ ꓒꓵꓽ ꓥˍ ꓟꓲ ꓟꓽ ꓟꓬꓽ꓾ ꓢ ꓢ ꓡꓰꓽ ꓪꓴꓻ ꓟꓶ ꓓꓹ ꓟ ꓥ ꓡꓳ= ꓕꓱ ꓟꓬ ꓙꓲꓻ ꓖꓴ ꓙꓳˍ ꓟ ꓛꓬꓲ-ꓑꓮꓳ ꓔꓯ ꓚꓲꓸ ꓛꓬ ꓦꓲꓻ ꓗꓪ ꓔꓶꓺ ꓠꓲꓹ ꓫꓵ ꓢꓴ ꓐꓴ ꓐꓱ ꓶ꓾ ꓚꓲꓸ ꓛꓬ ꓔꓶꓺ ꓔ ꓟ ꓔꓯ ꓜꓽ ꓠꓲꓹ ꓫꓵ ꓢꓴ ꓐꓴ ꓐꓱ ꓶ ꓛꓬꓲ-ꓑꓮꓳ ꓔꓶꓺ ꓚꓱꓹ ꓔꓯ ꓐꓯ ꓟꓳꓸ ꓖꓶ ꓩꓴ ꓡˍ ꓥꓳ= ꓮ ꓕꓯ ꓥˍ ꓟꓲ ꓔꓶꓺ ꓜꓽ ꓔꓶꓺ ꓓꓳ ꓔꓬ ꓢꓴ ꓐꓴ ꓐꓱ ꓶ ꓠꓽ ꓛꓬꓲ-ꓑꓮꓳ ꓔꓶꓺ ꓚꓱꓹ ꓠꓬ ꓟꓽ ꓫꓸ ꓟ ꓥ ꓡꓳ=

ꓛꓬꓲ-ꓑꓮꓴ ꓜꓲ ꓔꓯ ꓮ ꓡꓰ ꓔꓶ ꓠꓯꓹ ꓡ?

ꓛꓬꓲ-ꓑꓮꓳ ꓔꓯ ꓠꓬ ꓛꓬꓲ-ꓑꓮꓳ ꓫꓵꓽ ꓫꓵꓽ꓾ ꓛꓬꓲ-ꓑꓮꓳ ꓓꓽ ꓟ ꓐꓯ ꓢꓲ ꓠꓬꓲꓽ ꓙꓰꓽ ꓙꓳˍ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓜꓽ ꓓꓴ ꓟꓽ ꓥ ꓟ꓾ ꓐꓲꓻ ꓓꓴ ꓔꓶꓺ ꓔ ꓟ ꓢꓲꓹ ꓪꓰ ꓛꓬꓲ-ꓑꓮꓳ ꓥˍ ꓟꓲ ꓙꓳˍ ꓢꓰꓽ ꓡꓳ=

ꓟꓬ-ꓟ ꓗꓴꓷꓼ ꓕꓲ ꓐꓱ ꓗꓪ ꓛꓬꓲ-ꓑꓮꓳ ꓔꓯ 4 ꓦ ꓗꓪ ꓐꓰ 7 ꓦ ꓘꓴꓽ ꓗꓪ꓾ 10 ꓦ ꓗꓪ ꓐꓰ 7 ꓦ ꓘꓴꓽ ꓗꓪ ꓔꓶꓺ ꓔꓬ ꓥ ꓡꓳ=

ꓛꓬꓲ-ꓑꓮꓳ ꓔꓶꓺ ꓕꓯ ꓠꓱꓸ ꓐꓯ ꓬꓲ ꓜꓶ ꓔꓶˍ ꓕꓯ ꓙꓽ ꓖꓶˍ ꓟ ꓡꓰ ꓐꓰ ꓙꓽ ꓖꓶ ꓗꓷ ꓢꓲ꓾ ꓘꓪꓺ ꓔ ꓟ ꓬꓲ ꓟꓲ꓾ ꓥ ꓠꓬ ꓑꓳꓽ ꓘꓴꓽ ꓗꓪ ꓕꓲ ꓚꓬꓸ ꓐꓰ ꓕꓲ ꓚꓬꓸ 2' ꓛꓲ ꓗꓶꓹ ꓶꓽ ꓢꓲ꓾ ꓬꓲ ꓫꓵꓸ ꓕꓲ ꓢꓶꓽ ꓐꓰ ꓕꓲ ꓢꓶꓽ 4” ꓛꓲ ꓗꓶꓹ ꓶꓽ ꓢꓲ ꓠꓬꓲ ꓔꓶꓺ ꓐ ꓡˍ ꓟ ꓥ ꓡꓳ= ꓟꓽ ꓥ ꓠꓬ ꓕꓲ ꓝꓳꓹ ꓕꓲ ꓝꓳꓹ ꓗꓪ ꓬꓲ ꓫꓵꓸ ꓢꓶꓽ 4-5 ꓢꓶꓽ ꓛꓲꓺ ꓧꓳꓽ ꓗꓷ ꓢꓲ ꓔꓶꓺ ꓐ ꓡˍ ꓥ= ꓬꓲ ꓫꓵꓸ ꓔꓶꓺ ꓔ ꓟ 3-5 ꓠꓬꓲ ꓛꓲꓺ ꓕꓯ ꓠꓬꓲ ꓬꓲ ꓫꓵꓸ ꓗꓪ ꓐꓰ ꓬꓲ ꓜꓲ ꓤ ꓣꓱꓻ ꓓꓳ ꓡꓻꓳ= ꓬꓲ ꓒꓬꓽ 3-4 ꓒꓬꓽ ꓙꓳ ꓡˍ ꓕꓯ ꓬꓲ ꓜꓲ ꓕꓲ ꓝꓳꓹ ꓕꓲ ꓝꓳꓹ ꓗꓪ ꓟ ꓮ ꓘꓶꓸ ꓪꓴꓽˍ ꓟ ꓕꓲ ꓜꓲ ꓔꓯ ꓝꓰ ꓔ ꓢꓲ ꓣꓳˍ ꓟ ꓬꓲ ꓜꓲ ꓔꓯ ꓚꓵꓹ ꓦ ꓗꓷ= ꓔꓶꓺ ꓗꓷ ꓗ ꓠꓯꓸ 45-60 ꓠꓬꓲ ꓙꓳ ꓡˍ ꓕꓯ ꓬꓲ ꓒꓬꓽ ꓬꓲ ꓪꓳꓸ ꓠꓳ ꓞꓲꓼ ꓜꓽ ꓓ ꓡꓻꓳ=

ꓛꓬꓲ-ꓑꓮꓳ ꓬꓲ ꓒꓬꓽ ꓟꓬꓽ ꓡ ꓠꓱꓽ ꓡ ꓠꓹ ꓟ ꓐꓱ ꓶ ꓟꓶꓽ ꓦ ꓟꓽ ꓦ ꓠꓬ ꓬꓲ ꓟꓲ ꓔꓯ ꓬꓲꓻ ꓙꓬ ꓧꓳꓽ ꓖꓶ ꓠ ꓗꓹ ꓡꓳ= ꓩꓲꓸ-ꓛꓲꓻ ꓥˍ ꓟꓲ ꓧꓳꓽ ꓖꓶ ꓠ ꓗꓹ ꓥ= ꓖꓳ ꓡꓱ ꓥˍ ꓟꓲ ꓬꓲꓻ ꓙꓬ ꓧꓳꓽ ꓟꓬꓽ ꓡꓰ ꓝꓲ ꓟꓽ ꓓ= ꓬꓲ ꓙꓬꓻ ꓧꓳꓽ ꓟꓬꓽ ꓡꓰ ꓕꓯ ꓬꓲ ꓒꓬꓽ ꓧꓪꓼ ꓡꓰ ꓢꓲ ꓬꓲ ꓜꓲ ꓫꓵꓻ ꓗꓴꓸˍ ꓡꓳ= ꓩꓲꓸ-ꓛꓲꓻ ꓧꓳꓽ ꓖꓶˍ ꓕꓯ ꓥˍ ꓟꓲ ꓟꓬꓽ ꓙꓲ ꓡꓰ ꓠ ꓧꓳꓽ ꓖꓶ ꓟꓽ ꓓ= ꓩꓲꓸ-ꓛꓲꓻ ꓧꓳꓽ ꓖꓶ ꓟꓬꓽ ꓡꓰ ꓕꓯ ꓬꓲ ꓜꓲ ꓠꓻ ꓡꓰ ꓢꓲ ꓫꓵꓻ ꓗꓴꓸˍ ꓡꓳ=

ꓛꓬꓲ-ꓑꓮꓳ ꓠꓬ 12 ꓦ ꓡꓱꓸꓼ ꓔꓶꓺ ꓐ ꓡˍ ꓟ ꓪꓳꓽ ꓒꓬꓽ ꓕꓲ ꓙꓰꓽ ꓥꓳ= ꓝꓮꓲ ꓠꓬ ꓟꓬ-ꓟ ꓞꓳ ꓫꓵꓽ ꓐꓴ ꓮ ꓟꓬꓹ ꓜꓽˍ ꓟ ꓬꓲ ꓒꓬꓽ ꓕꓲ ꓙꓰꓽ ꓥ ꓟ ꓪꓴꓸ ꓠꓬꓲ ꓮ ꓘꓶꓸ ꓪꓴꓽ ꓟꓶ ꓢˍ ꓟ ꓪꓳꓽ ꓒꓬꓽ ꓥ ꓪ= ꓬꓲ ꓜꓲ ꓗꓪ ꓬꓲ ꓢꓶꓽ ꓓꓱꓼ ꓡ ꓕꓯ ꓕꓲ ꓐꓱ ꓠꓬ ꓬꓲ ꓢꓶꓽ ꓔꓯ ꓧꓼ ꓗꓷ ꓢꓲ ꓛꓬꓲ-ꓑꓮꓳ ꓬꓳ ꓫꓬꓹ ꓡꓳ= ꓬꓲ ꓫꓵꓸ ꓐꓱ ꓶ ꓗꓷ ꓠꓲꓹ ꓫꓵˍ ꓠꓬ ꓟꓳꓽ ꓡꓰ ꓟ ꓬꓲ ꓢꓶꓽ ꓔꓯ ꓧꓼ ꓗꓷ ꓢꓲ ꓟꓶ ꓛ ꓛˍ ꓟ ꓗꓪ ꓡꓱꓸ ꓖꓶ ꓗꓷ= ꓬꓲ ꓢꓶꓽ ꓡꓱꓸ ꓙꓴꓺ ꓡꓰ ꓕꓯ ꓬꓲ ꓢꓶꓽ ꓠꓬ ꓐꓶꓽ ꓡˍ ꓢꓲ ꓬꓲ ꓢꓶꓽ ꓘꓴꓽ ꓗꓪ ꓟ ꓬꓲꓸ ꓫꓵꓸ ꓓꓳ ꓡˍ ꓡꓳ= ꓬꓲ ꓫꓵꓸ ꓖꓳ ꓟ ꓔꓯ ꓫ ꓔ ꓢꓲ ꓟꓶ ꓦ ꓦ ꓪꓴꓸ ꓔꓴˍ ꓕꓯ ꓔꓶꓺ ꓐ ꓡˍ ꓡꓳ=

ꓛꓬꓲ-ꓑꓮꓳ ꓜꓲ ꓔꓯ ꓬꓲ ꓪꓴꓸ ꓔꓶꓺ ꓖꓴ ꓠꓬ ꓲ-ꓓꓲ-ꓬ ꓗꓴꓷꓼ ꓐꓰ ꓐꓶ ꓓꓳ ꓖꓴ ꓟ ꓶꓸ ꓮꓢꓲꓮ ꓗꓪ ꓐꓰ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=