ꓛꓬꓲ-ꓑꓮꓳ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓕꓱ ꓕꓲ ꓫꓵꓽ ꓠꓽ ꓧꓪꓽ ꓖꓳ ꓓꓱꓽ ꓔꓬ ꓢ ꓠꓹ ꓟ ꓐꓯ ꓟꓸ ꓖꓶˍ ꓟ ꓬꓲ ꓙꓵꓹ ꓗꓪ ꓛꓬꓲ-ꓑꓮꓳ ꓚꓱꓹ ꓔꓯ ꓐꓯ ꓟꓸ ꓖꓶ ꓡˍ ꓥꓳ=

ꓛꓬꓲ-ꓑꓮꓳ ꓠꓬ ꓣꓳ ꓐꓱ ꓗꓪ ꓔꓶꓺ ꓓꓴ ꓟꓽ ꓫꓸ ꓔ ꓟ ꓥ ꓡꓳ= ꓔꓶꓺ ꓓꓴ ꓟꓽ ꓫꓸ ꓔ ꓟ ꓡꓰ ꓐꓰ ꓡꓱꓺ ꓢꓲ ꓥˍ ꓟꓲ꓾ ꓪꓳꓽ ꓒꓬꓽ ꓬꓲꓻ ꓚꓬꓸ ꓢꓲ ꓠꓬꓲ ꓓꓳ ꓙꓲˍ ꓟ ꓔꓯ ꓣꓳꓽ ꓪꓳꓽ ꓒꓬ ꓬꓰ ꓜꓽˍ ꓟ ꓥꓳ= ꓕꓲ ꓖ ꓖ ꓗꓪ ꓠꓬ ꓬꓲ ꓒꓬꓽ ꓐꓰ ꓬꓲ ꓢꓶꓽ ꓔꓯ ꓟꓽ ꓛ ꓡꓱꓸ ꓢꓲ꓾ ꓬꓲꓻ ꓞ ꓔꓲꓹ ꓢꓲ ꓠꓬꓲ ꓓꓳˍ ꓟ ꓥꓳ= ꓛꓬꓲ-ꓑꓮꓳ ꓢꓶꓽ ꓔꓯ ꓠꓬ ꓡꓱ ꓢꓲ ꓥ ꓟꓲ꓾ ꓪꓳꓽ ꓒꓬꓽ ꓬꓲꓻ ꓫꓬꓹ ꓢꓲ ꓥˍ ꓟꓲ ꓜꓽ ꓙꓲˍ ꓟ ꓥꓳ= ꓕꓱ ꓟ ꓔꓯ ꓠꓬ ꓣꓳ ꓜꓽ ꓢꓲ ꓠꓬꓲ ꓙꓲꓻ ꓖꓴ ꓙꓳˍ ꓟ ꓔꓯ ꓣꓳ ꓟꓽ ꓢꓷꓸ ꓗꓷ ꓡꓰˍ ꓟ ꓥꓳ= ꓛꓬꓲ-ꓑꓮꓳ ꓙꓲꓻ ꓖꓴ ꓙꓳˍ ꓟ ꓠꓬ꓾

ꓣꓳꓽ ꓪꓴꓻ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓥꓳ= ꓚꓮꓠꓚꓰꓣ ꓠꓻ ꓫꓵꓽ ꓒꓬꓱꓼ ꓡ ꓓꓴ ꓔꓯ ꓥˍ ꓟꓲ ꓗꓽ ꓕꓸ ꓖꓶˍ ꓟ ꓥꓳ= Calcium ꓢꓯꓼ ꓙꓳˍ ꓟ ꓑꓶꓸ ꓓꓴ ꓣꓳ ꓪꓳꓽ ꓔꓳ ꓔꓯ ꓥˍ ꓟꓲ ꓔꓰꓹ ꓠ ꓢꓯꓼ ꓖꓶˍ ꓟ ꓥꓳ= ꓛꓬꓲ-ꓑꓮꓳ ꓬꓲ ꓢꓶꓽ ꓔꓯ ꓥˍ ꓟꓲ ꓬꓲ ꓞꓶꓻ ꓣꓴ ꓢꓲ ꓖꓳ ꓟ ꓔꓯ ꓠꓬ ꓣꓳ ꓐꓶ ꓠꓻ ꓠˍ ꓕꓯ ꓟꓽ ꓳ ꓡ ꓠꓹ ꓟ ꓟꓰ ꓖꓶ (ꓦꓰꓽ ꓖꓶ) ꓓꓹ ꓟ ꓥ ꓡꓳ= 

ꓛꓬꓲ-ꓑꓮꓳ ꓢꓶꓽ ꓬꓲꓻ ꓔꓯ ꓓꓳˍ ꓕꓯ ꓥˍ ꓟꓲ ꓞꓶꓽ ꓚꓲꓸ ꓔ ꓟ ꓔꓯ ꓓꓻ ꓡꓰˍ ꓟ ꓥ ꓡꓳ= ꓓꓴꓣꓲꓮꓠ ꓢꓶꓽ ꓜꓽ ꓓꓳ ꓡꓰ ꓗ ꓠꓯꓸ ꓛꓬꓲ-ꓑꓮꓳ ꓒꓬꓮꓪ ꓬꓰ ꓔꓯ ꓓꓳˍ ꓕꓯ ꓡ ꓞꓱꓹ ꓒꓴꓽ ꓔ ꓟ ꓗꓪ ꓐꓰ ꓗꓽ ꓕꓸ ꓖꓶˍ ꓟ ꓥꓳ= ꓕꓱ ꓟ ꓡꓰ ꓐꓰ ꓛꓬꓲ-ꓑꓮꓳ ꓠꓬ ꓣꓳ ꓠꓯꓸꓼ ꓗꓪ ꓙꓲꓻ ꓖꓴ ꓙꓳˍ ꓟ ꓡꓰ ꓐꓰ ꓣꓳ ꓤ ꓟꓴ ꓠ ꓔ ꓟˍ ꓟꓲ ꓙꓳˍ ꓟ ꓥ ꓡꓳ=

ꓫꓵꓽ ꓓꓯꓻ ꓠꓻ ꓙꓳ ꓢꓴ ꓠꓬ ꓮ ꓟꓬꓹ ꓜꓽ ꓟꓽ ꓓ= ꓞꓶꓽ ꓚꓲꓸ ꓠꓻ꓾ ꓳ ꓟꓶꓽ ꓛꓵꓽ ꓠꓻ ꓙꓳ ꓢꓴ ꓥˍ ꓟꓲ ꓤ ꓟꓴ ꓠ ꓔ ꓡꓳ= ꓕꓱ ꓟ ꓠꓬ ꓮ ꓘꓶꓸ ꓟꓽ ꓒꓵꓽ꓾ ꓧꓪˍ ꓟꓲ ꓧꓪ ꓢˍ ꓟ ꓙꓲꓻ ꓖꓴ ꓙꓳˍ ꓟ ꓛꓬꓲ-ꓑꓮꓳ ꓕꓱ ꓟ ꓔꓯ ꓣꓳ ꓒ ꓕꓲꓺ ꓒ ꓠꓶꓽ ꓗꓪ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓐꓯ ꓟꓸ ꓖꓶ ꓓꓴ ꓬꓰ ꓡꓯ=

Add new comment

18 + 2 =