ꓛꓱꓼ ꓡꓱꓼ ꓢꓶꓽ ꓔꓶ ꓚꓱꓹ

ꓛꓱꓼ ꓡꓱꓼ ꓢꓶꓽ ꓔꓶ ꓚꓱꓹ

ꓬꓲ ꓗꓴ ꓙꓲꓻ ꓫꓵꓽˍ ꓟ ꓛꓱꓼ ꓡꓱꓼ ꓢꓶꓽ ꓔꓯ ꓬꓲ ꓪꓴꓸ ꓗꓪ ꓠꓬ ꓐ-ꓣ-ꓤꓲꓸ ꓖꓴ ꓟꓶꓸ ꓾ ꓲ-ꓓꓲ-ꓬ ꓐꓰ ꓮ-ꓙꓲ-ꓔꓲ-ꓠꓸ ꓖꓴ ꓪꓴꓸ ꓗꓪ ꓔꓶ ꓪꓴꓸ ꓔꓴ ꓩꓴ ꓡˍ ꓟ ꓥꓳ= ꓬꓲ ꓗꓴ ꓙꓲꓻ ꓧꓪꓼ ꓧꓪꓼ ꓚꓳꓽ ꓔꓯ ꓠꓬ ꓮ ꓡꓰ ꓗꓪ ꓐꓰ ꓔꓶ ꓩꓴ ꓡˍ ꓟ ꓔꓯ ꓫꓬꓽ ꓫꓬꓽ ꓡꓰꓽ ꓟ ꓢꓷ ꓥˍ ꓟꓲ Amazonain ꓐ-ꓣ-ꓤꓲ ꓗꓪ ꓐꓰ ꓥꓳ ꓐꓰ ꓘꓳꓹ ꓣꓴ ꓔ ꓟ ꓙꓳˍ ꓡꓳ=

ꓛꓱꓼ ꓡꓱꓼ ꓢꓶꓽ ꓗꓪ ꓢ ꓙꓰꓽ ꓙꓳˍ ꓡꓳ= ꓬꓲ ꓜꓲˍ ꓟꓲ ꓮ-ꓠꓳ꓾ ꓮ ꓒꓵꓽ ꓡꓰ ꓐꓰ ꓬꓲ ꓚ ꓔꓶˍ ꓟ ꓬꓲ ꓜꓲ ꓝꓳꓽ ꓥꓳ= ꓬꓲ ꓢꓲꓽ ꓗꓴ ꓙꓲꓻ ꓠꓬ ꓬꓲꓹ ꓡꓵꓼ ꓡꓵꓼ ꓗꓹ ꓟ ꓥ ꓢꓲ ꓬꓲ ꓘꓴꓽ ꓗꓪ ꓬꓲꓸ ꓠꓲꓹ ꓟ꓾ ꓬꓲ ꓫꓵꓸ ꓢꓶꓽ 250 ꓢꓶꓽ ꓗꓪ ꓛꓲꓺ ꓙꓳˍ ꓡꓳ=

ꓛꓱꓼ ꓡꓱꓼ ꓜꓲ ꓔꓯ ꓟꓵꓽ ꓟꓽ ꓢꓲꓺ ꓢꓲꓺ ꓔꓶ ꓒꓬꓱꓼ ꓡ ꓓꓹ ꓡꓳ= ꓖꓳ ꓡꓱ ꓥˍ ꓟꓲ ꓟꓵꓽ ꓛꓲꓻ ꓟꓬꓽˍ ꓟ꓾ ꓩꓲꓸ ꓛꓲ ꓙꓳˍ ꓟ ꓗꓪ ꓪ ꓙꓲ ꓔꓶ ꓒꓬꓱꓼ ꓡ ꓢˍ ꓡꓳ= ꓡꓱꓻ ꓟꓵꓽ ꓗꓪ ꓟꓬꓽ ꓠꓬꓲ ꓔꓶ ꓒꓬꓱꓼ ꓡˍ ꓟ ꓥ ꓢꓲ ꓮ ꓘꓶꓸ ꓙꓬꓻ꓾ ꓮ ꓘꓶꓸ ꓛꓹ ꓟ ꓗꓪ ꓬꓲ ꓜꓲ ꓔꓶ ꓒꓬꓱꓼ ꓡ ꓫꓸ ꓡꓳ= ꓔꓶ ꓒꓬꓱꓼ ꓡ ꓥˍ ꓟꓲ ꓬꓲ ꓢꓶꓽ ꓮ ꓟꓬꓹ ꓟꓽ ꓓꓱꓼ=

ꓬꓲ ꓫꓵꓸ ꓔꓯ ꓠꓬ ꓙꓬꓻ ꓝꓲ ꓖꓴ ꓡꓰ ꓢꓲ ꓛ ꓝꓲ ꓓꓵꓽ ꓡˍ ꓟ 3 ꓦ ꓕꓯ ꓫꓵꓸ ꓖꓶ ꓠꓯꓹ ꓡꓳ= ꓬꓲ ꓫꓵꓸ ꓧꓶꓸ ꓕꓯ ꓫꓵꓸ ꓗꓷ ꓢꓲ ꓬꓲ ꓜꓲ ꓡꓲꓸ ꓤ ꓣꓱꓻ ꓓꓳ ꓡ ꓗ ꓠꓯꓸ 1’4” ꓛꓲ ꓙꓳ ꓡˍ ꓠꓬ ꓚꓵꓹ ꓔꓶ ꓐ ꓡˍ ꓡꓳ= ꓬꓲ ꓜꓲ ꓡꓲꓸ ꓤ ꓔꓶ ꓝꓲ ꓠꓬ ꓫꓵꓽ ꓦ ꓛꓲ ꓕꓯ ꓥ ꓢꓲ ꓕꓲ ꓜꓲ ꓐꓰ ꓕꓲ ꓜꓲ 10’ ꓗꓶꓹ ꓶꓽ ꓢꓲ ꓔꓶ ꓠꓯꓹ ꓡꓳ=

ꓟꓶ ꓛ ꓢꓯꓼ ꓟꓶˍ ꓟ ꓗꓪ ꓔꓶ ꓠꓯꓹ ꓟ ꓥꓳ= ꓔꓶ ꓗꓷ ꓠꓬ ꓬꓲ ꓚ ꓓꓯ ꓙꓰ ꓓꓴ ꓬꓲ ꓗꓹ ꓫꓬꓹ ꓬꓲ ꓓ ꓞꓳꓹ ꓖꓶ ꓠ ꓔ ꓡꓳ= ꓔꓶ ꓔ ꓟ ꓬꓲ ꓪꓴꓸ ꓕꓲ ꓘꓳꓼ ꓗꓪ ꓬꓲ ꓢꓶꓽ ꓮ ꓘꓶꓸ ꓟꓽ ꓓꓱꓼ= ꓕꓲ ꓖ ꓕꓲ ꓜꓲ ꓠꓬ ꓬꓲ ꓪꓴꓸ ꓕꓲ ꓘꓳꓼ ꓗꓪ ꓬꓲ ꓢꓶꓽ ꓟꓽ ꓓꓱꓼ ꓡ= ꓔꓶ ꓔ ꓟ ꓠꓬꓲꓽ ꓘꓳꓼ ꓙꓳ ꓡ ꓕꓯ ꓠꓬ ꓬꓲ ꓢꓶꓽ ꓓꓱꓼ ꓡꓻꓳ= ꓬꓲ ꓜꓲ ꓧˍ ꓠꓬ ꓕꓲ ꓜꓲ ꓗꓪ ꓐꓰ ꓕꓲ ꓘꓳꓼ ꓐꓱ ꓶ 150 ꓢꓶꓽ ꓗꓪ ꓐꓰ 180 ꓢꓶꓽ ꓗꓪ ꓛꓲ ꓓꓱꓼˍ ꓡꓳ=

ꓮ ꓟꓶ ꓐꓯ ꓟꓳꓸ ꓖꓶ ꓔ ꓟ ꓛꓱꓼ ꓡꓱꓼ ꓢꓶꓽ ꓜꓲ ꓔꓶ ꓚꓱꓹ ꓔꓯ ꓢꓧꓪꓰꓸꓠꓰꓔ ꓪꓰꓐꓢꓲꓔꓰ ꓗꓪ ꓐꓯ ꓔ ꓟ ꓔꓯ ꓝ ꓢꓲ ꓐꓯ ꓟꓳꓸ ꓖꓶ ꓩꓴ ꓡꓹ ꓟ ꓥꓳ= ꓕꓱ ꓗꓪ ꓣꓱꓽ ꓔ ꓟ ꓛꓱꓼ ꓡꓱꓼ ꓢꓶꓽ ꓐꓯ ꓟ ꓠꓬ ꓐꓶ-ꓬꓲ ꓗꓴꓷꓼ ꓫꓴ ꓗꓪ ꓣꓱꓽˍ ꓟ ꓢꓲꓹ ꓢꓶꓽ ꓟꓬꓱꓺ ꓥ ꓡꓳ=

#credit_photo

Add new comment

11 + 3 =