ꓛꓽ ꓗꓳꓼ (ꓛꓳꓽ ꓗꓳꓼ) ꓔꓶ ꓚꓱꓹ

ꓛꓽ ꓗꓳꓼ (ꓛꓳꓽ ꓗꓳꓼ) ꓔꓶ ꓓꓴ ꓐꓱ ꓶ ꓠꓬ ꓩꓲꓸ-ꓛꓲꓻ ꓟꓵꓽ ꓛꓵꓽ ꓙꓲˍ ꓟ ꓾ ꓩꓲꓹ-ꓛꓲꓻ ꓟꓵꓽ ꓛꓵꓽ ꓙꓳˍ ꓟ ꓟꓵꓽ ꓗꓪ ꓔꓶ ꓠꓯꓹ ꓡꓳ= ꓝꓮꓲ ꓠꓬ ꓛ ꓗꓴꓸ ꓙꓳ ꓠꓯꓹ ꓡꓳ= ꓮ ꓡꓲ ꓗꓪ ꓔꓶˍ ꓥ ꓟꓲ ꓛ ꓗꓴꓸ ꓙꓳ ꓠꓹ ꓟ ꓬꓳꓸ ꓚꓵˍ ꓟ ꓥ ꓡꓳ= ꓔꓶˍ ꓟ ꓗꓪ ꓛ ꓗꓴꓸ ꓟꓽ ꓙꓳ ꓠꓬ ꓙꓳ ꓡꓰ ꓠ ꓫꓬꓹ ꓖꓶ ꓠ ꓔ ꓥ= ꓬꓲ ꓫꓵꓸ ꓔꓶˍ ꓠꓬ ꓬꓲ ꓫꓵꓸ ꓫꓵꓸ ꓓꓴ ꓐꓱ ꓶ ꓬꓲ ꓟꓲ ꓘꓪ ꓖꓶ ꓠꓯꓹ ꓟ ꓥ ꓡꓳ= ꓘꓪ ꓓꓳ ꓡꓰ ꓠꓬ ꓬꓲ ꓫꓵꓸ ꓟꓺ ꓢꓶꓽ ꓫꓵꓸ ꓗꓷ ꓢꓲ ꓕꓯꓽ ꓢꓲꓺ ꓗꓪ ꓠꓱꓸ ꓦꓱꓽ ꓩꓲꓸ-ꓛꓲꓻ ꓟꓵꓽ ꓛꓵꓽ ꓐꓰ ꓑꓲꓸ ꓗꓷ= 

ꓬꓲ ꓫꓵꓸ ꓫꓵꓸ ꓔ ꓟ ꓦ ꓐ 3 ꓟ ꓛꓲꓺ ꓙꓳ ꓡ ꓕꓯ ꓬꓲ ꓜꓲ ꓤ ꓤ ꓣꓱꓻ ꓓꓳ ꓡꓺꓳ= ꓬꓲ ꓫꓵꓸ ꓕꓲ ꓐꓱ ꓠꓬ ꓬꓲ ꓫꓵꓸ ꓫꓵꓸ ꓗꓷ ꓢꓲ ꓦ ꓐ 5ꓟ 6 ꓟ ꓙꓳ ꓡˍ ꓕꓯ ꓢꓲ ꓡꓰꓽ ꓬꓲ ꓜꓲ ꓤ ꓣꓱꓻ ꓓꓳ ꓡˍ ꓟˍ ꓟꓲ ꓙꓳˍ ꓡꓳ= 

ꓬꓲ ꓫꓵꓸ ꓫꓵꓸ ꓔ ꓟ ꓕꓲ ꓘꓳꓼ ꓙꓳ ꓡ ꓠꓬ ꓬꓲ ꓜꓲ ꓡꓲꓸ ꓤ ꓔꓯ ꓚꓵꓹ ꓔꓶ ꓓ ꓡꓺꓳ= ꓚꓵꓹ ꓔꓶ ꓔ ꓟ ꓕꓲ ꓘꓳꓼ ꓙꓳ ꓡ ꓕꓯ ꓬꓲ ꓜꓲ 1' ꓟꓴ ꓡꓺꓳ= ꓬꓲ ꓜꓲ ꓡꓲꓸ ꓤ ꓚꓵꓹ ꓔꓶˍ ꓕꓯ ꓕꓲ ꓜꓲ ꓐꓰ ꓕꓲ ꓜꓲ 10'꓾ ꓕꓲ ꓡꓯꓼ ꓐꓳ ꓛꓲꓺ ꓗꓶꓹ ꓶꓽ ꓢꓲ ꓔꓶ ꓠ ꓔ ꓥ= 10' ꓟꓽ ꓞꓲꓺ ꓗꓶꓹ ꓡꓽ ꓢꓲ ꓔꓶˍ ꓠꓬ ꓪ ꓙꓲ ꓙꓲˍ ꓟ ꓥꓳ= ꓟꓬꓽ ꓠꓬꓲ ꓠꓬ ꓬꓲ ꓜꓲ ꓡꓲꓸ ꓤ ꓗꓪ ꓬꓲ ꓒꓬꓽ ꓡꓲꓺ ꓒꓬꓽ ꓠꓱꓽ ꓡˍ ꓕꓯ꓾ ꓚꓵꓹ ꓔꓶ ꓓꓹ ꓟ ꓥ ꓢꓲ ꓛ ꓝꓲꓸ ꓡꓱ ꓝꓲ ꓕꓯ ꓚꓵꓹ ꓔꓶˍ ꓟ ꓥ ꓡꓳ=

ꓬꓲ ꓜꓲ ꓔꓶ ꓓꓴ ꓐꓱ ꓶ ꓟꓽ ꓓ ꓬꓳꓸ ꓚꓵˍ ꓟ ꓠꓬ ꓬꓲ ꓜꓲ ꓔꓯ ꓛ ꓗꓴꓸ ꓙꓳˍ ꓟ ꓗꓪ ꓡꓰꓽ ꓔꓶ ꓠꓯꓹ ꓟ ꓥ ꓡꓳ= ꓛ ꓗꓴꓸ ꓟꓽ ꓙꓳ ꓟ ꓗꓪ ꓔꓶ ꓔ ꓠꓬ ꓔꓶ ꓒꓬꓱꓼ ꓡ ꓓ꓾ ꓔꓶ ꓢꓯꓸ ꓡ ꓓˍ ꓥ ꓟꓲ ꓬꓲ ꓜꓲ ꓬꓲ ꓢꓶꓽ ꓠꓽ ꓪꓴꓽ ꓡ ꓫꓸ ꓡꓳ=

ꓬꓲ ꓜꓲ ꓡꓲꓸ ꓤ ꓚꓵꓹ ꓔꓶ ꓗꓷ ꓗ ꓠꓯꓸ ꓕꓲ ꓘꓳꓼ ꓟ ꓗꓪ 3 ꓧꓪꓹ ꓟꓳꓼ ꓜꓲ ꓔꓯ ꓫꓬꓹ ꓡꓲꓸ ꓖꓶ ꓠ ꓔ ꓥ= ꓟꓳꓼ ꓜꓲ ꓫꓵꓸ ꓜꓲ ꓟꓽ ꓡꓲꓸ ꓖꓶ ꓕꓯ ꓠꓽ ꓟꓳꓼ꓾ ꓫꓵꓸ ꓮ ꓟꓬꓹ ꓣꓱꓻ ꓡˍ ꓕꓯ ꓛꓽ ꓗꓳꓼ(ꓛꓳꓽ ꓗꓳꓼ) ꓡꓯꓸ ꓤ ꓔꓯ ꓦꓯꓹ ꓒꓶꓼ ꓐꓴ ꓡꓰ ꓜꓰꓼ ꓜꓽ ꓡꓰ ꓖꓴˍ ꓟ ꓪꓴꓸ ꓠꓬꓲ ꓥ ꓡꓳ= ꓚꓵꓹ ꓔꓶ ꓗꓷ ꓟ 3 ꓘꓳꓼ ꓙꓳ ꓡ ꓕꓯ ꓬꓲ ꓜꓲ ꓗꓪ ꓬꓲ ꓪꓰ ꓪꓰ ꓡꓺꓳ= ꓬꓲ ꓪꓰ ꓪꓰ ꓗꓷ ꓟ ꓦ ꓐ ꓕꓲ ꓟ ꓙꓳ ꓡ ꓕꓯ ꓬꓲ ꓪꓰ ꓗꓪ ꓐꓰ ꓬꓲ ꓢꓶꓽ ꓓꓱꓼ ꓪꓴꓸ ꓔꓴ ꓡˍ ꓡꓳ= ꓓꓱꓼ ꓡ ꓟ ꓬꓲ ꓢꓶꓽ ꓠꓬ ꓠꓲꓹ ꓛꓵꓼˍ ꓟ ꓗꓪ ꓐꓰ ꓫꓵꓽ ꓡ ꓕꓯ ꓬꓲ ꓢꓶꓽ ꓧꓼ ꓓ ꓡˍ ꓡꓳ= ꓬꓲ ꓢꓶꓽ ꓧꓼ ꓝꓲ ꓠꓬ 10 ꓦ ꓕꓯ ꓥ ꓡꓳ= ꓬꓲ ꓫꓵꓸ ꓐꓱ ꓶ ꓫ ꓠꓲꓹ ꓫꓵˍ ꓠꓬ ꓬꓲ ꓢꓶꓽ ꓔꓯ 11 ꓦ ꓕꓯ ꓶꓼ ꓫ ꓢꓲ ꓟꓶ ꓛ ꓛˍ ꓟ ꓗꓪ ꓡꓱꓸ ꓗꓷ ꓠꓯꓹ ꓡꓳ= ꓙꓴꓺ ꓡꓰ ꓕꓯ ꓢꓲꓸ ꓡꓰꓽ ꓬꓲ ꓫꓵꓸ ꓒꓬꓱꓼ ꓡˍ ꓟ ꓥꓳ=

ꓛꓽ ꓗꓳꓼ (ꓛꓳꓽ ꓗꓳꓼ) ꓠꓬ ꓛꓱꓼ ꓡꓱꓼ ꓢꓶꓽˍ ꓡꓰ ꓐꓰ ꓬꓲ ꓑꓴ ꓡꓴ ꓓꓱꓼˍ ꓟ ꓥ ꓢꓲ꓾ ꓧꓼ ꓫˍ ꓕꓯˍ ꓟꓲ ꓬꓲ ꓑꓴ ꓡꓴ ꓧꓼ ꓠ ꓗˍ ꓟ ꓥ ꓡꓳ= ꓧꓼ ꓓꓳ ꓡꓰ ꓕꓯ ꓬꓲ ꓢꓶꓽ ꓔꓯ ꓕꓲ ꓢꓶꓽ ꓕꓲ ꓢꓶꓽ ꓧꓼ ꓗꓷ ꓢꓲ ꓬꓲ ꓙꓴꓺ ꓡꓱꓸ ꓖꓶ ꓠ ꓔ ꓥ=

ꓕꓲ ꓧꓪꓹ ꓔꓶ ꓔ ꓠꓬ 3 ꓘꓳꓼ ꓕꓯ ꓬꓲ ꓢꓶꓽ ꓓꓱꓼ ꓪꓴꓸ ꓔꓴˍ ꓟ ꓥ ꓢꓲ꓾ ꓬꓲ ꓢꓶꓽ ꓓꓱꓼ ꓪꓴꓸ ꓔꓴˍ ꓟ ꓗꓪ ꓐꓰ ꓝꓮꓲ 4 ꓘꓳꓼ ꓗꓪ ꓛꓲ ꓬꓲ ꓢꓶꓽ ꓮ ꓟꓬꓹ ꓓꓱꓼˍ ꓟ ꓥ ꓡꓳ= 4 ꓘꓳꓼ ꓛꓲ ꓬꓲ ꓢꓶꓽ ꓓꓱꓼ ꓗꓷ ꓗ ꓠꓯꓸ ꓠꓬ ꓬꓲ ꓜꓲ ꓟꓳꓽ ꓡꓰ ꓢꓲ ꓬꓲ ꓢꓶꓽ ꓮ ꓟꓬꓹ ꓟꓽ ꓓꓱꓼ ꓡ= ꓕꓲ ꓘꓳꓼ ꓡꓰ ꓕꓲ ꓘꓳꓼ ꓬꓲ ꓜꓲ ꓬꓲ ꓑꓳ ꓗꓪ ꓬꓲ ꓡꓯꓸ ꓜꓲ ꓣꓱꓻ ꓡˍ ꓟ ꓪꓴꓸ ꓠꓬꓲ ꓬꓲ ꓢꓶꓽ ꓧꓼ ꓓꓳ ꓡꓰ ꓠꓬ ꓬꓲ ꓟꓳꓽ ꓜꓲ ꓔꓯ ꓓꓶ ꓦ ꓠ ꓔ ꓡꓳ=

ꓬꓲ ꓜꓲ ꓕꓲ ꓜꓲ ꓠꓬ 5' ꓗꓪ ꓐꓰ 10' ꓛꓲ ꓟꓴˍ ꓟ ꓥ ꓢꓲ꓾ ꓬꓲ ꓒꓬꓽ ꓠꓬ 2' ꓛꓲ ꓫꓵˍ ꓟ ꓥ ꓡꓳ= ꓮ ꓟꓬꓹ ꓘꓳꓼ ꓔꓶ ꓔ ꓓˍ ꓟ ꓬꓲ ꓜꓲ ꓝꓳꓽ ꓥ ꓟ ꓪꓴꓸ ꓠꓬꓲ 10 ꓘꓳꓼ ꓟꓽ ꓞꓲꓺ ꓢꓯꓸ ꓓꓹ ꓡꓳ=

Add new comment

10 + 10 =